聽花CD #10：Tragic Idol

喺日本睇咗咁多idol show idol group，發覺好難撞到比較老嘅組合，唔係年齡做得idol後生幾近必然，講緊團齡：

見字時我睇idol資歷都未夠一年，但唔少睇過嘅組合其實唔係早過我好多開始名乎其實睇住佢哋大，有兩三年歷史已經可以話係資深老前輩。當indie band長夾十幾廿年唔散好平常，indie idol相反有幾年歷史已經叫好命，地下偶像呢家嘢其實會越睇越灰。

Babymetal證明metal idol做得到之餘，成功起嚟唔止日本仲可以紅遍全球加主流地下兩個市場食晒，有日本數一數二最強女主音坐鎮、隊band超強加整體好睇當然係主因，但你唔可以否認冇大公司後台係冇可能有咁非一般嘅音樂同製作級數。不過大公司有利自然有弊，冇可能唔為流行為賺錢而做時點都好重商業計算味，當初要成為全世界最創新而挑戰規範甚至禁忌嘅冒險精神第二隻碟已經冇咗一半，轉而傳落民間遍地開花。

即使Babymetal作為第一隊已經食盡全世界成浸頭水，日本本土仲有好大個indie idol市場夠俾你撈吓水尾，而偶像團多得嚟普遍短命時，為求存就會令你大把創意乜都敢試，而做得alternative本身就係賣怪仲越怪越好時更加如魚得水，好似今次主角Candye♡Syrup。

日本最大優勢係無論做啲嘢幾唔正常幾柒幾戇鳩，都立即會到盡頭全世界都會接受，唔係都唔會出到呢種五條女染到個頭五顏六色、著到Barbie公仔噉上台、初音聲雞仔聲唱trancecore嘅組合出嚟。如果係白人同非日裔亞洲人做，你未聽歌齋見到已經爆粗，但一話嗰班原來日本人嚟，你就會立即覺得好合理好OK喎。

睇過三次，第一次仲要喺band show睇，可想而知佢哋音樂有幾band/metal。2018年頭第一隻碟歌路metalcore為主再乜都溝啲ska punk都有，跳舞同表演又撈metal/core嘢band show嘢，有首一breakdown台下班仔就會做掌上壓砌條人肉橋，然後個肥妹落台一面嘔泥一面踩住佢哋過橋。即使音樂未至於好高質素，佢哋嘅live絕對夠過癮夠好睇。

隔幾個月再出隻EP當堂唔同晒，三首歌有首話係台灣人寫，派台兩首一首好Passcode另一首好deathcore主流地下兩味齊晒，音樂同製作進步唔少仲有得去美國表演。諗住捱出頭上位喇，點知出完碟無耐就話解散，八月中一週年紀念演出就係告別演唱會表演完即時全體畢業，九月頭去埋美國Candye♡Syrup第一期正式結束。

望落形勢大好都可以話停就停，導火線可能係其中一個center走咗，但影響係咪真係咁大？類似個案Alloy同樣多show得嚟出完碟冇耐主將離團，我仲好好彩佢走一個月前睇到live同佢影到相，佢畢業嗰晚Alloy隨即結束，但公司揾多三條新女改組成Will-O'，賣相音樂表演都轉型成功，而家好似仲多show出過Alloy時期。

照計少咗個主力，就算未搵到人代都夠做住先，最後一次睇已經係四人上陣，點解直頭散埋得佢哋知，因為台前幕後由始至終冇解過話，無聲無息就消失好似冇點存在過。除咗唔止嘔泥仲最唱得個肥妹入咗高橋聖子彈結他隊HöLDERLINS（而家應該叫高橋聖子之前隊band，呢個係另一個故事），另外幾個點、會唔會繼續做偶像做音樂第時至知，因為大家沉默到好似預咗件事遲早會發生。

但做咗咁耐偶像，係咪可以簡簡單單話唔做就唔做變返普通人呢？始終地下明星都係明星，只要你接受到每次演出要同大量毒撚近距離交流，呢個世界冇幾可即使你姿色未夠，都可以只賣藝唔賣身仍然而有大量異性貼錢圍埋嚟做兵，經常有fans送嘢俾你仲送到跪晒地，生日祭更加捧到你上天收花收禮物收到手軟，如果做得有聲有色仲有機會俾人請你去外國tour。呢份超然夾indie band夾到好大都未必俾到你。

最大分別係做idol等同一門事業，而且讀（初）中學已經開始，過程好可能會犧牲讀書嘅時間同機會，而唔係好出名或者大公司旗下廿歲頭就好大機會要畢業，當偶像賣青春而後浪來之不盡時點解一定要你？唔係好多個可以好似2&十六歲開始做地下偶像，做到單飛做咗六年仍然可以維持高人氣甚至越做越大，當然單飛成本低可能係主因。

所以Candye♡Syrup一週年大日子反而變成解散紀念日係非常唏噓，但未必完全係壞事，起碼最後一擊係美國tour比好多人走得風光，而且如果係做咗成年計數發現個project做落去大家都唔夠搵食，借有人走順便斬纜或者更好。當全隊可以解散得咁平靜，呢個理由唔係完全冇可能。

雖然Babymetal超乎所有人想像嘅成功一定對indie idol發展帶嚟好大助力，呢股熱潮唔會係近幾年至開始爆發，但睇過嘅組合好多只得一至兩年歷史，就代表Candye♡Syrup只係無數過眼雲煙之一。以佢哋為鑑，想追indie idol的話有機會睇同搵囡囡影相一定要去咗先，因為星途咁唔穩定時機會好可能只得一次。

所以話睇indie idol可以仲灰過睇indie band，今日你至睇完佢哋開開心心上台表演得好興奮，聽日已經粒聲唔出唔見咗人，可以全無先兆隨時結束，相信有時佢哋都身不由己。

聽花CD #8：Unto the Dawn《Apocalyptic Reflection》

其實之前已經想寫Unto the Dawn，不過唔係因為音樂而為另一樣嘢，但成日唔喺香港又要錄《Metal成熟時》Synergy又出碟一直拖住，到近排好多人仲要前輩級人馬提起呢隻碟，而你知道一隊後生新band可以得到咁多老前輩留意加一面倒讚好係好難嘅事，搞到寫完Synergy《LAIKA》立即開始寫《Apocalyptic Reflection》，襯飛之前寫埋佢，順便沾沾老前輩嘅光扮扮老屎忽先。

我好少會寫metalcore，《Metal成熟時》都講過metalcore只係九十年代尾美國玩爛nu-metal之後要搵下一個潮流，覺得北歐melodic death同Meshuggah啱使但係唔夠勁去玩，就簡化技術同編曲再將neo-classical變成hardcore，就形成直到而家仲未退晒潮嘅美國版melodic death metal aka metalcore。

metalcore對我嚟講最大問題係現場向得滯。我成日覺得'90 thrash係將'80 thrash玩慢一倍，而metalcore再將'90 thrash再玩慢一倍（再跟住嘅deathcore我唔敢提添喇）， 玩嘅易上手過extreme metal/melodic death、睇嘅聽嘅就算完全唔識啲歌喺現場都好易跟，一時間breakdown當道搞到睇metal gig好似去咗rave party。喺現場大家一齊high吓可以，但係你叫我喺屋企聽disco歌我就唔多頂得順。

加上作為一個歐派迷兼技術迷同時從來唔多受hardcore，雖然而家嘅北歐已經俾metalcore逆侵略搞到新舊melodic death band都變晒質，始終仲叫保存到當初令美國借鏡佢哋嘅內涵，有得選擇時點解唔直接聽返melodic death metal？甚至單單聽Meshuggah 1995年《Destroy Erase Improve》一隻碟，得著已經多過晒一年入面聽過嘅全部metalcore碟夾埋。

但係都有metalcore我鍾意，因為由melodic death演變出嚟，初期未去到好紅時啲band仲會鑽研melodeath式技術編曲而唔係breakdown走天下，好多而家pop到想喊嘅band，其實早期啲碟都有值得聽嘅地方。仲有一個謎之流派melodic hardcore。

metal一向耐唔耐就會出現一啲玄玄哋嘅分支，好似乜嘢係melodic metalcore呀？「啲riff靚啲囉」、「多啲清聲位囉」、「好多melodic lead墊底囉」，似層層但又好似其實隊隊都係噉玩法喎，你問係咪真係存在我都答唔到你。但事實的確係通常自稱或者俾人叫melodic metalcore嘅metalcore band我又的確比較受。

Unto the Dawn有好多樣嘢令我一聽就鍾意，其中一樣係令我諗起Killswitch Engage。唔係好多隊metalcore band我會鍾意，要數嘅KE一定有份，除咗唱得勁音樂仲幾重melodic death味道，屬於唔身在現場喺屋企對住對喇叭都會覺得有嘢聽唔會悶種metalcore。

而且音樂真係有料到，第一首《Before Everything Dies》作曲編曲技術氣勢「嘩」出嚟，應該係第一次有香港metalcore碟俾到呢份感覺我，就連Shepherds the Weak早幾個月出嘅高峰作《Biformity》都唔得。雖然仍然好多令我唔太鍾意metalcore嘅00000位，但技術唔錯riff夠紮實，加上作曲編曲功力的確好高，而且歌佬兩把聲都唔錯，我唔止唔會好似平時聽metalcore一到某啲位就唔耐煩，就連《Lucifer Effect》呢種好重hardcore味、平時我唔多會鍾意嘅歌，都可以聽得幾投入幾享受。

雖然第一首歌一開頭好爆，其實全碟整體唔係好恆，呢樣我本來都有啲擔心，因為講過呢一派易上腦易入耳之處就係將本身好激嘅嘢玩慢啲所以易跟，代價就係好多歌甚至碟都係只爆個頭吸引你跟住就靜晒慢晒搞到頭重腳輕。之前講過一個例子Betraying the Martyrs《Phantom》，明明隻碟頭半分鐘係個世界級開場，只要跟住直衝埋落去衝到隻碟最尾就可以去到年度大碟級數，點知半分鐘一過立即dup停慢慢磨，跟住就唔使再提喇（不過我仲係超鍾意隻碟入面首《Let It Go》cover架）。

計晒全碟真係稱得上衝，只得《Before Everything Dies》同《As Blood Turns Violet》兩首個頭，但作曲編曲好強，《As Blood Turns Violet》典型式爆炸性開頭再逐漸變輕轉慢，但四分半鐘入面一直有豐富變化，兩把聲唱得好同時夾得好氣氛一流，已經唔會再計較夠唔夠恆。呢首歌唔止係全碟最佳，仲應該算得上係香港metalcore代表作之一。

但前半做到個勢咁勁，反效果係搞到好似擺後半啲廣東歌唔夠英文歌勁。《逆容》的確唔係好出色，除咗手法同前面做過嘅一樣但精華已經喺之前三首發揮晒，仲要放喺《As Blood Turns Violet》後面，算係一個低潮位。

埋尾嘅《末日》係性質唔同嘅慢歌，所以有不足都未至於被過度比較，獨立聽亦唔差，只係就算我好希望香港band唱廣東話，總結係Unto the Dawn唱英文會較得心應手，除咗廣東詞有啲位填得唔太啱音，仲有清聲聲底其實有點老牛，唱英文唔會覺得有咩問題，但一唱廣東話間中硬係有啲怪唔太順耳。有時聲線、口音同咬字的確需要有一定程度配合，先可以將一種語言唱出理想嘅效果。

音樂絕對上乘，但我諗更多人聽完隻碟會講嘅係製作。香港錄完再送去外國做mixing/mastering開始普遍，而Unto the Dawn搵嘅All4band本身就係一個幫開呢類現代新派metal樂隊做後期製作嘅專業團隊，經外國音響工程師執完的確有極大分別，唔止整體好厚好實，鼓聲份音色同質感香港始終做唔到，仲有一份只有外國碟至搵得到嘅光鮮感（或者話好似有點點迴音嘅「K房聲」效果）。

我唔知大家都係香港錄音，唔同band做後製之前個master音色同音質分別有幾大，但即使而家香港人自己做mixing/mastering成品可以好清好靚，都硬係爭噉呢份「K房聲」嘅有機感搞到真實感差啲，尤其鼓聲硬係做唔出同一份質感同迫力。

因為兩者類型加推出時間都接近，好難唔將《Apocalyptic Reflection》同Shepherds the Weak隻《Biformity》攞嚟比較，但實際上又唔太比較得到：《Biformity》搵菲律賓studio做後期製作，當佢哋音樂上一早慢慢偏thrash帶點復古味，隻碟都整到音色粗糙偏舊派，具臨場感之餘好夾隻碟歌路，係個非常成功嘅例子。

Unto the Dawn始終維持現代metalcore路線，《Apocalyptic Reflection》錄音製作同樣非常配合自己音樂，而香港有潛質達到相同製作質素嘅係Qollision，佢哋都係搵外國工程師做mixing/mastering，三隻碟製作質素慢慢提昇，而整體尤其個鼓冇咁強修飾感。

《Apocalyptic Reflection》技術、創作同製作上，已經去到攞去外國都唔會失禮嘅級數，但呢隻香港史上其中一隻最佳metalcore碟理應平地一聲雷，而家出咗反而冇乜迴響，唔止雷聲雨點都冇。而呢樣就係最初我想寫呢隊band呢隻碟嘅嘢。

就算音樂水準已經去到咁高水平，都未至於立即仆到去寫，因為對我嚟講音樂「都係嗰啲」，畢竟metalcore本身限制就好大要有突破唔容易，所以好多時只有靠質素取勝，但係你選著metalcore呢個行頭已經失去優勢，因為作為（曾經）當打類型，全世界任何地方一早有多到數唔清嘅同類樂隊，就算你玩得勁寫歌掂製作好，去到世界層面對好多人嚟講只會係「都係嗰啲」。

