熱門文章

2014年5月29日 星期四

每週一相片大行動 2014 Week 22:估唔到我呢個偽IT人都有機會(被擺)上IT網




高登每次有人出post講午餐肉,陶傑抽水文之外另一篇必定有人share就係劉Sir death metal式開午餐肉潮文 ,令劉Sir得以同十九才子齊名。今時今日冇讀過電腦都可以入IT公司做IT人都未算奇,奇在估唔到呢個偽IT人偽到unwire會問劉Sir俾料。首先睇睇:


"Man vs. Machine: The Modern Metal Drumming Dilemma" by Lau Sir, 2014/1/3


http://www.facebook.com/matto.lausir/posts/10152142406410928


http://www.facebook.com/AgentsofFAME/posts/175883489288539


http://www.facebook.com/Metalababy/posts/436315473156897


跟住再睇睇:


《當樂手不再需要樂器》@unwire, 2014/5/25


http://unwire.hk/2014/05/25/musical-cant-take-the-beat/column/


http://www.facebook.com/unwirehk/posts/10154304107675495


咦,朋友,好熟面口喎。我666%敢講六翼天使十年前去歐洲錄音時鼓佬自己落手打鼓唔用鼓機嚇親錄音室班鬼佬段經歷,劉Sir絕對係全球獨家同大家分享的醬油,即係unwire諸位兄台唔俾返credit劉Sir唔緊要,好心就唔好學埋晒蘋果記者上高登抄文當新聞仲要唔!MOM唔抄的衰野啦,六翼天使錄鼓同華爾街講當今metal鼓手錄音用鼓機都唔自己打,我差唔多半年前寫已經寫喇。照dup又唔credit都唔緊要,一係噉啦其實我係unwire數碼天使專欄fans,一向覺得unwire去function影相影showgirl同借試機為名搵囡囡私影影得唔錯架,不過好衰唔衰唔賤格唔學學埋晒大陸forum要做會員再回覆先有得睇全集,好喇到我終於鳩痕到頂唔順特登為目及女申請個forum account,點知跟住差唔多成年都冇新女上場。即係肯學學3C4U噉勤力影女再勤力執相做福人群就OK架喇,如果仲會每次出完function超高速有相仲要唔使搞東搞西可以直接睇晒model靚相全集的話,幫埋手唔收錢寫鱔稿我都制呀,最好當然係寫稿之餘可以去埋活動實地考察一下啦,口桀口桀

2014年5月25日 星期日

這是至目前為止最接近完美的美漫超級英雄電影:《X-Men: Days of Future Past 變種特攻:未來同盟戰》

冇幾多套戲係充滿期待地入場,睇完可以心滿意足地離開,特別漫畫改編電影出名十套有九套唔掂第十套至叫好啲啲,《X-Men: Days of Future Past》雖然未算完美(中文名唔直接叫平凡但更貼切嘅《未來昔日》硬係要乜叉同盟戰已經是個遺憾),結果大大超過預期彌補晒上幾集嘅平庸甚至失望,前日睇咗一次今日立即睇多次,仍然覺得非常好睇值得一睇再睇,只恨香港冇上IMAX版。我敢講之後嘅美漫改編電影,冇幾多套可以超越得到佢。


相信Fox好想套戲可以早一年上,因為《Days of Future Past》係講2013年美國俾本來設計嚟狩獵變種人嘅機械人Sentinel統治(記得細個電視播卡通版改咗個好型嘅中文名,叫狩獵龍),變種人同有關係嘅人類成為社會最低下階層一係死一係俾狩獵龍捉入集中營。其實睇牌面已經知道冇得輸,因為本身只係個兩回完故事,但世界觀夠晒絕望加上時光倒流改變歷史橋段,兩回已夠成為經典,而X-Men系列之前幾集已經唔算特別好甚至俾人鬧,加上Marvel自己開始拍埋戲冇幾多套失手,只屬版權持有人嘅Fox要面對Marvel Studios兼背負辜負X-Men呢個品牌嘅罪名,加動用到一個神檯級故事做劇本,已經係只許勝不許敗嘅背水一戰,最後成為一套9/10嘅美漫電影,我覺得係導演同Fox終於知道大家想睇嘅係乜。


