熱門文章

2014年7月30日 星期三

多得無線澄清,我先知道原來福喜單嘢根本唔關強國事

我發現無線新聞有樣嘢好有趣。每次報導麥當勞單嘢,逢講到福喜,一定要喺福喜前面加美資兩個字。哦,原來又係外國勢力陰謀,強國是無辜的。

2014年7月27日 星期日

郵輪碼頭遊一輪記

雖然身為九龍城人,其實由細到大都冇乜入過啟德,只有細個時去過一兩次機場送機,同有年啟德大笪地行搞新年嘉年華,多攤位又有表演仲有機動遊戲不遜維園年宵,可惜可能地點真係太隔涉冇地鐵已是致命傷,難怪跟住大笪地話咁快就收檔。事隔N年後做咗呢份工,雖然公司窗口一望出去就見到啟德,但從來冇諗過去望望,大佬大笪地執咗之後得塊爛地冇車入去,一年一次七一Doom Festival同新起座郵輪碼頭更加唔關我事,點會無端白事去啟德?有事就唔同講法啦,特別件事係老細叫你去嗰陣時。老細慣咗有project搞緊未必話你知,但到要傾要做嗰日或之前一日就同你講「提定你先陣間你有份去見架」,結果呢日就無端端跟住檯客走咗落郵輪碼頭兜咗個圈。行過一次先知,原來都幾正喎。




呢個shot唔係我公司影,係上個客即係啟德碼頭office影。傳說啟德個郵輪碼頭係風水陣嚟,建築取龍形,坐西向東龍口對正鯉魚門,是為吸水發財陣也。




去時個碼頭其實仲未起完入面工地嚟,所以戴安全帽至入得,不過頂樓另有洞天係個超靚露天花園,有花有草仲有得睇晒九龍港島兩岸,當然唔少得插返枝中國旗俾各位同胞影相留念啦。




個客話個設計深思熟慮過,之前咪提過碼頭係條龍,前面個圓拱門就係龍口吞盡鯉魚門湧入嚟嘅海水,而大大舊嘅訊號塔代表龍吐珠。佢噉講我噉聽啦,風水+後現代前衛藝術嘅嘢,我識條春咩。




之前都冇諗過會嚟郵輪碼頭,更加冇諗過原來地方咁靚,個客又話雖然下面仲係地盤未開,但頂樓露天花園已經起好同開放俾公眾上去,就好有興趣再嚟。其實一直都想研究有冇可能由九龍城或者土瓜灣踩單車出嚟九龍灣返工,真係踩到去九展就冇乜可能架喇,但啟德呢邊少人更少車(因為根本得的士同一架小巴會入嚟...),加埋由頭到尾都係一條路,想踩入嚟其實唔難。梗係唔係而家三十幾度曬到應嚟踩,過幾個月涼返又冇咁猛太陽,先去搵架單車跟住個GPS試試啦。




其實今日個行程同關係相當複雜。老細一向同郵輪碼頭傾開生意,但今日係陪另一個客帶佢嗰邊嘅另外兩個客過郵輪碼頭實地睇場(其實主要係等同胞們可以去兩枝旗杆度影張靚相到此一遊),跟住上碼頭office同佢哋傾合作,然後再全部人即係夾埋五間公司一齊過海再見另一間公司傾project。唔明唔緊要,其實我都唔多明只係行行企企聽幾位老細吹水嘅我出席有咩意思,不過咁多檯客加咁大公司就即係食飯肯肯定唔會求祈啦,結果晏晝夜晚都係成班人去大酒樓一餐千幾蚊,見食得咁開心班客又住九龍,我就盡一盡地主之誼帶各位國內朋友搭天星小輪欣賞香港夜景啦。




做香港人咁多年都好少搭船,返工要過海唔搭地鐵都搭小巴或者巴士啦仲去碼頭上船慢慢嘆搏俾老細小咩,放假想過海幾架主要過海巴士通通經我屋企樓下使乜出去搭船咁花時間,之前搭過幾次都係日頭,反而冇乜幾可好似今次夜晚搭。可能對慣對熟覺得冇乜嘢,不過客觀講維多利亞港夜景的確係世界級,所以每逢有朋友第一次嚟香港,我都會叫佢點都要嚟睇一次海傍夜景,可以搭渡海小輪或者上山頂睇就更好。




