熱門文章

2013年12月31日 星期二

[Kowloon Metal City: News] Steve Smyth's Newest Project One Machine: The New Sanctuary for the Fans of the Disbanded Nevermore?




https://soundcloud.com/scarlet-records/one-machine-one-machine


Steve Smyth,多支出名樂團像Testament、Nevermore和Forbidden等的前結他手;Mikkel Sandager,Mercenary前任主音;Jamie Hunt,Biomechanical前結他手;Tomas Koefoed,Mnemic前低音結他手;Raphael Saini,Chaoswave前鼓手。四人共通點都在一個「前」字,令這由Steve Smyth親自選卒、成員來自完全不同國家的新樂團One Machine,看來就像個重金屬界的失業俱樂部。

這明星組合將於下年推出第一張專輯,第一首派台歌《One Machine》完全發揮了眾人所長,兩位結他手馳名的高速高技術solo互鬥,加上Mikkel Sandager多元多變的唱腔,有點像想在Nevermore解散之後,重造《This Godless Endeavor》之前的他們 - 有趣的是Nevermore在《This Godless Endeavor》會變得不過份偏向營造氣氛而更重型更技術化,Steve Smyth的加入是原因之一。且看下年專輯正式面世時,各位Nevermore fans是否真的終於找到另一個歸宿了。

We have Steve Smyth, the famous guitarist that stayed in several world-class famous bands like Testament, Nevermore and Forbidden; Mikkel Sandager, the former vocalist of Mercenary, Jamie Hunt, original Biomechanical guitarist, Tomas Koefoed, Mnemic's last bassist; and Raphael Saini, who was the drummer for Chaoswave not too long ago. The common charactieristic among all of them, is the use of past tense in description of their tenures. For present tense they have One Machine, the new project started by Steve Smyth with each member hand-picked by him, whom are from all different countries. That make One Machine some unemployment club for heavy metal musicians.

Before the release of their debut album in 2014, the band released the title track of the band as their first single before the end of this year. Showcasing the outstanding as always talent of the two guitarist as well as versatile vocal performance by Mikkel Sandager, One Machine sounds just like the deceased Nevermore in their pre-This Godless Endeavor time. That's interesting, as one reason Nevermore switched from their usual atmostpheric route to became heavier more technical in This Godless Endeavor, was the joining of Steve Smyth in that album. Let's see if One Machine is really the new Sanctuary for all longing Nevermore fans.

2013年12月29日 星期日

現在香港樂壇最需要的,是堅持




今天好像只有我一個人唱粵語歌,
那是因為我是代表/來自香港,
那麼重要的第一場比賽,
我希望可以用在我心目中,
很有分量的一首歌,來到這個舞台。


https://www.facebook.com/photo.php?fbid=243924009101970


謝安琪返大陸參加歌唱比賽,對手係台灣民謠風二重唱,一個人鬥兩個人、流行腔鬥文藝腔,依然決定唱廣東歌《情人》,因為身為香港人,而最後只輸0.01分,即係如果佢唔執著於語言以國語歌參賽的話,好大機會拎第一而唔係第二。

回到上星期,講到馮翰銘出碟《樂章》,雖然古詩古辭用廣東話更合韻,但因為「易填易唱」而棄廣東話選擇用普通話。正因香港太少歌手仍然會對自己語言同身份抱有堅持,香港音樂先至每下愈況。但係,搵食嗟,犯法呀,睇謝安琪出國語碟都要搞到音樂三不像就知世界難撈啦,睇佢主場香港反而連搵唱片公司幫佢出碟都搵唔到就知骨氣搵唔到飯食啦!

2013年12月28日 星期六

每週一相片大行動 2013 Week 52:今年完了,Yahoo Blog收皮了,我已經冇野講了





今年完了,Yahoo Blog收皮了,我已經冇嘢講了,要屌嘅,之前已經屌晒。可能就係屌得太多所以俾Yahoo玩,幾個月前「輕鬆搬家」功能一開始,立即將呢八年嚟三千幾篇文download晒落嚟,但係第一日搞到而家正式執笠一日,用晒搵得到所有方法,就係轉唔到格式搬去Blogspot,成幾千篇文咁大規模,仲要當中好多互相link嚟link去,你唔俾我成舊嘢掟上去,咪即係叫我同你一樣收皮算數?2013年拳擊日拆嘅第一份禮物,就係Yahoo一聲唔該令我咁大個文庫眨吓眼就唔見晒,最大遺憾當然係從此高登每逢有巴打開post講午餐肉,必定會同陶傑抽水文一齊出現嘅劉Sir death metal式鋸爆午餐肉潮文,一向係靠Yahoo Blog條link做宣傳,而家YB一死,呢篇令我同陶傑齊名嘅潮文當堂變晒死link,要Blogger呢邊出返篇新文重新出發。「輕鬆搬家」喎,我鬆你老母啦Yahoo。

2013年12月27日 星期五

和高登巴打一樣,我也在追憶「那個時候」的Dear Jane,可惜到此為止


[香港樂隊]Dear Jane你可唔可以做返一隊樂隊?


http://forum1.hkgolden.com/view.aspx?message=4895906


對於呢點,我十分認同。Dear Jane頭兩隻碟真係勁到黐線,《XOXO》隻碟首首歌旋律編曲都比同期好多樂隊勁幾班,而且聽落唔會覺得好pop而好重indie band sound氣息,林若寧填詞首《二十年後的歌》,對我嚟講拍得住Kolor《了不起》咁具重要性。可惜簽咗大label華納、由搵連詩雅幫佢哋拍MV變成幫連詩雅寫歌之後...我同巴打一樣,好懷念《XOXO》時嘅Dear Jane。

小道消息話,《XOXO》「銷量少得真係好撚好撚恐怖」,首先買得返我都想買多隻,我嗰隻已經唔知去咗邊度,最鍾意《二十年後的歌》同《沒有你的假期》呢兩首,隻碟編曲真係強到非一般indie band可比。而話隻碟賣得好少超少非常少,...其實好正常嘅,某程度上因為佢哋行得太前,其實好多年前《XOXO》做嘅,同近一兩年Supper Moment同Kolor等紅樂隊而家做緊嘅,有咩分別?我覺得《XOXO》作曲編曲仲要勁過呢兩隊band而家添。當然,當Dear Jane嚟到「而家」,換咗人、簽咗大label,已經唔會預今日嘅DJ,可以重復當年勇。

所以,都係聽歌啦,我的愛歌,《二十年後的歌》:




http://youtu.be/GBr9fshP55Q


(利申:雖然pop晒,但我覺得佢哋個逆cover版《到此為止》算係寫得唔錯一首,我都幾鍾意佢哋呢個版架,哈)

2013年12月25日 星期三

一個更開心的聖誕大餐




份人一向冇乜節日氣息,不過見聖誕佳節,咪落街行行買買雜食。屋企附近開咗間阿信屋,幾個月都未幫襯過,見聖誕開一開齋,就發現好大鑊,我好鬼鍾意食Doritos,呢度有隻韓國版,一樣咁好食但係平起碼三分一,睇嚟聖誕之後好難唔肥返。唉安安份份做個毒撚匿埋屋企咪好囉,做乜咁身痕呢。





琴日老細去人哋度黐餐,食剩啲嘢見冇人要咁浪費,就擸晒返屋企先,順理成章成為毒撚的聖誕晚餐,大佬我咁懶仲要呢種時節,真係頹到營多都唔想落手煮啦。落阿信屋經過間餅舖見到有隻流心朱古力撻,雖然$6.5一個好在幾好食,同冇呃秤入面真係大大劈朱古力,次次食完都流到成隻手黑晒。如果入面係士多啤梨醬就正。





正當我自己食緊琴日公司冇人要堆立雜嘢當聖誕大餐,一面食一面唱「其實毒撚一個更開心」時,屋企對面住地下家人,請咗成棚人去唐樓後園空地開party食真正嘅聖誕大餐。都係閂埋窗繼續上ThisAV好過。

Head Phones President香港Live:美少女轉身變,已變成metal warrior (and I'm loving it)


睇完Head Phones President,第一件事係好後悔冇帶相機出黎。一個鐘,示範晒香港band同外國band距離可以差幾遠:第一首歌把聲已經搶到恆晒嗌贏唔少麻甩佬,要恆要清想點轉點轉隨時轉聲亦得又唔會沙聲,可以搶足成個鐘由頭到尾維持得到最佳狀態加一滴水都唔使飲,仲要玩完把聲好似乜事都冇發生過,呢把聲底已經唔知幾多香港歌佬歌婆練得到。整套黑絲紗裙出場正過cosplay Sailor Moon啦,但著到好似好斯文台風相反喪到盡,跑晒步拱晒橋轉得勁個跳芭蕾舞跪晒地碌晒泥沙,連行步路都好似上左身噉,玩到噉完場件衫只係穿左幾個窿咁大把都算好野。就係好睇在可以完全唔顧形象唔錫身,而呢兩樣亦係99.9%香港樂隊歌手做唔到。當然啦,最正梗係歌妹真人真係好cute正啦~(廢事俾人打,利申先呀,Synergy新歌妹都好正架,口桀口桀(不過舞台經驗真係未夠))


係fans都知道大山安扎係演美少女戰士舞台劇出身。睇完佢玩live,實在唔明,點解會cast佢做Sailor唔知邊個?點睇都應該搵佢演邪派女王啦下嘩!

2013年12月24日 星期二

謝安琪的《情人》,超越了《拉闊變奏廳》的自己




http://youtu.be/JvDzZ3taFj0


謝安琪中國音超唱Beyond《情人》,比佢自己幾年前主要翻唱Beyond歌場《拉闊變奏廳》唱得好唔知幾多倍,G.E.M.之前紅館演唱會個cover版更加完全比唔上,不過入bridge嗰下轉折氣氛連接唔到,bridge之後段ad lib又差少少力唔夠帶動到最高潮,同埋臨尾唱錯歌詞,實在美中不足。好在唱完嗰個pose真係殺死人,乜都補返晒。

最後當然輸啦,對手係個台灣女聲兩重唱翻唱《酒干倘賣無》,一個香港人用一首廣東歌,鬥兩個大陸民眾最受落帶點地方民謠風嘅二人合唱,其實只輸0.01分已經係贏咗。

2013年12月23日 星期一

廣東歌一年沉過一年,有時就真係要怪自己人唔爭氣嘅


馮翰銘《樂章》
捨棄用粵語唱之迷思
@黃志華的博客

http://blog.culture.ifeng.com/article/31130528.html


馮翰銘隻碟《樂章》,似王菀之加方大同,小品得嚟帶點實驗性,應該係今年其中一張最值得聽嘅中文碟。不過我觀點同呢篇文一樣。小學已經覺得/知道,廣東話念詩讀辭先係正道,普通話讀好多根本押唔到韻甚至節奏都會亂,但好多創作人同歌手總會有好多理由,例如易作詞同(我認同嘅)普通話唱歌旋律性較重(同當然又係因為面向大市場為搵食啦),所以捨廣東話取普通話,即使主題應該用返廣東話表達先貼題。同埋,有心一創創舉,唔係應該挑戰難度先係咩?

正因呢種心態,廣東歌先一年比一年冇起色,因為自己人都唔爭氣。

2013年12月22日 星期日

原來容祖兒都好(death)metal

有冇睇容祖兒做代言嗰個壽司廣告呢?話佢同條魚係情人,大家喺海入面相識,跟住魚檔分別,最後去到壽司舖再遇,條魚仲係咁新鮮咁好食。呢啲完全係death metal歌詞嚟。

2013年12月20日 星期五

每週一相片大行動 2013 Week 51:老母,我又上電視喇,今舖係自由野




http://youtu.be/s5MYjpJU414



http://programme.rthk.hk/rthk/tv/programme.php?d=
2013-12-18&p=5529&m=episode





「老母,我又上電視喇,
今舖係自由野」




自由野令我第一次覺得香港政府做岩野
(所以應該好快收皮)



http://lausirisual.blogspot.hk/2013/12/blog-post_14.html




自由野Day 1感想:文青唔太多,靚女唔夠多,bass推太多。音響非常靚聲去到邊都聽得清,係低音幾乎一定出過其他人成日遮住其他樂器,但全日製作同班底同氣氛實在本地難求,不枉我朝早五點半起身出大角咀做part-time之後,點幾鐘收工眼瞓到死都由奧運站行去九龍站再頂到最尾十一點。不過我呢挺毒撚都係唔太適合嚟呢種咁文青嘅場合,入夜之前主台都得好少人,但過去文青樂園大草地,啱啱係今期流行新青年理髪店出場,觀眾人數多主台一倍以上。然 後聽佢哋唱咗幾句,唔知咩朝早起身去廁所屙屎,心諗做乜鳩轉頭即走,睇嚟我呢世人都係做唔到文青架喇,抵我溝唔到女啦。

我相信自由野歷史上最成功係揾King Ly Chee表演,根本主台成日到佢哋出先至係正式開始,大場都可以玩到pit晒插晒水Riz衝埋落台企上鐵馬唱,仲要成場表演都係橫風橫雨,我企正台前鐵馬,前面大雨到眼鏡己經乜都睇唔清,後面就狂撞上嚟差少少鐵馬都撞低,頂真係未試過香港睇一次band可以咁癲咁正,而當呢種場面唔使講日本台灣同大陸都好普遍,就證明香港缺乏容納得到嘈band嘅大show/music fest缺乏得好緊要。

臨尾對眼鏡仲要人哋插水時飛走埋,勁在跌落個pit度居然冇人踩爆冇花冇爛仲執得返,撞跌我眼鏡位朋友放心我唔會屌你,如果今日成場咁喪都撞唔跌我副眼鏡先至抵屌啦,係咪?話時話,說好的現場歌詞手語傳譯呢?相信冇因為冇人敢接job,全世界可以幫King Ly Chee做,應該只得曼德拉悼念儀式有精神病又上台扮自己係手語傳譯員嗰條黐線佬先夠班。

上次萬能青年旅店去HA賣飛鬼咁快搶唔到飛,今日嚟就係為咗佢哋,免費有得睇呢隊中國數一數二勁band喎,現場亦完全唔失望兼喜出望外,雖然冇乜台風好多時你望我我望你背對觀眾表演到好似band房練歌噉,但音樂真係無敵非聽CD可比,如果Dire Straits生在九十年代玩alternative rock,或者會同佢哋差唔多。

睇完個人重咗幾磅,因為入夜之後根本冇停過雨仲要越落越大,成個人底衫面衫件褸都吸晒水。本來聽日打算冇嘢做的話出去睇埋Day 2,睇到七點MastaMic玩完之後過HA睇唐朝,今舖睇嚟唔多使諗,如果仲係咁大雨仲邊敢出呀?

