熱門文章

2014年2月26日 星期三

所以我會選擇支持《中國音超》的謝安琪,而不是《我是歌手》鄧紫棋




http://youtu.be/D2MvGtwXeck


大陸今期流行三個歌唱比賽,最想睇其實係《中國好歌曲》,但見個名你都知道呢個可能係大陸電視史最有意思嘅音樂比賽節目,香港傳媒一定唔會宣傳、普羅香港人一定唔會留意。其他兩個人人都係追《我是歌手》,我較鍾意《中國音超》,唔係單純因為謝安琪,G.E.M.我都like,不過佢參加個比賽已經演變成純技術比試大家只係鬥嗌,雖然我都受聽咗咁多年metal反而覺得唔鳩叫唔多似唱歌添啦,同其實我好鍾意G.E.M.版《喜歡你》架,但係見而家網上面似乎一面倒「識聽歌一定屌G.E.M.淨係識鳩嗌」,我就唔好意思出聲話俾大家聽我鍾意佢喺《我是歌手》唱嗰幾首歌,廢事俾人笑我膚淺啦。

另一個原因係,大家心態真係太唔同,G.E.M.你點睇都覺得只為要贏,但謝安琪完全相反。佢做咗兩樣嘢,令我對佢再加好感:一來梗係香港人返大陸參加比賽,第一場就唱廣東歌表明身份同態度,去人哋主場仲玩到咁大,同搵自己前途較飛搏第一round就比人飛出局一樣冇咩分別,當然寸得起先可以噉玩法。

然後唱咗首本名曲《The One & Only》,你會話有咩出奇,但其實睇返各大歌唱比賽就知真係好出奇,直到今時今日即使超級出名歌手參加歌唱比賽,都冇幾多個會揀唱自己歌,諗深一層其實好諷刺,就當你真係好有料,點解要靠其他人啲金曲用或者較易拎到高分嘅「另一面的我」表演,而唔會好有信心噉憑自己把聲唱返自己嘅歌去贏?G.E.M.本身大把旋律技術兼備好歌,希望佢之後會有一場唱《睡公主》呢首代表作,雖然冇咩期望因為佢參賽有點過份計算唔似會肯行呢步,同老實,咁多年嚟我未聽過佢有一次live唱《睡公主》係唱得好...

謝安琪參賽再加好睇,係睇得人好舒服。睇佢談吐舉止,悠然自得唔志在點樣同你鬥,但其中又抱住一份堅持,雖然論唱而家把聲開始沉,好在技巧同感情比以前成熟(不過咬字有點太用力英文口音亦好硬),只係狀態始終唔算上盛依舊好聽但每場總有失誤,只係睇到佢唱完《The One & Only》份神情,所表達係有時一個歌手上台唔係為贏 - 不論係贏其他人還是贏自己 - 而只為可以唱到想唱嘅歌。呢一點,G.E.M.應該仲要磨練好漫長歲月之後,先有機會領悟得到。

2014年2月24日 星期一

Metalvolent Returns:點解今晚唔係叫做「Hermetic Silence Returns」?




其實Metalvolent Returns呢場show不如改名叫Hermetic Silence Returns,甚至直頭叫Hermetic Silence & Friends算啦,除咗Evocation另外三隊都同HS有關係,點睇都熟口熟面。Dismembered歌佬 a.k.a. Hermetic Silence歌佬話本地band唔及外國樂隊咁有號召力,所以搞show好難經營。不過我觀點相反,睇返近年情況,而家香港(extreme) metal band自己幾隊圍埋開場show同搞release party幾乎係票房保證,我諗佢應該唔知道之前一晚韓國thrash metal band Diablo出同一個場,全晚觀眾加埋,都唔夠佢講呢番說話時佢前面第一排咁多人...

其實今場已經有現成大大個marketing gimmick,好似當年怒人出碟時話過夠多人睇佢場show就剝光豬插水,最後真係賣到爆場除晒插咗,如果今次照辦煮碗話賣飛賣到一定數量Hermetic Silence就會歷史性重組jam返幾首歌,要觀眾人數有今晚x2甚至更多,其實唔難。(又其實,見到show名有Returns呢個字,我初頭真係以為會有「神秘嘉賓」出場架...)