又回到海港城了。上次過嚟呢邊係上Sony執執幾個月前做落堆文件手尾,過嚟第一日就係今次Snoopy展覽開始當日,今晚仲見到,幾時會轉呢。其實我最想好似上次蜘蛛俠噉,整返個Guardians of the Galaxy景點,不過相信冇乜可能矣。




碼頭同個客say個bye,搞到八點幾終於返得歸,好在係星期五,唔係咁鬼頻撲第二朝仲要返工就辛苦。係咪呢個鐘數有幻彩耀香江呢碼頭超級多人,不過吹住風聽碼頭幾隊busker band唱Supper Moment唱《海闊天空》,再行個圈至上巴士返屋企,的確是好很舒服的。但係次次都係尖沙咀放工順便散個步至會噉講,你叫我平日得閒無事專登出嚟噉行法,我又唔會咁好心機囉,呵。




不過其實送完客都仲有工開,有個客話想買珍妮曲奇又冇乜時間,見反正第二日都要出油尖旺買Slowdive飛同電腦嘢,就順便去尖沙咀睇睇係咩一回事。唔係個客講我都唔知道乜嘢係珍妮曲奇,不過又難怪作為香港人會唔知,因為第一眼見除咗個盒印個熊公仔幾靚之外冇乜特別亦唔見得好食,同埋間舖實在好多人,強國人。去到門口已經廿幾人,再俾強國同胞打吓尖排咗兩三個字終於到我,諗住有得買喇啩?唔好意思,原來想買珍妮曲奇呢,唔係噉樣行入舖頭就俾你買嘅,而係...




...係要先行返出去商場外面排隊,門口個哥仔會派籌分批放人入去,拎咗籌先代表你有資格去佢哋舖頭門口排隊。我十點幾去到,入到舖擾攘一輪大約十一點出到去,外面已經排咗三四十人,仲要排咗冇耐開始落雨仲要係雷雨添,當然又要見識強國人特別嘅排隊技巧啦,結果淋咗大半個鐘雨我先由相入面你見到個位置去到地鐵站入口前面,即係前面仲有十幾廿人,個天又越嚟越大雨,我就只有同個上海妹講句對唔住放棄算。


冇錯,會咁熱心,擺明就係因為女啦。即係如果係條佬叫我幫手我都會幫,反正今朝本身都會出嚟順便嗟,不過見到咁多人就一定即閃唔會排隊,但今次係個上海妹叫到梗有幾盡幫幾盡啦。自從上次去HA睇Diablo,冇錯咪就係香港成日話要睇show嗰班metal友話「挑又唔係大band我識佢老鼠梗係唔睇」結果得廿個人唔夠買飛嗰場Diablo,當晚最大收獲唔係睇咗場好精彩嘅show,而係撞到個唔知頭唔知路就上咗嚟睇Diablo嘅上海妹,佢係連睇完都唔知道三隊band叫乜名,單純因為係metal gig就上嚟HA捧場,走時話「我要回去了,趕著回上海看Fleshgod Apocalypse。」嘩上海的女孩子真是外在美跟內在美兼備啊。今次這位上海美人仲要住我屋企附近間酒店近水樓台添,我承認如果佢唔係結咗婚,晏晝落完雨又深水土步買完嘢,我係會出返去尖沙咀幫佢排多次隊排到買到為止架,口桀口桀

2014年7月24日 星期四

每週一相片大行動 2014 Week 30:一日撞到兩單交通意外(仲差少少撞到第三單)




一唔坐Sony返去九龍灣,陣黑氣立即跟住我走返過嚟呢邊。今日晏晝公司樓下有三車連環相撞,以為撞到交通意外仲要三架一齊出事已經難遇,點知放工可以再撞多單,仲好似好大單成架電單車飛出去連白車都嚟埋封晒路,事發地點係大街位幾架巴士都經呢個位出觀塘出九龍城,而出事時我架巴士剛剛好排第二,如果司機衝快少少或者之前是但一 個燈位少一個紅燈,我都唔使困咗喺度睇警察同救護員點樣善後。

