每週一相片大行動 2014 Week 47：成日都話，得文青者得天下

今朝要八點鐘上到APM個客度幫佢哋裝系統（講到好勁，其實係我同事裝嗟，我只負責過嚟坐扮到好多人嚟幫佢哋做嘢），早咗到揾嘢食，唔想又KFC，見電梯大堂隔籬就係Super Sandwiches就試試啦。就中伏了。

成世人第一次食SS，亦應該係最後一次食，餐牌影到份早餐好鬼歐陸好鬼靚，點知實物上檯嘩屌賣相茶記出品噉款完全唔對路，真係KFC份早餐睇落都仲高檔過佢。唔好睇都算問題係食亦唔特別好食，炒蛋是OK的但成份夾埋仍然好茶記，結果成個早餐最歐陸係隻碟，而如果唔係用呢隻碟而用返茶記KFC啲膠碟膠盒膠杯紙杯上，我唔講你都唔會食得出係「高檔」貨嚟。「高檔」我係指份量少過人但又賣貴人十幾蚊。

冇錯，Super Sandwiches可以賣得貴過茶記／雞記十幾蚊嘅原因，就係貴在隻碟。難怪文青生意做之不盡，只要稍為包裝一下，茶記都可以話自己係份子料理，仲要有人信有人肯俾錢至抵死。

每週一相片大行動 2014 Week 45：強烈支持愛字頭加藍絲帶罷買阿信屋

自從阿信屋開始辦埋雜貨，我冚家都去少咗超級市場，大佬三十幾蚊買到五斤米，平超市成半喎，你仲幫李日日賺？不過最正都係阿信屋成日入新貨，單想試晒佢賣啲麵其實已經好難。繼之前三個幾一包好好食仲煮到大大煲夠食幾餐嘅意粉，今期流行係呢隻韓國芝士味辣麵，$16一袋有四包，唔算貴不過亦唔算抵因為一包得百幾g（我一餐食兩包200g辛辣麵架），唯有噉諗：我出大角咀食芝士辛辣麵，雖然話俾成塊芝士你，但整完碗麵掟塊芝士上去噉就收我$2X，而家三份一價錢食到辣芝士公仔麵，OK啦。

同埋好食嘛。第一次買返屋企，老母話「整兩包今晚食啦！另外兩包聽日你拎返公司帶飯食。」跟住一人一包，食完之後向來唔多鍾意食麵特別即食麵的老母話「不如而家整埋另外兩包食埋佢囉！」結果嗰晚晚餐非常豐富，同俾我老母搞到第二日冇得帶飯返公司。自此每次經過阿信屋見到有貨都會掃返一兩袋返屋企，雖然賣呢隻麵最平其實係全家，即係之前搵到$4一罐Pokka咖啡間散貨場，正價已經$15仲平過759會員價半蚊，但係全家可能上位上得唔夠快俾阿信屋搶咗頭啖湯，而家除咗一早喺商場落腳啲主力舖，已經好難搵到了，屋企附近兩間都執咗好耐。係好灰架，而家唔搭車出去買，都唔知仲有邊度搵得到四蚊罐Pokka咖啡。（雖然最近去睇，好似已經加到五蚊罐了）

所以當早排各位愛字頭藍絲帶話罷買阿信屋，我不知幾開心，因為阿信屋真係唔愁唔夠客，就連完全唔睇好間九展分店，去過幾次lunch時間可以長期有近百人排隊條龍長到由舖頭排到舖尾，所以你班愛乜鳩咪Ｑ去阿信屋搶埋一份搞到我食唔到芝士麵呀。