呢屆政府從來好事同應做嘅事都唔會做,自由野係屈指數得到嘅德政之一。只希望之後、真係起咗個九西中心之後仲可以一年一年搞落去,不過到時自由野應該變成好嘢/應做嘅嘢,繼而俾政府收皮。

2013年12月18日 星期三

再聽《月牙灣》,令我很明白,為何唱片公司已幾乎放棄F.I.R.




http://youtu.be/sZXE20ScmPY


原來F.I.R.出咗新碟《Better Life》,居然可以出得咁低調。想當年第一隻碟,《Fly Away》、《Lydia》、《我們的愛》簡直勁到仆街橫掃香港大陸台灣,連韓國都翻唱佢哋,跟住兩隻碟遜色少少仍然夠殺,第四隻碟《愛.歌姬》先係最高潮,我覺得超越咗第一隻同名專輯,全碟冇一首歌唔好聽或者悶呢樣pop碟已經好難做到,而《月牙灣》係其中一首最接近完美嘅中文流行曲,08年平安夜喺世博搞嗰場演唱會,簡直係超過晒我香港睇過嘅所有流行演唱會,你真係現場親身經歷過,先會明白到原來華人地區可以有一隊台前實力加幕後製作已經有國際一線水準嘅組合,嗰陣仲要係女歌手同結他佬拍緊拖,知唔知我幾驚臨尾又係男向女求婚呢啲老土嘢完場。

只可惜係咪兩個人散咗所以音樂都跟住散埋呢,跟住兩隻碟簡直係失望到你唔信,就同兩年之後去紅館搞嗰場演唱會一樣,理應比以前更盛大更隆重,但結果得個殼冇內涵好空洞,所以好難怪出新碟都冇人知,見乜宣傳都冇,睇嚟唱片公司都有心放棄佢哋,而我聽咗幾首之後,今日立即拎返隻《愛.歌姬》勁煲《月牙灣》。真係好希望F.I.R.可以返到嗰陣個水平。

2013年12月16日 星期一

萬千星輝頒獎典禮...同我睇報紙廣告有咩分別?

原來今晚係萬千星輝頒獎典禮。每年睇到呢一晚無線圍內自己選返自己然後做到好似好大件事全城焦點點點點,感想都同睇報紙見到保險公司賣幾版廣告擺晒班sales堆車頭相出嚟講到點樣傑出彪炳一樣:

「屌,你打飛機關我撚事咩,企開啲啦屌你老母。」

2013年12月15日 星期日

自由野令我第一次覺得香港政府做啱嘢(所以應該好快收皮)

自由野Day 1感想:文青唔太多,靚女唔夠多,bass推太多。音響非常靚聲去到邊都聽得清,係低音幾乎一定出過其他人成日遮住其他樂器,但全日製作同班底同氣氛實在本地難求,不枉我朝早五點半起身出大角咀做part-time之後,點幾鐘收工眼瞓到死都由奧運站行去九龍站再頂到最尾十一點。不過我呢挺毒撚都係唔太適合嚟呢種咁文青嘅場合,入夜之前主台都得好少人,但過去文青樂園大草地,啱啱係今期流行新青年理髪店出場,觀眾人數多主台一倍以上。然 後聽佢哋唱咗幾句,唔知咩朝早起身去廁所屙屎,心諗做乜鳩轉頭即走,睇嚟我呢世人都係做唔到文青架喇,抵我溝唔到女啦。

我相信自由野歷史上最成功係揾King Ly Chee表演,根本主台成日到佢哋出先至係正式開始,大場都可以玩到pit晒插晒水Riz衝埋落台企上鐵馬唱,仲要成場表演都係橫風橫雨,我企正台前鐵馬,前面大雨到眼鏡己經乜都睇唔清,後面就狂撞上嚟差少少鐵馬都撞低,頂真係未試過香港睇一次band可以咁癲咁正,而當呢種場面唔使講日本台灣同大陸都好普遍,就證明香港缺乏容納得到嘈band嘅大show/music fest缺乏得好緊要。

臨尾對眼鏡仲要人哋插水時飛走埋,勁在跌落個pit度居然冇人踩爆冇花冇爛仲執得返,撞跌我眼鏡位朋友放心我唔會屌你,如果今日成場咁喪都撞唔跌我副眼鏡先至抵屌啦,係咪?話時話,說好的現場歌詞手語傳譯呢?相信冇因為冇人敢接job,全世界可以幫King Ly Chee做,應該只得曼德拉悼念儀式有精神病又上台扮自己係手語傳譯員嗰條黐線佬先夠班。

上次萬能青年旅店去HA賣飛鬼咁快搶唔到飛,今日嚟就係為咗佢哋,免費有得睇呢隊中國數一數二勁band喎,現場亦完全唔失望兼喜出望外,雖然冇乜台風好多時你望我我望你背對觀眾表演到好似band房練歌噉,但音樂真係無敵非聽CD可比,如果Dire Straits生在九十年代玩alternative rock,或者會同佢哋差唔多。

睇完個人重咗幾磅,因為入夜之後根本冇停過雨仲要越落越大,成個人底衫面衫件褸都吸晒水。本來聽日打算冇嘢做的話出去睇埋Day 2,睇到七點MastaMic玩完之後過HA睇唐朝,今舖睇嚟唔多使諗,如果仲係咁大雨仲邊敢出呀?

呢屆政府從來好事同應做嘅事都唔會做,自由野係屈指數得到嘅德政之一。只希望之後、真係起咗個九西中心之後仲可以一年一年搞落去,不過到時自由野應該變成好嘢/應做嘅嘢,繼而俾政府收皮。

2013年12月12日 星期四

每週一相片大行動 2013 Week 50:我是一個見到沈大師真人的不孝子




係,我係不孝子,但我都唔想。今日老細call晒全部人落九展,以為有大鑊嘢原來係正嘢,有event仲揾咗沈大師做司儀,嘩佢真人真係正到呢,嗚呀~~我都唔想要我老母受罪架,不過個場唔係大但多人到黐線,一見到有明星影成班人圍到實晒根本埋唔到台邊,之後仲大鑊方中信出場,全場女性當堂發癲,班女職員已經唔記得自己返緊工做緊嘢band show噉款衝台,我直頭係俾後面班女一嘢扯去後面差少少仆街,然後企我隔籬個女職員同我一樣太遠睇唔到,半截裙黑絲腳照擒上張凳上面遠眺。對唔住老母,我又要你受苦喇。

沈卓盈真人真係無撚敵地索,雖然老細話近睇塊面皮膚有點差,算啦留返個幻想空間俾我啦,我哋呢挺毒撚條命就係只可以遠觀女神架咋。

2013年12月8日 星期日

終於有model出「寫真」,我會好有興趣「買」


倪晨曦出性感月曆


http://hk.apple.nextmedia.com/entertainment/art/20131130/18530105


model有兩種,一種要除衫,因為唔剝衫冇其他嘢睇;一種唔使除衫,因為有樣有氣質唔使靠身材。所以最好睇,應該係本身唔使除衫嘅女決定除衫,搞到我對倪晨曦出月曆有啲興趣,因為而家香港咁多model咁多女,我覺得最正就係佢。

但當本身齋賣樣都夠而家都要剝衫,只得兩個原因,一係世界難撈,一係嫌撈得唔夠多,而如果係後者,成個局比港姐更美貌與智慧並重。要除完衫賺到錢同知名度,最簡單當然係出寫真,但當呢條水已經做到cheap晒cliche晒時,稍為包裝一下,檔次立即唔同晒:唔係寫真,係月曆,雖然底蘊冇乜分別;唔係賣,係送,雖然係跟潮流雜誌送,即係都係買,只係「間接」咗。目標結果實際上都係一樣,但就唔會令人覺得自降身價做cheap自己,甚至反而成為一件高檔潮事,繼周秀娜之後,佢可能係香港最聰明嘅model。

2013年12月7日 星期六

Robynn & Kendy新碟《Sail Away》,令我想起初期的謝安琪




http://youtu.be/DaeCysne7_4


其實一直覺得Robynn & Kendy麻麻,係幾好聽,只係兩個人把聲、曲、編、詞都太平淡,成功一大原因全賴AT17唔玩,進而池中無魚蝦為大。不過終於唔再用cover歌做賣點隻新碟《Sail Away》,唔錯喎,有點謝安琪頭兩隻碟種感覺,搞到我好大興趣。

2013年12月6日 星期五

每週一相片大行動 2013 Week 49:一個理由,話你知點解要用Google粵語輸入法 




一個理由,話你知點解要用Google粵語輸入法。唔會有任何一個電話中文輸入法,可以超越得到Motorola個香港輸入法,易打、好打、唔識倉頡都識打、地道夾市井、通俗之餘夠低俗,係真真正正按港式廣東話文化設計俾香港人用嘅輸入法,只差在唔曉出粗口,唔係就真正完美。可惜而家跳左船去LG Nexus 5跟機只得拼音,好在上Android Market(Play乜鬼野Store呀頂你)有Google自己推出嘅粵語輸入法,雖然好打同方便但關連字同Moto仲差得遠,全靠一招,力挽狂瀾。

2013年12月5日 星期四

我沒了智慧




剝智慧齒間診所喺正屋企樓下行一分鐘就到,咁近搞到冇乜危機意識,約咗十一點,十點半先起身,搭十一個半字至施施然躝落樓,醫生見面第一句就係

「唔係啩?早餐都冇食?知唔知點解我俾三日假紙你?因為陣間剝完牙痛到仆街痛足三日,到時屎到冇得你食呀!」

真大鑊。初頭以為要開刀剝牙好大工程,點知打完三枝麻醉針之後整咗一陣,唔夠四個字已經做完,見到醫生中間破開隻牙一左一右兩塊拎出嚟,真係好鬼br00tal。搞完之後醫生先話

「頭先撚化你咋!又唔使食屎咁慘,不過陣間你都唔使旨意食到乜嘢架喇,剝完牙要止血同吞口水,你今日食雪糕當飯啦!」

剝完落樓冇乜嘢,不過唔知麻醉針一過會發生咩事,醫生仲開咗隻話超級勁一食廿四個鐘有效嘅特強止痛藥俾我講到好大單,好鬼淆底,我怕呢兩日真係會痛到仆街。份新工返咗個半月未夠已經每個禮拜請一兩日假,唔係太好喎。

2013年12月3日 星期二

Nexus 5相機HCR+ mode係點?




Nexus 5相機唔係好勁,同我之前部Razr Maxx一樣800萬,不過用software救返唔少,如果想知道普通相機mode同N5個HDR+比係點,可以睇睇呢張相,都係琴日幫隔籬屋免費放餐檯賣廣告時影,上面係普通相機模式,下面係HDR+,比較細緻同色調平衡返,唔會似一般電話影相時偏白,而接近返DC效果。

(雖然部相機真係麻麻,想影好少少買N5部升級版LG G2好過啦,一千一百萬像素喎,但我好鍾意HDR+出嚟個效果,而家連第三方影相app都唔使裝。)

[共襄善舉] 免費實心木伸縮餐檯加四張餐凳一套,只要你肯嚟拎就免費送俾你




隔籬家人今個月搬屋,有實心木伸縮餐檯加四張餐凳一套,因為料靚幾乎同新一樣,唔想浪費所以免費送出,只要你肯嚟拎就送俾你,自用或捐贈有需要人士悉隨尊便。

全硬淨實心木製,尺寸約4尺長、3尺闊、3尺高,食飯可時拉長成5尺長飯檯,連四張全木餐凳,冇爛冇乜花狀態非常良好,全部免費。位置喺土瓜灣同九龍城交界、宋王臺/家計會一帶,因唐樓關係需要搬三層樓梯,我當然會幫你手一齊搬落樓啦。

因為新淨同用料手工堅料,想自用或想捐俾人都冇問題,有興趣十二月內隨時搵我啦。

(between,唔係賣花讚花香,而家真係好難搵到傢俬會似以前咁襟用,用咗廿幾三十年依然硬淨,唔要唔係因為用到爛,而係環境所迫先唯有放棄,否則我相信再用多廿幾三十年都冇問題)

2013年12月1日 星期日

音樂騷動 Show Motion 第一show主題曲《騷動》@蒲吧 30/11/2013




http://youtu.be/Vyg3tcMgKLs


昨晚30/11蒲吧音樂騷動 Show Motion 第一show,Once + Narcisus + 輕觸點一同演出特別為今場演唱會創作之主題曲《騷動》現場實況。Very good show!