人人都講嘅我唔再多講,所以只講Synergy。首首歌都要五六七分鐘係好牙煙嘅事,一來要長得嚟一直好聽唔悶難度非常高,二來香港人出名冇乜耐性,live仲玩長歌即係趕客玩自己嗟。舊歌聽多幾次慢慢聽得出部份編曲唔太夠順,新歌則越寫越成熟,完場首新歌應該嚇親人根本就係Opeth嚟,掌握到技術同概念係好事,但而家問題反而係有陣時太過唔似自己,嚟緊寫歌應該要搵返Synergy種感覺唔好太過Opeth。(雖然歌寫得好的話,繼續似落去我都唔拘,哈)

「話時話,相張咩料?」

「古有閃靈現場灑溪錢,今有招魂出show派吉儀。我都想同Synergy靚歌妹影幾張相益吓大家架,不過你知啦劉Sir毒撚嚟架嘛邊敢影呀,搵張吉儀頂住檔算啦。」

2014年2月23日 星期日

Korean Metal: Diablo Live in Hong Kong:勁好睇,但點解勁少人睇?




得罪講句,我覺得Diablo好睇過Havok,你可以話因為Havok一路向下,頭兩隻碟真係超正,但跟住越玩越冇力,上年隻《Unnatural Selection》聽到差唔多瞓著。相反Diablo優勢在於indie,始終亞洲樂隊地域限制,要達到同樣成就級數、要搵到外國同規模廠牌簽約支援,就算去到好出名時都其實好難,所以能夠鍾意點玩就點玩冇乜包袱。好似你問我Diablo其實玩咩我都答唔到你,呢一首Machine Head,下一首變成Slipknot,跟住thrash到Sepultura咁恆,最後播個drum loop intro加個dubstep backtrack玩到成隊Static-X噉款完場,擺明隊band前期後期兩個樣,但pop得嚟唔會放棄技術,結他佬有齊'80 metal solo加'90 metal玩聲玩effect奇技,成隊band台上非常活躍絕無欺場。

而我覺得佢哋呢晚做得最好,係示範咗gig同演唱會有咩唔同,雖然多數人會認為兩者冇分別,但實際上演唱會比gig規模更大更深化,唔只為上台唱幾首歌吹幾輪水就完而有一定主題性,會講流程講舖排會醞釀,Diablo做到就係令你覺得每首歌/每個演出段落之間都有一定關連或過渡,全晚係睇一個完整event而唔係精選碟live版咁小事。早前講到BabyMetal成功之道正是以流行音樂宏觀計劃經營偏向集中特定目標聽眾之metal,唔知Diablo係咪都有借鏡K-Pop做法,呢晚演出我睇得出好多香港樂隊一直忽略之成功/進步要素。

Diablo絕對好睇非常精彩更是抵睇,但講到咁好都冇用,可能個期真係唔好,好多人只留意星期日一晚四隊香港band,反而之前一晚有隊韓國metal band同一個場開show,似乎冇乜人知道或關心,台下景況真係...兩隻手都數唔晒嘅,但加埋兩隻腳就...我唔知最後冇encore係本身根本冇還是因為觀眾人數遠不及理想(好耐未試過九點幾開場/「準時開」都可以十一點前返得屋企),但當只得咁少人捧場隊band都可以表演得咁落力,就更加值得被人尊重。當然我亦不幸見過比呢晚更惡劣嘅情況,只有話當香港老細們咁揀擇的時候,台上全晚表演人數總和大唔過台下全晚觀眾人數總和的話,搞手已經可以當贏咗。

因為仲有一場Metalvolent Creation,Diablo寫住咁多先。補多兩個p.s.啦:

P.S.:G.E.M.出戰《我是歌手》,演出中段耳筒冇聲要求重唱,引發「出現技術問題時,歌手應否繼續演唱」之爭議。而今晚值得討論議題,係當表演中段樂手發現器材失聲再搶修無效,係咪應該照樣繼續演奏,即使只係扮彈?