再用出完《Necroracle》冇做過宣傳，都可以俾好多外國網選隻碟做2016年度大碟嘅Karmacipher做例子，佢哋可以咁成功唔止因為寫歌技術確實超強，仲有dissonant death metal一直限於小眾，所以當你整到一隻咁有料嘅碟出嚟，即使唔主動同人講，只要有人知道聽過就自然會幫你推廣出去仲要傳得好快。

呢樣就係行頭問題。而你揀咗一個一離開自己地方出到外面立即冇晒主要優勢嘅類型，有時單靠質素都未必可以有一番作為，而且metalcore一早過咗最高潮更加未必仲有咁多人肯理你，呢種環境要把握得到成功機會，首先最少要引到人聽你隻碟，亦即係要宣傳，甚至賣廣告。例如Instagram廣告。

如果有留意近兩個月搞band搞show嘅人討論，都會知獨立樂隊而家喺facebook越來越難宣傳，因為你分享facebook以外嘅網站，facebook會降低你個post嘅曝光率，即係有人寫咗篇碟評讚到你隻碟上天，但你喺facebook share完可能一個人都睇唔到，因為俾facebook hide咗唔出現喺其他人嘅wall度。想有人睇到咪俾錢賣廣告囉，但係咪真係有用呢，我只有話咁多年嚟我冇幾多次喺facebook見過band/rock/metal廣告，見到會有興趣開嚟睇嘅更少。

但喺Instagram反而見過《Apocalyptic Reflection》唔止一次，亦因為Instagram見到我至知原來香港有一隊band叫Unto the Dawn、先知佢哋出咗隻碟叫《Apocalyptic Reflection》，跟住至去搵嚟聽，先知原來音樂咁正。如果單靠facebook，我都要等到班老前輩講起呢隻碟，仲要facebook唔會hide佢哋啲post，至會知道呢隊band呢隻碟嘅存在。所以而家你想宣傳自己新碟又打算使少少錢做宣傳，不妨試吓去Instagram買個廣告位，分分鐘比靠facebook幫到你更多。

又或者，早排睇完show同band吹水傾開出碟呢個話題，大家至講笑話不如自己放埋seed囉。雖然直到而家好多西方人仲對亞洲band感到新奇好有興趣，你單單擺隻碟上Bandcamp已經多好多外國人知道你隊band聽你嘅音樂，但你唔可以否認其實最有效嘅宣傳方法係放seed，你覺得BT嘅人多定上Bandcamp嘅人多？

而家一出碟就全隻放上Youtube同Bandcamp俾人試聽已經成為樂隊間慣例，只要你擺得上去就好大機會俾人rip落嚟放上網seed，你睇吓而家上Google search band名碟名，成日頭幾個出嘅唔係隊band自己或者同佢哋有關嘅網站，而係邊度有seed download隻碟就知。而且經常你今日擺咗隻碟上網，聽日已經有人放seed，反正對佢哋嚟講唔使錢，唔知咩嚟好唔好聽唔緊要，攞咗落嚟益咗街坊至算啦。

所以個笑話就係，既然係噉，不如直頭我seed埋俾你啦，比齋放Bandcamp Youtube更加大機會令你會開我隻碟嚟聽，反正目的都係搏你試聽之後捨得俾錢買隻physical、會介紹你隊band俾其他人同睇你嘅live嗟，點解唔直接用性質相近但成效更大嘅方法？

而且（又可能呢個先係重點）當而家啲人已經雜到總之你有出歌出碟而俾佢搵得到，就乜狗屎垃圾都可以變成seed，如果你出完碟反而冇人放seed，咪即係你隻碟連狗屎垃圾都不如？梗係幾大都自seed先啦，唔係連免費都冇人肯幫你隻碟放seed咪好樣衰？

Unto the Dawn@facebook

http://www.facebook.com/untothedawn

Unto the Dawn@Bandcamp

http://untothedawn.bandcamp.com

聽花CD #7：Synergy《LAIKA》

香港metal band最大問題唔係唔夠技術，而係唔夠風格，由某幾隊band開始聽起夾起而似佢哋好正常，但發展一段時間之後仍然只追求更加似當初令自己聽歌夾band嗰隊嗰類，而唔係嘗試唔同嘅嘢開拓自己嘅路，喺香港band之間好普遍。呢一套十幾年前觀塘Livehouse雜錦show時代仲行得通，因為嗰陣香港metal band好少，練得勁玩得好嘅更少，就算音樂唔點特別，基本上你有返咁上下功力企得到上台已經有人睇你撐你。

但呢個時代唔止本地band數量多咗，要睇外國band無論網上定現場都易得多，當大家玩嘅做嘅一樣，自己地方競爭已經夠大，計埋外地的話都未使講日韓更加唔使講西方，單台灣同大陸已經大把band贏你幾條街，有時仍然會支持真係只因為「本地人撐本地band」呢個主場優勢。

呢樣我相信夾開band嘅人唔會唔明，只不過集中練一樣嘢點都容易過創造新音樂，因為就算技術台風未到好頂級，只要有一定級數都夠喺自己地方撈落去，但要造一樣新嘢唔止難仲要更多時間精神甚至更高技術，做到出嚟唔掂嘅仲會俾人笑踩多幾腳，點解要攞苦嚟辛？香港地夾band己經咁難出show嘅機會已經咁少，梗係越穩陣越好啦。當呢個成為香港(metal) band大風氣，我會更加欣賞樂隊敢去創新、敢去玩冇乜其他香港band試嘅歌路，而每講到呢個題目，有三隊band我一定樂此不疲猛咁提。

Dandelion Mound仍然係我心目中近代香港metal band之中最大遺憾，好難得香港有人玩metalgaze/blackgaze，歌寫得好而且夠出最少一隻EP，不過唔知人事方面係咪有問題，每次睇live班底都好似有啲唔同，好處係搵得啱人對音樂發展有幫助，最後就正式成為blackgaze（雖然個歌佬好多時唱得太core），但陣容唔穩定亦對每場表演方式同現場水準有影響，後期嘅live的確唔算玩得好好，最後更加未出到碟就散埋。雖然Topsy-Wave差唔多同一班人，兩隊歌路同表演分別都幾大，Dandelion Mound種音樂同感覺喺香港真係冇另一隊band代替得到。所以出唔到碟真係好可惜。

而djent開始嘅新metal band比以前更追求技術，歌曲整體同現場感染力唔及之前幾代係事實，但我唔太追新派都好鍾意Black Night Red Sky。progressive deathcore本地罕有之餘唔係整幾個breakdown等live有得俾人high就算，而將重點擺返落寫歌，有衝位有chok位有飄位編曲又有條理，技術同創作上好多都係同期香港band之中未見過，真正達到progressive創出新方向呢重意義。國際學校學生同喺外國文化圈子入面生活嘅band友諗法同做法向來唔同本地人，令佢哋成為一隊好特別嘅香港band，live又玩得好非常有feel，可惜呢頭話隻EP搞掂咁滯就出得，嗰頭就話隊band冇咗，又係香港metal一大損失。

所以最後一隊Synergy我曾幾何時都擔心過會唔會步另外兩隊後塵，因為大家同樣走自我創新路線，但佢哋最難sell：Dandelion Mound手blackgaze出得metal gig又出得文青show，Black Night Red Sky有大班core系觀眾支持新派metal fans又鍾意，如果呢兩隊都做唔住，歌路同客路更加窄嘅Synergy照計幾難捱落去。點知最後得佢哋出到碟。其實我有少少爆冷feel。

後生嘅未必知，Synergy其實算香港metal界all-star project，成班佬都係夾過十幾年幾隊band仲要好多係勁band（如果你聽香港death metal但係未睇過Hermetic Silence，你已經錯過咗好多），而嗰啲band就係我十幾年前啱啱開始聽metal第一批接觸嘅香港metal band，跟住大家夾埋成為Synergy，由第一場live到嚟緊第一隻碟release party，喺香港出過嘅show可能只得Incoming Take Cover呢場cover show冇睇到。Synergy應該係我呢世人追得最貼香港band，名乎其實細細個已佢哋聽佢哋班人啲嘢睇住佢哋大。講完都覺得自己好老。

但我非常樂於呢（十）幾年噉樣睇住佢哋，睇咗十幾年玩得好嘅香港metal band好多，但掂得嚟有格嘅非常少，所以每有一隊可以令你覺得好唔香港band甚至唔完全似聽開嘅外國band實會特別留意。因為夾Synergy之前啲band歌路已經有death有nu有progressive好雜，五湖四海夾埋Synergy歌路就係你都唔多捉到路，第一次睇live聽《In Your Eyes》反應係「嘩乜咁Carcass嘅」，然後第一次聽《The Dromos Home》，「嘩乜咁Opeth嘅。」呢兩隊都係你聽香港band時極少機會聯想得到，香港亦冇人玩progressive death metal咁滯，最接近我只知道2003年審判日有隊Phantasmagoria，當時上台好似只玩咗一首歌，就係將Opeth全長二十分鐘嘅《Black Rose Immortal》cover晒，不過跟住唔知去向。會玩Opeth式prog-death同時有原創作品公開嘅香港band，Synergy應該係第一隊。

亦因為追咗咁多年至會明白有幾難sell，其實睇佢哋出live台下反應就知。而家代人聽core嘢同死衝嘢大，唔識首歌唔緊要你有個beat或者breakdown俾我live跟住玩就得，同覺得隊band個個人都係彈／打solo當riff至算technical/progressive，而唔係舊時用編曲做氣氛種手法。當冇咩特登寫俾觀眾現場玩嘅位，仲要差唔多首首歌都兩個字長每隔一陣就變一變，唔係事前已經聽過甚至聽得幾熟吓，身處現場的確唔係咁容易投入得到。好多人聽Synergy第一個回應都係「好Opeth」，呢份絕對係美譽，只不過Opeth屬於必聽個年代已經係十年前，當而家班後生會問返你「邊隊係Opeth」或者「唔係啩你仲聽Opeth」，「好Opeth」有時唔完全係好事。加上隊band已經少出show，亦唔多歌擺上網俾大家入場前溫定書，整體唔太利於推銷自己。有時有態度有原則係需要付出嘅。

而且其實已經冇咁Opeth架喇，早期啲歌較接近melodic death時期Carcass，2013年隻demo左右《Dromos Home》同《The First Filth》先開始大變，前者舊時個版本仲要更Opeth，中段唱一句就急停嗰吓放慢之餘結他全清聲，同後段入男聲bridge之前有一吓好progressive rock嘅清聲chord，就連唱法都好初期Opeth／瑞典death metal式用聲咬字較清有時甚至少少black，都係令人一聽就覺得Synergy「好Opeth」嘅特色。不過唔知係咪嫌造作得滯或者唔想太Opeth，最後版本幾個位都改到冇咁prog rock，唱亦集中典型death式沉聲，對於好鍾意舊版嘅我嚟講係有啲失望，樂器同演唱音色上對比大會更有效帶出首歌氣氛。

但呢個轉變令而家嘅Synergy搵到一條自己嘅歌路，「好Opeth」只係一個引子，其他歌聽真就會聽得出獨特之處，亦唔會令你覺得「咪又係邊隊外國band」。《The First Filth》、《迴》同《Dromos Home》一樣屬於「Opeth系」，要搵Synergy入門歌三揀一就得，只揀一首正路一定係《Dromos Home》，不過我更想推《迴》，除咗編曲同氣氛唔同另外兩首有自己風格，仲唱廣東話加有男女聲，創作同技術原素方面最多元代。

最直接嘅《優越論》係另一邊「Carcass系」，快板為主加唯一一首短歌（以Synergy標準寫首歌閒閒哋接近兩個字長，四分鐘叫好短架喇），第一次睇反應就係現場觀眾終於有個位唔會咁悶喇，目前亦只得呢一首現場向曲目。如果有睇佢哋早期live或者會記得《In Your Eyes》，係第一首正式公佈作品風格亦接近《優越論》，不過屬於最早期創作唔及而家咁成熟，好似後半個melodic solo outro唔太夾前面個feel之餘似應該擺喺BlackWine嘅歌而唔係呢度，當有相似同時更完整嘅《優越論》，《In Your Eyes》的確唔算好必要。但《LAIKA》作為樂隊一個時期嘅總結，就算搵唔到適合位置擺呢首歌，對我嚟講《In Your Eyes》最能代表變到「好Opeth」之前嘅Synergy，當bonus track送俾大家見識吓隊band初期係點都好吖，一隻CD夠位放架。（其實將兩首demo remaster完再塞埋入隻CD都仲夠位架，到時就真係變成階段性總結嘅Synergy全集喇）

中間四首咁高質素，我反而覺得缺憾在全碟開頭。一隻碟最重要開場做得到聲勢奪人，所以選曲一係夠恆一係最搶耳，而《夢道》個頭同《LAIKA》序曲連貫之餘氣勢的確好有開場格，但聽到後半有點後勁不繼，搵唔到「Opeth系」大反差編曲特色時更似一首加長版《優越論》，偏偏《優越論》優越之處就係唔賣編曲賣力度而濃縮成四分鐘炸晒佢，《夢道》長差唔多一倍但編曲集中death metal技術同節奏上變化，要寫得長同時維持到高音樂性絕對唔容易。當後面一連幾首每首都咁有特色，《LAIKA》最平淡反而係開場。