不過已經好彩咗架喇,慣咗趕六點八德福開架巴士,因為半個鐘先開一班所以六點五到半就撇走去九龍灣運動場追巴士(冇錯,朝朝都十點至返到公司,坐低食埋個早餐十點半至開始做嘢,但又六點半即閃,我真係一個唔值得原諒既仆街),有兩個站俾我揀,今日見時間鬆動少少就去前面個站上車,如果我身痕或懶揀咗去後面個站,分分鐘等到七點頭嗰班開至有得返屋企,而且因為差佬封路,司機睇咗陣見勢色唔對就兜條近路出九龍城,反而仲快過平時返到屋企。

不過改道搞到差少少撞到第三單交通意外分分鐘做埋主角,因為行條平時莫講巴士連車都冇乜嘅內街,有架貨車明顯冇諗過會有巴士入嚟,睇住佢超高速打橫衝埋嚟然後急停,好在煞得切車停正架巴士車尾側邊,因為好明顯坐車尾嗰位咁(唔)好彩就係我啦,如果個貨車司機踩慢少少brake,聽日報紙頭版你就見到「九龍灣一日三宗交通意外,六點半至七點同一條街,街頭私家車撞電單車,街尾貨車撞巴士,仲撞瓜咗條死長毛。」

2014年7月21日 星期一

CCTVB已正式成為只屬於「新香港人」嘅電視台(雖然你班愚昧嘅香港人都係會繼續邊屌邊睇)


服左TVB, 講虎媽實況劇都不忘植入強國野


http://forum1.hkgolden.com/view.aspx?type=CA&message=5257284


之前《愛回家》已經講過,無記節目好鍾意陰啲陰啲大陸化,好似入面角色去開銀行戶口,簡簡單單話開儲蓄戶口唔得,係要話去銀行開人民幣戶口,仲要「人民幣」三個字好用力一粒一粒登出嚟慌死你聽唔清楚。新播套《我們的天空》,其實睇trailer覺得幾吸引,因為有點港台處境劇感覺,點知原來而家無記已經完全唔再掩飾大陸化,套劇完全係拍俾「新香港人」睇嘅劇嚟。班師奶班細路每日睇一集潛移默化,真係遲早睇壞腦。

2014年7月19日 星期六

每週一相片大行動 2014 Week 29:即使調到去天涯海角做嘢,我仍然會掛住宏力個騎呢餐牌




我呢個位向來冇特定地點返工,剛剛個星期又調咗去尖沙咀坐Sony,梗係開心啦雖然尖咀食飯貴但選擇多又好食,今次只鋸咗個扒都未挑戰幾個月前已經話要試一試的24" pizza,不過無論去天涯還是海角,我都會好掛住公司樓下間宏力,因為香港茶記嚟講佢哋都堪稱fusion界代表,繼我的最愛粟米班腩炒河,最想試嗰味,其實係炒底燒味飯。要個柒寶飯多汁炒底吖唔該。

2014年7月17日 星期四

愛港台劇的理由




http://youtu.be/QikOzdMiWTc


今個禮拜猛講電視劇,又走返去同model好有緣的Sony坐,就繼續講劇啦,前幾日美劇講左咁多,今次就講講港劇,首先覆灼港台呢集《同里有親》。其實而家無記最好睇唔係無線自己拍堆劇,而係港台處境劇,除左編劇導演配樂攝影器材通通贏無線幾條街,做casting果班先至勁,除左成日搵到你冇諗過做戲原來好掂的演員同歌手,最重要係港台開劇最鍾意就係去model公司揀蟀,所以套套都係女仲集集都有新女上場。《同里有親》一條街可以有童愛玲又有冼色麗,嘩世界係咪真係可以咁美好呀?呢集仲有倪晨曦,而家香港model除左Primo幾個膽之外最正就係佢,真係世界級,衰在戲份少左D。

不過其實又唔一定要等港台開劇先有得睇,佢仲有上Now做節目講音樂,其實有興趣追因為《控制音樂》除左佢,每集仲會訪問一個歌手加一隊(indie) band,只係佢做親堆節目都係額外收費台播,假如有一集有倪晨曦請Evocation上去訪問講佢地去Wacken Open單野至磅水啦。