每週一相片大行動 2014 Week 36：多謝阿信屋，令我可以用$5食到餐又飽又好味的意粉

阿信屋實在是我們窮撚的偉大救世主，唔係有佢，呢個時勢仲邊有可能$3X買到一包5kg越南米？去百佳惠康買五斤泰國米澳洲米的話價錢起碼兩三倍啦，隻越南米又唔係唔好食分別只係濕身少少，所以屋企附近開分店之後，我老母入糧貨寧願行多幾步路都唔幫襯百佳惠康。不過低處未算低，今期流行螺絲粉長通粉蜆殼粉400g通通$4.1一包，400g概念係夠煮四大碗，而且有會員卡七折三蚊一包，就算冇得平到盡街坊價都有八折先三個半（其實到而家我都未知幾時當我會員幾時當我街坊，是但啦八折都好平啦已經），然後落街市買$20免治牛肉，撈埋可以整到四兜免牛意，隻粉又要好食＆食得飽喎，自此老母成日叫我經過阿信屋就買幾包，我亦成世人第一次開始帶飯，因為當而家出街食飯四十蚊已經係基本消費時，廿幾蚊夠一家人食一餐、$5食得飽你，真係慳到好多。同埋真係好食嘛。

每週一相片大行動 2014 Week 32：我討厭政治，但係我真係好鍾意食8度海逸個自助餐同芒果拿破崙

我屋企有咩節日從來唔會喺正日搞活動，因為成家都最憎排隊最憎迫最憎無端白事俾人收貴，所以父親節隔咗咁耐，老豆終於話「咦！係時候食返餐好！」自從好多年前試過一次成家人去酒樓食飯，俾幾舊水嘢食唔掂服務又差仲要迫餐死之後，老豆次次叫成家食飯都去食自助餐，一來大家都鍾意食西餐多過中餐，同自助餐乜都有任揀又可以食到夠食到飽至收手，最重要陷家都鍾意食甜品所以每晚最後狂掃蛋糕同雪糕係大家最開心嘅時候，我屋企上次去茶樓飲茶係幾多年前我已經唔記得。

咁多年試過好多間酒店自助店，好平食過，好貴又食過，最出名都試過幾間，但係兜兜轉轉，最鍾意食嗰間反而係屋企樓下8度海逸。估唔到土瓜灣酒店收得尖沙咀價錢，就真係有大區酒店水準，我老豆好簡單只要海鮮夠多就好食就得，所以通常只有最貴幾間先滿足到佢，就算收到五六百都唔係間間海鮮佢會話好食，但係8度食過一次之後話一定要再食多次。我唔食海鮮所以去食自助餐多數頭兩round已經冇咩選擇，呢間係第一間我會食到飽都仲未試晒所有想食嘅嘢，食極都未食好鍾意的刨冰，因為有無限Haagen Daz，同埋個芒果拿破崙真係正到癲。

只可惜好事總是可一不可再。係咪已經俾近來連我屋企呢邊都開始出現嘅成千上萬架旅遊巴帶來班千千萬萬強國人攻陷咗呢，隔咗大半年嗟，個自助餐水準完全唔係同一回事，嘢食少咗，補得慢咗，同埋唔好食咗，除咗雪糕同芒果拿破崙仲keep到，之前土瓜灣食到尖沙咀級數自助餐仲要食到飽都未試晒全部嘢果份驚喜呢。我討厭政治，但係我真係好鍾意食8度海逸個自助餐同芒果拿破崙架。

（between，其實我到而家都唔知點解間酒店叫8度。點睇都係斜多過八度啦吓話。）

每週一相片大行動 2014 Week 29：即使調到去天涯海角做嘢，我仍然會掛住宏力個騎呢餐牌

我呢個位向來冇特定地點返工，剛剛個星期又調咗去尖沙咀坐Sony，梗係開心啦雖然尖咀食飯貴但選擇多又好食，今次只鋸咗個扒都未挑戰幾個月前已經話要試一試的24" pizza，不過無論去天涯還是海角，我都會好掛住公司樓下間宏力，因為香港茶記嚟講佢哋都堪稱fusion界代表，繼我的最愛粟米班腩炒河，最想試嗰味，其實係炒底燒味飯。要個柒寶飯多汁炒底吖唔該。