《Sodom and Gomorrah》放最後正路，通常實驗性最高、最玩氣氛或者全碟最爆嘅歌最啱用嚟埋尾，而呢個九分鐘長實驗幾蝦人聽，一來前面啲歌本身已經唔叫易聽相當花精神，最後一首仲要再玩長啲實驗啲，係挑戰緊聽眾精力同集中力。當然作曲編曲做得好可以救返，只係寫長歌最難一向係後面點樣可以冇突破都最少足以維持落去，而首歌最吸引係個頭但敗也在個頭開得太大。你一聽到唔知算印度定中東個intro，聽完頭六首個心點散都會醒一醒，因為一聽到個intro就會諗「咦嚟緊有新嘢喎」，跟住波動亦夠大，只不過嗰份異域氣氛只係最頭同後面整一整點綴一下，intro帶俾你「有新嘢」個想像空間好似一直都填補唔到。

當主題係史詩級聖經災難故事仲要做壓軸加埋呢個intro，我就預期會炸到天火焚城好撚勁噉撚樣，點知前半炸晒後面有點虛，就好似啲天火硬係出唔到，有點覺得俾人昆咗。不過當《LAIKA》係總結隻碟之前嘅Synergy，而《Sodom and Gomorrah》係一個未來新歌方向嘅新嘗試的話，我對新歌又會有啲期待，因為首歌做唔足一回事的確做到前面咁多首（舊）歌未試過嘅嘢，Carcass完Opeth完之後睇吓可以再搵到乜嘢新玩法。我會希望唱方面可以實驗多啲。

其實我覺得拆聲方面demo時期以至《In Your Eyes》都比正式錄碟時變化更豐富，而家有時唱腔聲調偏向單一，有啲位用返高音啲black返啲聲底唱會更惡。而且本身已經有把高識別性男聲時，男女聲理應有更大發揮空間，當然有啲嘢太多就濫，好似全隻碟每當有男聲出現就寧舍搶耳，因為做到一份好似專誠搵人featuring唱嘅效果而突出，只不過當本身就唱得之餘Synergy音樂就係多元，呢方面好值得發展一下。例如，如果《Dromos Home》頭幾句拆聲用偏black腔方式唱（其實demo版就係噉），甚至男女聲每人輪流唱幾句，氣氛已經好唔同甚至更強烈。

另一樣當然係唱多啲廣東詞啦，始終冇成員英文特別好時，英文詞好難寫得靚更難冇錯，正如兩首舊歌英文詞其實有相當多文法錯誤，如果唔係隻碟兼作一個總結而盡量保留歷史痕跡，我係成員的話一定提議呢兩首不如重新填過詞啦。如果全部唱中文咪乜都唔使怕囉～加上呢個時代廣東話文化比以往更重要，堅持唱廣東話更加有意思有價值。

而出下一隻碟時，希望錄音方面會再有突破。呢兩年香港metal band出品帶出完全Made in Hong Kong嘅製作質素唔會差得過外國同級樂隊，雖然仍然有一份近代metal碟普遍嘅電子修飾味，但相信好難避免，因為有好多嘢你唔係租專業studio要喺自己band房錄就一定有限制，單單鼓聲份質感同空間感已經好大分別。《LAIKA》有嘗試模擬返份真實感，但都好難完全洗甩份電子味，不過成品已經好靚聲架喇，你估我唔希望可以錄到《My Arms Your Hearse》咁勁咩，香港又土地問題又成本問題又唔夠呢方面器材人才，做得到先得架。當近兩年香港自家錄音製作質素大有進步，現時環境許可下做得到呢個水準時，相信下隻碟唔會係短期內嘅事，到時本地錄音製作應該又會再進最少一步，到時啲聲可以更具臨場真實感就好喇。

不過個包裝就唔好再咁玩嘢喇。近幾年香港改變嘅唔止錄音技術，仲有大家出碟除咗鬥音樂仲有鬥花巧，想搵隊band出碟正正經經用普通CD盒仲難搵過出digipak出boxset，而《LAIKA》係繼雞蛋蒸肉餅個蒸籠之後再一個華而不實顛峰，打開隻碟會升起呢吓係好特別，但係個盒冇位食實隻CD，每次打開甚至拎起個紙盒隻CD會跌出嚟嘅機率係50%。

相信我係全香港第一個拎到隻實體碟嘅人，只不過早入手半個月即係隻碟會跌多半個月，當你18/3去到release party買碟時我應該會同你一齊買返隻，因為到時隻CD已經跌到爛Q咗，呢個digipak可以令我開多個專欄叫「跌花CD」。唔買多隻CD咪買黑膠囉，雖然佢哋唔係第一隊計劃出黑膠嘅香港metal band，不過出膠其實好多問題要克服，Synergy應該係Hyponic之後第一隊成功出到膠，仲要雙透明黑膠相當型，如果連黑膠都做到打開個盒隻碟會自動升起就型到爆（到時可能個盒仲貴過隻膠）。

雖然我好鍾意《LAIKA》，Synergy亦一定係香港metal史上獨一無二，好遺憾亦好老實亦好諷刺，我唔覺得隻碟喺香港呢個自己地方可以點樣幫到Synergy，因為眾所周知而家香港而家班觀眾聽眾喺core年代聽開長大，當代progressive亦已經同舊時唔一樣，要佢哋肯認真聽返尤其睇返上一代嘅progressive/death絕對唔簡單甚至嘥氣。加上歷史加經驗之談，呢類喺本地算異類玩得咁唔本地嘅metal band，往往向海外發展先會得到應得嘅賞識同回報，遠嘅有Hyponic，近嘅一定係Karmacipher：

十年前Thornslaughter只出得到一隻demo（唔計Hyponic同Heresy呢班doom death老前輩，Cadaver之前香港應該未試過有death metal band成功出到碟？），之後得返兩個人繼續捱落去歌路band名都轉過唔止一次，製作經年終於嘔心瀝血出到香港第一隻dissonant death metal碟《Necroracle》，喺冇主動向海外宣傳嘅情況下，都俾大量外國metal網勁讚選為年度大碟。反觀香港，上年第二隻碟都出咗喇，而家仲大把人問緊邊隊係Karmacipher、乜嘢係dissonant death metal。

當夾band搞band房越來越難，穩穩陣陣開開心心夾夾band出出show順便媾媾女就係喺香港夾band嘅核心價值，正因呢種心態香港(metal) band好少有大突破大驚喜，所以玩得好我會支持，但會更尊敬Synergy呢類偏鋒樂隊，因為敢冒險走幾乎喺本地做唔到嘅路線，再而達到音樂上嘅成功，付出更大收獲更難，但做得到嘅可以更有效喺世界層面幫助推廣香港band整體。而之前已經差唔多逢係NOWED搞嘅香港／大陸metal gig就見得到佢哋嘅Synergy，出《LAIKA》之後正式由live台柱變成NOWED Records一份子，係時候把握向國際進軍喇。

噉係咪亦代表望咗好耐嘅INDenial X Synergy co-headline tour有冇機會成真？

Synergy@facebook

http://www.facebook.com/synergyhongkong

Synergy@Bandcamp

http://synergyprog.bandcamp.com

18/3/2018 Synergy "LAIKA" Album Release Show

https://www.facebook.com/events/140792759950492

聽花CD #6：Some stuff from 2017 I enjoy a lot

幾年前已經唔再做全年Ｎ大總結，因為當時投入好多時間去搵band去聽碟，最後只會發現都唔會發掘得晒，總結完一定會再發現其他更好聽更值得做年度Ｎ大嘅碟，今年仲要離港避世兩個月，已經脫節到連好多追開嘅band最近點今年有咩新歌新碟都唔知，更加唔使諗今年邊隻碟最好。見已經冇特別追band搵嘢聽時，今個年底居然都撞到三隻碟覺得唔錯，就集中講呢三隻算。

一向唔太迷美國black metal因為好兩極化，一係玩得好普通甚至唔掂，一係就好高水準或者好特別，而Xanthochroid叫自己「Cinematic Black Metal」，上一隻碟亦係第一隻大碟、2012年《Blessed He with Boils》甚至有啲似Emperor隻《Prometheus》。

當而家好多black metal band只求做到下一隊Behemoth或者Dimmu Borgir，佢哋反而會選擇走咁另類路線，加上我本身勁鍾意《Prometheus》自然特別留意佢哋，但係跟住只間中出吓新歌，cover幾首Wintersun做民謠，同將Opeth首《Harvest》變成symphonic black metal版，但係見會選呢啲歌cover都知佢哋唔普通。

五年之後終於再有新碟，加多把女聲變成好多男女清聲，仲一出就兩隻，籌備五年嘅雙碟概念專輯《Of Erthe and Axen》俾到佢哋種交響配樂black metal更大發揮。Act I做到好磅礡，Act II就較內歛似返之前，我鍾意Act I多啲因為我追求嘅symphonic black就係呢種，浮誇唔緊要全部夾埋合理就得，好似最後兩首組曲相當完美。Act II都好，只係在我欠缺Act I份爆發力，同鼓聲有點乾之餘mix得太出。不過呢兩隻碟係我好耐未試過會咁沉迷嘅black metal碟。

同樣五年未出過碟嘅「riot-opera」band Diablo Swing Orchestra都趕得切年底出新碟。一開始已經玩獨家嘅cabaret metal，當你隊band咁avant-garde自然好難賣，所以之前三隻碟都係三年一閏仲隻隻唔同label，新碟仲要隔足五年，而五年間可以發生好多事，好似第二次換女主音。

影響絕對唔細，因為前兩個都係女高音唱法，新歌妹用返傳統清聲，一唔覺意就會變成Nightwish翻版，但呢個轉變對佢哋反而係好事。雖然風格特別，玩完metal carabet想試新嘢，metal band配女高音加歌劇式男聲組合反而有限制，因為呢種唱法唔係種種歌路都夾，所以始終唔太捉到啱自己嘅路，之前三隻碟水準其實一直下滑緊。

新碟有五年時間加一個完全唔同唱法嘅女主音，今次終於清楚應該點樣做可以再創新之餘，唔用女高音反而為佢哋演唱方面帶嚟更大自由，新歌妹唱得之餘玩聲又勁，而家音樂玩得更放，俾返過去咗去耐嘅全盛期The End Records感覺我，作為一隊實驗樂隊，之前三隻碟相比之下反而有點保守。不過有個隱憂，其實上隻碟開始佢哋音樂已經好Muse，我反而驚之後會慢慢冇咗自己風格甚至越來越pop，但係再下隻碟應該又要等最少兩三年啦，到時可能歌路甚至歌妹又轉多次。

其實錯過咗今年係個好大遺憾，因為2017年好多新band出碟同舊band新碟都好勁，只係時間精神係唔夠就唔夠冇辦法，既然到年底至較空閒而主要發掘到呢三隻，今年就盡情享受呢三隻碟過年算。其實仲有一隻都想講講，就係Karmacipher喺2017年尾二一日出嘅新EP《陣獄》，不過得兩日時間而我想花多啲時間去認真煲煲呢隻碟，就等隻碟會出physical嘅時候再講返啦。（希望會出啦）

Xanthochroid@Bandcamp
http://xanthochroid.bandcamp.com

Diablo Swing Orchestra@facebook

http://www.facebook.com/diabloswingorchestra

聽花CD #5：INDenial《INDenial》

喺呢個metal發展停滯不前嘅年代，要出頭有兩條路，一係將自己嗰瓣練到好專，就算冇新意都有質素搭救，但當同一件事已經有無數人做緊做過，就只有寫歌技術都好頂級，再加運氣同際遇先可以成功。另一條路當然係唔行其他人行過嘅路，其實而家玩metal最大成就唔係人哋聽完你嘅歌會話「你哋好似邊隊」，而係「你哋好似呢隊，又有啲似嗰隊，但聽落又唔多似．．．」

所以會鍾意INDenial隻碟，因為玩得好嘅香港band多不勝數，但令你捉摸唔到嘅就好耐至撞得到一隊。籠統講係thrash，不過唔似聽慣聽熟典型，音樂入面搵得到九十年代美國thrash、二千年代偏thrash系嘅瑞典melodic death metal，同2010年之後嘅德國thrash，但幾種唔同年代同風格嘅thrash又撈得埋之餘唔夾硬。

字面上睇唔會係我最鍾意種metal，因為聽thrash個人喜好最緊要夠衝同有一定技術性，而INDenial根基近九十年代打後著重節奏感多過速度感種「post-thrash」，技術亦唔係好高超，但riff夠爽夠實淨，寫歌編曲亦順得嚟唔悶，唯獨鼓套路比較舊派，夾復古thrash足夠，但樂隊走新派路向時，就嫌打得太保守差少少火花。

雖然將最基本練到最穩打穩紮時你隊band已經冇得輸，如果只係完全玩返晒Machine Head種groove metal，都只會達到「勁但咪又係嗰啲」程度，來自現代金屬嘅影響就幫音樂提昇唔少，雙主音、樂器聲人聲加effect同最後首歌加女聲呢類手法，令音樂多一份摩登色彩唔會太老土或典型，而且錄音加咗好多好多印象分。

其實我自己唔算好鍾意djent興起之後嘅現代metal錄音，整體數碼處理到冇晒雜質甚至有點假，人聲同樂器好似互相鬥大聲鬥突出，大家都咁高咁大企得咁前時，做得好係一幅音牆，執得唔好就好易令整體平面化。隻碟係有少少缺憾，好似鼓聲唔夠真實感之餘感覺唔太夾其他，同有時metal都係粗糙返少少比較好，不過音樂唔太old-school thrash加有點新派時用呢種聲效果幾好，而且製作水準加同音樂配合嘅程度，《INDenial》絕對數一數二：

近年有三隻香港metal碟：卸甲《皇者令》、Karmacipher《Necroracle》同INDenial《INDenial》，都係本地製作而錄音質素直迫國際水準，簡直係省靚「Made in Hong Kong」招牌嘅portfolio級作品。