2014年7月15日 星期二

好耐未試過開電視會咁有盛事氣氛:Marvel《Agents of S.H.I.E.L.D.》 vs. DC《Arrow》同日首播之戰

當無記越嚟越垃圾嘅時候,今年明珠台反而帶得返起以前每逢暑假就一次過推晒全年最勁最想睇啲劇集出嚟好大陣仗種氣氛,世界盃完咗個禮拜幾套勁劇一齊開始播,雖然應該禮拜三《Under the Dome》先係重頭戲,但講最過癮肯定係星期一,因為呢晚係Marvel同DC電影市場正式開戰之後,兩大美漫廠牌第一套為進軍電視界而設嘅劇集同時香港首播。噉樣先似盛事、噉樣先似暑假嘛。

兩間label就算拍劇依然跟足拍戲種拍法。《Agents of S.H.I.E.L.D.》好多人鬧,其實我都冇乜大期望,因為睇預告都預咗係好典型Marvel戲路,即係賣大製作大排場,製作級數媲美電影非常落本,加一貫美式幽默笑位度得幾正,只係格局正路過正路可以話有點太保守,娛樂性夠只係開開心心一個鐘之後冇乜特別深印象留低。都有嘅,就係成套劇超多女仲要好正,一開波出嚟串吓場條女正到呢,出得兩個鏡但係睇到你口桀口桀口桀~同埋另一樣嘢,當年睇《新世紀福音戰士》都有諗過:

「又話全世界最神秘組織、又話唔俾得普通人知?噉點解上至飛機大炮下至一枝原子筆乜嘢都要加自己組織個嘜頭上去,次次出動全架車全隊人全身都係S.H.I.E.L.D.個logo,慌死人唔知佢哋係邊個?」

跟住到《Arrow》,反而冇諗過無線會揀星期一至四晚十二點播,會排呢個時段有一定代表性,因為通常題材比較嚴肅沉重或者畫面一定要剪過至出得,就會排到呢個時間播,例如《The Walking Dead》如果首播就直接排十二點播的話,應該可以完全唔剪足本出街。

同走開超級型路線嘅Marvel相對,DC劇同戲一樣走真實型,雖然故事的確幾灰拍得亦唔差,動作冇想像中咁激仍算精彩,Green Arrow唔係英雄而係反英雄會殺人更是好事,但你成層樓殺晒一滴血都見唔到就無奈咗啲喎。故事唔算突出冇乜新意,我好簡單劇本唔會悶過《Agents of S.H.I.E.L.D.》就得,不過可能幾難,因為DC成功在搵到Christopher Nolan reboot蝙蝠俠,但亦失敗在《Dark Knight》三部曲太成功限制咗自己戲路,蝙蝠俠之後幾乎逢係DC就要好灰好沉重好強悲劇人物色彩,想超級型少少都好難,睇《Green Lantern》就知出事。希望發展落去唔會覺得只係睇緊一個曉射箭嘅蝙蝠俠啦。

相信嚟緊兩間label仲有大把劇拍,但最希望反而係《Guardians of the Galaxy》有機會拍劇。套戲未上畫單幾條trailer,已經令佢由Marvel最冇人睇好嗰套變成全部人都超級有興趣睇到底係咩一回事嘅年度焦點電影,如果真係拍得出漫畫入面份荒謬感出嚟(trailer已經拍得好足喇),然後拍埋電視版變成Marvel嘅《星空奇遇記》,肯定爽到震。

2014年7月14日 星期一

無記劇同節目都越嚟越垃圾,但係明珠台就越嚟越似樣

今晚開始,

逢星期一晚:
9:30 我和殭屍有個約會3
10:30 Agents of S.H.I.E.L.D.
12:00 Arrow

逢星期二晚:
9:30 我和殭屍有個約會3
10:30 The Blacklist
12:00 Arrow

逢星期三晚:
9:30 我和殭屍有個約會3
10:30 Stephen King's Under the Dome
12:00 Arrow

逢星期四晚:
9:30 我和殭屍有個約會3
10:30 Castle
12:00 Arrow

明珠台今個暑假真係勁到冇嘢好講,我都未試過可以一星期四晚明珠台都有劇追咁堅,Arrow擺每晚十二點做先最攞命,結果每個禮拜得返唔播劇只明珠930播戲嘅星期五可以抖抖。是但一晚都唔想錯過,搞到下星期一Slowdive都唔知去唔去好添。(其實Slowdive仲考慮緊嘅最大原因,係揀咗出名撞聲撞到爛嘅九展圓hall搞,呢樣先最擔心)

