熱門文章

2010年2月26日 星期五

頂你個肺我都冇諗過開罐午餐肉
可以講咁死多粗口開得咁metal

年初四晚八三三上 漢 屋企打邊爐,臨收檔提過下今個星期五晚一齊去睇《錦衣衛》,點知在場各位得我一個認真,另外兩個完全冇左件事無聲無息放飛機,結果今晚返到屋企又要自己搞掂。前晚俾麥記所謂「買一送一」昆過一次,唔甘心再俾佢呃,今晚決定自己整。點知仲衰。

通常自己屋企整野食,假如雪櫃冇微波爐叮叮(我是波仔hardcore fans,波仔d即食飯盒比你想像中好食同飽),來來去去得一味營多撈麵,兩年前美食節掃貨加街價同樣是個半一包,事隔兩年已經加左差唔多25%價就黎見兩蚊喇,但一餐整兩個仍然四蚊有找仲平過食公仔麵。嫌悶咪加多罐午餐肉囉。不過而家午餐肉都算奢侈品喇,又回到兩年我屋企果頭賣五六蚊罐咋,而家同一罐肥豬仔細罐裝平極都十一二啦,所以通常等減價有十蚊以下時掃貨,之前公司果頭正呀天壇牌細罐$9.8食得好開心,可惜冇晒貨了,今餐想加送,唯有去屋企對面間屋村辦館,要成十一蚊,想食冇計唯有科水。

呢間辦館我從來唔多鍾意,因為個老闆娘永遠口黑面黑當你俾錢佢老馮噉,同埋叫做辦館但超過一半野貴過大超市,老實講唔係佔地利開正屋村地下近過人地超市便利店同夜收,都唔知佢點樣做得住,而我就算貴仲會幫襯而唔走去其他舖,就腳之外仲本著一分寧益小機構莫益大財團的支持underground精神(唔使再笑喇我都知呢樣野非常戇居俾人笑足咁多年喇已經)。唔妥間野除左老闆娘仲有前科,我都算經常幫襯佢買午餐肉,之前試過兩次買到返屋企開唔到捲捲下扭斷左,第一次符碌用罐頭刀搞番掂,第二次連罐頭刀都玩到崩埋,最後你估都估唔到,摷左把電線鉗,沿住扭斷個位一路剪剪開個罐,食完冇肚痛都幾好野(定好彩?)。今舖仲激。插條匙落去扭個位扭唔郁,試左兩個字,大力得滯直頭扭斷埋個頭,扭到中間斷都叫做可以翻炒電線鉗怒剪條橋。上次整崩左屋企把罐頭刀又唔記得左買番把新,夾硬黎撬左幾野,撬到個罐都變晒形,先篤得穿個罐少少。最後只有出絕招。












「頂佢鹵味。我冇幾可試過一次講咁多粗口。」


「此情此景,直頭可以用黎做death metal碟artwork。」



開佢唔到棄之可惜加上等緊開飯,將屋企全部工具抬晒出黎務必開到佢為止,乜叉方法都試晒連鋸都出埋,亦考慮過放入膠袋一鎚打爆個罐噴晒d肉出黎算數(十足落街市買免治牛肉噉款)。最後罐頭刀鑿到幾個窿,搵鎚仔加螺絲批打多幾個大窿出黎,再用大鉗細鉗又剪又撬又拉罐中間自己開左個蓋,破肚穿腸式用筷子一劈劈午餐肉蓉撩出黎十分Cannibal Corpse,平時會切粒撈麵食,而家連個工序都慳埋。