2013年11月30日 星期六

人生一大挑戰

人生其中一個最大挑戰,係自己幫部機貼保護貼。呢兩日連貼兩鑊,一晚貼Nexus 5、一晚貼iPod Classic,兩鑊都衰晒,無論事前點樣抹乾淨個芒點樣用膠紙黐走晒毛粒塵粒點樣揀個乾淨冇塵靚位黐,第一次貼完總會有泡,拉返起再整,整幾整之後仲衰個底實入晒塵,成塊嘢貼完好似生青苔噉唔黐好過黐。N5都叫做捨得使錢的話出先達出黃金可以買返張仲有專人幫你貼埋(我永遠唔明點解我用同一個方法貼,做舖嗰班永遠冇事,我就貼完仲樣衰過唔貼),iPod Classic連個套都要淘寶淘返嚟,而家芒貼連張轆掣貼紙都收晒皮,唉笠完個膠套繼續裸跑算。

好懷念以前iPod開箱正面已經貼咗塊膠膜唔使煩。

2013年11月29日 星期五

Typhoon Haiyan Benefit Concert:一個fing住頭做善事的晚上




雖然Hypno5e香港站取消咗相當可惜,但HA同一晚變咗場五隊本地菲裔metal/core樂隊合辦嘅菲律賓賑災演唱會,一晚有得睇晒Shepherds the Weak同Black Night Red Sky再加King Ly Chee,平時都冇乜機會啦。

出場安排有點有趣,KLC居然排第二,而BNRS最後出。就難為了我,可以話今晚係專誠為Black Night Red Sky而嚟,但平日晚加例牌遲開又撞啱今晚有嘢做要落一落樓,搞到只睇到最後三首,咪話我衰,呢晚我真係寧願STW做壓軸。

「between,Shepherds the Weak上次玩完《Master of Puppets》,今晚到《Symphony of Destruction》。佢哋技術走向同風格,cover Megadeth比玩麥記更加適合。」

佢哋應該係live最玩音響效果嘅香港metal band,每次聽到間場好post嗰隻tremolo聲,真係想問問使唔使tune到咁靚呀?BNRS去到嘅地步係,單聽到結他聲你已經知道係佢哋咁有性格,而且歌越寫越好,氣氛技術編曲要乜有乜(冇女soli),最緊要歌路係metal位篇幅大過core位,而家最想出碟嘅香港metal band,就係Black Night Red Sky同Massacre of Mothman,不過錄音的話一定要做到比Qollision隻碟更靚聲,至帶得出佢哋種「hi-fi metal」效果。

成晚最意外反而係第一隊Death Reject,雖然排第一,但我覺得數一數二好睇。近返melodic death結他妹同鼓佬技術好勁(成晚最鍾意鼓佬就係佢),編曲好紮實變化多之餘夠出人意表,歌整體又夠順唔會覺得一截截唔夾,而且話第一次出show台風已經唔錯,又多一隊要多加留意嘅香港metal band。不過有兩樣差少少,首先metal band live得一枝結他絕對唔夠,第二呢bass佬要再苦練吓至得,當另外兩個咁技術派,佢仲係00001111花都冇乜實在太過平穩,而且佢唱清聲,一來唱同聲都實在唔叫好好,二來我覺得其實Death Reject而家啲歌冇乜必要呢種唱法,落咗清聲反而有點似為加而加。

今場真係一場好show,最大收穫賣物籌款度執到保證絕對絕版嘅HK Rockstar謝霆鋒演唱會翻版碟乙隻。係有樣嘢好唔開心囉,即係我今個月開始九展嗰頭返工,諗住佔晒地利返工日子睇show方便,但係偏偏呢兩個星期我調咗去屋企樓下返工,HA先至平日夜晚有metal show睇。明玩我嗟。

2013年11月26日 星期二

Nexus 5初上手手記

從來唔明點解電話殼可以賣到咁鬼貴,其實見換咗Nexus 5想試試用皮套,但平極都要六七十,見Yahoo有人放膠套包埋保護貼同郵費先$28,自然是窮撚首選啦琴日過完數今日已經收到。成世仔第一次自己貼保護貼,貼到成劈嘢噉邊位起晒泡中間又有幾粒捽唔走,同個膠套一樣頂住先啦真係去到一日望見都頂唔順咪換個好啲囉。不過部機用落真係唔錯,向來唔太鍾意LG,玩咗半日Nexus 5,夠令我呢個Motohead對佢哋改觀。

個芒真係超靚,膠殼機但手感唔差,衰在我手同面都多汗多油,一定要加保護貼同戴套唔可以裸跑,比較可惜。作為第一部正宗Android 4.4,其實我只用得著超快超順呢一樣,真正兩個賣點冇乜受益。號稱可以令部機比而家快一倍嘅ART mode因為Whatsapp兼容唔到,為咗一個app而放棄,而Google Experience Launcher除咗多一個Google Now專頁唔覺有乜特別,都係ssLauncher種超高自由度先啱我玩。軟件上暫時用落冇遇到咩問題,不過仲未set返起全部app,Razr Maxx時一次過開晒ssLauncher + Swipepad + Widgetsoid@Notification + Tasker部機會谷到幾乎死,唔知而家字面spec勁一倍會唔會搞得掂?暫時試到問題係,Tasker有時會拉開notificatoin bar先至load icon,會搞到通知欄落得一半停咗或者彈返上去,要拉多嘢先落得晒。

有兩樣嘢就一定要屌,始終唔多慣4.1打後,任何嘢都係先排中文字跟住至到英文字。而最仆街係,4.0唔准用原生系統以外程式開關GPS我已經覺得好賤格,估唔到4.2之後連飛機mode都唔俾第三方控制。屌你啦你知唔知我有幾多Tasker profile係控制部機開關飛機mode去慳電去自閉做毒撚呀?而家搞到我差唔多一半Tasker profile要重新寫過。最仆街係要我次次手動開關,Kitkat個setting又唔係易開,呢樣搞到我超撚唔妥4.4,同考慮緊係咪未過保養就為可以重奪飛機mode控制權root咗佢。

行版機有繁體中文但得拼音輸入法,其實好灰因為轉咗嚟LG冇咗Motorola個超強勁香港輸入法,倉頡唔識打可以用X做百搭揀字連我呢個倉頡白痴都曉打,試過好多中文輸入法都冇呢個方便功能,關連詞又有勁多好地道香港俗語好多時打緊字可以笑死你,設計條友唔知係咪高登仔嚟,最激英文你打metal會自動出Metallica。好在上Android Market download咗Google個廣東話輸入法都唔弱,keyboard超好打轉語言方便廣東話關連詞又夠多,雖然太正勁唔夠過癮,同都係冇得用X代碼唔識拆倉頡碼就灰,但功能同介面搭救我收貨。

硬件上,只有話最好係通話,雖然冇咗Motorola最出名嘅Crystal Talk(呢個係我一直以嚟勁捧Motorola同想轉Moto X原因之一,Mo記電話通話質素真係無人能及),都夠清夠大聲,問題係喇叭唔得掂細聲到呢,鈴聲唔夠響都算,聽歌睇片至灰。以前Razr Maxx用機身喇叭聽歌上Youtube,較一半已經好大聲成個客廳聽到,N5就算開到最大聲你都只會嫌佢仲係好細聽得唔清楚。

另一樣嘢都好靜不過我鍾意,就係相機冇嘈到拆天快門聲,其實Motorola相機港版rom一向有得熄快門聲,係刷上4.1.2因為外國rom關係唔root冇得熄相機聲,出街立即唔敢影啦一影真係成條街冇人唔知道你偷影緊人裙底。N5好在相機聲只得細聲聲一響,雖然影相畫質麻麻,睇參數得八百萬同Razr Maxx一樣就預咗,但有個相當無敵HDR+ mode自動調整色溫同白平衡,影出嚟同普通mode差天共地。之前用開應該係最好嘅第三方影相app ProCapture,Motorola電話相機出名食屎但ProCapture可以用程式救返好多,不過嚟到N5,應該會為咗個超強HDR+ mode繼續用Nexus 5個原生相機app,之前買Procapture嗰一條,豪俾你啦。如果原生app可以加返格線就好。

作為一部$3588價位機有近旗艦級硬件同手工非常之抵,好可惜總會一分錢一分貨,乜都可以俾好嘢你,就係偏偏得舊2300電。唔明2300係點樣?我用例子答你,今朝起身100%,搭車時搞搞setting上上網,一個鐘返到公司已經用咗2X%,連咗wifi擺喺檯唔郁待機的確冇乜扣電,但一開芒用嘩頂倒水速度真係嚇鬼死你,以我用量唔多可能唔靠尿袋頂到一日。雖然我有兩舊外置電跟身(當你拎住兩部電話加經常收到追魂call或者要成日落site立即一部電話live電話會議另一場即場影相或者Teamviewer,其實帶咁多嘢都唔太夠),唉用過Razr Maxx舊幾乎不死嘅3300電,真係返唔到轉頭。所以而家都未試過拎部N5打機,我怕玩一個鐘Dead Trigger已經玩晒100%電,部Razr Maxx亦因此唔使退役住,因為舊電夠大變咗部Android遊戲機,亦即係而家我經常有三部電話加兩舊尿袋跟身。(...)

電細嘅「好處」,咪就係叉電快囉,今朝去到七十幾%時拿拿臨插返隻2A牛,一個鐘唔使已經叉咗差唔多30%電,快到我都有啲驚叉死舊電,係咪要換返隻1A牛部機冇咁傷?但1A牛電壓問題touchscreen會冇反應...另一唔妥梗係USB插頭擺底啦,鍾意Motorola好多原因,其中一個就係佢哋通常將USB頭擺頂或者側邊,噉樣叉電時部機就可以企喺度,如果插底又想部機企得起身,咪即係叫你幫襯買個dock囉!如果一定要俾錢,Nexus 5有NFC,或者落本少少買無線叉電板好過,屋企一塊公司一塊,擺低部機就叉拎起就行得,反正我慣咗用Airdroid傳file連USB都好少插,無線叉電連個插火牛都唔使個USB頭可以捱多一排。

總括嚟講,唔嫌喇叭同舊電比想像中差(呢個年代,都冇咩人唔帶尿袋出街架啦),同埋相機只叫合格夠日常用唔夠影靚相(老實,真係想用電話影靚相,就買iPhone或者Nokia啦,用Android電話又想影靚相矛盾得有點on9,頂籠俾部Sony你囉),以三千中價位加最正宗冇任何垃圾app跟機嘅Tr00 Android加將來有更新一定會最快,我覺得物有所值,尤其我是一條從來唔捨得俾超過四千蚊買一部電話嘅窮撚。如果你捨得的話,咪加多千幾蚊出部等同於Nexus 5升級版嘅LG G2,規格同N5相似,不過硬件勁多少少芒大多少少相機勁多少少,不過價錢唔止貴多少少囉。

2013年11月25日 星期一

所以,唔使錢我都會嚟返工




呢兩個禮拜合皮到震,調咗去跟個土瓜灣客教佢哋用公司個新系統,夠頽可以九龍灣返完上半晝公數搭車返屋企,食完lunch瞓多陣晏覺,先出門口行兩個字過去開工。因為咁近,上星期六朝早無聊走咗過去玩,其實係自己私底下去冇同老細講架,冇錢收都去OT,點解?「因為個project幾趕吓,所以為咗個客為咗老細無私奉獻囉!」咪傻啦,劉Sir條XX又點會咁好死呀?

個客喺九龍城碼頭開舖做大陸團生意,不過佢套猶太人式生意頭腦冇得唔服,包埋左右兩間舖,右邊間舖賣歐洲朱古力,唔買貴嘢又想買禮物都有平價選擇;左邊間佢唔講我都唔知都係佢哋,因為係間小食檔賣魚蛋賣珍珠奶茶賣糖水,連樓上街坊出面等巴士等船班路人甲乙丙同唔買嘢等散團班大陸客生意都做埋,真正高中低檔男女老幼通殺。而嚟到教用電腦班都係姐姐嚟好玩又好傾,大家同聲同氣又爛玩最開心,嚟到一坐低,

「阿Sir阿Sir!飲杯珍珠奶茶先!」

都未飲完經理就走埋嚟擺低堆到成座山咁高嘅朱古力,

「我哋啱啱入咗批比利時朱古力,有五隻味,試完話俾我知覺得點!」

一面飲奶茶食朱古力,都做唔夠一個鐘嘢,

「阿Sir你辛苦喇!食魚蛋做下午茶啦!」

經理見到你食魚蛋,又行埋嚟

「咦做乜食魚蛋,頭先俾你啲比利時朱古力食晒嗱?唔緊要,仲有隻意大利朱古力想搵你試味!」

再上多陣堂,又另一個靚女走埋嚟

「阿Sir得唔得閒呀?幫我搬幾箱貨,搬完請你食串燒!你想食腸仔定雞翼?」

搬完嘢仲食緊串燒之際,行返埋位又多咗兜燒賣,

「阿Sir你教得我哋咁落力,食埋碗燒賣我哋繼續上堂啦!食完口乾仲有珍珠奶茶喎!」

跟住經理又會走埋嚟,重複同樣的錯誤。即係,唔係我真係好想六點立即收工跑兩個字返屋企呀,唔準時閃人的話,真係會食到返到屋企時連晚飯都食唔落呀。我仲要駐呢邊兩個禮拜添。應該有足夠時間俾我為聖誕節做part-time聖誕老人做準備。

「老細,話時話,呢間老點係咪你哋架?係咪可以早午晚三餐過埋嚟黐飯食呢?」
「點會係我呀?我咁醒會改間舖做呢個名?睇見個名就知點解間嘢一早執咗笠啦!」

2013年11月24日 星期日

半澤楊修之直樹之死

睇晒十集《半澤直樹》,結局寫得好正,最後大佬之後原來仲有真正最後大佬,絕到冇嘢講。不過論到最峰迴路轉都係意識方向,一直似講/鼓勵突破規範打破階級觀念推翻制度,但結尾都係想話你知,老屎忽無論點樣都只會係老屎忽,任你點樣有才華有拼勁有功積,一日你唔甘心情願做奴隸,一日你都唔使旨意有好日子過,唔好發夢會有「將功補過」或者「論功行賞」呢回事。原來係一套以銀行業界包裝嘅《楊修之死》。

2013年11月23日 星期六

每週一相片大行動 2013 Week 47:To Madfinger:你哋已經搞到Dead Trigger 2走火入魔




Dead Trigger 1.0其實相當完美,唯二不滿係正關只開到第二版非洲,同埋新系統實在太太太貪錢,全部嘢拆到有幾細得幾細跟住逐項問你要錢,冇左第一集「玩家俾唔俾錢玩都可以玩得開開心心」種使命感。但以完成度黎講1.0真係超晒班,不過Madfinger班友見都係賺得唔夠多就patch返幾嘢,主要為「平衡」,即係破壞平衡,將喪屍整到有幾勁得幾勁,當連一隻卒仔食火箭炮食到應一應都可以唔死,就即係之前你買武器同升級堆錢幾乎變晒垃圾,同重新開始由level 1從頭玩過冇咩分別,想過關請繼續努力搵錢或者俾真錢Madfinger啦唔該。呢樣我都算,1.0明明好順冇乜錯漏,點解patch完之後反而可以又lag又多bug到癲?bug到一個地步係,呢張圖,有玩Dead Trigger 2的朋友,不解釋,你懂的。

不過,挑,我咪又係同反無記班文青一樣,一面屌一面玩,「罷玩」一晚取得「階段性勝利」之後繼續死煲爛煲,哈。

2013年11月17日 星期日

為Dead Trigger 2枝電鋸打到嘔,點知打到出嚟仲嘔


打到嘔,終於俾我打到Dead Trigger 2枝電鋸出嚟。火箭炮要八張設計圖、tech & gunsmith level 6加$160000+3 days,電鋸居然可以要一樣咁多設計圖之餘,要level 8加十五萬同三日,而且原來唔當係近身武器,仲要食多我一個武器位。即係你話我知,電鋸原來仲高科技過火箭炮、仲貴重過機關槍?真係想要,所有升級同生產夾埋,要用多差唔多一百萬蚊加十幾日時間,

