熱門文章

2015年9月8日 星期二

我慶幸有一個仆街童年


團體拍片證公園遊樂場設施太悶
小孩寧自創玩法


http://forum3.hkgolden.com/view.aspx?type=CA&message=6032313


而家一代細路永遠唔會明白乜嘢係真正童年。我好好彩住舊區加學校區,屋企附近五六間學校,幼稚園同小學都係屋企隔籬返不知幾爽,最重要係舊區加多學校加公共屋村,加埋就係好多樹、好多公園。亞皆老街球場係附近兩條屋村同幾間學校細路嘅天堂,中學生踢波,小學生就去隔籬公園玩同間小童群益會圖書館睇書,可惜間群抽會好細間只係一間屋仔,我小學未讀完就執咗,間屋仔就變咗差唔多未見過有人出入嘅雜物房同管理處,真浪費,因為我好開心細個屋企隔籬有間圖書館,令我小學已經開始勁睇小說狂追衛斯理。不過去圖書館為名,其實都係為去公園玩嗟。

講緊膠墊都未舖仲係全公園石屎地嘅年代,有個超高鋼架,成班人上面玩捉飛嚟飛去,而家啲細路可能連擒鋼架即係乜都唔知,屋企另一邊個公園有繩網同圓形鋼架,不過唔敢好似其他細路可以跟住個圓形調轉個人爬同爬到上頂。跟住鋼架拆咗變成氹氹轉,一開始係一塊圓木板加幾條鐵超簡陋,然後變咗飛碟型中間外星人頭大家排排坐嗰隻,試過班仆街轉到超高速落到嚟嘔一大餐,跟住點?咪又係坐上去再玩過再嘔過。玩完仲有又係成層樓高嘅韆鞦,班細路可以企喺度打打到270度,我就唔多夠薑,就同其他細路玩互撞,以前啲韆鞦係木板,一人坐一塊你撞我我撞你,撞到啲鐵鏈打晒結拆唔返就著草,勁開心。

以前啲滑梯全金屬夠晒metal,仲要高過兩個大人,因為鐵造加勁斜滑得勁快勁爽,大熱天時曬到成座滑梯慶恰恰更好玩。第二代矮咗再變咗螺旋梯,冇以前成層樓咁高時玩得咁過癮,就改另一種玩法玩攻城,一班下面打圈爬返上去,另一班上面滑落嚟踢撚死爬上嚟班人,不知幾好玩。而家啲膠梯,又矮,又唔好滑,邊好玩架。我屋企附近好似仲有一座鐵滑梯,得閒去睇吓拆咗未先。

童年唔係噉過,有乜好過?可惜歡樂時光短暫,過多幾年全部鐵嘅拆晒變晒膠,仲要細細座又矮完全冇挑戰性,木板韆鞦變咗一塊膠皮,好多大大座嘅變成細細件健身器材,冇計啦,鐵造夏天必定辣到陷家產,辣親細路管理員同政府實俾而家啲老豆老母屌(換著以前,就係你辣親之後俾老豆老母屌:「屌!天氣咁曬,鐵就梗係會熱架啦,科學堂miss冇教你咩?用吓腦啦柒頭!」從生活中(一面被屌一面)學習),而且膠製點都平過加易保養過鐵製木製,仲有繩網鋼架高滑梯木韆鞦氹氹轉,大個諗返細個點玩會發覺當時真係一直在玩命而家會好鬼驚,同而家興咩健康生活做運動嘛。結果從前嘅公園,多嘢玩仲件件都都鬼死咁大應該叫做遊樂場,而家吉晒空地多過嘢玩,變成俾阿伯阿婆做gym散步同禮拜日菲傭印傭聚腳嘅公園,連細路都冇興趣再落嚟,又少嘢玩又咁鬼悶,我留喺屋企玩電話唔好?

所以我好慶興經歷過石屎地公園年代,曾經喺鐵鋼架木韆鞦時仆過無數次街。我慶幸有過一個去公園跌過嘔過無數次再去圖書館睇無數本書,而唔係單單電話電腦遊戲機中渡過嘅童年。

沒有留言:

張貼留言