全碟我最鍾意嗰樣係唱。成日覺得香港band出碟有兩大挑戰，就係鼓聲錄得靚加隻聲夾到音樂同其他樂器，同主音CD內外都聲好唱功勁。INDenial強處唔止雙歌佬，仲有主歌佬本身把聲已經強而有力加聲線獨特辨識度好高，但唔會只一清一拆走天涯而再有變化，聽咗十幾年香港metal，呢個歌佬都算最啱feel。

折衷派thrash加上歌佬聲線特別之餘唱功恆得嚟多變嘅組合，聽完諗起Darkane，當Darkane係我數一數二鍾意嘅thrash death/melodic death band甚至metal band，而你音樂特別歌佬可以令我聯想到呢隊可能係瑞典melodic death metal最被忽視嘅樂隊時，我就係好難唔鍾意你隻碟。只不過亦有另一個問題：CD入面唱得真係好勁，但係現場似乎未能夠完全唱返晒，所以聽完碟再睇live就會覺得有一段距離。當練到live都唱到晒《Deadly Carnival》，就真正做到CD內外一樣咁強，嚟緊九月中就要去北京幫Kreator做開場，咁難得搵到呢種機會，事前一定要操多啲練好把聲同度氣，到時一定要搏到盡唔好失禮，唱到第二日入醫院都要去盡佢呀。

音樂我係完全冇問題甚至會俾好高分，但隻碟本身就幾大問題。美術好重都市味，好摩登搞到似alternative rock band出碟，metal碟設計都係惡少少或者有議題較合適，同歌詞係一張張明信片，一唔覺意跌咗張咪大鑊？同點解要出到咁大盒呢，突成截出嚟搵位擺已經難，仲要成個紙盒一有穿有爛就冇得救，我個盒就係一唔小心責皺咗噉就拜拜。音樂點new-school冇所謂，但出碟個型式可唔可以old-school返少少呢，簡簡單單出隻CD就得架喇．．．

INDenial@facebook
http://www.facebook.com/INDenialHK

INDenial@Bandcamp
http://INDenial.bandcamp.com

聽花CD #4：Escharotic《Escharotic》Digi EP

「聽花CD」第一篇，反而唔係想寫CD。香港女聲metal fest The Voice of Sirens II比I成功，除咗樂隊夠多元化加隊隊都玩得好好（如果我話我鍾意二人組合嘅The Pafala多過三人組，會唔會俾人打），Escharotic隻digi EP亦係一大焦點。

用USB drive出single甚至專輯，無論主流還是獨立都賣咗好多年（場show早少少時間有個韓星出USB single，講到前無古人後無來者，見到笑而不語），不過作為一個音樂媒介優勢唔大，除咗一定要插電腦先有得聽（以前問題冇咁大，但而家有啲人真係屋企唔開電腦甚至冇電腦），仲似買精品多過買音樂。以前買過兩隻，陳奕迅隻手指整到成餅錄音帶噉樣，開嚟睇MV之後就收返埋冇掂過，USB本身就係賣細隻，你唔係叫我拎住咁大餅周圍去吖嘛？另一隻直到飛咗去屋企唔知邊度都未聽過，甚至連嗰隻USB係邊個出都冇晒記憶。

Escharotic醒在唔只得一隻USB手指，而係賣成部MP3機俾你，睇完show一出門口插隻耳筒已經立即有得聽，當隻EP五首歌四個字長，由HA返到屋企已經夠聽兩次，而當好多時買碟只為支持同收藏，十隻碟八隻拎到返屋企都唔會聽甚至唔會開，呢隻digi EP已經贏在令我最少聽過兩次，跟住仲可以入其他歌出街聽。當普通USB手指用除咗好大隻亦冇乜問題，好多artist賣USB隻手指整到鬼咁多花款真係唔多想用，就算唔怕整花整爛捨得用，有啲一插就autoplay成堆歌同片，點拎返公司用呀？

不過最正其實係個袋，估唔到買細細部MP3機有得送大大個環保袋，size剛剛好放到我部電腦，唯一煩惱係每次出去開會都要解釋俾班客聽點解我個電腦袋咁brutal。與其送一大堆拎到返屋企得個擺字用唔著唔要又唔係嘅雞肋，真係寧願你送個環保袋俾我仲實際。

至於音樂唔使講太多，香港最似Arch Enemy嘅band一定係Escharotic，但成也AE敗也AE，音樂非常似後期Arch Enemy唔算新穎，不過當你路線係純melodic death時規限自然大，就唔會求有大突破只求質素，呢方面就絕對交足貨，錄音反而值得講講。而家獨立製作要做到接近專業級質素唔難，但metal一向唔係靚聲就好，每種metal都有屬於自己嘅年代感同錄音製作方法，選擇配合自己音樂嘅聲音更加重要，可以想像一下用djent聲玩black metal會有幾柒（你話你玩post-black就另計啦）。

隻EP以而家indie band錄音水平計可能只夠當demo，但音質同層次感已經唔會輸俾好多人，最重要捕捉得到需要同配合自己嘅感覺，單單入耳已經舒服過印象正面過好多碟，因為說服到我「係嗰樣嘢」。錄音質素可以更高當然更好，但除咗有時太靚反而失去應有感覺，仲有一個現實問題：你想追求某隊band或者某個外國級數嘅錄音，必須要有一定器材同技術，而且無可避免會被拎嚟同外國比較，唔夠資本同信心做到時就好易兩頭唔到岸。與其俾人話似某隊外國band但下一句就係唔夠人靚聲，我寧願製作質素唔係頂級，但聽嘅人會感受到你同你所代表種音樂份真實。

digi EP呢招精彩，不過我份人比較老土，有得揀都係鍾意買CD，所以正式出碟時，都係正正經經出返CD啦唔該。 （同出普通膠盒版得架喇，最鬼驚digipak同禮盒裝，唔知點放好爛咗又冇得救，就好似下一次我寫嗰隻）

Escharotic@facebook
http://www.facebook.com/EscharoticHK

Escharotic@Bandcamp
http://escharotic.bandcamp.com

聽花CD #3：A New Beginning

重開專欄講音樂，既然決定重新上路，今次用一個新方法開始。之前執碟有個櫃終於執到吉咗一半（其實只係夾硬將嗰一半搬去其他眼不見為淨嘅暗角），跟住屋入面見得到嘅碟都望一次，想聽同想寫嘅抽晒出嚟，再慢慢諗寫乜同點寫。

一隻隻碟寫有時會好悶（同冇咁多時間逐隻寫），新專欄想試吓唔同寫法，好似幾隊band幾隻碟撈埋一齊寫，寫吓跨媒介題材，甚至唔寫音樂寫吓工業同文化，雖然我寫嘢成日拉到好遠離晒題，「聽花CD」呢個專欄都會盡量集中CD同音樂上面。

執出嚟啲碟想夾埋寫嘅紮埋一舊，跟住好似俄羅斯方塊一舊舊堆高佢，啱啱好質滿半隻櫃，我老母見到都話

「十幾年嚟第一次見你啲嘢咁企理。」

一紮碟一個project，未計單碟已經有六十個project，以我寫文嘅速度分分鐘一個月先出到一篇，就算唔再加新碟已經夠寫幾年，當然前提係唔會爛尾先。咁多年嚟耐唔耐就會嘗試唔同形式嘅專題寫作，不過多數維持一段時間就無以為繼，因為要定期出文時間同心機消耗好大，好耐以前仲會投稿俾網站同雜誌專欄就冇計迫住起貨，到純粹為自己興趣時冇承擔自然會hea，寫到咁上下或者返工忙屋企多事就會放低甚至放棄。希望咁難得準備晒成櫃碟俾自己寫，「聽花CD」可以的起心肝成為一個長遠發展嘅寫作計劃啦。

（然後話，咁難得執到個櫃咁靚，再拎返落嚟咪搞到亂晒又要執過？都係由佢唔好搞算啦唔好寫喇）

聽花CD #2：Hear Flower CD: The Provenance

好耐未認真寫過碟評，你叫我用香港話亂啡幾百幾千字講一隻碟其實唔難，但要好似以前投稿時期用書面語正正經經寫，一個禮拜寫到一篇已經算好快。所以十年前仲係台灣前衛金屬誌論壇管理員時搞過個「每週一唱片大行動」，就係迫自己每個禮拜最少寫一隻碟，不過只堅持到一段時間，因為以我寫文嘅仔細程度同長度，要定期認真寫碟評絕對稱得上係苦差，離開TRHK之後都好少再寫喇。

不過早排煲返好多香港band同indie舊碟，又挑返起舖寫文癮。其實有諗過開個樂評page，但當以前返學同份工較得閒時一星期寫一隻碟已經係個大挑戰，我諗直到謝安琪再出碟之前都唔會再寫論文式「專業」樂評，開個page但一兩個月先出一篇文就冇意思啦。而且你知身在香港地開得呢種page，一定大把人挑你機話你寫啲嘢錯乜漏乜，所以都係留返喺自己地盤，聽完一隻碟有嘢想寫，有心情又有時間時咪用唔認真嘅方式講講佢，自己匿埋打吓飛機就算啦。

仲有一個原因，因為遲出世加太遲開始聽音樂，失去經歷香港樂隊同獨立音樂最輝煌時代嘅機會，只有靠之後聽人講返同自己追返，再開始寫樂評就係多一個理由俾自己發掘歷史，同重溫返早前買落但未聽真嘅CD，寫吓新band新碟之餘亦分享返舊band舊碟。你知啦，香港地嚟緊冇乜show睇架喇，冇show評寫時咪寫吓碟評囉．．．

對我嚟講寫作最難嗰樣唔係寫得好而係改名，成日篇文寫完都諗唔到叫咩好就亂咁嚟，所以你見劉Sir啲文啲page堆標題成日九唔搭八，我真係覺得改名好難。不過今次開個樂評專區，第一樣就係起個名叫「聽花CD」，全因呢樣就係導火線，唔係因為有想聽返嘅舊碟已經聽到花晒播唔到燒唔返，就唔會去節拍去二手舖去HMV開倉上Yahoo拍賣掃成堆碟，繼而促成有興趣寫返碟評。

同改呢個名，亦係希望喺呢個數碼世代，可以搵到下一隻會俾我聽花嘅CD，唔知仲有冇機會撞到呢種可以俾你聽到花嘅神作？

聽花CD #1：聽花CD：序

好耐未試過掃咁多碟。呢幾年多數去睇show同去日本先會瘋狂買碟，係呢兩個月無端端挑起執舊香港碟舖癮，又撞著HMV清倉加Yahoo有人放，結果一掃就十幾廿隻。

今次要多謝各位兄弟，一個月前提到想執返黃秋生兩隻碟同余力機構兩隻碟，一個月後全部入手再加意外收穫，出外真係靠朋友。其實除咗余力機構第一隻其他全部都有，買完又買因為我份人太過old-school，不過唔係咁old-school又點會搵咁老土嘅碟呢。

陳輝陽、因葵同余力姬夾埋嘅余力機構，係一個香港地有才華有態度只會揾唔到食嘅實證。九七年第一隻碟其實有點大路，雖然同同期香港流行音樂比較已經相當另類，因葵走咗之後三年磨一劍，第二隻碟《快活》變咗玩嘢rock，今時今日聽仲會覺得好前衛。我諗陳輝揚成世人最開心應該係呢幾年，佢畢生才華貢獻晒俾呢兩隻碟，余力姬把聲唔係超靚，但正正帶點粗糙更配合陳輝揚咁真誠嘅音樂。

不過當你隻碟過咗廿年再聽仲會覺得超前晒廿年之後嘅音樂，喺'90尾'00頭嘅香港絕對唔係好事，只代表出碟時走得太前嘅你死得好快。正如《快活》絕對屬於香港音樂經典之一，但問吓身邊有幾多人知呢隻碟甚至識得余力機構呢個組合？佢哋個名廿年後突然有人提起，都因為首《活著》俾人翻唱，唔係謝安琪佢首《活著》係原創，而係同余力機構所代表嘅完全相反嘅Twins其中一個，聽完佢唱只會令你更加懷念佢哋。如果謝安琪首《活著》先係翻唱，你話會幾美好。

香港地好現實，玩到識飛都用，係搵唔到食就要向現實低頭，嗰陣香港仲未接受到呢種音樂，再過幾年先開始欣賞唱作歌手同實力派，早咗出道嘅余力機構兩隻碟之後無以為繼唔算意外。陳輝揚轉做幕後跟住寫K歌寫到出晒名，係呀完全冇晒余力機構時期火花，人哋搵到食仲有名有利喎你吹咩？至於余力姬，維基百科話去咗美國做律師。你話搵錢至上到做嘅嘢搵唔到食就連活著空間都冇嘅香港，抹殺咗幾多有才之士同理想。

黃秋生唱作路好相似，第一隻碟國語加粵語alternative pop跟住第二隻變成全粵語indie rock，仲要比余力機構再早幾年出碟市道同接受性更差，不過佢算演而優則唱冇咁辛苦，有後路時個project自然去到幾盡都冇所謂，最少余力機構唔會唱粗口歌先啦。同有江湖地位時吹雞自然有號召力得多，你估請得郁黑鳥成員幫你寫歌同邱禮濤肯幫你拍MV真係個個做得到咩。