每週一相片大行動 2014 Week 27：維他最新隻紙包港式奶茶有幾好飲？見圖。講完。

又一間平價邊爐俾我食死咗，德星我會永遠懷念你的無限任食阿波羅雪糕

灰喎，屋企樓下間德星，之前話打邊爐金融海嘯價$90全包做到六月二號，其實真係好正架有阿波羅雪糕任食，點知六月三再行過，已經拉晒閘貼左張「內部裝修」。而眾所鳩知酒樓界行內術語，「裝修」90% =「執笠／走佬／換老闆」，而再開返一定唔會仲可以打邊壚一舊水有找到時連雪糕都可能冇，灰啦冇得再一打打噉狂食阿波羅喇。

每週一相片大行動 2014 Week 20：劉Sir的上班生活

每週一相片大行動 2014 Week 19：雀巢vs.四州．罐裝咖啡大戰

琴日提到經過紅磡探探屋企樓下搬過去檔士多，點知一早閂門，跟住發然對面佳寶都有好多寶物，我想搵返碧泉檸蜜。似乎個天都知我好想去，所以今日禮拜日都九點幾收到call叫我出紅磡開工，等我又可以順便過去望望，咁早唔會撞到唔開啦。之前只顧住買Pokka，今日先知原來四州都有出250ml細罐裝咖啡，而且平喎$15四罐即係四蚊罐唔使，不過同$4.5雀巢比唔太掂，可能原版Pokka重奶味甜味好汽水feel，細罐裝想似返咖啡，但我覺得陣味似奶茶多過咖啡而且沖到好鬼淡，雖然本身唔太鍾意飲雀巢，但四州細罐除價錢平一樣真係冇樣夠鬥。到頭來，$5一罐350ml Pokka始終是無能敵。

所以今日又掃一箱廿四罐Pokka返屋企，因為間士多開返唔夠一個月老細又話要搬喇，做埋下星期之後搬去邊未知道，但斷估唔會搬返去我屋企附近啦。所以雖然要抬三四個字返屋企＆350ml x 24真係好鬼死重，辛苦都要架喇，因為呢箱可能係最後一箱喇。

每週一相片大行動 2014 Week 18：我想飲碧泉檸蜜呀

半個月前屋企樓下間士多執笠，立即連掃兩箱Pokka咖啡返屋企，臨尾幾日老闆娘話會搬過紅磡有緣再會。今日見去寶石睇《蜘蛛俠2》（呢一集、呢個版真係點睇都十分emo），見順路就唔搭車行路返屋企，睇同老闆娘夠唔夠緣份，話咁快就搵到，見時候仲早就去食個飯先啦，食完返轉頭，

「七點咋喎，咁早就閂舖？嘩，使唔使呀？」

好在佢係搬去佳寶對面，就順便過去行行。其實第一次行佳寶，未行過都唔知原來真係咁多荀貨，細維他奶2.4一包真係冇得輸，不過好耐未買過包裝，因為買盒大盒一升先$7．．．咖啡只搵到$4.5一罐雀巢，不過最想掃其實係好耐未飲過加去士多都未必搵得到的碧泉、沙示，而家仲搵得到$3一罐汽水仲想點呀？（我仲想搵返碧泉檸蜜呀！最後一次飲好似已經係讀緊中學時，但而家仲回味無窮，仲有冇地方買得到呀？）