美國佬最鍾意拍商業戲又要懶有抱負有深度,結果擺好多時間落無關重要人物同枝節解釋劇情,搞到出現大量冇意思文戲浪費時間拖到慢晒繼而打得唔夠盡興(《哥斯拉》...),點知今次導演好勇喎假設好多嘢例如角色背景大家已經知道索性唔多解釋,其實好事嚟因為符合觀眾所求,正如我睇哥斯拉都係想睇幾隻怪物打摔角嗟,你唔需要同我好詳盡地解釋佢哋係點樣嚟邊度嚟、講佢哋打交時班人類做緊乜嘢。導演就係勁在之前咁多集故事加上DoFP係一個唔算簡單嘅概念,開場唔使幾耐三兩下已經精簡交代晒非常明快,過程亦唔會強求「深度」而一味加好多畫出腸甚至無謂對白扮到內容好充實,即使打戲唔多亦唔算打得非常勁,整體唔會空洞節奏亦唔覺慢或失控,人物對白角色交流一切都係剛剛好。(雖然仍然要cliche一下,改轉歷史關鍵一刻,其實磁力王一拎到槍立即落手已經搞掂收得工反正當時嘅佢就係咁冷酷無情,當然硬係呢個時候先要做一大輪感情戲結果搞禍晒,跟住套戲又要做多成個鐘先至完得場)最重要係今次主角終於唔係狼人,而俾返好多戲Mystique同磁力王做,甚至可以話Mystique至係主角,雖然臨尾磁力王條頸中咗槍都可以唔流血仲若無其事噉閃人呢,就真係好鬼吹脹嘅,就同原著係Kitty Pryde返到過去帶領X-Men改變歷史,電影版為咗繼續食Hugh Jackman條水,夾硬將Kitty Pryde由只識得穿牆講到仲識得將其他人意識穿越時空,所以結果唔係佢而係狼人回到過去咁吹脹 。雖然我明狼人做絕對好睇得多。


另一樣成功係今Fox拍到一套好睇得嚟屬於自己而唔似Marvel Studios出品嘅Marvel電影。咩係Marvel Studios電影風格?即係經常出現笑位加拉頁式浮誇場面,換言之搬上螢幕仍然好重漫畫感覺,而《Days of Future Past》就完全揾唔到呢份漫畫感,全靠氣氛營造得好,未來世界唔算出好多時間已經夠晒敵托邦,笑料留返1973年至玩但唔會玩過龍同時保持凝重。兩個時空打戲規模都唔大,但未來係噉死人非常灰,過去打鬥係歷史場面一部份,感覺真實同切身得多唔會話好似為打而打。唔係冇人才冇方法,某程度上佢哋限制比Fox更少,點解Marvel反而咁多年都拍唔出一套同樣能夠令人覺得認真嘅美漫電影?你可以話始終Marvel好多最嚴肅最沉重嘅故事都出自版權賣咗俾Fox嘅X-Men,呢個亦係Fox嘅優勢。


同唔知點解Marvel自己開戲啲CG硬係好鬼死假,Fox就睇得出畫面用色、拍法同CG高起碼一班,而且打鬥唔多唔大但好識得做場面,好似Quicksilver個look好潮童,仲要著住1973年最潮嘅《Dark Side of the Moon》,但係條友演得好鬼入格,每次出場全部人都笑到仆街,越獄一段直頭夠成為經典。范Blink Blink雖然戲份唔多而且全套戲唔計俾人殺時尖叫只得一句對白(不過都未使包艇,火仔好似仲少出鏡,同由頭到尾「對白」只得噴火「嘩!!!」同俾人殺「呀!!!」),唔會預有咩戲做,但呢個Blink look真係超型神情亦叫交得足貨,同佢招傳送門真係整得好鬼靚用得好特別。睇完《Days of Future Past》好耐之後,你仍然會記得范Blink Blink同Quicksilver,但係睇咗咁多套Marvel Studios戲,又有幾多場面到而家仲覺得印象好深刻呢?