同其他轉型歌手唔同，黃秋生好清楚自己想做乜，同搵咩人合作會做得出佢想要嘅音樂，根本就唔志在最後成功與否，係要成功要賣得要紅就唔會唱粗口歌啦，而且喺地下做土皇帝唔開心得過上主流做路人甲？雖然論歌我比較鍾意rock底嘅《地踎搖滾》，其實《支離疏》較有性格，兩隻碟歌路都好雜，同時好多歌都會搵到模彷某外國樂隊嘅感覺，但呢份tribute味《地踎搖滾》比較重，呢個係八九十年代香港（獨立）音樂通病，因為仲處於追隨同學習外國階段，好少可以建立到完全屬於自己嘅聲音。是但啦，聽《吓》聽《地踎搖滾》兩首已經夠殺啦，呢兩隻碟份爛仔同地下味好真實，之後都冇幾多香港band香港碟玩得返。

本來只打算執返呢四隻突然想聽返嘅碟，不過跟住越來越大鑊。唔知點解我行二手舖從來冇乜運，想要嘅一係行極都冇，撞到都只得一二三百蚊炒價貨，偏偏其他人就係無論去邊區行邊間都搵得到，仲經常只需要一二十蚊執笠價，呢四隻都靠兄弟幫手至搵得返，不過成日煩人唔係路亦唔多好意思，就開始上Yahoo拍賣。

其實Yahoo真係好多寶藏，耐唔耐會有人放香港indie同band舊碟，當然有啲係炒家而且炒起上嚟可以好癲，好似搵緊余力機構隻《快活》時Yahoo有兩個人放緊，有隻二手最後炒到$320，就算隻碟絕版我亦好想聽返（同，其實本身我已經有．．．），都唔會捨得俾咁天價去買。最抵死另一個人放隻全新先賣兩舊水，唔知三百二贏到隻二手條友最後喊咗幾耐呢。同，我隻夜冷二手$20，夾埋用咗唔使Yahoo十份一價錢執晒佢哋全線兩隻，之後HMV再執多隻全新都係$60．．．

所以玩Yahoo拍賣最緊要係耐性，好多時肯等都會等得到夜冷價平貨，好似百無聊賴時見到有套亞龍大頭三隻$250，隻《Action Figures》仲要全新未拆，其實聽metal咁多年都冇乜聽過佢哋就執啦，買完之後就有人放平貨，$18隻《大車店》邊度搵呀，三隻分開買夾埋都唔使一舊水。唯有當俾多咗係為套碟99%新冇花仲有側標，加有隻未拆絕版貨囉，雖然買到返嚟都係照開嚟聽架啦，其實蠢咗如果另外買多隻四五十蚊二手，隻全新《Action Figures》過一排再擺上去放可能已經放到$250，不過我份人唔多鍾意呢種炒賣行為只為音樂，係賺少好多錢架喇。（呢個故事亦教訓大家，第時想執平碟記住跟住劉Sir，佢每次買完一隻碟之後好快就會有人放平貨）

其實Yahoo之外facebook二手CD拍賣區都好多寶，好似黃秋生之前搵極唔見，《支離疏》算易搵係唔知點解《地踎搖滾》好少見二手舖有貨，到我集齊之後立即好多人放佢嘅碟標價五六十蚊亦唔貴，但我份人始終比較懶唔慣成日望實有咩執，加上好多頭版碟絕版碟貴到飛起想買都唔捨得，呢個時候就輪到HMV出場喇。

又係靠朋友，唔係身邊有人單聲都唔知佢哋搞全場八折感謝祭，metal碟就算啦我更有興趣掃返復黑王同舊indie碟，小島Chyna浮世繪Raidas呢啲五六十蚊一隻唔使諗見到就掃啦，如果上Yahoo買初版貴幾倍呀，我只求有得聽唔志在收藏時買復黑王已經好足夠，仲要之前猛咁搵余力機構，點知去到銅鑼灣大大隻放喺度冇人要，唔使煩喇俾多六條執埋佢啦。

其實有幾隻碟已經唔係第一次買，黃秋生兩隻一早有，余力機構隻《快活》屋企直頭有最少兩隻，你未經歷過十幾年前嘅聽歌生活，未必明一隻碟點解可以買多過一次。想當年屋企部機harddisc得四十幾激，裝完Windows呀Office呀得返一半，全家人爭一部得廿激harddisc嘅電腦，想燒MP3只可以燒128K仲要揀碟燒。其實128K音質已經唔差，當換咗新機harddisc大咗時，自然想燒返320K追求一下或燒返當年冇燒到MP3嘅碟，但簡單的話就唔使咁煩啦。

當時寬頻未普及加好多碟特別地下band根本冇得download，想聽metal同indie只有靠買碟，每個月份零用份糧差唔多貢獻晒俾各大小CD舖，而住喺香港一大問題係土地問題。我鍾意一隊band慣咗買全線，而一隊老band全線過十隻碟好平常，所以開始聽音樂第一年已經買咗過千隻碟，後來開始收手時屋企已經有三千幾隻碟（但碟仍然會繼續買），已經自暴自棄到一個地步CD櫃都唔用，總之邊個位擺嘢唔會俾老母小，新買啲碟就揳落去啦，問題就係今日買咗隻碟唔立即聽立即燒的話，第二日已經唔知揳咗去邊唔見咗。

所以當一隻CD唔係買嚟儲時會一買再買不離三個原因，一係當你好想聽返或者燒返一隻碟，但首先要面對屋企個四五千隻CD碟海，你會寧願放棄直接買過隻算，好似浮世繪隻《愛花的少年》，第一隻買完返嚟未開已經唔知飛咗去邊，突然心血來潮想聽返HMV又開倉，咪煩喇買過隻再執埋《知道不知道》儲返齊一套啦。

另一個原因就係聽到花。而家嘅人好難想像聽花一隻CD，因為好多時只會開一次燒MP3（我都係），加上而家上網stream就得，好多時買碟只為儲返physical支持隊band，買到返嚟拆都唔拆用嚟擺唔係用嚟聽（我都係．．．）。但十幾年前冇Youtube冇streaming，就算買咗碟屋企部電腦都冇位燒MP3，有啲碟就只有播CD聽，有時粗聽得滯會搞到隻碟花晒聽唔到，我隻黃秋生就係例子。

而最後一個原因，就真係為收藏甚至保育。香港band而家出碟都難，更何況二三十年前？復黑王都叫會幫大band經典碟印多一兩水，地下band當年印幾百隻就永遠只得嗰幾百隻，少一隻就冇一隻再搵唔返，所以就算自己已經有或者唔啱，每次見到都執咗先，寧願第時撞到有心人想要時平放俾佢，都好過啲碟放喺度永世冇人理，最後俾人當垃圾送去堆填區咁浪費。

所以有啲碟，唔會理音樂好唔好同自己有冇，總之見到就會買，余力機構隻《快活》我HMV開倉買呢隻應該已經係第四隻，仲要加埋有兩隻全新未拆，而DSC同Azylum兩隻碟我屋企應該各有最少五六隻。所以我其實有潛質做炒家，當《快活》二手Yahoo可以賣到$320，我屋企兩隻全新賣得晒已經抵返晒呢兩個月嘅買碟錢，加埋其他好多絕版碟，過多幾年可能每隻標一兩百都放到。可惜呢，我份人買碟就真係只為聽音樂．．．

呢個月不停煲呢堆舊碟，聽得出好多味道。Raidas出名在《傳說》，雖然同類歌路當中我都係鍾意浮世繪隻《愛花的少年》多啲，不過一比第二隻時浮世繪就輸好多，《知道不知道》pop好多仲玩到港台節目主題曲咁健康唔太慣，相反band味重過電味嘅《Raidas》就一定係香港band碟中嘅經典，齋聽好鬼靚嘅結他已經好滿足。Chyna隻碟又話有首兩個字長drum solo，點知得分半鐘，同隻碟先得廿幾分鐘EP長度，好在後半唔錯，雖然都好pop，不過當年嘅主流rock/metal係咁大路，你album track玩得夠火我都收貨架喇。

嫌太大路咪聽亞龍大，第一隻碟種爛撻撻真係冇得輸，第二隻碟已經太pop，第三隻雖然唔再metal但玩得幾Alice in Chains，未至於咁多人講到咁差。而聽完余力機構，之後應該要追溯埋天織堂。而家聽返廿幾年前嘅香港band同indie，仍然會覺得好好聽，唔係因為舊一定好聽，而係佢哋其實玩得好前衛，又或者話而家嘅香港band其實有點倒退。

余力機構好多歌根本就係佢哋唔玩幾年之後，王菀之出道頭幾隻碟嘅風格，只不過佢哋玩時啲人覺得好怪唔理，要隔幾年市道轉咗，王菀之再玩大家先開始接受覺得好創新，而佢哋較另類嘅歌好似好Velvet Underground嘅《三分鐘宇宙論》，根本就係好多好多年之後My Little Airport等文青樂隊想做嘅，正因生不逢時令余力機構只能成為一個獨立傳奇。

你唔會預而家仲有人玩synthpop同new wave，但《Raidas》好AOR嘅歌路同而家好多北歐hard rock/heavy metal band玩緊嘅差唔多更加唔會輸，而Raidas特別之處係營造到當時至而家都好少香港band會做或做得出嘅epic感覺。要唔靚要metal嘅，好多人知道亞龍大只因為LMF，但LMF後來已經只餘潮味，想搵返地下感覺咪聽返亞龍大第一隻，當而家嘅香港(metal) band不停追求更靚更新派時，反而失去咗《亞龍大》同黃秋生頭兩隻碟份真誠。

呢個係而家香港band界死結：睇落好似發展得好快、音樂不斷有新嘗試，但實際上落入一個循環，好多廿幾年前嘅香港band/indie artist根本就係玩緊而家嘅香港獨立音樂，又或者話而家香港只係回頭追求復黑王所代表個時代嘅創作高峰。

舊band襟聽唔止音樂多元化，各大小樂隊風格百花齊放，就算一個獨立artist自己歌路都可以好廣闊，但更優勝之處係當時嘅band聽得出感情好豐富，聽同一隊band唔同碟感受已經可以非常唔同。而家嘅band技術同製作資源一定比以前高，偏偏主流感情都係好重壓抑感好低迷，大家想表達嘅好似冇乜大波動大分別甚至唔多想表達，或者更直接只追求節奏同技術走感官路線，用太多電腦執到乜都好整齊好靚嘅新一代錄音製作方式有一定影響。

所以新band會聽，但真係冇太多碟會俾得返舊band嘅感覺同豐富感情，所以每聽完一輪新band新音樂，多數會回頭尋尋根。我相信我會繼續追一排復黑王同舊band碟。哎吔，Yahoo隻天織堂俾人搶咗添．．．

要睇土匪亡靈，因為你知道香港唔會出到一隊土匪亡靈：土匪亡靈無品大匯演

2014最灰係乜？唔係睇唔到Origin，唔係仲未媾到女，而係買晒飛訂晒機票酒店生日個禮拜飛去台中睇山海屯，先知怒人撞正我生日正日搞巨碟發佈演屌週，然後山海屯話會 搞香港站。係灰到貼晒地，因為睇陣容睇班底睇埋隻碟都知，就算為怒人成個演屌週（其實只得兩晚．．．）放棄全個台港山海屯都絕對值得，只有同自己講：

「去山海屯睇到土匪亡靈場處男show，衰唔晒吖。仲有台妹真係好撚正呢。」

點知半年之後，土匪亡靈嚟香港，同場仲有怒人。我已經屌到冇氣了。





其實我好佩服主辦單位，雖然土匪亡靈話題性十足，兩地文化語言到底不同，正如怒人我哋覺得好正，台灣人聽可能完全唔知做乜春覺得聽條鐵，加上喺香港名聲未算好響， 會為佢哋開蒲吧仲要開全場而唔只做半場，實在好勇。

另一勇係搵Mechanix做第一隊，因為音樂上內容上同全場gig主題完全唔夾有點鳩唔搭柒，不過我都明白想喺香港搵到啱呢場show出嘅（奇）band其實好難，世界上有幾多個怒 人呢，神奇膠之類身價又可能太高。好處係可以見識新band，但第一個印象係嫩，編曲同表演都有點亂，雙歌佬但唔係玩拆聲雙聲部、唔會清聲唱和音，只係輪流嗌，兩把聲區別 又唔夠，只好似一人嗌一句等對方唔使咁辛苦，到最後一首歌（似乎係佢哋嘅「single」）先至有清聲後面加把拆聲，但整體根本唔需要刻意分開兩個人唱。當本身一個人都做到 而拆開兩個人做，就只好似歌佬未得所以要搵人分擔。

老實歌同演我都覺得唔太理想，但solo非常非常非常之好，技術夠仲有melody有sense，在這個01001就係咁簡單的breakdown時代，我好耐未試過睇一隊香港band彈solo會睇到

「嘩！！！」

雖然音樂屬我唔太鍾意類新派，為手solo，我好有興趣睇下一次Mechanix演出。





好耐未睇過怒人，半年人事幾番新，今次又新一個班底了，但之前都係一隻新碟一隊band唔算出奇，《屌時代》而家都去到第三個版本啦（雖然我仍死忠地覺得bass跟住 progressive keyboard拍線拍到飛天個第一版係最正）。歌同演方面大家都好熟悉，所以想講係隊band。

姑且叫「雙重鳩鼓宇宙巨樂隊」做MK1、《屌出生天》班底做MK2、而家個怒人大惡隊做MK3，如果話MK2係怒人咁多年嚟實力最強表演最可觀時期，相信冇幾多人會反對，因為 MK2樂隊勁在唔止全情投入首歌帶動到台下都興奮，玩舊歌時亦會加自己風格入去為佢哋注入新生命，而MK3我覺得即使有人有技術，暫時未搵到當時份火花。但第一次齊人出剛剛 開始嗟，bass佬台上面癲癲哋同樂隊表演風格好鬼夾，結他佬《仆街人生》用自己方法將段solo彈到Buckethead噉款，睇得到別於以前嘅可能性，俾時間磨合一下，或者會是另一 種精彩。