每週一相片大行動 2014 Week 17：黑椒漢堡的遠去，迎來了更久違的粟米批

今年嘅黑椒漢堡食得我好鬼開心，而呢兩個月尖沙咀中港城嗰頭返工次次食飯都要行兩三個字又貴到死，唔想行餐死仲要四五十蚊餐晏，最就腳加最經濟就只得樓下中港碼頭麥記。入到去立即屌晒鬼，因為我同同事都係超級黑椒漢堡fans，本來諗住挑戰連食兩個珍寶黑椒漢堡，點知嚟到至發現唔見咗變成唔知咩韓式飯，好在有個意外驚喜，就係失蹤多時嘅粟米批重現江湖。其實非常好食，最鍾意用嚟點薯條，隊條薯條入去撩幾撩再拎返出嚟食真係人間極品，就係唔知點仲難遇過二百年一遇大雨，今年居然有得食肯定仲癲過黑椒漢堡嗰陣，lunch食完買定個返上公司做下午茶，夜晚放工買返個返屋企做飯後甜品，九點半之前落多次樓買多幾個，食住睇「期待再期待」嘅《我和殭屍有個約會2》，睇完未夠咩唔緊要我屋企樓下間麥記開通宵，落樓整多個做宵夜囉。梗要食到咁癲啦，好似話做兩個星期咋，過咗五月頭又唔知要等多幾多年至有得再食架喇。

每週一相片大行動 2014 Week 12：真．黑椒漢堡大戰2014

2008．帝皇黑椒漢堡：《劉Sir個網七週年誌慶之黑椒漢堡s》
http://lau-sir.com/mcpeppers/mcpeppers.html
2011．黑椒珍堡：《從新黑椒漢堡看麥當奴與香港經濟之衰落》
http://lau- sir.com/one_week_one_photo/2011_week42.html
2012．珍寶黑椒漢堡：《真．黑椒漢堡大戰2012》
http://lau- sir.com/one_week_one_photo/2012_week45.html

說來慚愧，作為黑椒漢堡忠實fans，每年只得半個月有得食，所以每次到此神聖兩星期都會異常虔誠，買一個普通版加一個特別版合體自製帝皇版已成年度傳統，不 過咁大件事上年居然遺忘，因為有更具挑戰性的咖哩漢堡挑機。今年黑椒漢堡居然一反常態 ，唔係年中年底跟住將軍漢堡出，而會排年頭失驚無神檔期，今次終於唔會忽略冇唔記得喇，隔一年再次延續邊食黑椒漢堡邊睇香港經濟的年度活動。

我都冇諗過會噉講：麥記真係良心企業。以前細個成日食麥記因為平，當茶記十尾廿頭一個碟頭飯，麥記一個餐可以平多幾蚊，而當年的幾蚊購買力唔細，對零用 錢唔係多的小朋友黎講吸引力非常大，想儲錢買野食買野玩，就係靠每餐麥記慳埋幾蚊儲落去買架喇。跟住唔使講啦，大個之後麥記反而由窮人食府變成有錢人先食得 起，食個餐唔飽肚仲要貴過食茶記客飯傻的嗎，好在百屌成材大家最拮据時候肯出平包平餐，好多時出街唔捨得使錢就係靠佢，尤其而家出尖沙咀返工四五十蚊食餐飯 閒閒地，更加體會到五蚊蘋果批九蚊包同廿一蚊餐係幾咁珍貴。

而故事主角黑椒漢堡，隔一年之後，居然食到感動流淚，唔單止保持水準，今年所謂珍寶版終於唔再只俾多塊扒你就算，而真係加多一層有三塊包四塊扒，如此盛 況好耐未見過，更顯珍寶版著數得多，因為普通版幾年前縮到只得一塊扒之後就再冇加返，而2014珍寶版加多六蚊就有多一塊包三塊扒你喎，抵食幾多呀大佬。亦因為 今年俾足料，冇返三層都配唔上呢個稱號之帝皇版終於再度君臨天下，可惜夾埋只得五塊扒，比2008年初代少一塊，但係份量依然比2012多一倍，價錢先至$38.6只貴多 六毫子，同上年三扒珍寶版咖哩漢堡一樣。簡直係反通漲價錢。

今年個黑椒漢堡，居然食到我有點童年時感覺，會覺得真係好食得黎抵食、食完慳左幾蚊好開心。假如麥記肯將黑椒漢堡列入常規餐牌再整埋做$9包 － 單扒普通版 都好丫 － 就可以取代亞視成為香港良心了。