2013年11月15日 星期五

每週一相片大行動 2013 Week 46:繼九龍城廣場KFC,再次說再見,尖沙咀Burger King




繼上次九龍城廣場KFC,今次到尖沙咀Burger King,又係我撞到正last day黎到幫襯順便送行,多謝Gershwin 啦,唔係為左佢,我都唔會咁機緣巧合食到呢度最後的晚餐。雖然本身係諗住睇佢聽晚尾場。

2013年11月13日 星期三

Dead Trigger新patch...原來係個嫌賺得唔夠多鑿多你一筆嘅陰謀

前晚(11/11 22:30(好似係))Dead Trigger出新patch,唔係終於肯開新campaign有得打香港大家繼續屈喺美國同非洲,噉點解要patch?原來係Madfinger嫌1.0少少嘢都要你俾真錢個設定仲未賺得夠,特登更新再屈多你一筆。

新版賣點係「rebalancing」,標榜幾隻大佬喪屍適度弱化咗,問題係卒仔勁咗好多。琴日明明揩吓個掣已經做低幾隻,今日點解好似射極都冇乜效用?仲要而家每次出數量都比以前多一倍,單對單武器立即收晒皮,patch前雙輕機槍一排彈殺五六隻喪屍或者一隻大佬屈機到爆,係我最自豪嘅投資,patch後射到天黑先打得死一隻,仲要殺得嚟已經有另外七八隻打到埋身,當堂覺得之前拎咁大舊錢買Dual Uzi on99。

亦即係新版根本就係迫你做兩樣嘢:仲想用單對單武器,一係買新勁槍一係將舊槍升級,即係$$$;一係改為投資大範圍武器,又係$$$。之前全球連線攻城,話打贏會送枝AK47俾你,點知辛辛苦苦殺幾千隻喪屍之後唔係送槍,而只係「好喇而家你可以俾錢買呢枝槍喇」,已經覺得Madfinger有點過份。玩埋個新patch,直頭覺得佢哋已經走火入魔。

2013年11月10日 星期日

每週一相片大行動 2013 Week 45:十年前上雜誌的靚仔相,再現江湖




多謝Stan哥仲搵得返十年前呢期《打口》,唔係我自己都唔記得咗呢回事。同一本已經R.I.P.多時嘅音樂雜誌《打口》有關,重點是第四期,好多年前講過所以呢度懶再講喇,自己睇history啦。嘩十年前嘅劉Sir,即係仲未過130磅、對波仲大過肚腩嘅劉Sir,嘩而家睇返張相都唔多認得自己。

呢一期《打口》我好似仲有keep到,但間房咁亂唔知仲有冇機會摷得返,好在當時有scan低,咁值得留念,因為一期入面有好多樣嘢值得留念:

  1. Donald Ashley專訪,而家已經冇乜人/雜誌仲會訪問佢。最近一次有人會搵佢做訪問,諷刺地,係仆街嘅亞視。

  2. 六翼天使訪問。果時剛剛畢業交晒功課等緊拎證書,未有工開嘅日子又撞正搞show,係TRHK第一場show同香港第二場外國band嚟開嘅metal gig - 你冇經歷過,唔 會知道當時搞一隊外國band嚟香港,係幾咁困難要使幾多錢。當時唯一一本幫手宣傳同會訪問佢地嘅雜誌,就係《打口》。呀,仲有亞視,呢記唔記得劉Sir上《慧珊時 尚坊》同你講metal...

  3. 第四期係第一次行雙封面,身為客席編輯同顧問嘅我,成功爭取到用六翼天使張相做封底。意義重大呀,證明劉Sir講嘢真係有人聽架,騎騎。

  4. 最後同最重要一樣,咪就係呢張靚仔相囉。是咁嘅,一直有幫《打口》寫嘢,呢一期除咗六翼天使訪問講解乜嘢係(power) metal,仲有寫Lenny Kravitz訪問同Velvet Revolver專題。當晚酒店大堂訪問完六翼天使,佢地幫我同隊band影張合照,出版社想出作者介紹但得呢張相,就cut咗合照入面個大頭出嚟,點知排版位仁兄見版面有好 多吉位,就將張相放到車頭相咁大,名副其實嘅大頭。真係而家自己睇返都有點尷尬。
故事,未完架,呢期第四期《打口》,亦是一個劉Sir黑仔得超乎想像嘅見證。《打口》出咗剛剛好一年就執咗;六翼天使嚟完香港差唔多成隊換晒人,出多隻碟跟 住消失埋;TRHK唔使講啦;而Velvet Revolver劉Sir寫完之後都收咗皮,歌佬自己隊Stone Temple Pilot出返嚟玩,但搵咗Linkin Park個歌佬唱,剛剛Loud Park day 1搵佢地做壓軸 (唔好問我,我都唔知點解一個metal fest會請隊grunge band,仲要擺最後...),睇兩首已經頂唔順,搵LP歌佬嚟唱根本就係想自殺。一期書就睇得出,劉Sir真係生人 勿近,佢遇過掂過嘅嘢,從來冇乜好下場。

2013年11月5日 星期二

I love this job

份工做咗半個禮拜,日日都唔同嘢玩,first day係去聽師奶們投訴公司啲電腦點樣難用不過意見接受態度照舊,跟住一上工就撞著公司搬office,星期六OT做苦力搬貨,禮拜日再加班幫手砌server,星期一正式的day 2變咗做速遞仔,今日就去紅磡幫手砌機整機,因為做完嘢五點幾搭車返到公司都過晒放工時間仲要塞車呢,就爽到震地早幾個字收檔,趕得切去黃埔睇Thor 2六點場之餘有得食多個Mos Burger日式薯餅魚柳bell。所以呢份工真係搵得好,似返我想做嘅嘢,而且每一日你都唔知會發生咩事要做乜嘢,噉先至多嘢學唔會悶夠晒好玩。

不過一開始返工部電話就死咗公司又冇腦,第一個月人工除咗要用嚟買新電腦新電話,睇嚟仲要買買新衫。話晒份工要成日出街見人就廢事日日黑衫啦,但摷晒個衣櫃發現想執得到夠著一個禮拜嘅唔係黑色衫好難,講緊短衫咋喎長袖仲大鑊,我生存咗咁多年個衣櫃先得四件長袖tee,仲要得一件唔係黑。而家季都轉埋,係咪要去Uniqlo買返半打文青style素色/彩色長袖衫脫脫毒先。

2013年11月3日 星期日

每週一相片大行動 2013 Week 44:男人的浪漫消費主義




份新工真係夠晒多嘢玩,返第二日已經要幫手搬office,去紅磡做嘢見到有檔樓梯口雜貨攤賣呢隻十功能卡片刀,一蚊雞一樣功能,就豪一條俾個阿伯唔使煩,跟住上到去開箱拆嘢立即用得著,即刻覺得自己好pro。似乎要整返把瑞士刀至得,用唔著都可以得閒無事拎出嚟扮蝴蝶刀fing幾嘢扮晒型,噉就真係男人的浪漫喇。

但更需要,似乎係新電腦同新電話。寫字樓唯一一部用得嘅電腦居然係成世人第一次見嘅Ubuntu,唔知係咩嚟的話,簡單嚟講係個介面打橫嘅Windows(好似Windows都可以將下面條工具bar set去旁邊...),load乜都超慢仲要打唔到中文,跟住同事話「係噉架個個都係帶私伙電腦」,之前去旅行用開部netbook又死鬼咗,我又唔介意平平地買返部手提,反正屋企去旅行同第時打第二份工都用得著。電話反而先緊要。

部Razr Maxx 3300電真係超級無敵,用咗年幾舊電仲夠超高用量嘅我出街捱大半日,但1GB ram已經唔夠我玩,一個launcher加幾個自動化app已經霸晒全部資源,原來之前隨便開個app都要十幾廿秒先開到已經碎料,而家係玩到一開機已經彈app,連幫我清ram個reboot app都唔夠ram行,有時打電話接電話都做唔到,因為smartphone將電話當成一個app,冇ram又點行app打/聽電話呀...而家份工好多時要即時同寫字樓live update,即係落到場半分鐘先開到Whatsapp跟住再用半分鐘開相機仲要load一大輪先話彈app開唔到好喇開到相機喇影完又要十幾秒先save到,點做嘢呀大佬?以我玩法相信要2GB ram加四核CPU至夠用。

其實Razr Maxx以外HTC One設計用料同規格最接近我想要,但舊電得2200,仲要出咗至話粒CPU降grade但價錢唔跟住降,明伏吹呀。最新出部One Max 6”太大仲要六千二太貴,其實Sony Z1好有興趣電訊數碼客仔又有得平一千(雖然都要四千),叫做而家其中一部相機最靚Android電話規格同設計又唔錯(Motorola之外,我應該最鍾意Sony設計),問題係Sony電話出晒名軟件寫得差倒水倒得勁過其他牌子,舊電話3000,實際效能可能得2000...又唔想用韓國機大陸機。只係想揾部簡簡單單4.5"芒2GB ram 3XXX電加有得插micro SD嗟,但好似真係除咗香港已收皮嘅Motorola,冇邊間廠仲會整。

仲有之前去完東京可以屋企叉叉吓電無端端望住都見但擰一擰轉頭就消失咗部iPod,硬係覺得個天都話我係時候升級買返部iPod Classic。大鑊仲要放工行返出德福淘大嗰頭凶宅百老匯衛信電器舖行極都有,睇嚟新工第一個月份糧凍過水...

2013年10月31日 星期四

打Dead Trigger 2打到睇住《The Walking Dead》大結局殺喪屍有記

Dead Trigger 2打咗一個禮拜,打到琴日終於儲夠錢升夠level買到枝半屈機嘅十字弓,夜晚睇《The Walking Dead》大結局,入面班友電視用十字弓射喪屍,我就電話入面十字弓殺喪屍。同上一集比,今集如何?我唔直接答你,我用呢幾日高登同人吹水寫落堆嘢答你就算,因為忙住喪屍大屠殺(實際上,係仍然成日比喪屍屈死):


「第一集捨得使錢就好易打得爆機,我用$25港紙買枝minigun同自動補血已經由頭屈機屈到尾半日打爆機,可能Madfinger見咁易玩冇乜錢賺,今集系統搞到好鬼搵笨

「畫面靚咗、音響勁咗、故事豐富咗、任務變化大咗,普通關感覺都好驚險刺激,但難玩咗好多。第一集玩hard mode完全冇難度,今集normal mode都覺得電腦明屈,特別細場出自爆大喪屍同Rager時,主要問題在刻意做到裝備太廢彈藥太少。」

「想整新武器要先搵科學家升全體tech level,再升槍匠級,再集齊武器藍圖先整得到,單為整枝M16已經要浪費一日時間,然後道具同武器整出嚟又要各自升level,通通都係錢。主角升level除咗每級多一點血冇意思,你每升一級,喪屍就升兩級,打到第五關level 14,枝MK2輕機槍射十發先殺死一隻雜卒,打一隻大佬搵唔到油桶要兩三個手榴彈先殺得死,normal mode side mission一版先得千幾蚊,好多時打埋都唔夠填返整買手榴彈同止痛藥條數,仲要係成功過到關至有咁多錢,中間出嘢Rager撞你兩撞,完場炸彈錢補血錢都蝕埋

「想早啲有勁裝備?俾真錢買黃金囉,最hihi買嘢升級要錢都算仲要計時間,科學家升tech level 4要24個鐘真係 俾完錢買完樣裝備仲要再俾大筆黃金去抵銷製作/升級時間,問題係今集買黃金個價位貴到

「雖然遊戲性同介面真係大幅度進步,但第一集唔使俾真錢都可以玩得好開心嗰種感覺冇咗(我仲要係一出立即俾USD0.99買嗰班),第二集玩咗半日,只覺得Madfinger恨賺錢恨到發燒

「咪搞到好多人唔想玩電話game囉。俾真錢就係為唔使無意義重覆無限次side mission儲錢買道具慳時間,而家只係慳儲錢嘅時間,但慳唔到買道具嘅時間,心諗做乜鳩

「一開始,俾credit就買到裝備,只要一重;跟住,俾credit升級之後再買裝備,要兩重;而家去到全隊升級>隊員升級>買裝備,三重先至到手,仲要每樣都另外要以斷小時甚至日數去計嘅等待時間。每一重都係想你俾真錢去換credit嘅藉口,其實你兩重我都會接受,電話game最鍾意玩雙貨幣,一種打任務賺一種99%要真錢買,但隻game好玩我都肯俾錢買,不過當我明明夠credit買道具都唔可以立即到手,仲要我等幾個鐘甚至一兩日又或者再俾多次真錢買時間,我就只覺得係難以置信地戇鳩

「今集裝備差咗、輔助工具少咗、喪屍勁咗,難度比本身已經易過頭嘅第一集高係好事,噉先至襟玩同有興趣長玩。問題係Madfinger將每一個部份都以盡可能賺最多錢而非遊戲性作為開發目標。出第一集時Madfinger講過,佢哋目標係整一隻唔俾真錢玩都可以過到關嘅遊戲,但肯花少少錢可以買到更多特別道具同武器,即係俾唔俾錢都打得爆機,只係體驗同滿足度之分別。第二集難度高咗本身係好事,但當好多地方都只有無止境問你要錢,難玩就會變成氣餒,完全偏離晒DG1理念。」

2013年10月29日 星期二

每週一相片大行動 2013 Week 43:R.I.P.(& F.U.), Yahoo Blog





R.I.P.(& F.U.), Yahoo Blog



首先,廢事唔記得講,劉Sir個新竇係




http://lausirisual.blogspot.com



我最不期待的畫面出現了。其實最初冇諗過開blog,因為Geocities時代出身,當其他人玩緊跟住玩完Xanga時,我已經赤手空拳用HTML打左成個網站lau-sir.com出黎,一個真真正正的鍵盤戰士:


劉蛇得金十週年:
一個挑戰世界紀錄的鍵盤戰士傳奇
http://lau-sir.com/lau-sir.com_10years.html


經歷過的話,都會記得當時Xanga真係非常流行非常熱鬧,因為好多學生妹同而家上左位的藝人/model都係Xanga常客,果陣唔似而家又蘋果又東字頭得Yes同便利又未興除衫,要上位就只有靠自己一堆火星文幾張相引厹follow,即係都係膚淺,叫做比而家新上位一班多少少內涵噉囉,果陣時追星班人真係會睇字架。之後網誌呢回事沉寂過一排,後來多返公司加入至慢慢多返人再寫,而當時最多人用就係Yahoo Blog,或者因為咁多提供blog服務大網站當中,Yahoo本地化做得最好啦,同埋再上一代自建網站年代皇者Geocities都係Yahoo主管叫做有點關連,最重要係未有Facebook嘛。身邊好多人都有開,「你都開返個啦」,日講夜講,最後真係開左個,不過其實只係將個網寫完堆野搬過黎一雞兩味,但難不在寫,而在點樣整個blog。