P.P.S.:我諗今晚最過癮係完場有個嚟香港玩嘅上海靚女搭訕,臨走一晚特登上嚟HA睇表演,過癮在佢係連兩隊band叫咩名咩地方嚟都唔知,「那為甚麼會來看?」「在網頁見到這段時間看得到的只得這一場是metal,就來看了。」一問一答,我已經可以666%肯定地話你聽,呢個一定係好女仔嚟。睇睇呢位連band名都唔知,見係玩metal就嚟捧場的上海妹妹。再回頭看看揀擇的香港老細們。搞到突然間好想去上海。可惜個靚女聽日返上海,傾咗幾句就趕住走,而我只是一條得撚樣書的柒頭,睇嚟下次去HA睇metal show之前,要微信微博QQ乜Q都裝晒落部電話度先得。

每週一相片大行動 2014 Week 9:好感動,終於可以香港開電視睇到BabyMetal




除非會再上《Music Station》,如果唔係今次會係第一次同唯一一次香港電視機睇得到BabyMetal,雖然台上面有晒骨頭人同日本鬼新舊兩隊band好大排場,但首《打咩打咩》似播帶仲濃縮到得返一半,不過已經非常好睇,即係其他人包括紅爆AKB48表演時得音樂同歌手聲,只覺得好似拍緊MV,但到BabyMetal玩先發現原來個場有觀眾,成班人(其實係毒撚...)衝晒台一齊唱一齊跳好鬼癲。所以話BabyMetal真係好睇架,可以咁成功,因為pop有資本但唔夠內容,metal有內容但唔夠資本,間label非常醒地將兩者之長合為一,抵佢發達,同都想問好耐,點解一直冇人噉做?

越睇越想睇,年初三晚crossover閃靈要返工迫住退晒機票酒店冇得睇,跟住個禮拜六日三月一同二仲要去到東京武道館連開兩場加每晚一個主題,不過更加冇可能去到啦。唯有望望今年Summer Sonic同Loud Park有冇計。

2014年2月22日 星期六

從王菀之新歌《天堂有路》,回頭看被遺忘的丁氏姊妹




http://youtu.be/OvYSqSGXIO4


王菀之雖然討厭政治,但以歌論歌,佢的確係而家香港非常難搵實力風格兼具之唱作人,雖然某程度上「而家香港」呢一點是成功一大原因。新歌《天堂有路》好聽,但聽完只諗返起丁菲飛,其實走同一ethnic fusion路線者,丁氏姊妹早十年已經玩到登峰造極,可惜時也命也,當年丁菲飛音樂風格同唱歌聲線俾人勁笑勁小,如果佢係遲十年或者半個十年,到而家較成熟較開放(只係「較」)市道先出道,分分鐘係佢紅而唔係王菀之。


當十年後/遲足十年的今日,大家可以為一個本土歌手(終於)寫同唱出一首朱哲琴風格流行曲喝采,可想而知香港人音樂認知發展係幾慢。


拾遺珠:丁菲飛《樂源》

http://lausirisual.blogspot.hk/2010/04/blog-post.html



淺談丁菲飛《樂源》

http://lausirisual.blogspot.hk/2003/11/blog-post.html


2014年2月21日 星期五

千呼萬喚,亞視終於肯重播《我和殭屍有個約會》

http://youtu.be/KYg7Rz5E2Zg


千呼萬喚,亞視終於肯重播《我和殭屍有個約會》,仲要特登整咁大條預告片宣傳,雖然內容相當九唔搭八,但而家亞視好難得有自家製作水準叫見得人架喇,即使只是一條trailer。第一次睇以為會有第四輯,不過當然冇可能啦,其實可以remaster頭三輯已經好好,但當然,又係冇可能啦。