2014年7月9日 星期三

每週一相片大行動 2014 Week 28:要一面搭車一面記怒人歌詞再一面唔好嚇親人,其實好難




今晚「屌出生天牙刷騷」rehearsal,雖然怒人啲歌已經聽過無限次正宗聽到識背,不過叫我立即唱又未至於100%背得晒出嚟,你試吓就知架喇其實怒人啲歌詞好蹺口好陰濕架。特登印咗成疊歌詞方便搭車時記,不過啲字較到好鬼大粒成日嚇親其他人,「嘩張紙寫咁多粗口嘅條友黐撚線架!」所以後來唔敢拎出嚟拎部電話睇歌詞算,仲要將啲字縮到仲細過報紙字size驚死俾人望到,不過因為經常記吓記吓就會順口地唱咗出嚟,搞到次次搭車都係上車之後好快冇人敢坐/企我附近。

2014年7月7日 星期一

怒人屌出生天牙插騷暨劉Sir破處show倒數] 倒數第四回:低俗得義無反顧(吹呀!):香港新一代粗口歌王怒人專訪(中)


怒人五部曲.第四章:
低俗得義無反顧(吹呀!):
香港新一代粗口歌王怒人專訪(中)


http://lau-sir.com/http://lausirisual.blogspot.hk/2013/05/kowloon-metal-city-track-25.html


今個星期六就係「怒人屌出生天牙插騷」,又問我點解要睇?因為呢場係空前絕後你一定未體驗過嘅show,唔係band show而係一場talk show,一場你都有得玩埋一份嘅talk show!

. 鳩先預屌,搶先現場感受全隻新巨碟,為八月演屌週熱身

. 劉Sir現場專訪,俾大家深入理解新碟每一隻碟背後嘅小花絮大道理

. 怒人加樂隊成員同大家分享兩年嚟嘅心怒歷程,回顧第一隻EP,解構入今隻新碟,仲有第二隻巨碟都未開始賣,已經有嚟緊第三隻巨碟預告!

. 嫌劉Sir問得廢的話,觀眾都可以參與一份訪問怒人,問乜撚都得,至怕你問得唔夠柒!

. 當然仲有禮秘禮物!


怒人屌出生天牙插騷


http://www.facebook.com/events/1506533086242403


日期:2014年7月13日


時間:20:00(19:30開始入場)


地點:Zuksession


地址:灣仔盧押道18號海德中心5樓(灣仔地鐵站C出口)


票價:$100 預售 / $150 即場(包一杯飲品)



怒人Facebook: http://www.facebook.com/NoYanDiu9Nei


怒人係火陷, 係暴燥, 係不滿, 係青春, 係衝動, 係幼稚, 係發癲, 係戇鳩, 係痴線, 係笑聲, 係屌聲...屌!


怒人N年前係一人樂隊, 依家係一隊N人樂隊


On Drums: Tim


On Bass: Jacky


On Guitar: Jason, 怒人


On Vocal: 怒人


On鳩: 香港資深五金業工作者劉Sir



七月十三日,金屬狂人 vs. 金屬傻人

2014年7月5日 星期六

[怒人屌出生天牙插騷暨劉Sir破處show倒數] 倒數第三回:低俗得義無反顧(吹呀!):香港新一代粗口歌王怒人專訪(上)


怒人五部曲.第三章:
低俗得義無反顧(吹呀!):
香港新一代粗口歌王怒人專訪(上)


http://lausirisual.blogspot.hk/2013/03/kowloon-metal-city-track-24.html


上回同大家講咗怒人八月頭筳開兩場,點解仲要十三號晚去灣仔ZukSession睇佢?咪因為要嚟俾只得呢晚會上台嘅劉Sir屌柒你囉。今次就到好多人話Vader又係十三號晚出,撞show點睇呀?雖然軟飯你呢世人都未必食得到,但要食兩家茶禮其實唔難。

我用例子答你:怒人場show八點開場,我當八點三至開波啦,主題係解構新碟,假設個幾鐘玩得完,到時先至九點幾嗟,以大多數大band show起碼遲大半個鐘至開場嘅傳統,可能怒人玩完另一邊先至開始冇耐,立即飛地鐵過HA,好彩的話去到嗰陣第二隊opening都仲未落台。

上面講咗乜鳩,自己參透吓啦。邊個話怒撚與Vader不可兼得?