因為美術白痴,所以成個網搞左十幾年都只得白底黑字,開blog諗住好啦試下整色整水啦,搞少少野已經覺得Yahoo Blog個系統超廢,介面難用都算,出文個格式永遠同你打果陣唔同出到黎字體大細唔同晒排版移晒位。而且越用越衰,你諗過一個網站,可以每一次更新都比上一個版本更差更多bug未?我用左七八年,上唔到試過,打晒野出唔到試過,出到但篇文唔知去左邊唔見左又試過,總之你諗得到的問題,冇幾多個YB用戶未遇到過。但又唔係冇鬼用,blog始終係一個生態圈,入左圈子就多左人知道你個blog睇你文章,好多而家仲有聯絡的固定讀者同朋友都係噉樣識返黎,如果只靠自己完全獨立個網,唔yahoo唔google真係永世都唔會知道,雖然只要你search「劉Sir」,就會發現呢個字早就雄霸晒各大搜尋引擎各個國家版本首頁。

之但係唔知點解,落力本地化之兩個最大部落格Yahoo同Sina反而會越做越差,加埋已經唔興寫blog上Facebook一張相幾隻字已經大把人like啦仲同你顛郁下手幾百字咩,仲會寫blog一班多數都搬去系統同持續性較有保障的外國勢力Wordpress同Blogger。前面都提到Yahoo更新係可以一次衰過一次唔update好過,當後來有一次整到自己成個Blogger噉,但居然人人都用Facebook時代居然都仲唔可以同其他社交網連結繼續封閉,然後系統大量bug管理員百屌都不成才,就知道Yahoo已經放棄左個blog,都未夠後來仲玩埋自我審查,好多文章會無端端被bam出左都只可以私人睇唔會公開,但點解唔公開得又永遠唔會講原因你知(而家或者會醒水識講「行政保密」,雖然已經夠鐘收皮了),最初因為好多人用bot開blog寫文或者去人地blog回覆賣鹹濕廣告,搞到內文或回文有任何字眼佢覺得不雅都會被洗,不論有意還是無意。然後係政治,我試過好多次內文鬧民建聯,出左街冇幾耐之後就俾Yahoo bam左。到後來連有粗口都會俾人洗,連怒人篇訪問都唔俾出街,但更多時候係你可以正正經經寫野冇淫野冇政治冇粗口冇人身攻擊,完全唔知咩事都可以俾人bam,跟住要自己估估下我邊粒字犯左規?而Yahoo永遠唔會講佢地禁文準則係乜、文中一出現乜野敏感詞就會唔俾公開。當搞到連寫blog咁簡單都要搞咁多野,就知道執笠只係遲早問題甚至就快。

後期仲會留低一班一係早就放棄只志在有個可以自己執格式同寫長篇文章的地盤玩到收檔就算,一係就好似我呢挺人想走但懶拖得一日得一日,終於今年社交軟件大革命好多野離我而去,Microsoft夾硬要你將MSN升級做Skype,Google閂左Reader迫你轉用Google+(呢單絕對係本年度最大悲劇),然後Yahoo收購Tumblr幾個月之後學埋Google衰野,話晒用左十幾億收購返黎梗想你轉去用佢啦,方法好簡單嗟,將一早已經放棄發展/改進的Yahoo Blog執左佢咪得囉。就同當年因為blog開始興起,就唔理全世界反對,將成個Geocities平台一野剷晒佢一樣。

雖然Yahoo Blog對整個網絡界黎講冇乜大不了,受影響多數係因為易用所以點差都繼續用得閒寫寫生活瑣事的師奶,有實力有深度果班早就搬左去其他地方繼續經營啦,香港YB整體一早冇晒富價值內容,(台灣就唔同YB執笠係一件大事,不解釋,你懂的,口桀口桀),不過始終Yahoo唔叫細公司、Yahoo Blog都算風光過一時,而家執笠都算係一個時代的終結,尤其今年咁多同樣用左好多年的網絡工具一齊消失,點都有點唏噓。而最大鑊當然係,弊,中伏,雖然其實用左Yahoo Blog冇耐我已經覺得以佢個咁垃圾系統要執笠其實唔難,用多排再明白到選擇用Yahoo Blog(將)會係我寫作生涯最大錯誤、一個會極度後悔的決定,而家印證左啦,或者一開始就用Blogger會更好,但係,唉,懶嘛,YB係垃圾但點都叫易用過其他,同開左個頭寫開就唔想郁啦。所以而家最煩係點樣將咁多年幾千篇文搬去第二度?我仲要本身個網好多內容係連返黎Yahoo Blog添,而家變左千幾條死link你叫我點救?然後Yahoo提供個「輕鬆搬家」係搬唔到過去Blogger,Yahoo同Google兩家打對台架嘛點會益對家?搞到執笠已經唔開心點樣執手尾搞到人更加唔合皮,只覺得Yahoo連幫人善後呢樣野都冇心去做,成個Blog Department班人根本頹到仆街,即係我相信佢地係打算定十月最後一日做YB last day,但十月好似有三十一日架喎,點解會係30/10轉唯讀模式唔再俾人出文唔係三十一,連查查日曆都唔去做咁求祈?

Yahoo Blog都有帶過俾我開心的時光,好似幾年前居然可以拖大半年都搞唔掂的垃圾留言,即係不知名account無端端去你度回覆留言寫幾句好似好感性句子再加一堆隱藏廣告link果種,人人屌到仆街,但我同班bot玩玩得好撚高興。可惜一切俱往了。相當諷刺,當年係Geocities令我開始自製網站開始網上寫作,跟住俾Yahoo因為唔合心意一野剷晒;然後歪Blog令我開blog,但寫左幾千篇之後,又係一樣話黎就黎就執柒左佢,仲要唔幫你諗方法轉移過最多人想搬過去的Blogger。Yahoo點解會霉足咁多年、點解會俾Google收皮,唔係冇原因的。

2013年10月1日 星期二

Moby與我 a.k.a. 沒有那天晚上的Moby與David Letterman,就沒有今天的我




http://youtu.be/JH63fTLEEm8


Moby今日出新碟《Innocents》,相信冇乜人理因為「Moby太pop了」,但對我黎講係年度大事,我會開始聽音樂、會有今時今日知識地位,都係由佢啟發。不過 - 唔好笑 - 因為果陣好鍾意《YMCA》首歌,所以Village People精選碟成為我成世人第一隻買的CD,當年年少無知只知道《YMCA》、《In the Navy》同《Go West》好聽,果陣上網又難,Village People原來係咩料點鬼知喎,好在買左隻精選碟冇耐之後佢地黎香港開演唱會冇去睇咋。第二隻買的CD先至係Moby隻《Play》,亦係我正式開始認真聽音樂的第一隻碟。而第三隻碟係同樣重要的U2《All That You Can't Leave Behind》,因為《Beautiful Day》令我迷band/rock,進而成為metal友。

係,其實metalhead劉Sir本來係technohead黎,聽band野之前有一段好長時間係聽電野,而開始聽電野甚至開始聽音樂,仲因為另一個人:David Letterman除左令我英文突飛猛進,仲係其中一個音樂啟蒙渠道,有一晚Moby上去表演新碟《Play》首本名曲、已成ambient經典之《Porcelain》,一聽不得了首歌鍾意到黐線,跟住就膽粗粗去左HMV買隻《Play》(真係要用「膽粗粗」形容,因為到當時未去過咁大間加咁high class CD舖買碟,一條中學雞入去覺得自己好撚膚淺),港版仲要送多隻bonus EP加多兩首獨家remix。跟住就跳左入個無底深潭。直到今時今日,《Porcelain》仍然係我其中一首最鍾意歌曲、《Play》仍然係我個人十大唱片之一。襯住佢出新碟,睇黎又係時候重溫全線,其實《Play》之後真係冇幾多隻碟稱得上好聽,希望《Innocents》唔會令我失望。(唔驚,唔掂咪拎返隻Village People精選出黎YMCA返幾野囉)

Moby與我的軼事,仲有二。一係,當年year 1係通識即係乜叉都要修,三科術科唔係叫我讀PE丫嘛就即係音樂同美術兩科讀晒,art其中一個final project係整一件作品做到視覺效果同聲音相配合,就搵個紙皮箱,入面整森林景,再雕幾個望天打卦土人公仔,用sample左美國黑人福音歌首《Honey》做配樂,代表外面係個現代世界,箱入面自有天地,一個「被遺忘的國度」。件作品一收到題目就立即諗到晒全個概念點樣做,結果仲拎左幾高分。而家好耐未試過遇到呢種靈機一觸狀態。

另一係,之前都提過:大阪環球片場收場時,其中一首歌係《God Moving Over the Face of the Waters》。所以去完立即覺得自己文青左。

2013年5月14日 星期二

Kowloon Metal City Track 26:怒人五部曲.第五章:低俗得義無反顧(吹呀!):香港新一代粗口歌王怒人專訪(下)


你可能認得他是怒人,或他超級英雄下的平民身份Roland Li,不論認識那一個他,都總會知道「啊!就是唱粗口歌那個傻佬嘛!」大家都覺得一個勇於在藝術層面突破,並敢言敢於為替我們對各種生活與社會議題發聲的人物,理應可於現在混沌的香港廣受注視。奈何亦因這個社會之世利跟愚昧,欲成藝術發展,必先抨擊市井低俗,到底文化與藝術是否只可為高尚權貴服務,一定不可包含平民百姓所想所求?來自地下的藝術家是否上不到大場面,永遠只可以站在場邊,還是也可以有出頭一天?






這(不)是文化

從日常生活到社會大道理,怒人的歌通通一針見血得來風趣幽默地痛罵一番,說出了很多現在地道香港人心中所想,就是一直衝不出「局內人獨特品味」的層面。只有怪香港人都討厭政治,加上廣東白話、粗口、惡型惡相、豪邁風格的平面設計,未談到其中有甚麼深層次訊息,一般(香港)人見到首個印象,便只會是「沒文化」。

「怒人的原意就是去做能讓自己高興的事,甚至根本不想人聽到,便說過我的第一首歌《仆街人生》是一時興起為自娛而在躲在睡房錄成,所以從沒有計劃過要給他人怎樣的印象、考慮其他人能接受到甚麼,不喜歡便不要聽,有些人聽到覺得道出他們心中所想,就越來越多人加入我這個大屌聯盟。有今時今日成就,是個驚喜,沒有事先想過的才最珍貴。」

「每個社會階段都有屬於那時候的抗爭音樂,像黑人的hip-hop、英國七十年代帶動punk文化、牙買加也有reggae,全都是平民有感社會不公或受到壓迫,而催生成一種宣洩和控訴的媒界。你覺得香港有性質接近的宣洩工具嗎,還是怒人的音樂已成為本地獨有的藝術宣洩媒界?」

「我會說很多東西不是刻意營造出來的,像如果一直想著要去宣洩,『啊我今天要宣洩上班的壓力!那我就要做這樣的東西!』就不會有一時衝動而生的『仆街人生!!!好撚無奈!!!』這些歌出來,所以我會做,而不會標榜做來做甚麼。而且類型和性質應由評論人去辨別,正如我不會說自己是punk、形容自己是heavy metal,這樣自我定型便限制了創作思維,而且任何音樂誕生那天樂隊們都不會說『我玩的是XX』這樣而是後人描述,所以想怎麼做就做就是我的精神。」

「所屬型態可由他人定奪,那創作的質素優劣是取決於自己主觀,還是該和觀眾感受掛鉤?如何才算好作品?」

「兩者是個循環,人是一種群體生物,所以有時需要互相認同,如果你做了一件東西出來,其他人認同而他們的迴響讓你自我感覺良好,對自己的作品就會再加滿意。外界的肯定有一定重要性,所以我也要感謝大家這麼欣賞怒人這個戇鳩仔,令我成功將大家變成跟我一樣的戇鳩仔!」

「你也稱得上是個藝術家吧(怒人按:不敢當!),你會覺得音樂始終是門藝術,還是只是娛樂?兩者有區別嗎?」

「呀...這又要看他人如何評論,即其他人說是甚麼就是甚麼,我喜歡留白,聽眾愛聽成是甚麼都可以。我的音樂是個自我表達的渠道,藝術的定義不就是表達自己嗎?所以都可以話我在做藝術,但你說是糞便我都會高興,因為你已憑自己的觀感對我的音樂作出評論,而非單單只會說些『噢,就是band囉~』這樣大家都懂的顯淺說話,而有自己一套看法。」

「既你自覺『不敢當』藝術,該不會否認更接近『次文化』這普羅大眾對你的音樂和表演之定型。大多數人認定的思想通常被視為道德規範,怒人所代表則是獨立界別或『次文化』。你覺得這兩個對立面彼此關係是怎樣?」

「『次文化』即廁所的文化,廁所雖然比較污穢,但上廁這回事任何人任何日子都必定會做,就跟宣洩心中煩惱一樣。雖然有些人覺得粗口就像排泄物般骯髒,但其實大多數人都會說相當平常,所以『次文化』的存在有其必要,因為總有人會接受並視為一種發洩渠道,只不過有時遭到持商業利益者排擠,令大家未必接觸得到這門文化的產物,所以應該多聽不同聲音,過程中會找到驚喜。」





「『次文化』即廁所的文化,廁所雖然比較污穢,
但上廁這回事任何人任何日子都必定會做,就跟宣洩心中煩惱一樣。」



很多人都被騙倒,表演時歇斯底里,平時則嬉皮笑臉,但也可以很認真很嚴肅地跟你討論正經題目,思路清晰而且取向明確,清楚明白自己想做甚麼、想表達甚麼,並在有意無意間緊守著一個使命崗位:在被北方大陸語言文化入侵之際,擔當香港地下音樂界的廣東話大使。他是接觸過唯一會在唱歌和日常閒談中避免俗成懶音的獨立音樂人,像怒人的撚樣書專頁網址 facebook.com/NoYanDiu9Nei,被人問候得多,倒是頭一遭被來自同一地方的人配以這突出鼻音問候,旋被其文化氣息折服,心甘情願獻上娘親。雖說無傷大雅,但見微知著知其認真,就像執著於鍵盤戰士時代常被遺忘的廣東粗口正寫。

「記得之前提過全部人都聽我的歌買我的唱片那家公司嗎?有天我帶唱片回去給同事們,老闆問:『這個是甚麼字,「門」字入面加個「能」字,沒有見過。』我便答他:『是「撚」字來的。』」

港式粗口博大精深,是廣東話文化精要一部份,其中「黃金五字必有一門」之訣卻因電腦字庫所誤導幾近失傳,一些新一代甚至連正寫都不知道,試過在街上看到塗鴉,「屌」真的是尸內吊,「鳩」有九隻鳥,「撚」字左邊剔手右邊然,「柒」和「西」更不用說了,理應是重要街頭藝術卻使用電腦輸入法的同音字或諧音字令人沮喪,而且其實門字部正寫不是更簡單更適合塗鴉嗎?