當然大家更關心係幾時有新歌？唔係新咗Ｎ年嗰啲呀屌。





「全盛時期嘅怒人，一晚可以撕爛幾多本撕政報告同露幾多次J？」





播咗Ｎ個版本嘅《東京熱》（利申：Tokyo Hot是甚鳩麼？），主角終於上台。我好榮幸睇到上年山海屯土匪亡靈第一場show（代價是放棄怒人用MK2絕響「巨碟發佈演屌週」 同我慶祝生日，我仍然覺得是一個太大的代價），雖然當時只出擺最外面街角位唔買飛經過都有得睇個細台，得三首歌加一首《You Suffer》（好似係），好夾硬先玩到半個鐘， 但全場反應超好個個笠晒絲襪玩到癲，計入座率更加係全場音樂節頭幾名，我呢個普通話半桶水台語更加識條春嘅香港人都覺得場show好撚好睇。而今次中國tour香港站加第一次 香港開show．．．我已經唔知應該俾咩反應。





土匪亡靈音樂就似Ephel Duath隻黑碟，擺明亂咁嚟、有啲位擺明唔夾，但技術練到好勁第一首歌已經俾個gravity blast你歎，全隊表演好紮實，加撈埋好聽好玩喎你吹咩。 唔係彈幾首歌唱完就算，而舖排足全場成一場完整表演，冇錯佢哋依然超少歌唔夠歌又玩又吹水都只得四十分鐘，冇錯你班港燦都係聽唔明到底班友唱乜同想唱乜，但冇人會話佢 哋玩得唔好或者今晚唔好睇，加埋唔知點解特別多事幹彈彈吓斷結他帶播歌又hang機又乜乜乜，如果係其他show遇到你會「屌唔撚係啩咁撚雞」，但今晚出呢啲意外反而令氣氛更 開心更好玩，稱得上現場演出，就係要有呢啲控制唔到嘅突發事先好玩嘛。





而且又唔係鳩玩亂嚟，好似由香蕉a.k.a.太陽花到黃傘帶出一首歌唱晒兩岸兩場革命，玩味之間又可見認真同心思，點解成日覺得外國樂隊（包括大陸同台灣），表演硬係做 得比本地樂隊好、開show比香港band好睇？就係佢哋明白點樣去計劃一場有娛樂有內容有思考空間嘅表演，好似土匪亡靈自稱「綜藝團體」，你會覺得好笑，但正是此綜藝之心， 由佢哋第一場演唱會開始，每一場演出都唔只得音樂咁簡單。

好多人成日話劉Sir只識踩香港band彈佢哋呢方面唔掂嗰方面唔得，但想講一隊樂隊練嘅唔應該只得技術，企得上台要兼顧嘅仲有表演，而睇得外國band多都會體會到，香港 band一個大問題係往往只顧修練前者，而長期忽視後者，需知技術高唔代表就等於識得表演，就如上次 韓國post-thrash metal band Diablo香港當晚，一隊indie band點樣將全晚串連成一場一氣呵成嘅演唱會，佢哋點樣台下只得廿個人（唔夠）都可以好似對住二百幾人表演 咁落力，好老實，我真係唔覺得有幾多香港(metal) band做得到。之但係Diablo玩完第二晚係本地extreme metal大團圓之Metalvolent Returns，呢場爆到癲，而之前一晚Diablo觀眾人數夾埋都唔夠當晚台上全部樂隊加埋咁多，有見及此，我相信有啲嘢其實香港band自己都唔多 會執著或覺得需要學習。





「簽名會用螢光筆簽是那招？？？」

（同埋，蒲吧唔係一向話無煙無酒無粗口咩？但怒人已經出咗Ｎ次蒲吧都未俾人blacklist，今場show張poster可以貼到落大門口大人細路都見到，跟住又露撚又撕爛施政報告 ，我已經唔知道癲嘅係土匪亡靈、係怒人定係蒲吧）





後來先睇到，真係多謝QWERTY的朋友如此抬舉，其實劉Sir一向只出名在用一百個字去寫十個字講得晒嘅嘢，用字數扮到好似好專業噉去呃啲無知婦孺以為佢好Q勁噉嗟。

同通常稱得上／被稱為「經典」，好多時都代表而家已經過晒氣或者收咗皮，哈

現在的香港一定不能給你相同的tr00 metal體會：Still Crazy Fest 2014@KT&G 상상마당，上水，首爾

Lonely Christmas最好的節目當然係回顧返上星期六日場Still Crazy Fest，因為這就是浪費漫長時間的最好方法。TL;DR的話：今場韓國metal fest真係非常非常之唔同，尤其同現今香港普遍metal gig/fest相比時，同去睇metal gig啲韓妹真係好正。

其實好好彩，你會以為南韓喎首爾喎亞洲唯一音樂工業拍得住日本嘅國家喎，過到嚟點會冇show睇呀？就係冇乜，呢邊hip hop同dance pop才是王道band sound難成風氣，連indie gig都好難揾，同唔知點解班韓國人乜都收埋硬係唔俾外國人知，gig已經少仲要放晒喺韓文網站，英文網就唔擺出嚟，唔係出發前有次手㾗上一上Method個facebook，都唔知十二月會有呢場玩足兩晚嘅Still Crazy Fest，仲要係我落機第二個禮拜添。好在個期就到，因為錯過咗今年就再冇show睇了。

又好在個場算近，我酒店搭半個鐘地鐵就去到（韓國火車搭其實唔慢，走咗架車要等好Q耐至浪費時間）。場fest都算個大活動，每三個月一場小gig，年底就壓軸喺上水搞個周末大fest，此上水不同彼上水，首爾個上水係個十足歐洲小鎮噉嘅大學區加消費區，有座每層各有主題嘅藝術中心，場fest喺地庫同蒲吧半場差唔多大細嘅livehouse搞，相信次次開都係呢個場搞，indie metal fest可以做到包起一個幾層樓高嘅外牆直身海報，都算威水。

日本同韓國好鍾意六七點開場，未必真係搭正就開始，但亦唔會好似香港入席同開席之間可以差成個幾鐘，多數遲少少就有得睇。不過你問韓國睇gig最煩惱係乜，要咁早睇唔多慣未算最煩，而係除咗難搵之外，搵到你都未必知自己睇乜，望望張海報就知，全部嘢包括英文band名都得韓文字，好在賣飛counter班姐姐能操一口流利得嚟冇乜難明口音的英語，有得碌卡買飛之餘，仲可以問到全晚lineup每隊英文名係乜。其實好有趣，我嚟咗韓國咁耐，唯一可以大家全英語溝通冇難度，就只得睇show呢兩晚，出返城唔好話商場大舖啦，連旅館睇場都唔太得，而呢個現象亦唔限於韓國，好多本身唔係講英文嘅國家特別亞洲國家，往往最努力學同英文講得最好就係搞show同夾band一班，不過箇中道理，香港班老豆老母唔會明亦都唔會聽。

成日話去外國係體會當地文化同見識其他國家特色，今場絕對做足晒甚至有突。前年去科隆睇Evile，最前嗰位係個輪椅metal友，今次韓國Still Crazy兩晚都係一個盲人霸第一排中間位，跟住係個頭髮長到落腰嘅侏儒。台下亦完全唔似一班睇metal嘅觀眾，長頭髮嘅人少著band tee更加少之又少，兩樣齊的劉Sir已經係望落好metal嗰個，年齡層亦偏高似老豆老母去學校睇自己仔女表演，而且女性佔差唔多一半，見親不離正常出街樣or去party樣or文青樣甚至著到成個時裝model噉入場都有，band樣metal樣嘅女只得幾個。最意外都係音樂方面，因為到場之前只知亦只識Method一隊，結果呢場可能（先至）係成世人第二場唔係extreme metal的metal fest。（第一場係2009年自己搞嘅Hibria + Vigilante，我心目中的永遠最佳metal gig）




老實捧場一大目的係為一別八年的Method，上次係搞佢哋嚟香港落灣仔酒吧開show（仍然係我搞過同睇過嘅show當中最難忘最好feel一場），今次到我飛嚟首爾睇佢哋出show，亦因佢咃我先知道呢場fest。香港嗰邊間酒吧同TRHK都執晒，呢邊佢哋仲撈得幾好，現場反應一流班文青女都high晒，唔同在嚟香港表演集碟之後走咗歌佬同一個結他佬，跟住三年出一隻碟對上隻係2012，而家新歌佬一個人唱加彈晒，同歌路變得更摩登玩到Arch Enemy噉款，但live仍然冇變超級地正，隔咁多年仲可以越來越好咁得人心，呢樣我都估佢哋唔到。而當本身唔叫唱得好拆的Method已經算全fest最恆，就知今個fest相當old school，第一晚叫較新派，起碼仲有Yellow Monsters同Naty，前者睇名會覺有點戇鳩，但音樂幾好夠過癮似J-Rock版Bullet for My Valentine，而且表演粗糙但粗獷得嚟紮實，唔會覺得係鳩玩而真係好識帶動氣氛；後者玩'90 thrash，不過整體麻麻，同第一晚開場玩melodic hard rock/metal隊Kasi一樣，有技術但音樂同表演都唔夠出眾。

雖然我為Method，其他人係為全晚最後兩隊主場地膽。Crash加少少電底歌佬枝咪落effect，有點似九幾頭的Ministry，而當時嘅Ministry其實相當thrash，所以metal底多過電嘅恆歌live拍得住Method咁爽，而且歌路編曲變化都幾大，第一次睇已勁鍾意，難怪會排第一晚尾二。壓軸Zero-G根本就係一班老鬼搞嘅Accept tribute band，歌路同歌佬把聲都好似，又要老派地搵人專唱和音，最後嚟多兩首AC/DC，而第二晚就係延續呢份old-school精神。唔知係星期六事定班底有點偏新派，第一晚只得接近一百人而且較多後生，會有班仔mosh pit然後班女叫班仔去mosh pit之後企前面fing頭的奇景，而第二晚星期日就唔見咗大半班後生而多返老鬼加有大半場人，或者觀眾已反映了音樂走向。第一隊得韓文名隊band已經夠殺，成班人包頭巾爛身爛勢貼身牛仔褲笠多件毛毛褸，歌佬枝十字架咪stand隊嚟隊去，唱唱吓歌又拎條皮鞭出嚟fing幾fing，雖然唔叫太唱到，但在只接受到日系visual的香港，你永世唔會有機會睇到一隊咁Steel Panther嘅本地glam metal band表演。跟住Won又係Zero-G式老鬼speed metal band，最正有個望落幾大年紀仲幾厚妝但成身皮勁有霸氣的bass婆，雖然睇band show有靚女是好睇，但論metal gig有時見到呢種bass婆而唔係bass妹會更好睇。Zihard就係Jeff Scott Soto時期Yngwie Malmsteen上身，結他佬Fender啡到九彩，西裝歌佬仲要cover《I'll See the Light Tonight》（其實更想聽《Faster Than the Speed of Light》），而應該係兩晚最多fans嘅Black Syndrome繼續old-school，成晚根本就係幾隊band輪流鬥高音。全晚只得有點alternative嘅Basket Note較悶局，最後一隊Blackhole又係似之前一晚Crash電底metal，其實幾奇怪，睇牌面應該Black Syndrome先係主角，海報都係第二晚得佢哋有得出band logo，點知最後變咗Blackhole排第二晚最後，但可能仲好因為玩得真係好好，同Crash比Blackhole較重metal而唔係賣變化，睇的話我會揀Blackhole。

之前識嘅韓國metal band只得幾隊而且都玩extreme metal，今次長進不少加睇到好多本地true metal band，感想係人哋個scene可能仲難發揮過香港，睇年底叫多假大日子都可以接近冇gig就知，但樂隊無論玩乜都磨練到好勁，就算係玩到好pop或「唔夠metal」，全隊人都一定玩得齊、表演一定識搞氣氛、技術一定練到好紮實、結他佬一定係solo高手，而個場本身係專門livehouse，環境好音響亦超靚，呢樣香港就應該冇可能做到。全fest睇落好大型一晚有六隊，但用香港人心態入場會覺得有點唔夠，望過吓rundown，每晚目標都係三個鐘內完，即六點鐘開始、每隊玩4-6首歌、連轉場一隊只用半個鐘時間、九點之前完，現實當然冇可能，但兩晚都可以九點半前走得，叫得fest玩咁少好似唔夠盡興，只可以話韓國人慣咗早完場留返時間睇完show去酒吧飲酒，好似第一晚睇完之後場入面hea咗陣，轉頭頭已經全部band執晒包袱走晒咁滯，急到碟都買唔切只搶到隻Crash但買唔到Method，如果同一個班底俾香港人搞？每隊band起碼玩多兩三首歌，六點開場唔玩到十一點半唔准完！但算啦香港自TRHK之後已經冇人會搞呢種非extreme的metal fest，間唔中落酒吧可能會有差唔多活動但規模絕對及唔上，我只有話好耐未試過成晚聽唔到一句嘔泥，同兩晚加埋，我聽到嘅清聲、高音同結他solo，已經多過晒全年香港睇過嘅metal gig總和，所以呢個週末非常滿意，因為而家香港嘅metal (scene/gig)真係俾唔到同一份體驗各位喜歡old-school metal的朋友，就當睇show預祝自己Marry Christmax啦，反正聖誕節幾日只會街都唔出匿埋酒店渡日辰。