怒人屌出生天牙插騷


http://www.facebook.com/events/1506533086242403


日期:2014年7月13日


時間:20:00(19:30開始入場)


地點:Zuksession


地址:灣仔盧押道18號海德中心5樓(灣仔地鐵站C出口)


票價:$100 預售 / $150 即場(包一杯飲品)



怒人Facebook: http://www.facebook.com/NoYanDiu9Nei


怒人係火陷, 係暴燥, 係不滿, 係青春, 係衝動, 係幼稚, 係發癲, 係戇鳩, 係痴線, 係笑聲, 係屌聲...屌!


怒人N年前係一人樂隊, 依家係一隊N人樂隊


On Drums: Tim


On Bass: Jacky


On Guitar: Jason, 怒人


On Vocal: 怒人


On鳩: 香港資深五金業工作者劉Sir



七月十三日,金屬狂人 vs. 金屬傻人

2014年7月3日 星期四

《把握今天》可能係港共政府有央以嚟拍得最好(同最metal)嘅廣告




http://youtu.be/-Qtu5C9nu6k


政府最新個戒煙廣告好正喎,又化到成班友喪屍噉款,又影佢哋成身刀疤傷㾗,又影第一身視點俾醫生開刀做手術又拍吓內臟郁吓郁吓,點睇都覺得個導演本身係拍death metal MV,不過拍完俾政府買斷咗條片至變咗做戒煙廣告。我本身唔食煙,但睇完個戒煙廣告之後反而好想試。

政府廣告一向7 or on99,不過逢係同毒同煙有關,好多都拍得好正好有意境。

2014年7月2日 星期三

[怒人屌出生天牙插騷暨劉Sir破處show倒數] 倒數第二回:怒人,給大家上了一課唔係亂屌而係有橋的marketing


怒人五部曲.第二章:
怒人,給大家上了一課唔係亂屌而係有橋的marketing


http://lausirisual.blogspot.hk/2012/11/kowloon-metal-city-track-22marketing.html


下下星期日就係怒人屌出生天牙插騷喇。你問怒人八月出碟時會開兩場啦,點解呢個禮拜日仲要去睇?咪因為只得呢一晚至會有劉Sir上台俾你屌同屌柒你囉,柒頭!


怒人屌出生天牙插騷


http://www.facebook.com/events/1506533086242403


日期:2014年7月13日


時間:20:00(19:30開始入場)


地點:Zuksession


地址:灣仔盧押道18號海德中心5樓(灣仔地鐵站C出口)


票價:$100 預售 / $150 即場(包一杯飲品)



怒人Facebook: http://www.facebook.com/NoYanDiu9Nei


怒人係火陷, 係暴燥, 係不滿, 係青春, 係衝動, 係幼稚, 係發癲, 係戇鳩, 係痴線, 係笑聲, 係屌聲...屌!


怒人N年前係一人樂隊, 依家係一隊N人樂隊


On Drums: Tim


On Bass: Jacky


On Guitar: Jason, 怒人


On Vocal: 怒人


On鳩: 香港資深五金業工作者劉Sir



七月十三日,金屬狂人 vs. 金屬傻人

2014年7月1日 星期二

今天,要聽謝安琪《雞蛋與羔羊》




http://youtu.be/R2_DWOyluTs


今日、今年七一,必定會聽、流傳最廣嘅半正式主題曲有兩首,怒人《香港鳩政》之外,就到謝安琪《雞蛋與羔羊》。未知今日做乜好的話,聽完再諗吓。

以歌論歌,「新碟」終於有一首完全由周博賢主理之Kay歌登場,氣氛氣勢同其他他人插手之作完全兩個層次,始終只有周博賢先可以帶出謝安琪最真最完全一面。三首新歌當中除咗《勢不兩立》雷聲大雨點小,同唱功退回《Yelling》時期踩晒鋼線好唔穩定狀態(我認呢方面好大保留,因為《Yelling》隻碟連錄音都唱得唔太好),謝安琪今隻廣東碟,係我今年最期待嘅新碟。只係,希望今年出到啦...