2014年2月20日 星期四

我好鍾意《Revolution 末日重生》第一季結局

唔覺唔覺又追晒一套,今晚明珠台十點半播《Revolution》大結局,套劇比我想像中更加唔錯。故事講全世界突然間冇晒電力,延伸到人文生活同社會政治轉變,當然唔少得美劇典型大主線陰謀論,而且新派美劇作風死人唔使本,每隔幾集就會有一個一線尾二線頭大角色死,夾埋夠爽夠緊湊,最重要有J.J. Abrams做監製就真係品質保證。

以美劇講都算落本,前半成日跑馬打鬥、火車輪船堡壘大爆炸,後段開始有返電力差唔多集集都有坦克戰機直昇機仲應該有唔少係真嘢嚟,同埋講過好多好多次,《Revolution》係我睇過打戲武指同攝影水準數一數二高嘅美劇,而且殺人手法夠br00tal,有時你都要問問以無記戇鳩尺度計算,點解居然可以唔剪就出到街?而且個結尾相當一流,當你可以重新開動全世界已經停頓好多年嘅所有電器,你會唔會做,同成功之後第一件會做嘅事係乜?全套劇最後三個字轉折同劇力,簡直贏過近幾年唔少大電影,而且個大結局玩到幾大,加上「全世界大停電」主題已經結束,更加期待下一季可以點樣發展。

要講其實仲可以講好多,好似又要百屌主角個女簡直比港女更港女,90%集數都係因為佢無端端發神經唔跟大隊行事自把自為累人累物,就算世界末日當前都要全世界人就佢一個,要大家做晒佢想做嘅嘢先至再去制止世界末日,簡直睇到你想兜巴兜巴車埋去。不過唔講喇,仲有半個鐘Dead Trigger 2 Facebook版就正式公開(又會咁益我哋香港fans啱啱好香港00:00開始咁正?),睇完《Revolution》大結局再打多鑊飛機,就差唔多時間打喪屍喇。

2014年2月19日 星期三

[Kowloon Metal City: Fun Fact] 準備好迎接最metal的世界末日、今個星期六的「諸神的黃昏」嗎?




http://youtu.be/KwdcFVsmYtU


今個星期六就是維京傳說中的世界末日「諸神的黃昏」,地球將會進入永遠的冬季,人類互相殺戮,神魔大戰,一切回到黑暗虛空。你會如何迎接這最metal的世界末日?

Prepare yourself mortal, for this Saturday is the day of Ragnarök, "The Twilight of the Gods". From this day earth enters an eternal winter, with massacre and genocides spreading across the land. Then comes the battle of the pantheons, and ongoing war lasts until nothing but darkness and void is the only thing left in the the world as we know it.

So, how will you embrace this impending apocalypse?

2014年2月18日 星期二

《華爾街狼人》真不錯,星影匯都係(雖然九展開戲院就真係好on9)




http://youtu.be/A-y1N29vH2Y


九展開左間新戲院益晒我,六點鐘九展做完野,行返公司時見到搭九上《華爾街之狼》,上到公司拿拿聲執手尾走人,搭五閃,行到去入七仔買埋野食先至買飛,都仲趕得切開場半個字前坐低。呢個場確係爽,地方勁大勁好坐,又畫面音響都靚,而且幾時買飛都一定大把靚位你揀,梗係啦,呢個位置邊有人黎睇戲架?睇我連晚飯都要食七仔執兩個包加包?飲就當一餐根本冇得揀,就知係九展開戲院/黎九展睇戲有幾戇居啦。

好在套戲,同間戲院一樣咁正。

2014年2月13日 星期四

而家香港地想搵返平靚正晏仔都咁難

過完年就加價,已成食肆慣例。返工經過麥當勞,想買個早餐,嘩居然加咗一蚊,就係唔益你返公司嗰頭食茶記,點知仲大鑊全日乜都貴咗兩蚊,就快齋食個碟頭飯加杯嘢飲都要四條埋單。睇嚟第時只可以下午茶時間先至落樓食飯。