當然另一醒係用到時光倒流呢個永遠充滿吸引力嘅題材,因為當中必定充斥無限悖論,好似《未來戰士》唔係Terminator回到過去就唔會有Skynet、John Connor唔送自己老豆返去以前就唔會有自己,《Days of Future Past》就係X教授冇要狼人返到從前教化自己,就唔會有之後嘅X教授出現,而拉埋會改變歷史、創造新時空時就更加多嘢玩(印象中戲入面好似有幾句對白係有意無意講之前嘅X-Men同狼人電影唔多掂,哈) 。只係整體有點太含糊太空泛,特別拉埋上幾集時,好似話有Days of Future Past 全因Mystique殺咗Bolivar Trask跟住俾人捉咗去做實驗,但睇返原來咁多集又唔似真係發生過呢回事,正如當七幾年已經有狩獵龍時,之前咁多集冇理由冇出現過。同點解歷史只會變好唔會變差,正如救咗磁力王出嚟嗰刻歷史其實已經改變咗,點解唔可以係因為磁力王越獄令全世界肴底立即開始種族屠殺,唔使有未來版狩獵龍已經冇晒變種人?又既然有狼人就可以返到從前,點解唔可以再返更前,直頭Trask未出世/未發明機械人之前就殺咗佢?當然最大謎團係,X教授喺第三集死咗,後來點樣復活?隱藏片段話佢個思想入咗另一個人身上復活呢樣嘢我唔會接受,可以個樣一模一樣仲要又係坐輪椅?然後狼人第二集最尾(唔知點解復活嘅)X教授同有返超能力嘅磁力王喺廿一世紀Trask Industries開始有研究成果時一齊去揾狼人幫手,時間同Days of Future Past相隔十幾廿年,兩者點樣連結得到?


老實,我都唔會預期佢解得通甚至會去解畫架喇,更關心係嚟緊下一集會點。《Days of Future Past》劇本真係好好,好完整(唔計頭先講堆bug),同理正言順地reboot唔會下次睇會戲名一樣但入面乜都唔同晒樣同之前冇乜關係,而post-credit已經話你知下一集就會係《Days of Future Past》之外另一個X-Men經典故事《Age of Apocalypse》,一個以大公司主流漫畫標準計非常黑暗相當惡啃嘅故事。但點樣駁落去呢?原著係X教授個仔返到過去點知錯手殺死自己老豆,冇咗X教授令邪惡變種人Apocalypse統治世界,磁力王就改邪歸正成立X-Men反抗。所以作為一個美漫迷會為今集成就喝采,但個結局太大團圓,始終係Fox拍總留幾份商業考量好難去到好盡,假如Marvel Studios經手,佢哋可能今集結尾就話救唔返X教授,跟住直接接落AoA開始下集。不過算啦,世事難盡其美,正如點解咁大套戲居然唔上IMAX?如果Megabox第時肯上返次IMax版,我會睇第三次都唔奇。《X-Men: Days of Future Past》就係目前為止最接近完美嘅美漫超級英雄電影。


(between,見人哋買飛有海報送,點解我睇兩次都冇?原來一場入面買兩張飛就有得拎海報,而我雖然睇咗兩次都係買咗兩張飛,但作為一條毒撚每場都只會買一個位,換言之就算我睇多一百次都唔夠資格拎海報。邊個話毒撚一個更開心,我想要范Blink Blink海報口牙,口烏口烏)

2014年5月24日 星期六

每週一相片大行動 2014 Week 21:當東京的妹妹遇見劉Sir

是咁的,一直以來我地香港IT部同東京只靠文字or電話溝通, 因為東京舖接頭果班都係囡黎,成班麻甩佬自然點爛口都變/扮到好斯文,所以東京班女對IT部的人外表抱有幻想。到今日我地終於有代表過黎喇,平時同我地傾開個妹妹(佢個名真係叫妹妹)立即衝出黎應門,當第一次見到劉Sir副尊容,即時反應係