翩翩起舞










http://youtu.be/0IbOGW0c_Co


微短片《喪屍血滴子 Zombie Guillotines》



只一個半年,怒人成為香港地下樂壇一個無人不曉的名字,更獲其他藝術界中人邀請參加各類製作成為跨媒體藝人,冒起之快令很多人羨慕。其中知名作品是本土製作喪屍「微短片」《喪屍血滴子》,還要是排中間的主角級角色。

「有些朋友想拍獨立電影、cult片那些,會找我參演,應該是因為大家都喜歡我的猥瑣眼神,那些『嘿嘿嘿~』的目光他們愛看,便令我有機會飾演這樣的角色。」

「黑鳥、黃秋生和LMF,堪稱香港粗口歌天地人三魔。(下刪怒人即席演唱黃秋生金曲N首)上一代粗口歌天王黃秋生對怒人的啟蒙顯而易見,既然你那麼富表演天份,有沒有想過步他後塵,唱完粗口歌再開拍一套《狗西雞包仔》,跟著像《商業狗西》所言,『歌影視跳撚埋舞』?」

「假設性的問題不答!到時候再想!太商業那些不好玩嘛,現在不會做,將來可能到有家室心態變了,但到時才算吧。甚麼都是待要想的時候才再想,現在想的只是去罵想罵的人,不用給他們面子!」

「在你自己的樂隊,影像演譯同樣是重要一環,下一張EP問世時會有新的短片看嗎?因為怒人影片大家都愛看。」

「我自己都喜歡拍攝,想作多些有故事性的東西,一些是發神經的,像坐在超級市場購物車上衝下街頭,又會拍些瘋狂得來有意義的,還有就是搞笑的。不過我一向是創作時創作、製作時製作,在寫歌錄歌的時間不會想,到要宣傳的時候自會絞盡腦汁找些新意出來。」

「Youtube有個很出名的叔父叫『極醜惡』,專門揭發警察失職濫權和親共政黨真誠賣香港的惡行。既然你那麼多事想批評,又愛玩視覺派的東西,何不弄個『極憤怒』頻道出來?」

「有想過啊!有時在街上見到一些商家的行為,都想拿部攝影機邊拍邊鬧,不過待有時間再想。此刻對我來說最重要還是音樂,和發狂!」



憤怒的前路

「第二張專輯方針定好了沒有?會在何時推出?」

「寫了十來首歌,會選六首出來做張EP。我愛出EP多於大碟,因為EP可以推出得較頻密,便能多開演唱會,和有多些機會做封面、辦多媒體等各類型創作,每次六首歌這樣的發行模式最適合不過。至於推出的日子...其實第一張EP錄音時有個很傻的想法,因為那時候深信十二月就是世界末日,便趕緊錄好在八月中推出,留下三四個月享清福。現在發現沒事了,新EP也希望會在夏天推出,夏天是我最愛的季節,舉目皆是汗流浹背的背心熱褲囡囡...(編按:骨子裏,都是一個呃蝦條的故事)最主要其實是那份活力,溫度高得要開冷氣調劑,令人比冬天更怒更燥。」

「樂隊音樂在香港太小眾,本地市場又太小,很多樂隊早就以港外市場為目標,香港實際上只屬一個起步點和跳板。你自己有沒有展望海外的計劃?或附近的地區會邀請你去表演?」

「我的唱片有些外國華僑都會買,試過寄到上海、澳洲和英國,至於到外面表演,曾經上過廣州,畢竟大家都說廣東話。但一來不是太熟悉大陸,二來上去表演旅費等成本很高,遠親不如近鄰,倒不如先在香港做得再好一點,再慢慢進入其他地方,總之會以香港為先,始終是自己地方嘛。」





甚麼叫狂?
就是在演唱會當眾/當著大量女性面前脫光,再全裸插水。
然後將當晚染滿污跡的內褲高掛在band房內留念,不洗不棄。



「唱片發佈會是怒人和樂隊的大日子,上一次連剝光豬插水都試過,下一場release party,還能玩得出甚麼花樣?」

「那麼容易想到就不會過癮啦,一定要是些我自己都想不出來的,到計劃演唱會再打算。要做到一些自己都意料不到的事才最好玩。」

「你如此有才又做到自己想做,人生歷程可算相當成功了。其實自己有沒有定過一些目標,像立志到達某個地步或藝術/文化層面,作為人生其中一個階段的成就?」

「內在目標才是我所追求,即自己一定要高興,有些事做了看的人很滿足但自己未必同樣滿意,又就算有錢也可能因富有變得頹廢,反而自覺需要努力工作,辛苦但可以磨鍊個人精神,維持對四周環境的危機感,這樣人便有生產力了,也因此才會有怒人在這裏。這大半年怒人做的事令我充滿力量,很多時候需要花時間去琢磨去鍛鍊,但那些時光花得有價值。」

「發狂和批判是怒人一個核心價值,會不會有日可以聽到較正經、較正面的怒人作品呢?要上帝創造一塊祂搬不動的石頭,和要怒人寫一首沒有粗口的歌,到底那樣更難?」

「當然是搬不動的石頭!其實我也有些較靜態的作品,不過要收費台的聽眾才有機會欣賞得到,收費很便宜的,每六秒六毫。哈!要轉型我會用其他方法,自己也會區分不同身份,就像工廠生產有不同產品線,怒人是我這個人其中一條product line,想做其他風格或單純為發展商機那些不會叫怒人,會叫做Roland Li,要賺錢便用其他身份去做,總之不要污染到怒人。我常說最重要高興和痛快,做甚麼都不打緊能達到這兩點就可以,可能將來我會變成一個商業狗西,可是那時候我高興的話其他人怎樣批評我都不會理會。不過今日不是,今日我仍然是要狠批那些商業狗西!」


後記:Cannot See Through





這是怒人在《係亂屌定屌亂由你自己判斷》最後,寫給各位樂迷們的心聲。本身怒人的出現已經是個悲劇,若非香港社會生活磨人,Roland當天在睡房唱的怎會是《仆街人生》,只會拿枝木結他「鏘鏘鏘」地歌頌社會真美好。只可惜生活是一堆挫折、是必須妥協,困難總比辦法多,難怪怒人出名寫歌快,而怒歌持續地連珠爆發, 只代表大家的生活越來越差,再看不透這個世界還有多少事物自己可以掌握得到。面對如此暗淡前路,除非可以衝出(或說逃出)香港,否則要不做怒人的fans,很難。



怒人五部曲
The "Angry Fucker Anthology"


第一章:怒人.上傳:百年一遇地道香港搖滾「鳩core」係亂屌定屌亂,由你自己判斷

http://lausirisual.blogspot.hk/2012/10/kowloon-metal-city-track-21core.html


第二章:怒人.下傳:怒人,給大家上了一課唔係亂屌而係有橋的marketing

http://lausirisual.blogspot.hk/2012/11/kowloon-metal-city-track-22marketing.html


第三章:低俗得義無反顧(吹呀!):香港新一代粗口歌王怒人專訪(上)

http://lausirisual.blogspot.hk/2013/03/kowloon-metal-city-track-24.html


第四章:低俗得義無反顧(吹呀!):香港新一代粗口歌王怒人專訪(中)

http://lausirisual.blogspot.hk/2013/05/kowloon-metal-city-track-25.html


第五章:低俗得義無反顧(吹呀!):香港新一代粗口歌王怒人專訪(下)

http://lausirisual.blogspot.hk/2013/05/kowloon-metal-city-track-26.html

2013年5月12日 星期日

Kowloon Metal City Track 25:怒人五部曲.第四章:低俗得義無反顧(吹呀!):香港新一代粗口歌王怒人專訪(中)


怒人,本來只是典型不過的八十後青年Roland Li,以僥倖成績考到設計學位,再為溫飽打著沒有前途的工作漫無目的過活。但本著不認命精神為理想拼搏,將對生活對社會種種不滿而生之憤怒轉化為舞台上的能量,一口久違了的地道粗口歌加一身搖滾狂態,兩年間活躍於舞台、政治音樂會甚至銀幕,打響了自己另一面「怒人」的名堂迅即顛倒眾生,包括大群蜂擁而至的美女。在現實趕絕夢想的香港居然會發生夢幻得可比童話故事的情節,這個城市出了甚麼問題?






樂在當下

小學起老師已天天洗腦,「中華民族刻苦耐勞」、「國際都會充滿活力」,實質只乃將逆來順受合理化的狹隘精神勝利法,讓大家心甘情願為財團霸權勞役至死,富如超人、窮像凡人均難逃宿命,更何況區區怒人?就如灰姑娘遇上白馬王子從此幸福美滿之前,未上枝頭的生活亦只得一個灰字,怒人風光以外實則都跟你我一樣,否則也寫不出《老闆我愛你》,歌詞大意很簡單,以「屌」代「愛」即是。

「當怒人踏下舞台,也需靠Roland做樂器導師和美術設計才有飯吃,即始終要做些正當工作逃離不了。既然《老闆我愛你》這首歌罵老闆罵得這麼兇,會在公司對自己老闆唱,或『意外』打開了Youtube播給他聽嗎?抑或怒人講就凶狠,做原來只像鵪鶉般一碌...」

「唱都不用唱,像之前做過一份兼職,全公司都有我的唱片,老闆都聽我的歌。(編按:證明這世界已瘋癲)對呀他們非常喜歡!我進那公司時已提及一年後會出唱片,其實有時老闆會喜歡有活力、有目標的年青人,你用對抗的心態對待他他也會同樣的對抗你,相反抱著輕鬆心態,其他人會更願意接受。」

原來滿腔怒火之餘,怒人也支持「快樂抗爭」。

「因為以愉快的心態去做可以減少惹他人反感,像我的音樂主線不是落在粗口處,而是『啊這個傻佬很好笑很好玩!』最緊要好玩,現在很多人硬是感到生活不如意,就是因為沉悶不好玩嘛。」





傳說中,這是怒人應徵通利琴行時提供的自拍照。
不難明白為何最後要自己出來招生。



別被那憤怒而猥瑣的神情嚇到(後者倒是真的),日常生活中Roland其實是個親切的kai子,甚麼時候都可以活得很開心,也會讓身邊的人一同高興。

「所以我不喜歡用『fans』這個字眼,有點由上而下看對方的性質,我較愛用『friend』呀、『觀眾』呀、『朋友』呀,或者是『撚屌的知音人』!第一張EP《係亂屌定屌亂由你自己判斷》主要用網上接團購單,人數夠多時到街頭交收的遊擊方法賣,因為可以即場簽名和寫些白痴東西給各位朋友嘛!我喜歡寫『怒人屌鳩XXX!』有次寫時簽名筆斷了墨,就在沒事的時候多加一行『啊sorry剛才沒墨水,現在補多句,現在墨水暴發呀屌你!』他們都覺得很撚戇鳩,我就很撚高興。這樣做生動些嘛!因為平時做很多事都那麼死板,就像那些商業音樂...商業音樂!!!」


地下小rock star在商業大都會

香港首席MC馬米MastaMic有云:「細個學音樂讚你有天份,大個做音樂話你冇錢搵。」居於香港非獲豐厚家底支持而選擇投身音樂,在長輩眼中就是原罪,大家喜於有怒人娛樂我們時,也好奇逆這城市商業王道而行至成了個小rock star,其實能掙多少錢,發了達沒有?

「第一張EP印了五百張,半年來賣了三百張左右。為何要用街頭交收這種方法賣?因為懶!秋紅(香港著名hardcore樂隊)的歌手Jan是我朋友,他介紹過一家distributor(發行商)給我,他們要求先加警告貼紙,那我又...其實都是我懶的關係,所以沒去了,要找肯賣的唱片店,地點未必人人方便,又要貼貼紙,屌~做得來我都自己賣掉了。而且在店賣題不了字,始終街頭聚首能見到買家本人可以大家屌兩句,這樣就好玩得多!我亦有放在旺角一家我朋友經營的教學中心,待我不能抽空出去時請他們自己上去買,這已經算比較商業的做法了,哈哈!」

「還有賣了一段時間後自己辦演出,很多人看完表演後『嘩好撚高興呀!』就大批大批的賣出去了。我就愛經這些較親近的渠道賣,即是沒放唱片店都不主要是因為懶,不要說到自己那麼懶啦~」

暑假唱片發佈會前後大賣到現在街頭打遊擊,才賣了一半多些,還要投資辦演出,本回得了麼?還是表面光彩內裡卻虧得我們可以暗笑一下?

