熱門文章

2015年1月1日 星期四

每週一相片大行動 2015 Week 1:My Toxic Soul in New Year's Seoul




諗返,好似第一次喺外國過一月一日,但同聖誕一樣冇乜特別,一來首爾地理位置好難落雪,聖誕之前已經落晒,而家就算落都只會深夜落一兩浸,第二朝返工時見地下積咗幾撻先知,餘下的只是一個字:嘩屌真係好撚凍。而且又唔係嚟旅行,咪又係噉都係都冇假放第二朝繼續返工架啦,仲灰啲添,一月頭就係project deadline,星期一夜飯八點先食返晏晝個飯盒,琴日五點食lunch已經叫有進步雖然只係啃麵包,今日叫可以三點鐘就可以拎住個飯盒慢慢扒,我已經覺得今個新年都幾快樂了,即使都係八九點收工,然後第二朝八點半就要返到公司。

雖然我住緊間湯房部電視唔似第一間旅館有有線電視勁多嘢睇,除咗大量購物台只得幾個真正電視台仲要係細台,啲細台賀年節目只請到啲望落已經覺得好流的二三線組合同歌手,都叫有唔少(好淫的)韓妹睇。但今晚縱然辛苦,都決定脫一脫毒,返房之後擺低嘢沖個涼就換返衫出去對面街明洞夜市走走,在人群中渡過舊日迎接新年。結果...當毒是本性是,就會話「唉早知留喺房好過啦,起碼電視入面班韓妹姣得多少布得多。」(其實係有點戇居,夜市十一點九已經閂晒咁滯,跟住好多人塞晒去中間有好大棵聖誕樹同大電視嘅十字路口位,以為有活動,點知十二點發生嘅事係,熄燈,眾人「屌」一聲散水)

點都好,在首爾的1/1 00:00,祝一個小時後在香港的大家新年快樂,同都係嗰句:祝大家今年講得出,做得到。

沒有留言:

張貼留言