2014年5月22日 星期四

新版美國哥斯拉,其實係災難片嚟




http://youtu.be/ft_fzEDHAHU


美版哥斯拉reboot其實拍得唔差,係衰在始終美國佬拍乜戲都硬係要俾好多戲份人類,結果明明係套怪獸片都可以搞到成套災難片噉,好睇一回事,但實在揾唔到哥斯拉電影嘅感覺,反而《Pacific Rim》仲能夠拍出應有嘅特攝色彩。同埋隻嘢個頭連住個身搞到好鬼肥,好在仲幾有霸氣,只係打得真係唔多唔夠勁,同留到最後先出大招,加埋應該用嚟死用嚟尖叫用嚟走難嘅人類鬼死咁多戲,成日怪物一蒲頭打一兩嘢就飛去講班人點走嚟走去,真係屌出聲。所以美國佬真係唔應該翻拍日本戲。

between,條片其實係劇透嚟,口合

2014年5月12日 星期一

仆你個街,歲月留聲台冇守諾言提早一個鐘八點半播《我和殭屍有個約會2》嘅喂!

頂你,本身上個星期歲月留聲台話《我和殭屍有個約會2》今個禮拜開始提早一個鐘播,搞到我不知幾咁高興,因為八點半播可以食住飯睇,九點半完到瞓覺仲有連續幾個鐘可以一氣呵成地做嘢,如果九點半播十點半完時間其實唔好使,八點返到屋企食完飯個時間最尷尬,聽隻碟可能聽唔晒喺度等九點半又唔知點,然後十點半熄機個時候話遲唔遲話早唔做都唔知搞乜好,不過最重要都係八點半播我就可以霸住客廳部電視,等我老母唔使做完愛回家之後直落睇埋《西遊記》啦。

等我滿心歡喜,到今日八點半開電視,仆你個街《今日睇真啲》嚟嘅喂?本來就係八點半播,點知跟住亞視見《西遊記》俾人屌到咁慘,就決定主台八點半再播多次第一集同無記打對台,噉有乜理由自己打自己呢,結果一個禮拜唔夠歲月留聲台就潛晒水當冇事發生繼續九點半播第二集。一早話你執剩個歲月留聲台好過啦,而家連主台都要走重播水嚟鬥無線,亞視你真係執柒咗佢算啦。

不過維持九點半播又衰唔晒,就係十點半可以唔使轉台直落覆灼埋《龍門陣》,呢個都算亞視最成功節目之一,嗰陣講政治節目只限於七點鐘港台時段或十點半後大家熄晒機嘅時間播,政治呢家嘢同論政節目一樣根本冇乜人會關心,點解?因為當時係九十年代頭香港的和平盛勢囉!亞視勁在搵黃毓民鄭經翰兩個插人插到神級嘅主持上去,令好多討厭政治嘅人都會開始睇甚至追論政節目,當年亞視有兩個節目唔睇港產劇加唔睇中文台嘅老豆都會晚晚追,一個係《八婆會館》(睇個名好似好柒,但連我老豆都會追就知真係好好笑,其實小品劇計當年亞視做得好過無線多多聲)(between,嗰期仲有個搵同一班底做主持嘅《今日睇真啲》式捉姦節目,唔記得叫咩名,又係好笑到仆街),另一個就係《龍門陣》,就算你唔識唔理政治,單睇黃毓民鄭經翰兩個寸人窒人屌柒人已經係一大享受。當然更大興趣係當年呢個節目講政治都可以屢創高收視因為怒屌共匪屌到好撚激,想知有冇可能而家完全唔剪足本重播先?