「錢是有賺,我也喜出望外。最初心想『唉屌!能回本就算了!』因為EP很多器材都是各界朋友鼎力相助借給我,舉行發佈會的Hidden Agenda場租又不貴,所以成本比較低,能回本之餘還賺了,夠我吃幾個月!」

這場發佈會,就是名字破紀錄地「九十九個字」長的「怒人係亂屌定屌亂由你自己判斷巨碟發佈演屌會」,有去看一定不會忘記。兩個經常掛在怒人嘴邊的口頭禪是「開心」和「爽」,這處事心態為他贏得一班專業級僱傭樂手與他同台,還有大批樂迷死忠追隨,難忘之處就是當晚場內美女fans數量之多、比例之高,可是好些靚仔樂隊潮童band都不及。

「唱粗口歌唱到有這樣的成就,是咪覺得自己巧威威呢。」

「不會有這樣的感覺,覺得威就變得虛榮,虛榮即是追求一些外在目標,我反而追求內在目標,即是做完自己可以如何痛快。做到怎麼出眾都沒用,自己一定要爽!」

「這跟你2012年底新歌《商業狗西》中心思想不謀而合,一首歌一網打盡不圖質素只圖利益的主流音樂、流行歌手和理想就是名成利就的地下樂隊。你對主流樂壇的印象似乎很差...」

「僅一部份,像Jun Kung(恭碩良)、林憶蓮和方大同都有心做好音樂,我很欣賞他們。只是也有些實在過份只顧賺錢,要吃飯是理解的,但不要強姦我耳朵好不好!你也是音樂人也會想寫好歌,別只為錢而遺忘了當日的自己!」

「真的那麼有態度嗎?最新的江湖傳聞是有家大唱片公司覺得怒人很有潛質,如果肯簽約加盟即付現金一千萬,加全公司歌手任屌,男歌手用把口屌,女歌星用碌鳩屌,只要你簽約就可以。deal不deal?」

「....................................」

「哈!!!唱完《商業狗西》的怒人,自己到了這個抉擇時候...」

「一千萬啊!也要看做甚麼,如果要我改變自己的音樂方向就一定不成。」

「總之要改歌的話,多少錢都不成?」

「....................................」

「又要猶豫了!哎喲~~~」

「一千萬!令人性的真面目盡現各位眼前!但這個數字對比太大,如果只得如五十萬我也不會接受。」

「不如具體化一點,用一隊已經簽了大公司也已出名的前地下樂團,是誰就請自己意會。如果可讓你立即達到那個水平,但要聽從公司吩咐做事...」

「不是天價又要改音樂就不會,很多事自己都能做,辦演出我可以,出唱片我懂,泡妞我又在行,能夠自己做到為何要求人?有錢但沒有那份感覺其實更辛苦,就算其他一億萬人覺得好,我自己一點也不痛快,是很戇鳩的一回事。」

「但是如果有一千萬,女歌手任你玩弄之餘還可以做自己想玩的音樂,唱完《商業狗西》的你都會願意,對不?」

「噉梗係啦!有女屌喎!」(<這部份請用最大音量讀出)(朗讀時凝望下圖有助提升意境)






不止音樂

《商業狗西》之所以惹人談論,是得罪的不止香港所有流行歌星還有差不多全部獨立樂隊,雖無指名道姓,卻太易被人對號入座。

「罵過主流樂壇,indie scene又如何?會寫這首歌,其實是覺得香港band scene真的很差嗎?」

「這方面我較樂觀,近一兩年出現很多新樂隊,現在的band show也很好玩和多了內涵。一些製作單位像Hidden Agenda亦非常有心推動音樂,怒人很多演出像我們的第一場和推出EP那場都在那裏辦,將來應該會繼續在那裏花很多時間,可能生仔都會去Hidden Agenda生,死都要死在Hidden Agenda,希望他們生意越做越興隆。所以我反而覺得地下樂壇變好了。我自己也擅長舉行演唱會,去幫助新手和推廣樂隊給更多人認識。」






敢言和做其他人所不敢做,令很多人覺得怒人是現在香港獨立音樂界別一個文化標誌,他也不是一直只顧著自己可以如何痛快,也會想辦法幫忙推動,令本地獨立音樂更成熟、繼續進步。怒人主場叫「香港搖滾樂勢力」,看看海報的墨寶就知誰是主腦,已在他母校理工大學辦過兩次,計劃2013下半年舉行第三場。

「這個活動宗旨除了推廣樂隊音樂給對這方面沒多少認識的人,還會盡量請新樂隊上台以助宣傳他們。而這也不單純是個樂隊活動,我想了一句口號『噉既人生,邊個甘心?(如此人生,誰會甘心?)』,會按這主題進行各類型創作,例如平面設計。其中一份作品是張身份證,主角名叫勞一世,身份證號碼9413-9413-9413,上面寫著『最高工資$20』但『最低工時25小時/每日』。這張身份證在描述大家每天的生活,『呀很撚不高興呀』,希望吸引到一些本身不是聽這類音樂,不過平時生活不愉快而有共鳴的朋友參與,繼續宣傳這個主題。這就是我平時一直在想在做的事。」





朋友,你的身分證掉了



「試過有人來到才發現『啊!中伏!』嗎?」

「試過上較大的音樂會,小妹妹們為某些出名或主流的樂隊慕名而來,渾渾噩噩地站到台前,到我一開始表演『屌柒社會!』她們就嚇壞了。唱完我對她們說『不愛聽就不要聽,走吧!』跟著她們就走了。或者更好,我表演時她們去吃個飯,吃完上來就可以看心儀的俊男樂隊,大家各取所需。」

「也有些是被活動的主題創作,像那張身份證吸引而來的,在『第二次香港搖滾樂勢力』便看見好些新面孔,不過可能排在前段的樂隊太吵,聽一會便走了。以後計劃時會考慮音樂方面不要太激進或較重型的排後些,但整個活動一定會保留『噉既人生,邊個甘心』這個中心思想,期望能繼續吸引更多外面的人留意。」

相信這就是香港樂隊活動主辦人之最痛:觀眾人數看似可觀,但其中經常有很大比例的人進場只為看某類音樂或某支樂隊的演出,非我類者就不支持,寧願離場閒談、吃飯、抽煙。更無奈是,很多時主辦單位也需依靠這類觀眾提供的經濟支柱經營下去。

「所以我想辦別有含義的音樂會,用一個主題覆蓋全個活動,台下宣傳設計、台上表演樂隊都可以幫我表達這中心思想,像方才談到生活中的不如意和不滿,好讓進場的人都會事先明白而帶著理解主題思想的心態進場,那在場時欣賞方式便會別於平時,聽得仔細一點、想想剛剛那首歌在說甚麼、是否合乎活動的意識。我也會盡量邀請些具導賞性質的樂隊,和嘗試利用場地技術如投映歌詞,盡力協助樂隊去表達和觀眾去了解音樂與當中想法。了解思想這部份相當重要,當他們抱有一種想法,便自然而然懂得自己去發掘能替自己表達的音樂。」

「也遇過一些受到感染的局外人,試過事前未聽過多少的年青一代覺得『嘩很瘋狂呀!!嗚呀!!!』越聽越高興還上網訂購我的唱片,出來交收時發現是個小孩子來的,心想『唉教壞細路今次仆街了。』」


就讓'80革命

另一香港band show常見現象是任表演者如何狂放,觀眾可以極端相反地全無反應。怒人的演出好看在很少出現這樣的情況,大家見到他上台已經開始失控,而且最投入最不顧儀容一班反是女歌迷們,不畏於與男性觀眾一同奔跑推撞,接過咪高風懂得歌詞接著唱,在怒人演出常見的台上台下互相譏諷環節,有些女歌迷能毫不避忌地以同樣富攻擊性的語言還擊。

「現在觀眾比我還要瘋狂!像一次到旺角行人專用區替反國民教育的街頭音樂會演出,我跟街上的人說『喂來到旺角,不是不旋轉吧?』跟著那班觀眾真的旋轉著起舞,看見這樣的情景,唱著歌也想笑。」





http://youtu.be/_r0ozUz2BsM


怒人@旺角行人專用區反國教街頭騷encore(9/9/2012)



始終唱著這麼市井的歌,街頭才是怒人的戰場。既然不高興就要罵,樂壇罵過社會當然不會幸免,現在香港跟大陸接軌的情況越來越嚴重,政府很多賣港勾當已連掩飾功夫也懶得做,要找人物找題材不愁煩惱,像《香港鳩政》和《再見老屎忽》兩首便指責得指名道姓,謾罵過也非不了了之還會身體力行,到跟音樂有關的社運活動不難碰到其本人。如今政府對反對聲音的執法越來越嚴格幾至不可理喻地步,還這麼上鏡,不怕日後被點相繼而秋後算帳?

「擔心過一秒,就沒了,因為不滿意就要批評的啦,又不是殺人放火我只是在表達自己,連表達自己都要死的那天,世界已經非常黑暗。所以擔心不了,會禁制我更好,越是禁止就越多人會留意。」

「又唱粗口歌、又批評政府、又上社運表演,試過在一些場合如街頭表演,被家長或五毛憤青斥責嗎?」

「沒有,因為通常我都比那些人惡,哈哈!社運表演我也不敢說參加很多,通常表演完就不再放在心上。像意色樓樂隊的阿禮那班中堅份子才是把這大水池建築起來的人,我只是在前人做好後跳進去跟他們一同玩。」

「既你以歌寄意,亦參加跟政府意向相反的活動,本身政治取向相當明顯。梁政府上台後短短三個月,社會已經出現數之不盡問題,其中幾個較獲關注話題像自由行、蝗蟲入侵、深港融合和東北割地,會成為怒人下一首歌的主題嗎?」

「我不會特別去想,通常是那東西影響到我,讓我不快才會寫。所以有時候怒人不是刻意去批評社會中的人和事,只不過那些問題終於進迫到身邊,令我有感受而爆發出來,即其實是自己寫給自己聽的,只不過大家也對那些現象心存怒火,聽到我的歌覺得和他們想表達的一致,便喜歡了一起去控訴。可是提到那些問題也真的很嚴重正在蠶蝕香港,有一日或真的會出現在我的歌曲中。」






下回預告:

怎樣算是文化?怎樣算是藝術?粗口可以「入流」嗎?唱粗口歌,可不可以做藝術家?

粗口你或者天天都講,但爆粗之餘,有否想過自己是否真的懂得粗口?

「歌影視跳撚埋舞」唱著唱著,怒人真的翩翩起舞,我們是否找到了下一個黃秋生?

而平步青雲的他...會有日不再唱粗口歌嗎?



怒人五部曲
The "Angry Fucker Anthology"


第一章:怒人.上傳:百年一遇地道香港搖滾「鳩core」係亂屌定屌亂,由你自己判斷

http://lausirisual.blogspot.hk/2012/10/kowloon-metal-city-track-21core.html


第二章:怒人.下傳:怒人,給大家上了一課唔係亂屌而係有橋的marketing

http://lausirisual.blogspot.hk/2012/11/kowloon-metal-city-track-22marketing.html


第三章:低俗得義無反顧(吹呀!):香港新一代粗口歌王怒人專訪(上)

http://lausirisual.blogspot.hk/2013/03/kowloon-metal-city-track-24.html


第四章:低俗得義無反顧(吹呀!):香港新一代粗口歌王怒人專訪(中)

http://lausirisual.blogspot.hk/2013/05/kowloon-metal-city-track-25.html


第五章:低俗得義無反顧(吹呀!):香港新一代粗口歌王怒人專訪(下)

http://lausirisual.blogspot.hk/2013/05/kowloon-metal-city-track-26.html

2013年3月8日 星期五

Kowloon Metal City Track 24:怒人五部曲.第三章:低俗得義無反顧(吹呀!):香港新一代粗口歌王怒人專訪(上)


Roland Li,典型八十後世代港仔一名,渾渾噩噩離開校園後打著看不見前路的工作,卻不認命而藏身睡房和工業大廈繼續為理想奮鬥,活脫是很多同代人的寫照。直到某天終於忍不住要爆了,以怒人名義在台上拿著電結他吐出連珠粗口發洩對生活對社會種種不滿,憑低成本自製EP《係亂屌定屌亂由你自己判斷》和全裸插水謝幕的「巨碟發佈演屌會」,一夜之間成為這「不求上進不願反思只懂埋怨社會」迷失世代新一個次文化代表人物。為何本來好端端的年青人,居然自甘墜落至此,不介意低俗甚至以低俗為榮?錯的是他的神經?老豆老母?還是現在的香港社會?






從Roland到怒人

英國研究指出,成長過程對人格和事業定型存在關鍵性影響,想必主角過去路途不太平坦,否則Roland也不會變成怒人。

「家人對我很重要,因為父母離異我一直和母親相依為命,唱片內也有多謝她,化名『怒母』,『鳴謝怒母的照顧。』」

有云仗義每多屠狗輩,粗口爛舌仍深明孝義之道,只是香港生活壓力實在迫人,逼迫之下神經不失常才是新聞。

「最初沒打算打band,只是某一晚想把最瘋狂的東西錄下,就衝進睡房關上門(心想客廳的母親不會聽到我的屌聲),將結他插進電腦再拿枝劣質咪高峰連串音符和粗口爆出來,就完成了第一首歌《仆街人生》。睡房就是我的世界。」

很多人覺得奇人現身事必有因,是紅星南掛繼而亂世出英雄?亦或純粹又一隻「呃蝦條」的害群之馬?其實只是多數樂隊中人組團後為攀得更高而遺忘之原點:

「我的座右銘是『開心和爽快最重要』。做怒人其實只為自娛,像錄《仆街人生》就是放在MP3機讓自己可隨時隨地發洩,錄音當晚也算一場表演,亦永遠是我人生裏頭最精彩的演出,因為即使沒有任何人看到(睡房門外的怒母可能聽到),正是這表演將我變成一個充滿力量的戇鳩仔!」





盡在不言中



或者長久以來我們正是等待一個戇鳩仔出現打破悶局,但如此自我形容未免有點謙虛,可以出道兩年迅即冒起成香港獨立音樂界話題人物,單靠傻勁不夠亦必需有才,像將從punk到heavy metal等多種傳統元素重新詮釋成獨一無二音樂性格,和膽敢唱廣東樂隊也少用的地道口語,再加插大量粗口無顧忌地嘻笑怒罵各類社會生活議題,當很多本地樂隊仍未能脫離以模仿外國樂團為首要目標的迷思,倡議本土意識和保育的時勢,造就這個充滿地道色彩的英雄誕生。

「音樂靈感來自聽歌組樂隊最初留意那些,像X-Japan - 好撚MK [sic] - 跟著就是Metallica、Guns N’ Roses此類。在以前他們影響我最深,早期的音樂就是取材自這些比較大眾化的樂隊,不過沒有刻意去學或模仿,總之創作時腦內有甚麼東西便用,再加些創意融入不同技術,但其他band友『啊我非用這段solo不可』、『一定要一個小節內彈出九百個音符』那些想法我從來沒有過。」

為何會用一般粵語樂隊都很少會唱的港式口語?是一開始已有此打算,還是賞試填詞方發現自己根本不懂,乾脆用大堆廣東話加粗口鳩迆?

「我爆歌時...我不喜歡用『寫歌』這個詞語,因為寫歌實在太文雅不合我風格。我爆歌不愛修改,只相信創作時第一個爆發出來的念頭,和喜歡親口將內容說出來的感覺,要寫得很整齊、要填多少個七言絕句、要寫得像『傷春悲秋~桃園花落去~』那樣文藝,通通不喜愛。反而我會追求沒有特別事先構思,自然而然產生的靈感。」

粗口呢?為何一定要鬧?為甚麼一定要講粗口?其實也可以正正經經地談論一件事...