每週一相片大行動 2014 Week 8：今天的晏晝飯暨下午茶．粟米班腩炒河

每週一相片大行動 2014 Week 7：這，才是真香港人的生活。

今日葵涌個倉開完工，夜晚要出深水埗買parts，大安旨意出嚟行街掃貨。與其去朗豪坊同班「新香港人」爭食$40一碗魚蛋再行我哋根本買唔起嘅名店，倒不如出嚟深水埗，先去福仁個個禮拜唔同款檔散貨場幾蚊一件又實用掃一堆返屋企，買唔夠行埋鴨寮街囉，買落啲貨使咗錢又用得著好開心。跟住龍津食魚蛋，都係一碗但七蚊咋喎，而且我覺得好食過朗豪坊囉，唔夠加多底雞蛋仔又七蚊都仲平過人。仲未夠喜喜喜喜整多兩串雞軟骨然後合益泰$6四條勁滑坑渠腸粉，走去搭車返屋企經過點可以唔順便整多份新香園蛋牛治呀。

這，才是真香港人的生活。

每週一相片大行動 2014 Week 6：唔該唔該唔該唔該唔該唔該唔該咖哩豬扒飯唔該

跟緊個客新年喺大角咀開咗新場，我就梗係開心啦，呢頭多嘢食又好食又唔算貴嘛，而家去咗其他區返工，嘢食少咗好多選擇之餘話咁易四十蚊先食到一餐，所以呢幾個星期可以重臨舊地，每日放lunch寧舍愉快。

雖然舊區舊樓都慢慢變成一幢幢豪宅，暫時都仲有唔少平靚正嘢食，好似發現到有間日式咖哩飯，賣晒廣告話「講一句唔該平五蚊」，立即入去坐低「唔該唔該唔該唔該唔該唔該唔該咖哩豬扒飯唔該」，食到飽仲有得加多杯凍華田，食完唔使俾錢仲找咗幾蚊俾我當利是傍身添。

每週一相片大行動 2014 Week 3：真正的Golden炸雞，原來係KFC鹹蛋雞

雞記今期推黃金雞，即係「用黃金蝦煮法整炸雞」，即係乜嘢我都唔知，只知道我呢世人唔會食第二次䶢蛋味嘅炸雞。乜KFC已經食勻全世界冇貨到連䶢蛋雞都要出 咁技窮呢咩。

可能坐我隔籬個阿伯一早知道個黃金雞係大伏嚟，所以好鬼勁出面買個飯盒拎入嚟食，仲巴閉到特登攞咗個雞記托盤裝住食扮到好似真係KFC堂食正餐噉，好多人見 到都問：

「嘩KFC幾時賣埋叉雞飯架？」

一個更開心的聖誕大餐

份人一向冇乜節日氣息，不過見聖誕佳節，咪落街行行買買雜食。屋企附近開咗間阿信屋，幾個月都未幫襯過，見聖誕開一開齋，就發現好大鑊，我好鬼鍾意食Doritos，呢度有隻韓國版，一樣咁好食但係平起碼三分一，睇嚟聖誕之後好難唔肥返。唉安安份份做個毒撚匿埋屋企咪好囉，做乜咁身痕呢。





琴日老細去人哋度黐餐，食剩啲嘢見冇人要咁浪費，就擸晒返屋企先，順理成章成為毒撚的聖誕晚餐，大佬我咁懶仲要呢種時節，真係頹到營多都唔想落手煮啦。落阿信屋經過間餅舖見到有隻流心朱古力撻，雖然$6.5一個好在幾好食，同冇呃秤入面真係大大劈朱古力，次次食完都流到成隻手黑晒。如果入面係士多啤梨醬就正。





正當我自己食緊琴日公司冇人要堆立雜嘢當聖誕大餐，一面食一面唱「其實毒撚一個更開心」時，屋企對面住地下家人，請咗成棚人去唐樓後園空地開party食真正嘅聖誕大餐。都係閂埋窗繼續上ThisAV好過。