2014年5月10日 星期六

絕對夠資格成為新一代經典的半套神戲:《雙生靈》

好在最後都堅持去睇,《雙生靈》果然係半套神戲。得半套因為雖然完場前半個鐘就開估好似太早,但開完之後仲可以一直爆落去加每幕都係超前之前嘅更高潮,單呢一點已經足夠成為經典,但之前大半套其實仍離唔開典型日式驚嚇劇模式,當後來劇本同表達可以咁超凡,前半就顯得水準較低,令成套戲頭輕腳重。而且劇本好神但其實幾多bug吓,最大個真係大大個喺度大到驚死你睇唔到:同一個地方有兩個人同時做緊同一樣嘢,有乜可能一直都冇撞到或者發現另一方存在?同解釋我聽點解條女由應門媾仔到媾到結埋婚再跟住「離家出走」咁長時間,間屋入面居然可以冇人知冇人理真係冇事發生一樣?當然最重要係,點解唯獨主角一個唔會醒覺?(當然可以正如戲入面所講,又係好典型日本仔式「愛的力量改變一切」,令所有不可能變成可能...)

冇錯bug呢家嘢真係唔少,但臨尾半個鐘實在無敵得無話可說時,我哋就當成缺憾美啦,同多bug都係好事,因為套戲有人鬼兩界,咁多線又咁多bug,出碟應該會好似《Memento》有唔同剪接版,買返嚟可以慢慢研究,仲有同戲院唔同嘅另幾番感受。當然最重要係,一套半神級戲會估你唔到地少院少場上,我都係好夾硬去撞仲要買到第一行之外全場最後一個位先睇得到,五月個個禮拜都有非睇不可勁片上,應該上埋嚟緊禮拜頭就落畫架喇。香港地想睇好戲,唯有靠碟啦。

2014年5月8日 星期四

《我和殭屍有個約會2》貞子篇實在睇到人太感動了(其實我是來求seed的)

http://youtu.be/_57T3np33xA



[其實我是來求seed的] 《我和殭屍有個約會2》其實幾好嘢,九十年代尾流行啲乜全部大包圍,玩動漫(平行宇宙改變歷史完全是美漫水,第二集片頭直頭係EVA添啦),玩《Matrix》(都未使講慢鏡同一樣懶型嘅動作設計,兩隻邪殭屍叫奇洛同李維斯已經擺明tribute),又美劇式玩單元,剛剛個單元玩埋電影《貞子》再crossover《盜墓迷城》,頭幾集飛歐洲今次飛多轉日本,仲搵埋真係做貞子個日本妹扮多次貞子,亞視拍一套劇可以落本成噉都算歷史性,不過套劇只播咗三分一劇情未正式入高潮已經神級好睇,老細唔肯落咁重本去拍先至有問題。

歲月留聲好睇在集體回憶,當年2000上網仲係好新奇好奢侈一回事,未經歷過56K逐個鐘計PNET嘅後生一代唔會明白點解老嘢見返ICQ、超樣衰Geocities網站、用HTML打成個網出嚟係幾咁激動(廣告時間:劉Sir個網同貞子個網一樣,都係100%全人手逐句HTML code打出嚟架)、見到況天佑話「佢個電話打唔通,一定係上緊網」會心微笑,當然唔少得見到求叔「我send度符俾你」跟住開scanner send張符入電腦打鬼真係cult到爆炸,唔好笑呀貞子X互聯網呢家嘢正版貞子十幾年後3D版先至有咋,亞視其實好鬼前衛走在時代最前端架。

只係題材關係導演有點一反之前風格想走深度路線,經常好/太刻意要劇中角色講好多上網世代道理,搞到有點怪又有點拖,最後講貞子背景最明顯,可能見俾咁多錢請當時數一數二出名嘅日本妹拍港劇所以有幾盡用幾盡,講佢點樣成魔講足半集就真係太花時間喇。同埋最後血咒講到點樣勁點樣人類絕種,轉個頭條街啲人照行街睇戲好似頭先乜大事都冇發生一樣 - 呢個係當年港劇通病,鍾意玩到好大,但就算件事世界末日級仍然永遠好似全世界只得香港有事,件事一解決全人類立即回復正常冇死過人馬照跑舞照跳,將好多問題過份簡化同忽略,欠一份宏觀視野。