2014年2月10日 星期一

每週一相片大行動 2014 Week 7:這,才是真香港人的生活。




今日葵涌個倉開完工,夜晚要出深水埗買parts,大安旨意出嚟行街掃貨。與其去朗豪坊同班「新香港人」爭食$40一碗魚蛋再行我哋根本買唔起嘅名店,倒不如出嚟深水埗,先去福仁個個禮拜唔同款檔散貨場幾蚊一件又實用掃一堆返屋企,買唔夠行埋鴨寮街囉,買落啲貨使咗錢又用得著好開心。跟住龍津食魚蛋,都係一碗但七蚊咋喎,而且我覺得好食過朗豪坊囉,唔夠加多底雞蛋仔又七蚊都仲平過人。仲未夠喜喜喜喜整多兩串雞軟骨然後合益泰$6四條勁滑坑渠腸粉,走去搭車返屋企經過點可以唔順便整多份新香園蛋牛治呀。

這,才是真香港人的生活。

2014年2月9日 星期日

東京大雪

做IT有樣好,就係可以衝出香港,好似我公司有個客喺日本開舖,近排個系統有事,琴日同佢傾咗大半日電話(係,做IT有樣唔好,就係點止on call 36小時,根本每個禮拜都係返足七日工每日廿四個鐘),晏晝傾傾吓突然間成間公司尖叫,「下雪了!」隔一陣再打已經搵唔到人,原來係十年一遇大風雪,睇嚟勁到要立即收舖避難,好似好大鑊。搞到好羨慕添,話晒今年冇得去歐洲避年睇唔到雪景。

但又唔係冇機會,聽老細講個客諗住日本嗰邊擴充,真係搞得成,可能要搵個人飛去日本駐場一年。當我第一次知道有機會去東京返工的時候,其實我是拒絕的!因為我覺得,

「老細,今年Summer Sonic lineup唔多掂喎,Loud Park又唔知點噉...」

2014年2月8日 星期六

[Kowloon Metal City: Review] 香港black metal樂隊Aum首張EP《Of Pestilence》登上英國網站The Heavy Metal Saloon


Aum: Of Pestilence@The Heavy Metal Saloon

http://baileysmmcreamy.blogspot.hk/2014/02/aum-of-pestilence.html


不知多少人還記得四年前有一支發過一張同名EP的thrash metal樂隊Aortic Regurgitation,EP甫推出樂隊即解散,或說改組,以Aum之名改走black metal路線繼續上路,而Aum的首張EP《Of Pestilence》,近日獲英國網站The Heavy Metal Saloon評論。

between,仍不知道誰是Aortic Regurgitation,可參考此精讀:


《淺談香港二人thrash metal樂隊
Aortic Regurgitation首張同名EP》


http://lausirisual.blogspot.hk/2010/10/kowloon-metal-city-review-female.html


Aum, a black side project by members of Hong Kong thrash metal band Aortic Regurgitation, just got their debut EP "Of Pestilence" reviewed on the UK metal blog The Heavy Metal Saloon.

In case you missed the great Aortic Regurgitation, here a review of their only EP "Aortic Regurgitation" (but in Chinese only):


[Kowloon Metal City: Review] Female-Fronted Hong Kong
Thrash Metal Duo's Debut EP "Aortic Regurgitation" (2010)


http://lausirisual.blogspot.hk/2010/10/kowloon-metal-city-review-female.html

每週一相片大行動 2014 Week 6:唔該唔該唔該唔該唔該唔該唔該咖哩豬扒飯唔該




跟緊個客新年喺大角咀開咗新場,我就梗係開心啦,呢頭多嘢食又好食又唔算貴嘛,而家去咗其他區返工,嘢食少咗好多選擇之餘話咁易四十蚊先食到一餐,所以呢幾個星期可以重臨舊地,每日放lunch寧舍愉快。

雖然舊區舊樓都慢慢變成一幢幢豪宅,暫時都仲有唔少平靚正嘢食,好似發現到有間日式咖哩飯,賣晒廣告話「講一句唔該平五蚊」,立即入去坐低「唔該唔該唔該唔該唔該唔該唔該咖哩豬扒飯唔該」,食到飽仲有得加多杯凍華田,食完唔使俾錢仲找咗幾蚊俾我當利是傍身添。