每週一相片大行動 2013 Week 46：繼九龍城廣場KFC，再次說再見，尖沙咀Burger King

繼上次九龍城廣場KFC，今次到尖沙咀Burger King，又係我撞到正last day黎到幫襯順便送行，多謝Gershwin 啦，唔係為左佢，我都唔會咁機緣巧合食到呢度最後的晚餐。雖然本身係諗住睇佢聽晚尾場。

頂你個肺我都冇諗過開罐午餐肉可以講咁死多粗口開得咁metal

年初四晚八三三上 漢 屋企打邊爐，臨收檔提過下今個星期五晚一齊去睇《錦衣衛》，點知在場各位得我一個認真，另外兩個完全冇左件事無聲無息放飛機，結果今晚返到屋企又要自己搞掂。前晚俾麥記所謂「買一送一」昆過一次，唔甘心再俾佢呃，今晚決定自己整。點知仲衰。

通常自己屋企整野食，假如雪櫃冇微波爐叮叮（我是波仔hardcore fans，波仔ｄ即食飯盒比你想像中好食同飽），來來去去得一味營多撈麵，兩年前美食節掃貨加街價同樣是個半一包，事隔兩年已經加左差唔多25%價就黎見兩蚊喇，但一餐整兩個仍然四蚊有找仲平過食公仔麵。嫌悶咪加多罐午餐肉囉。不過而家午餐肉都算奢侈品喇，又回到兩年我屋企果頭賣五六蚊罐咋，而家同一罐肥豬仔細罐裝平極都十一二啦，所以通常等減價有十蚊以下時掃貨，之前公司果頭正呀天壇牌細罐$9.8食得好開心，可惜冇晒貨了，今餐想加送，唯有去屋企對面間屋村辦館，要成十一蚊，想食冇計唯有科水。

呢間辦館我從來唔多鍾意，因為個老闆娘永遠口黑面黑當你俾錢佢老馮噉，同埋叫做辦館但超過一半野貴過大超市，老實講唔係佔地利開正屋村地下近過人地超市便利店同夜收，都唔知佢點樣做得住，而我就算貴仲會幫襯而唔走去其他舖，就腳之外仲本著一分寧益小機構莫益大財團的支持underground精神（唔使再笑喇我都知呢樣野非常戇居俾人笑足咁多年喇已經）。唔妥間野除左老闆娘仲有前科，我都算經常幫襯佢買午餐肉，之前試過兩次買到返屋企開唔到捲捲下扭斷左，第一次符碌用罐頭刀搞番掂，第二次連罐頭刀都玩到崩埋，最後你估都估唔到，摷左把電線鉗，沿住扭斷個位一路剪剪開個罐，食完冇肚痛都幾好野（定好彩？）。今舖仲激。插條匙落去扭個位扭唔郁，試左兩個字，大力得滯直頭扭斷埋個頭，扭到中間斷都叫做可以翻炒電線鉗怒剪條橋。上次整崩左屋企把罐頭刀又唔記得左買番把新，夾硬黎撬左幾野，撬到個罐都變晒形，先篤得穿個罐少少。最後只有出絕招。












「頂佢鹵味。我冇幾可試過一次講咁多粗口。」

「此情此景，直頭可以用黎做death metal碟artwork。」


開佢唔到棄之可惜加上等緊開飯，將屋企全部工具抬晒出黎務必開到佢為止，乜叉方法都試晒連鋸都出埋，亦考慮過放入膠袋一鎚打爆個罐噴晒ｄ肉出黎算數（十足落街市買免治牛肉噉款）。最後罐頭刀鑿到幾個窿，搵鎚仔加螺絲批打多幾個大窿出黎，再用大鉗細鉗又剪又撬又拉罐中間自己開左個蓋，破肚穿腸式用筷子一劈劈午餐肉蓉撩出黎十分Cannibal Corpse，平時會切粒撈麵食，而家連個工序都慳埋。