但除咗呢兩樣真係無懈可擊,貞子篇係傻強之外杜汶澤演技最高峰,最後兩次菠蘿油告白配埋主題曲,《假如真的再有約會》個「劇場版Mix」根本就係為杜汶澤決定留低電腦世界同貞子一齊呢幕而創,如果首歌可以有一個完整版係用呢個女聲intro就好喇。全個單元拍出一份磅礡電影氣勢,當編、演、導都超水準,就算唔搵真正個貞子嚟做其實都冇大分別。所以亞視今次終於醒目,下星期開始提早一個鐘八點半開始播,早就應該啦,因為九點半撞《M Club》都仲有師奶唔肯轉台,但八點半《西遊記》喎柒到連我老母咁鍾意睇無記垃圾劇睇完都屌喎,打對台的話分分鐘收視可以有雙位數。

所以,就要來求seed了,因為轉咗個靚時間個禮拜我先睇唔到。有冇人知邊度有得一次過download晒三集靚聲靚畫版?下星期有幾日唔喺香港,就想搵嚟睇定先廢事返到香港時唔知頭唔知路,我都知Youtube有晒全集,但想順便搵晒三集高畫質版珍藏。我都知難架喇就算強國都未必有種,莫非要上東門華北走返轉睇仲搵唔搵得到翻版DVD?

2014年5月5日 星期一

張衛健說出了我看大陸版《西遊記》的心聲




http://youtu.be/IehMzYYE1tg


睇嚟我老母部iPad仲未整返好,因為今晚我又睇晒成集《西遊記》,真係屌我老母。今集講到緊箍咒,睇極我都只會記起呢一段,當有咁經典嘅張衛健在前,而家套大陸貨真係睇到我對眼好撚痛。

2014年5月4日 星期日

每週一相片大行動 2014 Week 19:雀巢vs.四州.罐裝咖啡大戰




琴日提到經過紅磡探探屋企樓下搬過去檔士多,點知一早閂門,跟住發然對面佳寶都有好多寶物,我想搵返碧泉檸蜜。似乎個天都知我好想去,所以今日禮拜日都九點幾收到call叫我出紅磡開工,等我又可以順便過去望望,咁早唔會撞到唔開啦。之前只顧住買Pokka,今日先知原來四州都有出250ml細罐裝咖啡,而且平喎$15四罐即係四蚊罐唔使,不過同$4.5雀巢比唔太掂,可能原版Pokka重奶味甜味好汽水feel,細罐裝想似返咖啡,但我覺得陣味似奶茶多過咖啡而且沖到好鬼淡,雖然本身唔太鍾意飲雀巢,但四州細罐除價錢平一樣真係冇樣夠鬥。到頭來,$5一罐350ml Pokka始終是無能敵。

所以今日又掃一箱廿四罐Pokka返屋企,因為間士多開返唔夠一個月老細又話要搬喇,做埋下星期之後搬去邊未知道,但斷估唔會搬返去我屋企附近啦。所以雖然要抬三四個字返屋企&350ml x 24真係好鬼死重,辛苦都要架喇,因為呢箱可能係最後一箱喇。

2014年5月3日 星期六

每週一相片大行動 2014 Week 18:我想飲碧泉檸蜜呀




半個月前屋企樓下間士多執笠,立即連掃兩箱Pokka咖啡返屋企,臨尾幾日老闆娘話會搬過紅磡有緣再會。今日見去寶石睇《蜘蛛俠2》(呢一集、呢個版真係點睇都十分emo),見順路就唔搭車行路返屋企,睇同老闆娘夠唔夠緣份,話咁快就搵到,見時候仲早就去食個飯先啦,食完返轉頭,