2014年2月7日 星期五

[Kowloon Metal City: Fun Fact] 繼大阪Slayer咖哩屋,各位Slayer fans又多了一個朝聖景點


Traffic Circle In Poland Named After Late SLAYER Guitarist JEFF HANNEMAN@Blabbermouth


http://www.blabbermouth.net/news/traffic-circle-in-poland-named-after-late-slayer-guitarist-jeff-hanneman/


借問金屬天堂何處去?潮童左手指北歐,右手指東歐。在波蘭這帶給我們Vader和Behemoth的保守小國,一家設計公司投得了一個汽車迴旋處的冠名權,結果在2014年,這條馬路多了一個circle pit,向上年離世的Slayer結他手致敬的Jeff Hanneman's Circle Pit。

今年多了一個到東歐旅行的理由。

We all know Scandinavia is the Heavy Metal Heaven on earth. If it's too far or costly for you to go, Eastern Europe is another eden for metalhead. And it just turns better: a design company outbids others the rights to endow a traffic circle for a year in Poland, the conservative country that gives us Vader and Behemoth. They then take this chance to honour the legendary guitar from Slayer that passed away last year, and baptise this circle Jeff Hanneman's Circle Pit.

Sounds like one more reason to plan a trip to Eastern Europe this year.

2014年2月6日 星期四

[Kowloon Metal City: Video] 為了賺(更多)美金,你可以去到幾盡?




http://youtu.be/duIaFMZL22I


為了賺(更多)美金,你可以去到幾盡?荷蘭交響金屬樂隊Within Temptation早就為進入美國市場,將自己由歐洲一線gothic metal樂隊降格為Evanescence複製品,相信覺得還是賺得不夠多,新專輯《Hydra》曲風依舊難說gothic稱alternative metal更恰當,四位客串歌手中居然有三位來自美國樂隊,號稱「網羅不同歌唱風格」,實則經過充份計算,三人三種出身,得以瞄準所有潛在市場一網打盡,所以會出現美國hip-hop歌手Xzibit出現在歐洲「gothic metal」樂隊歌曲中的異相,正式成為Evanescence第二了。記得德國「pop death metal」Deadlock已有試過美rap加歐金惹來全面劣評,當有前車可鑑的時候仍義無反顧,相信WT早就不再關心舊歌迷的感受了。Go west才是王道。

(雖然除了《And We Run》這首不妥,《Hydra》其實不太差,已是她們這十幾年來最好的專輯了...)

How far will you go for earning as much US dollars as you can? The Dutch "once-gothic-now-alternative" symphonic metal band Within Temptation had earned their fame in the States long ago, by degrading themselves from a top-class European gothic metal act to an Evanescence clone. Surely nobody hates some more bucks, so in their newest release "Hydra" three out of four of the guest vocalist are from US bands with different styles/backgrounds. "For diversity", they claimed. But more obvious a very clever marketing scheme to target all new potential markets at once. So here we have this "innovative" collaboration between an European symphonic metal and an US rapper. In fact we had Deadlock, a German "pop death metal" band, did something alike years back, which received overwhelmingly bad comments. Looks like somebody here do not learn the lesson. But who cares, just go west like Pet Shop Boys sings, where all the money is.

(Despite this hideous attempt to mix US rap with EU metal (and failed), "Hydra" actually is already their best effort in a decade...)

2014年2月5日 星期三

睇台灣婆媽劇的理由(和大陸婆媽劇咁死廢的理由)

睇J2七點半檔,就睇得出大陸劇同台灣劇差距有幾大。終於知道上一輪播嗰套叫《愛的蜜方》,初時以為台劇,因為畫面拍到有幾靚得靚加同樣婆媽到爆炸,到見到簡體字先知咩地方出產,但劇情以婆媽劇嚟講都好廢,老母有睇所以望過幾集,不離男女主角行埋一齊,幾集之後硬係有啲事分開,再過幾集又行返埋,然後大病絕症乜乜乜,同埋衰人一係會變返好仲要成班好人肯原諒佢接納佢圓過大團圓,唔變好就天網恢恢繩之於法,咁政治正確仲係粵語長片年代咩而家,柒到乜柒垃圾都睇嘅我老母都頂唔順,追到咁上下睇返《愛.回家》算。