仲未完，可能呢個部份先係戲肉。唔知係咪呢邊流行餘興節目呢，完show之後仲有個大抽獎，雖然有時似搞笑求祈執件嘢出嚟就送俾大家，不過好嘢居多，好似第一晚有個獎係一次過送成棟Crash隻EP － 你冇睇錯係一棟十幾隻 － 結果俾條女拎咗，我贏到的話肯定帶返香港派街坊幫佢哋宣傳，而兩晚大獎都係送結他，第一晚俾個metal侏儒贏咗，但其實我更想要第二晚二獎把武士刀。全張飛我唯一識睇嘅就係飛號幾個數目字，但當然抽獎又點會唔係講韓文呢，就有藉口搵囡囡搭訕了。前面提過今場metal fest最唔metal一個地方係入場班女似去party去酒會多過去睇gig，而兩晚都見到一個短髪韓妹，個樣同著衫似似小品文藝電影女角，玩到好high嗌晒跳晒拍晒手，呢種囡囡你去香港嘅metal gig係接近冇可能遇到（唔難理解點解香港十個聽metal九個都係冇前途的毒撚），仲要兩晚都有緣地企我隔籬，抽獎時自然搵靚女幫我手對飛啦，只可惜我唔識韓文，而佢唯一識講的英文係OK，加上我個樣可能真係太毒，結果兩晚過去都冇著落。嚟到韓國我第一次會後悔點解唔預先練定韓文先。

（當然，最大團圓的結局應該是「屌你，好冇？」「OK！」）

每週一相片大行動 2014 Week 51：事隔八年，再遇Method

一別八年，終於再睇到Method，不過上次係搞佢哋嚟香港落灣仔酒吧開show（仍然係我搞過同睇過嘅show當中最難忘最好feel一場），今次到我飛到嚟首爾睇佢哋出show，其實我都係出發前無端端身㾗地上佢哋Facebook，至知道今個禮拜六日呢場fest。

香港嗰邊間酒吧同TRHK都執晒，呢邊佢哋仲撈得幾好，現場反應一流班文青女都high晒。嚟香港表演集碟之後走咗歌佬同一個結他佬，跟住三年出一隻碟對上隻係2012，唔同在新歌佬一個人唱加彈晒，同歌路變得更摩登玩到Arch Enemy噉款。但live仍然冇變超級地正，第一晚入面六隊排第三，已經可以肯定成場fest最受歡迎佢哋一定有份。只可惜玩得四首歌，絕對唔夠喉。

當好多十年前接觸過嘅band已經因為種種現實問題消聲匿跡，Method隔咁多年仲可以越來越好咁得人心，呢樣我都估佢哋唔到。

每週一相片大行動 2014 Week 49：一張圖，道出一個metal友對Clockenflap對metal的感想

知唔知點解Clockenflap 2014閃靈出個台叫Your Mum？因為直線相隔幾十米就係文青台，佢哋表演時隔籬經常有人大叫

「細聲啲呀你老母！！！」

今年係七屆以嚟第一次睇Clockenflap，或者期望有點高心態亦不太同，作為香港全年最大音樂藝術節，老實內容同製作質素比我心目中差得都幾遠，上面只係其中一個不足，而我第一日第一刻已經中伏。去過西九都知有打對角兩個入口，主辦單位編咗一個職員同樂隊用，一個觀眾入場，但完全冇指示邊個打邊個，我係去到樂隊入口個閘口，俾埋人查飛，跟住叫我等陣等咗幾個字，先至有人同我講「你應該過去另一邊個閘入場。」然後話五點開閘，點知遲咗差唔多四個字至放人入去，你知由碼頭行入去條路已經唔係短啦，中間仲要俾人摷吓袋check吓飛，夾夾埋埋又冇兩個字，最過癮係第一隊band五點開始玩。唔緊要我本來計劃係第一隊睇Thud，又是過癮，唔係話五點九至開始咩，我去到佢哋個台先五點半左右嗟，點解隊band已經玩咗一半？唔計記者連我在內都唔知夠唔夠十個真正觀眾，要一隊好band對住塊空地表演，見到都灰。三日以嚟經驗係時間表其實冇乜太大意義，已經試過唔止一次時間表內容同實際情況完全不符，早知係噉我禮拜五就唔使特登請全日假四點未夠就過到嚟，反正結果都係差唔多七點至正式有嘢睇，我呢期又中港城返工咁近，早知就六點收工至過嚟好過啦。

（話時話，本場刊勁厚超落本，跟場刊張flyer個時間表畫得幾靚幾清晰，點解全部設計官網都見唔到？網站個時間表第一個版本直頭好似中學生做功課完全睇唔到幾點咩台邊隊打邊隊，跟住改咗設計好少少雖然依然樣衰，作為咁大個音樂節，呢方面會唔會唔夠專業呢？）

話晒搞咗七年，由免費搞到而家幾貴飛都有人制，香港難得可遇之強大班底自然是賣點，不過為拉觀眾入場可以去到好盡，為求一網打盡有乜band肯嚟都搵晒先，結果反而多band得滯，最多人鬧係幾乎全個fest最多人想睇嗰五六隊band全部排同一晚出，仲要係好多人嚟唔到嘅禮拜五。冇錯牌面的確精彩，聽實Ｑ講最後一晚單大台睇The Flaming Lips已經爆場12,000人，仲未計其他台人數，之前兩晚情況相信亦差不遠，場面十分墟陷，問題係此情此景係靠犧牲堆砌出嚟，好似第一晚要我放棄Mogwai睇閃靈，最後一晚又要The Flaming Lips同張懸之間做取捨，睇時好爽，但之後硬係覺得蝕咗唔開心，編排實在唔太理想。

要解決編排問題唔係冇辦法，一係加台囉，不過環境所限唔太可能，而家只三個台都已經咁鬼迫，眼中是The Raveonettes但耳中是Shepherds the Weak確係幾超現實，加上其他所謂細台即D場只得帳幕仔，台係得咁多架喇。另一個方法簡單得多，台與台之間協調咪得囉，三個主要舞台分別運作個方案幾好，主台Hardbourflap專做大band，Replay走文青同party路線，Zippo一向極力支持地下樂隊，所以佢哋主理個Your Mum Stage音樂多元化之餘，亦係全場音樂而非音量最嘈一個，好似第一晚Shepherds the Weak然後閃靈，中場播Pantera，其他台邊可能見到？只係同樣聽落好理想，現實兩個細台感覺好似外判出去做，而主辦單位同兩間「外判商」冇乜協調，搞到成日三個台一齊開波然後一齊完，結果全個fest做得最多就係等下一輪三個台一齊開場，同每一晚都係只能魚或熊掌的抉擇。點解唔會大家傾好先，一個台表演時另一個準備，到A台節目完大家就可以立即趕去B台睇下一輪？而家搞到好似比賽噉，三個單位同一時間開show鬥邊個台多人睇，而唔係齊心協力搞好一場音樂節。更大鑊係除咗Harbourflap每晚重頭戲真係稱得上靚聲之外，其餘九成節目音響都係非常唔掂，點解咁多soundman鍾意係唔係都推爆bass，推到除咗低音乜都聽唔清楚，再震到台前冇人敢企至開心？事實是上年自由野大台，古典鋼琴民歌搖滾hip hop blues hardcore乜風格都有比Clockenflap更廣泛，但全日冇任何一個環節你覺得推聲推得差。Clockenflap規模是有國際水準，但製作上仍需努力，作為一個大型音樂節音響卻幾乎不合格，是很大致命傷。

你話因為Clockenflap唔係單純音樂仲係藝術節，幾乎每兩場show中間都有成個鐘你消磨，係俾你多啲時間去其他細台如D場同藝墟發掘，我認同，好似令我有機會睇多次《打轉教室》，同Replay Stage睇完Rodney Branigan嚇親之後跟佢過隔籬酒吧草坪細台睇多次，的確呢份找尋驚喜先似睇fest，只係當你時間表已編得唔係好又成日唔跟住個表做嘢要人走嚟走去撞彩，搵到有嘢想睇但好多人都係圍埋大聲吹水嘈住晒（屌你老母睇Tenacious D時前面條仔擺明唔係睇show純粹溝女，傾偈把聲仲大過台上Jack Black，阻撚住晒到連企我側邊條女都頂唔順屌佢老母），消費又高食細細隻熱狗都收你五十蚊飲杯汽水又二三十（大佬，我去Summer Sonic食嘢都唔使呢個價位，仲要相同價位係食得飽唔係只夠揳牙罅），咪搞到唔係成班人嚟玩只一個人一心入嚟睇表演嗰班越行越冇心機囉，所以我睇完頭兩日頂唔順，禮拜日瞓到兩三點至起身，都冇覺得冇睇半日好傷，因為已經當咗五點甚至七點至係正式開場嘅時間，遲啲嚟仲可以出面食餐飽至入嚟慳返筆。同其實主辦單位自己都有意無意將音樂凌駕其他啦，正如宣傳重點之一家庭樂一家大細都有嘢玩，但係個遊樂場好細而且唔多設施玩，仲要同D場迫埋一齊有時嘈親班細路，而且冬天個天黑得快，但家庭區係完全冇燈，基本上六點已經摸黑冇得玩冇得搞藝術，結果咪又係趕晒全世界去三個大台同幾個D場帳幕，冇得俾你同班細路開開心心去公園玩，理得你班老豆老母同小朋友死？

第一次睇Clockenflap，印象真係麻麻，又衰唔晒，始終政府最大德政就係西九劃咗塊地咁多年都完全冇作為，大家先可以幾年嚟有一大片空地加無敵海景做咁大場音樂藝術節，只可惜似乎呢個政府永遠唔會做啱嘢，跟住西九就會封兩年，好難再搵到個同樣咁靚咁好景地方了。而且呢種場合鬼佬一定佔最大比例，而多鬼佬就是好一向是文青指標，亦即係肯肯定呢個禮拜五六日大把文青囡囡同國際學校學生妹。同唔係有Clockenflap就唔會有一個俾Zippo打骰的舞台，唔係有Your Mum Stage閃靈X國樂團呢個組合冇乜可能嚟到香港，雖然只出得全場最僻最細個台、雖然音響真係撻晒Ｑ，睇閃靈真係好好feel，因為佢哋份態度同成個Clockenflap相反完全唔離地，同個細台一樣接近民眾，呢一點佢哋之外只得唱到俾人cut show（好似係）的My Little Airport做得到。但係呢份腳踏實地，你都估到，只容得下於小台，對主辦單位嚟講，講到metal只有Tenacious D之類至叫入流上得大台，作為一個metal友，呢張圖道出晒我對Clockenflap處理(indie) metal的感想。亦相信之後唔會有咩大改變／進步。

會是可一不可再的香港站吧：Gacharic Spin 5th Anniversary Gachallenge 「Winner向前走」中國巡演香港站

（TL;DR的話，直接飛到尾啦，有正嘢睇架，口桀口桀）

命呢家嘢冇計，雖然九展隔籬返工聽落好爽，但每逢撞正九展或者Hidden Agenda或者樂人地帶有show嘅返工日子，十次有八次唔係晏晝先有客急call出去另一個場做嘢就係要OT。早排幻日 X Evocation撞著個客死server，場show完咗我都未收得工；大前晚就係見魏如萱又去九展開演唱會，諗住放工過去walk-in，點知頭先講兩樣嘢打孖上，返到屋企仲要開電話會議開完又差唔多十工點，只有話好在之前冇買定飛。錯過咗好睇的兩場，就只好講返好耐之前呢場，其實想寫好耐，不過太忙加太懶。（between，見字呢晚本身係花倫演唱會，點知就係今晚有得九龍灣早收工，HA先話花倫嚟唔到香港開唔到show，真係R.I.P.，我話我）

應該係成世人第一次一年內睇一隊外國band睇足三次，五月連睇大阪同名古屋兩場（雖然兩晚都唔係為睇佢哋），十月居然會嚟香港，半年內就睇咗三次Gacharic Spin。為佢哋仲破埋戒，作為一個九龍城人真係唔太鍾意過西灣河蒲吧，雖然屋企樓下就有巴士直到，但一程要搭成個鐘，而呢晚係史上第一次會平日日子仲要星期三收工過蒲吧睇show，大佬睇完返到屋企都差唔多十二點，第二朝又要早走身返工，好支力架。不過是值的，雖然今次Gacharic Spin香港站，冇想像中咁精彩。

又要講返五月頭。過日本其實係想睇WW Face呢個女band metal fest，主要為我覺得好Ｑ正的Light Bringer（年中睇完，年尾隊band就話出多隻碟就收皮了，近得劉Sir果然好易R.I.P.），同場仲有Gacharic Spin，同埋GS隊band搵埋LB個超勁歌妹搞的side project DOLL$BOXX，因為呢個line up可一不可再而會兩日內去晒大阪同名古屋。一直冇寫返兩場show又因為懶，簡評的話，Light Bringer最正經同一早預期係點，隊band好叉勁音樂十分Angra，滿足，但冇驚喜；不論製作本錢只論表演同音樂，DOLL$BOXX絕對勝過Babymetal同我見過之任何日本女子metal band，強在自己玩樂器而全隊技術高超，全隊演得落力又有舞台表演，同時自己寫歌而風格完全冇人似佢哋，可惜只當side project，所以好難出live同出新碟（而家LB散咗會機會大啲啩）；最後一隊Gacharic Spin，三隊當中佢哋最紅好多碟更超多表演，不過啲歌我真係聽極都唔鍾意，似輕量版DOLL$BOXX而且輕得都幾多輕到有點平淡，不過表演好睇因為有兩個囡囡專責跳舞，而且兩晚表演可以有一半歌唔同，真係抵落本加咁辛苦走嚟走去睇晒兩場。