「那就不會以怒人的身份做了,怒人這個形象就是要宣洩大家不滿!題材來自生活體驗,在獨處時胡思亂想出來,就好像那些藝術家一樣,他們不都是愛自己瑟縮一角然後『噢~今天又下雨了~令我很想念你~』這樣不停地自問自答嗎?只不過我鑽牛角尖後爆發出來的是『屌!屌屌屌!』」

「通常先對一件事有個感想,像《臭鳩洪》就是寫一位偉大恩師,只記得他姓洪,和我當年在理工大學讀設計學位時批了個《仆街人生》入面提到只得1屌68的GPA,想到有甚麼不高興,立即開個TXT(Windows筆記本)打字,歌詞就這樣爆出來。所以TXT真是我的好朋友,因為可以即時和迅速地紀錄當時所想。而創作的方式多數是先想好個意念,有了歌詞再作音樂,音樂通常只是第二位。」

「粗口不是我的主線,並非一定要用,不過這回事其實很普遍現在差不多任何人都會說,如果想用而強迫不去用只會更辛苦,加上憤怒的事多數會用粗口表達,爆粗與否取決於寫的時候覺得該不該用,順其自然。可能有一天我的性格改變了不再愛粗口爛舌,到時我的歌也會跟隨。」

成功之道,在於不隨波逐流,想做就去做從心而發,和最緊要開心。還有TXT。





現實版TXT



夢想與生活

喜歡無心插柳柳成蔭多於處心積慮,正因當中意想不到驚喜往往充滿樂趣,就如不是某日只為一時衝動而寫《仆街人生》,今天的Roland人生可能仍跟凡人你我一樣,只能做個起床上班>回家吃飯>拉屎睡覺>周而復始的仆街。

「我以前是Poly Muso(理工大學音樂學會)要員,方大同的鼓手李一丁來做導師,那時他已在Myspace聽過怒人的歌,一直在想『嘩怎會有這麼瘋狂的人存在?』後來見面大家閒聊時發現『啊原來你就是怒人!』」

「怒人&雙重鳩鼓宇宙巨樂隊」的傳奇故事,就在這一天展開。因為以前沒想過組樂隊一心只想唱歌,便隨便選了彈低音結他,再由李一丁的朋友擔當其他崗位,像同樣替恭碩良等名歌手伴奏的結他手Jason,和有只廿歲不到的一丁徒弟Jimi任第二鼓手,就連他們著名的紅黑白MV,也是由這些唱作歌手的製作幕僚操刀。有點不可思議,這班人皆可在session界獨當一面,加起來是個好些流行歌手都渴望可得到的陣容,但一班於娛樂圈(或稱樂壇)打滾和維生之高手,竟心甘情願不收分文,自發為個匿藏在荃灣某工業大廈的傻人練習、表演、白做 - 請留意怒人寶號排在巨樂隊之前。

「因為好玩!」答得斬釘截鐵。「他們都是聽過怒人的歌覺得好玩而走在一起,有時也嫌做商業音樂做得太多很反感,像李一丁般『屌像做雞一樣,屌又是打那一些,好撚悶呀!』相反怒人的音樂充滿活力,所以就算他們本身跟我完全沒有關係,和我一起出表演又沒錢,仍因為喜歡我的音樂而每每百忙抽空來排練、參加演出。」

口裏說不,若有天自己可以做雞,身體又會誠實嗎?

「外間對我的印象都是發狂的!講粗口的!唱歌的!有點像搖滾巨星那樣 - 我又不敢說自己很出名很多人認識 - 所以暫時沒甚麼人邀請我做那類工作。而且做僱傭樂手...我的隊友不是更厲害嗎!他們每個都是替Jun Kung(恭碩良)、方大同這些實力歌手伴奏,這麼強也就不會輪到我。再者我亦不特別渴求,因為始終彈商業音樂就必定會有compromise(妥協)。」

「雖然!我也自學有成,考到了鼓和結他的Distinction評級Rockschool『砂紙』(證書),大家不妨找我教教樂器!」





怒人與No Yan Studio兩大吉祥物
(我是不會告訴你那安全島燈是從那裏偷來的)



兜兜轉轉,又回到現實的問題:根據2013年度財政預算案曾俊華司長定義,如今月入四十萬方夠資格晉身中產級別,就算做到真正搖滾巨星,有見現在收入與物價水平嚴重失衡,想簡單買個粟米斑塊飯當午餐,內心可能仍需掙扎一番。「中產」尚且生活艱難,更何況區區工廈band友屋村仔?

「現在自己做老闆教樂器,有沒有想過有朝一日要回頭做一份正當的全職工作?怕不怕到時適應不到?」

「這我經常都在想!下班搞樂隊對我完全不可行,因為下班最早都要六七時已經沒有精力,現在的approach(方式)是兩邊遊走,即做自由人兩三個月,跟著找份工作全職拼搏兩三個月,做到『屌唔撚想再返工呀!』便回復自由身集中做音樂做演出。冬天是工作賺錢和創作的季節,夏天就會再見到我了,因為我喜歡夏天那份活力。」

能餓不死也需面對身邊人,畢竟香港這「國際都會」淵源是中華文化的傳統儒家思想,表面開明實質比鄰近地方保守,不正正經經打工、夾band、講粗口,通通是普羅大眾尤其父母輩眼中社會失敗人士的「典範」。

「家人有反對嗎?怒母知道你怒人的真正身份後,有沒有覺得生舊豬西都好過生你?」

「哈!沒有!歌她應該沒怎麼聽過,但經表姐、表兄弟、舅父等等一些年輕親戚傳回她耳中『嘩!你兒子現有頗具名氣啊!他XXXXXX!』她又覺得...OK的!再者怒人帶給了我工作,像教樂器和拍獨立電影,給她知道『我夾band之外也有工作做!』她又覺得不錯,因為是這樂隊帶契的。」

「那在家人和其他人面前,你的態度是一致還是有別?會對著他人恭恭敬敬低聲下氣,轉頭在band房現發狂本性?還是平時也會對著怒母和其他人照屌?」

「起初無大分別,因為那時怒人只係一門興趣,每個星期或有一天錄音,跟著幾個月發幾首歌,想發狂便發狂,反正不會公開表演,關上房門便沒人知道。現在有一半生活跟怒人有關,便開始要有區別成兩個身份,平時要很正常地按規律生活和工作,另一個就全力做怒人做的事。」





http://youtu.be/8doRkCVevAA


怒人自辦自演「香港搖滾樂勢力」(21/3/2010)



爆之道,在...

Roland正式變身怒人和巨樂隊的出現是第一張唱片兩年前,在2010開始參加各類演出,包括自己籌辦的理工大學年度盛事「香港搖滾樂勢力」 - 那時候他還在彈低音結他,現在已變成結他手了。其時唱片部份歌曲已成雛型,當晚幾首像最初只為自娛的《仆街人生》、《社會真美好》還有《老闆我愛你》,現已盡皆成為indie仔間一傳十十傳百的金曲。期間舖排經歷兩個寒暑之久,是「工作時工作創作時創作」和「愛夏天不愛冬天」的生活習性,還是其他原因?既曲詞都由自己一力承擔,又怎樣跟其他隊友合作?

「我爆歌有時一天可以爆十首出來,有時十個月一首都爆不到,所以...是由情緒帶動的。說過我不喜歡修改而信任一開始的感覺,其實爆出來時自己已大約知道那首歌值多少分,有些本身已不很高分,對我來說怎樣改都是垃圾,就索性不要再想過;有些一出來就是神話級,就怎樣改都只會是神話啦!所以寧願多做幾首,再篩選看看那些有潛質再作取捨。現在製作中的第二張EP就有十六首歌讓我選擇,絕對不會改,改很浪費時間,比重作更花時間。」

「基本定好後,主要創作人你是會召其他隊友來『一丁!鼓你這樣打!Jason!結他這樣彈!』還是其他人也有機會參與,大家一起按你提出的構思,共同以完整樂隊的型式作好一首歌?」

「都...較難,因為有時我作的實在太強了,他們也會反映『啊這一段是怎樣想出來的』、『嘩一定要做到呀一定要打到呀!』我現在希望可以摻雜更多人的不同味道,都會叫他們自己編曲,不過偶爾demo錄得太完整,便有點困難。」

「會不會大家討論時出現分歧,你錄好了demo有自己方向,他們卻喜歡另一些做法?又有沒有試過交給他們自己修改,結果和本身想做的差很多?」

「很少,始終怒人的音樂是環繞歌詞想表達的中心主題,例如《商業狗西》是鬧那些想投身商業的band友,有一天可以和唱片公司簽約時,自己不又是會背棄本來原則!能讓我表達得到想說的主題就是好音樂,他們想怎樣彈都可以,我無大所謂。」

「樂隊出名在雙鳩鼓,即是有兩套鼓。其實打兩套鼓有甚麼用?作曲同編曲如何用雙鼓設計?還有...我真的聽不出跟單鼓有甚麼分別!」

「嗚嗚~很失望啊~~其實錄音沒有雙鼓,只不過大家玩的時間想做,或算是個gimmick(噱頭),和一個音樂上的嘗試。怒人分開了思想和音樂造詣兩個表達層面,雙重鳩鼓只限音樂上的放肆、一點實驗,如一套鼓打平常的節拍,另一套就加多點擂鼓,便形成不同樂句相撞的效果,重疊起來有點像操兵,而我同樣唱那些東西,雙重鳩鼓不會影響到我。但這僅限於一個樂器上、音樂上和gimmick上的遊戲、貪好玩,不會用來創作,因為怎樣每次都找兩個鼓手出場呀?」

「至於其他器材,其實我用的都不是好東西,多數都...不是我自己的,哈!全部是問我另一隊樂隊鬥牛梗的朋友借的,都是些普通的Line 6、UX2、大陸買的interface之類,總之能插上全部想插的就可以。所以錄音方面接近沒成本可言,我也要多謝相助的好友。只不過之後投入很多時間做mixing(混音),和做很多實驗,有時器材質素不需要最高,但你的聲音要夠特別,即是在怎樣的環境收音。怒人第一張EP便利用工廠大廈band房外面走廊的公共空間當錄音室,因為環境的迴響令每一敲都『澎!!!』聲浪很壯大充滿混凝土的壓迫力,聲音不就特別了。我比較喜歡鑽研特別音色音效,反而不愛追求太高質素的器材。」





http://youtu.be/B3B934ShMwA


怒人錄音花絮,「辛撚苦過拍AV呀屌你」



邊錄音邊研究,耗時一年錄製的《係亂屌定屌亂由你自己判斷》在2012年夏天甫推出已成話題之作,未聽先看封面已搶盡風頭,除了兩個大剌剌的「屌」字和怒人尊容異常搶眼,那九龍皇帝般的墨寶式書法亦別具一格。

「你讀設計出身,雖然GPA只得1屌68就好撚柒(怒人按:之後都有2的...),現在就學以致用在唱片的美術上,像這『撚屌手寫歌詞』是由自己一手包辦吧?」

「對,先在大型的紙上一個一個字地寫,再用電腦排版。設計這門技能對我來說很重要,怒人的包裝和宣傳等,因為我懂設計所以方便很多,而且全部自己動手做便快很多,和自.我.很.多,任何人一看就能認出。」

「唱片做好了拿去印時,歌詞那麼多粗口,找廠商印刷的過程辛苦嗎? 」

「印刷廠見到反而很高興!那家廠是以前某份工作的人介紹,印教育光碟、政府宣傳光碟那些正當東西,收到我的彩稿時說『嘩!這麼多粗口!』本來我也擔心慘了不知願不願意替我印,誰知跟著很開心地答沒有問題,因為覺得搞笑嘛。跟我接洽那個師奶,在通知我完成的電郵說『《仆街人生》碟已印好了!』很好笑的。所以有時粗口與否不是重點,反而其他人覺得你輕輕鬆鬆和在表達自己都會尊重,除非是對粗口很反感的人,但現在多數都不會太介懷。」

忠實表達自己是獨立文化一大核心價值,見《係亂屌定屌亂由你自己判斷》的名字和封面,主題呼之欲出毫無避忌,逗趣在很多「很憤怒」、「我唱粗口歌」的本地樂隊,單從看卻完全看不出其端倪,有時警告標籤比唱片內容的粗鄙文字更顯眼,甚至從善得跟普通唱片無異,透不出怒火與態度。始終很多香港獨立藝術中人,即使創作取向可以很激進,在對外推廣自己的時候,心中或潛意識中仍會有寄望藉平實包裝滲透再獲局外知音人賞識的幻想。怒人可是徹底地將這一切拋諸腦後,因為,看見封面上那個面目猙獰的怒人都知道,對,他真是傻的。






下回預告:
「怒人係亂屌定屌亂由你自己判斷巨碟發佈演屌會」貴為香港歷史上其中一場最多美女捧場的band show,唱粗口歌唱到台下美女如雲巧威威,其中有甚麼花絮有甚麼內幕?
這地下藝術工作者暨新一代次文化標誌,會如何看待「上流」的文化藝術?
除了工廈也敢於走上街頭參加政治音樂會,面對真正的社會議題與政治抗爭,口唱粗口歌批判之餘又有怎樣的勇氣和見地?
在舞台上盡情狂妄又參演獨立電影如今饒有名聲,當機會降臨在自己身上時,唱過《商業狗西》批評為錢出賣靈魂的獨立樂隊的怒人,會繼續做人還是寧做狗西?

「出街果陣咪知囉,屌!」



(In courtesy of Arto Leung & Lau Sir @Mugazine)





怒人與蛇亂鳩噉黎鳩吹訪問全錄音





http://youtu.be/wcOkNYGe-B0


Part 1





http://youtu.be/9k5DCXeB_oc


Part 2




怒人五部曲
The "Angry Fucker Anthology"


第一章:怒人.上傳:百年一遇地道香港搖滾「鳩core」係亂屌定屌亂,由你自己判斷

http://lausirisual.blogspot.hk/2012/10/kowloon-metal-city-track-21core.html


第二章:怒人.下傳:怒人,給大家上了一課唔係亂屌而係有橋的marketing

http://lausirisual.blogspot.hk/2012/11/kowloon-metal-city-track-22marketing.html


第三章:低俗得義無反顧(吹呀!):香港新一代粗口歌王怒人專訪(上)

http://lausirisual.blogspot.hk/2013/03/kowloon-metal-city-track-24.html


第四章:低俗得義無反顧(吹呀!):香港新一代粗口歌王怒人專訪(中)

http://lausirisual.blogspot.hk/2013/05/kowloon-metal-city-track-25.html


第五章:低俗得義無反顧(吹呀!):香港新一代粗口歌王怒人專訪(下)

http://lausirisual.blogspot.hk/2013/05/kowloon-metal-city-track-26.html