而家新播套《幸福選擇題》終於好睇返,台灣出到國嚟到香港啲戲級數就係唔同,都係老土失憶橋段都係婆媽,但就係唔會咁惡頂咁悶,真係唔知點解大家拍同一樣嘢,大陸永遠擺脫唔到一份娘味土味。同最重要係,台妹真係好正嘛,我認好多時我唔睇都會留意台劇,囡囡一個原因已經大晒,《幸福選擇題》王心凌真係嗚呀~睇返套《愛的蜜方》,大陸拍但要搵個韓星做女主角,就係佢哋自己都明白大陸妹呢樣嘢,無論點包裝,始終都係娘囉。

所以最無敵嗰套台劇,係《兩個爸爸》。你要睇戲,演員真係識做戲;要笑,對白同笑位度得好,我唔多鍾意睇細路,都覺得入面班細路做戲好正好笑;要劇情,唔係一味講媾仔媾女,婆媽得嚟好多角色同支線帶到戲味出嚟,難怪可以拍幾十集睇足年幾;最重要當然係女啦,一個周曉涵已經嗚呀~想知有幾無敵?我老母而家夜晚電視睇緊《幸福選擇題》時,會同時拎住部iPad睇返《兩個爸爸》,而且應該係第三次翻睇。搞到我都想睇埋一份。

(between,而家無記八點半嗰套,香港劇主題曲居然唱國語我都算,嘩條女仲有冇可能可以唱得仲難聽過而家呢)

2014年2月3日 星期一

上年2013新年,亞視重播1989年煙花匯演。今年2014新年,到重播1990年煙花。照噉計,假設亞視唔會執柒咗,我地到2038年,先可以喺亞視睇到今年嘅煙花。




http://youtu.be/97XcTEWZOf8

呃利是原來有報應的

去到最後一日紅日年初四,終於有新年假放喇 - 其實老細話鍾意的話我咪照落場坐照claim OT囉,不過算啦俾自己放返日假啦,同我知道事呢家嘢呢就一定會出嘅。調咗去跟其他客,好耐未去過屋企附近個場喇,反正都係行兩個字,晏晝食飯見無聊就順便過去探探人,同拜返個晏年(這才是重點)。呢個場有樣好,其他場兩三日唔埋總會出事call你搞搞佢,反而呢度咁多個月電腦都未出過問題,直到今日,逗完利是返到屋企,啱啱換完衫立即收到電話,部機出事急call幫拖。都唔知係呃利是有天譴,定我真係黑仔到去到邊就死到邊。

咁急call以為好大件事,點知要整返原來好簡單,開過部機就搞掂,結果行過去兩個字,reboot部機半個字,返返屋企兩個字,夾埋半個鐘都冇,都唔知問唔問老細claim OT好。

2014年2月2日 星期日

政府話:「馬路巴士少咗,交通就改善咗。」真係?我睇唔透。

無驚無險個場冇事發生夠鐘即閃(我講過!唔好再喺我面前提「而家呢個鐘數,BabyMetal同閃靈喺台北表演緊喎!」)。去食個雞記先返歸,好耐未試過旺角搭車返屋企,今日先達門口搭一轉至知道,而家個政府有一樣嘢永遠非常有效率,就係擾民。

有冇睇過近來電視成日播嗰個交通路線重組廣告?冇睇過唔緊要,簡單嚟講,個廣告話(亦即係政府話)方法就係減少巴士、巴士站同巴士線,踢晒啲人去搭地鐵。點解馬路少咗巴士,交通就自會有改善呢?搭地鐵的話,我當你唔會又係成日無端端出事跟住拍個「唔好意思囉」廣告就當冇事發生,真係次次準時日日唔會死火停電乜乜乜,但係,我住九龍城喎,冇地鐵搭喎,到頭來都係要轉車搭巴士先返到屋企喎。近幾個月發現平時搭開啲巴士線慢慢消失,好似今日唔搭一次都唔知四條線唔見咗一條,算好架喇九龍城出美孚兩條線縮到得返一條,試過走咗班車等足半個鐘先上到跟住嗰班。莫非噉樣反而係方便咗?