佢哋唔係第一次中國tour，不過係第一次tour中國而會出香港，如果唔係之前睇過知道佢哋live係點我未必會睇，因為音樂始終唔太受但表演真不錯，另一個原因係WW Face時其中一個dancer腳傷得返一個跳，今次捧場想見識兩條女一齊跳係點。其實今場幾似名古屋，當晚個場都同今晚蒲吧半場差唔多size，不過用更大面積做舞台同有百幾枝燈好鬼pro，同當然台下人數完全冇得比啦，你諗吓蒲吧開半場而個台霸咗一半位然後再企滿人會係點？setlist都差唔多，但會話齊兩個dancer反而冇想像中咁精彩，可能WW Face另外兩隊都係恆band自然玩多嘈歌，自己solo就轉返「大路」，所以多咗pop rock歌同慢歌，抱住睇metal gig心態感受始終差啲。同埋好過癮，中國tour依然係用新碟《Winner》做主題，點知居然冇玩到首主題曲。

睇就依然好好睇嘅，大部份道具gimmick嘢都有出，係估唔到之前腳傷個dancer，即係左手邊個樣十足純情學生妹應該入偶像組合唱吓歌仔就算完全唔夾隊band嗰個，原來跳舞仲勁過另外一個，有首歌揹座keyboard俾琴妹同結他妹鬥solo，名古屋嗰場係座keyboard冇聲跟住琴晚爆肚9up solo。雖然台下就真係幾淒涼，我諗都有六十人嘅，不過有幾個日本佬fans（真係佬）帶齊道具又熟晒邊啲位做乜動作，Gachiac Spin音樂唔算頂級，但現場好睇就係呢種娛樂性，同台下少人都好，隊band都唔會hea過日本主場表演時，不過論表演、論音樂、論台上台下整體，其實更想睇根本係同一隊band嘅DOLL$BOXX。Gacharic Spin音樂大路嚟講係得、樂隊技術係夠、表演亦絕對勁，但某程度上得到更大成功，在於囡的身份，我用例子答你：

如果係劉Sir彈一段Joe Satriani你聽，你會話「屌！彈呢啲。」但如果係個糖妹噉嘅靚妹彈段Joe Satriani你聽，你就會話「屌！！！彈呢啲！？！？！？！？」佢哋技術唔係其他（全女）band做唔到，King Records同Bright Star Records近幾年已經帶出大量技術派全女metal band，但係睇住bass妹狂slap、結他妹狂tap、鼓妹狂double bass，加十分melodic的metal底，即使聽碟麻麻live見到總有點震撼，尤其現場送多兩條女跳舞你睇呢。而DOLL$BOXX就係Gacharic Spin原班人馬唔要兩條dancer唔要全部pop rock歌慢歌，然後將佢哋隻J-dance-pop metal玩到thrash咁滯，再搵埋Light Bringer個超長氣超高音歌妹唱爆咪，然後加返少少動作舞步，雖然只出得一隻碟，但一隻碟加睇一次已經足夠成為我最愛嘅日本女子band。只不過metal的代價就係forever underground，所以DOLL$BOXX明明音樂最好，偏偏只出得一隻碟，而GS越嚟越pop，因為要搵食；要metal就Light Bringer，但玩埋今年都摺了。近幾年好似佢哋正正經經玩metal仲要玩得好嗰班女聲metal band其實唔少，只可惜Babymetal贏的是資本，有點似四大天王時代的反唱作歌手反實力派的香港樂壇，你寫歌好、技術勁，又點？我有大公司包裝同宣傳，吹咩？雖然我都係Babymetal fans，不過，老實，有得揀，我寧願睇DOLL$BOXX都唔睇Babymetal囉。唯有希望WW Face反應咁好（如果唔係去山海屯，我八月頭會飛咗去睇東京場加場），Light Bringer又唔玩，兩邊會有心夾埋出多隻碟啦再tour啦。

最後一樣想講，係就算今場show到頭來唔好睇（好在唔係），你都冇乜好怨，因為一隊咁勁嘅日本band嚟香港表演個半鐘，仲要開蒲吧有勁燈光大舞台，仲要到場至知原來有Ever做opening，先至收$120 － 冇錯係百二蚊你冇睇錯，一個睇本地band都可能唔得嘅價錢，我都唔知係咪收錯我錢。唔知係搞手經驗唔夠定點，唔係第一次tour中國不過係第一次搞香港站，或者以為香港物價指數加觀眾人數都會及得上大陸，結果就用大陸飛價錢喺香港開，但在香港知名度唔夠，加上差唔多開show一個禮拜之前至公佈仲完全冇宣傳，其實今晚有五六十人，已經比我想像中多，論演出性質同規模HA會更夾，但蒲吧個台先配合佢哋活動大嘅舞台表演。或者搞手唔知中國同香港之分別，或者對呢個「國際都會」太有信心了，所以Gacharic Spin嚟香港相信可一不可再，聽過好多搞手講，好多band搞中國tour都唔會有香港站，因為就算大陸非常叫好叫座，好多時大陸賺埋條數都唔夠香港開一場蝕埋條數，大佬一隊出show觀眾以百計嘅band嚟到至得十份一人捧場，計晒飛錢商品錢都未夠填場租啦，仲未計食宿交通機票呢？而且之前一晚可以對住幾百人表演，點知今晚得幾十，搞手同樂隊見到都未必有癮啦。

好好彩抽到167號飛，而呢張167會成為我永久珍藏，因為我擔心佢哋唔會再嚟香港，可能真係等DOLL$BOXX有新碟出時，再飛過日本睇WW Face Round 2啦。

（between．1.0：想知DOLL$BOXX有幾正，睇睇呢個《Take My Chance》MV就明，最過癮係日本睇佢哋出live，台下真係同個MV一樣成班毒佬架，冇錯係佬勁多阿叔仲多過後生毒撚）



http://youtu.be/mu2z4Uf9Tgc

（between．2.0：又驚你錯過，其實個bass妹係水著女嚟架，口桀口桀）



http://youtu.be/6LXM-xxyLf8

憑Wintersun對《Time II》的堅持，Jari Mäenpää行動解釋俾香港人點解唔可以袋住先

Wintersun’s Jari Mäenpää and Nuclear Blast Have Kissed and Made Nice with Each Other

http://www.metalsucks.net/2014/10/03/wintersuns-jari-maenpaa-nuclear-blast-kissed-made-nice/

好耐未寫過有關metal文章，今日特意寫寫，因為對現今香港時局，呢單新聞有一個啟示。

Wintersun最出名係可以用差唔多十年出一隻碟，原因係唱片公司只俾好少錢佢去做隻碟，視野廣成本卻有限，《Time I》就係半妥協之下完成，好多部份只有用家中器材完成，可以聽得出製作方面有相當多瑕疵。所以《Time II》Jari Mäenpää決不讓步，一定要入專業錄音室錄音，只係單憑唱片公司微薄資助冇可能達到目標，亦因合約所限唔可以經群眾集資，結果一拖再拖。

當中可以帶出好多議題，例如可以話佢太理想化唔現實，幾多樂隊錄音連搵似樣少少嘅器材錄音都做唔到？既然唱片公司俾得你係得咁多，「袋住先啦！」其實Jari可以同《Time I》時一樣，有幾多錢就使幾多出咗隻碟至算，「話唔埋之後唱片公司肯投資remix remaster呢！」不過佢選擇全力堅守立場，長時間爭取之後，終於輪到唱片公司讓步，批准佢用自己要求嘅方法 － 群眾集資 － 去達成目標。雖然過程辛酸亦用咗好多年時間，但最後爭取到嘅，係真正想要嘅成果，而唔係一個過後連自己都面對唔到嘅不淪不類結果。

凡事總要貫徹。今天你是金鐘派還是旺角派，請自行選擇。

每週一相片大行動 2014 Week 31：怒人 X 劉Sir 屌出生天

By courtesy of Vic Shing@Music Surveillance
http://www.facebook.com/shingvictor
http://www.facebook.com/MusicSurveillance


[ZukSession x Rock Motel 純粹組團 呈獻 怒人-屌出生天牙插騷] Full Gallery:
http://www.facebook.com/media/set/?set=a.740242069355023.1073742229.185833024795933

每週一相片大行動 2014 Week 28：要一面搭車一面記怒人歌詞再一面唔好嚇親人，其實好難

今晚「屌出生天牙刷騷」rehearsal，雖然怒人啲歌已經聽過無限次正宗聽到識背，不過叫我立即唱又未至於100%背得晒出嚟，你試吓就知架喇其實怒人啲歌詞好蹺口好陰濕架。特登印咗成疊歌詞方便搭車時記，不過啲字較到好鬼大粒成日嚇親其他人，「嘩張紙寫咁多粗口嘅條友黐撚線架！」所以後來唔敢拎出嚟拎部電話睇歌詞算，仲要將啲字縮到仲細過報紙字size驚死俾人望到，不過因為經常記吓記吓就會順口地唱咗出嚟，搞到次次搭車都係上車之後好快冇人敢坐／企我附近。

怒人屌出生天牙插騷暨劉Sir破處show倒數] 倒數第四回：低俗得義無反顧（吹呀！）：香港新一代粗口歌王怒人專訪（中）

怒人五部曲．第四章：
低俗得義無反顧（吹呀！）：
香港新一代粗口歌王怒人專訪（中）

http://lau-sir.com/http://lausirisual.blogspot.hk/2013/05/kowloon-metal-city-track-25.html

今個星期六就係「怒人屌出生天牙插騷」，又問我點解要睇？因為呢場係空前絕後你一定未體驗過嘅show，唔係band show而係一場talk show，一場你都有得玩埋一份嘅talk show！

． 鳩先預屌，搶先現場感受全隻新巨碟，為八月演屌週熱身

． 劉Sir現場專訪，俾大家深入理解新碟每一隻碟背後嘅小花絮大道理

． 怒人加樂隊成員同大家分享兩年嚟嘅心怒歷程，回顧第一隻EP，解構入今隻新碟，仲有第二隻巨碟都未開始賣，已經有嚟緊第三隻巨碟預告！

． 嫌劉Sir問得廢的話，觀眾都可以參與一份訪問怒人，問乜撚都得，至怕你問得唔夠柒！

． 當然仲有禮秘禮物！


怒人屌出生天牙插騷

http://www.facebook.com/events/1506533086242403

日期：2014年7月13日

時間：20:00（19:30開始入場）

地點：Zuksession

地址：灣仔盧押道18號海德中心5樓（灣仔地鐵站C出口）

票價：$100 預售 / $150 即場（包一杯飲品）


怒人Facebook: http://www.facebook.com/NoYanDiu9Nei

怒人係火陷, 係暴燥, 係不滿, 係青春, 係衝動, 係幼稚, 係發癲, 係戇鳩, 係痴線, 係笑聲, 係屌聲...屌!

怒人N年前係一人樂隊, 依家係一隊N人樂隊

On Drums: Tim

On Bass: Jacky

On Guitar: Jason, 怒人

On Vocal: 怒人

On鳩: 香港資深五金業工作者劉Sir


七月十三日，金屬狂人 vs. 金屬傻人

[怒人屌出生天牙插騷暨劉Sir破處show倒數] 倒數第三回：低俗得義無反顧（吹呀！）：香港新一代粗口歌王怒人專訪（上）

怒人五部曲．第三章：
低俗得義無反顧（吹呀！）：
香港新一代粗口歌王怒人專訪（上）

http://lausirisual.blogspot.hk/2013/03/kowloon-metal-city-track-24.html

上回同大家講咗怒人八月頭筳開兩場，點解仲要十三號晚去灣仔ZukSession睇佢？咪因為要嚟俾只得呢晚會上台嘅劉Sir屌柒你囉。今次就到好多人話Vader又係十三號晚出，撞show點睇呀？雖然軟飯你呢世人都未必食得到，但要食兩家茶禮其實唔難。

我用例子答你：怒人場show八點開場，我當八點三至開波啦，主題係解構新碟，假設個幾鐘玩得完，到時先至九點幾嗟，以大多數大band show起碼遲大半個鐘至開場嘅傳統，可能怒人玩完另一邊先至開始冇耐，立即飛地鐵過HA，好彩的話去到嗰陣第二隊opening都仲未落台。

上面講咗乜鳩，自己參透吓啦。邊個話怒撚與Vader不可兼得？


怒人屌出生天牙插騷

http://www.facebook.com/events/1506533086242403

日期：2014年7月13日

時間：20:00（19:30開始入場）

地點：Zuksession

地址：灣仔盧押道18號海德中心5樓（灣仔地鐵站C出口）

票價：$100 預售 / $150 即場（包一杯飲品）


怒人Facebook: http://www.facebook.com/NoYanDiu9Nei

怒人係火陷, 係暴燥, 係不滿, 係青春, 係衝動, 係幼稚, 係發癲, 係戇鳩, 係痴線, 係笑聲, 係屌聲...屌!

怒人N年前係一人樂隊, 依家係一隊N人樂隊

On Drums: Tim

On Bass: Jacky

On Guitar: Jason, 怒人

On Vocal: 怒人

On鳩: 香港資深五金業工作者劉Sir


七月十三日，金屬狂人 vs. 金屬傻人

《把握今天》可能係港共政府有央以嚟拍得最好（同最metal）嘅廣告

http://youtu.be/-Qtu5C9nu6k

政府最新個戒煙廣告好正喎，又化到成班友喪屍噉款，又影佢哋成身刀疤傷㾗，又影第一身視點俾醫生開刀做手術又拍吓內臟郁吓郁吓，點睇都覺得個導演本身係拍death metal MV，不過拍完俾政府買斷咗條片至變咗做戒煙廣告。我本身唔食煙，但睇完個戒煙廣告之後反而好想試。

政府廣告一向7 or on99，不過逢係同毒同煙有關，好多都拍得好正好有意境。