「七點咋喎,咁早就閂舖?嘩,使唔使呀?」

好在佢係搬去佳寶對面,就順便過去行行。其實第一次行佳寶,未行過都唔知原來真係咁多荀貨,細維他奶2.4一包真係冇得輸,不過好耐未買過包裝,因為買盒大盒一升先$7...咖啡只搵到$4.5一罐雀巢,不過最想掃其實係好耐未飲過加去士多都未必搵得到的碧泉、沙示,而家仲搵得到$3一罐汽水仲想點呀?(我仲想搵返碧泉檸蜜呀!最後一次飲好似已經係讀緊中學時,但而家仲回味無窮,仲有冇地方買得到呀?)

2014年5月1日 星期四

Truth Corroded "The Saviours Slain" Live in Hong Kong:這一晚,有很多corroded truths

唔係有Hidden Agenda,有好多理應更受賞識嘅樂隊大家根本冇可能睇到,Truth Corroded就係表表者,唔係有HA點會出新碟有tour都有機會到香港表演,今次仲要已經係第三次。雖然玩得好但你知香港地現實玩得好唔代表乜嘢,比起台風同實力各位大老細們更關心隊band個朵有幾響,Laibach「新文化大革命」提過香港今時今日仲有一個咁蓬勃嘅live scene全靠傻人,正如冇HA,大家有機會睇三次Truth Corroded嘛?雖然,我都係第一次有機會入場睇佢哋live...

碟就有追開,只有話頭兩隻覺得都幾普通,但一路death落去technical落去,新碟我係非常非常之受,所以好好彩今晚嚟到睇佢哋。而我覺得Truth Corroded最大成就,唔係身處世界上其中一個樂隊最難發展嘅地區澳洲,可以默默耕耘堅持十幾年出到五隻碟;亦唔係對住一班比預期中少得多嘅觀眾,仲可以全不欺場交足貨(又諗返起上次台下得廿個人但台上仲好似對住二百個人表演咁搏命嘅Diablo,另一傻人做福人群的代表作);而係話俾大家聽,如果metalcore/deathcore走breakdown,世界會是多麼的美好,同想表演一場精彩metal live,一個技術高有創意嘅lead guitarist係相當重要。好可惜近來HA實在冇乜運成日同人撞,上次Alcest撞The Black Dahlia Murder,都可以話冇乜事,對文青嚟講識睇一定係睇Alcest,所以當晚HA反而係難得見到嘅爆場;呢晚就大鑊,撞到歌路接近但出名/潮無限倍嘅Bullet for My Valentine,講音樂點會唔係Truth Corroded贏吖,但前面咪講咗囉,對大部份香港人嚟講,一隊band幾時至係好睇?個朵響嗰陣時。

「between,好多人都問點解呢幾個月好多場大band嚟香港都見唔到我蒲頭。就講講今晚啦。要睇BfMV其實上年Summer Sonic已經有得睇,佢哋接住Maximum the Hormone出,而Maximum the Hormone玩完,我已經毫不猶豫走咗去瞓晏覺。既然上年去大fest主台出我都寧願瞓,今次嚟香港就算同一晚冇Truth Corroded,如果我反而俾幾舊水入場補睇返,會覺得自己好戇居。」

至於Evocation,雖然「遲到」所以睇唔到(不過都喺樓下聽晒成場),但就所聽,今場睇唔到損失都唔算好大,畢竟已經睇咗佢哋最完美一次演出,就係上年幫Ne Obliviscaris做opening。老實睇Evocation咁多年,幫NeO做Opening嗰晚表演同製作真係超晒班,話當晚係其中一次香港metal band最佳演出亦絕不為過,以當晚水準作準的話,要成為第一支代表香港出戰Wacken嘅metal band,其實唔難。但係NeO之前同之後,唔知點解一直都遇唔到嗰晚好似標童上台咁堅嘅Evocation,所以都係等《天靈靈地靈靈》Wacken Tour Edtion算,我想要特別版送Evocation@Wacken official bootleg DVD加Emperor bootleg唔該。