要噉做,除咗因為巴士公司政府冇份,而地鐵老細係香港政府自己之外,我睇唔透。

咪喺新年都要開工嘅我面前提起今晚台北BabyMetal X 閃靈單嘢!

邊個敢喺買晒機票訂晒酒店都要撻訂,年初三朝早八點幾就要出到個客個場開工嘅我面前提起

「喂今晚Babymetal去台北同閃靈一齊玩喎!」

我就祝佢今生今世冚家富貴。屌無赦。

2014年2月1日 星期六

每週一相片大行動 2014 Week 5:我的新年願望:家是香港




屋企條街,街頭橫巷巷頭有檔補鞋,細細個搬嚟已經喺度,好難得廿幾三十年都未執冇俾人趕,一來補鞋呢門手藝居然仲未失傳仲有得做,你知啦我哋細個就話買一對黑鞋著到爛咗穿咗就拎去補,修無可修先唔要嗟,而家代人覺得兩三個月食一次自助餐係基本架嘛,鞋未著舊已經要換啦,仲邊需要補鞋?二來係而家香港政府同業主邊容得下呢種街邊小檔,呢一代應該係最後一代有牌街邊檔,相信要多謝回歸前嘅香港政府,唔係佢哋某程度上通融,邊有可能仲搵到呢種後生做到老、做到病做到死先唔再服務街坊嘅街邊舖?我住緊條街,街頭係呢檔補鞋,中間後巷係擺塊鏡幾張凳加一疊公仔書再自己駁水駁電就做生意嘅上海飛髮佬,街尾係兩公婆報紙檔,上海師傅一早收山,報紙檔東主年事已高百病纏身三年前已經收檔,如果連呢檔補鞋個阿伯都唔做,我住緊呢條街就會冇晒兩個見證香港歷史發展嘅街坊老店。

正因地道香港歷史一點一滴消失,今個新年特別感觸。住新界嘅朋友體會最深啦,呢幾日大陸人返晒鄉下,交通立即暢順晒,條街當堂闊落晒,似返蝗禍前嘅香港。新年幾日放工返到屋企嗰頭,落車一路行,搵得到一個箱仔加張凳仔就街邊開檔嘅龍鬚糖、糖蔥餅小販,所以好開心,而家有時冬天落街見到有人推車賣炒粟子燴蕃薯,可以過去三四十蚊買返屋企慢慢嘆,已經非常開心,仲要真係好有緣先撞得到,而呢個農曆新年幾晚見到屋企呢頭街邊有人擺檔賣小食嘅光景,已經好耐未見過 - 「好耐」,係講緊兩個半一串十粒魚蛋、四個半一碗碗仔翅,個阿叔可以抬住大大樽石油氣燒住大大鑊滾油整鍋同蔥油餅炸油炸鬼臭豆腐嘅年代。簡單嚟講,係九七之前。

人人過台灣總會見識夜市,有幾多人過台灣會唔夜晚出去掃街?香港同台灣咁相似,又唔係冇地方冇文化,一模一樣搞返個夜市,對民生對旅遊業都只會利多於害,而且其實十幾二十年前我哋細個時,香港地好多地方已經有由小販同食檔聚集而成嘅夜市啦,而且做得有聲有色有特色添。噉點解而家唔搞呢?算啦,問准李嘉誠同領匯唔使你交租未呀?九七之後政府慢慢取締小販牌,以前可以靠一個牌一架車搵到食養全家嘅死一個少一個,背後原因,你明啦。同埋,新年流流政府先迫你講粗口,話原來各位地道香港人由細講到大嘅廣東話,並唔算係香港嘅語言。家都不是香港啦,仲搞夜市?