熱門文章

2014年9月27日 星期六

每週一相片大行動 2014 Week 39:多謝Stan哥份遲來但kvlt爆的生日禮物




其實我份人一向唔多注重生日呢回事,又唔係假期咪又係要返工,但係都唔介意大家用嚟做藉口送嘢俾我請我食飯嘅,不過今次一定要多謝Stan大佬份超精美生日禮 物,做咗三十幾年人,呢份應該係收過最有心思嘅生日禮物,有主題禮物盒仲要一份拆完又一份。件Walking Dead tee唔夠膽著我驚老母洗衫時嚇Q死佢,不過居然搵到蔣嘉瑩唯一一隻碟《約會》,對我呢個《我和殭屍有個約會》fans嚟講實在太過珍貴。真係講柒十柒次多謝都唔夠。

雖然亞視一早已經執柒咗都冇人覺得可惜,其實早前真係有為佢哋擔心過,就係話出糧都唔夠錢、政府已經開埋聲話有機會收返個牌時,立即肴晒底:「大佬,你 點都要播晒三輯《我和殭屍有個約會》先好執呀!」呢套劇係《天與地》之後第一次由頭到尾每晚都追嘅劇,仲要連播三輯即係追足半年,不過絕對值得,雖然第三集 故事同剪接都唔太得,全個劇本真係冇得頂第二集直頭神級,而家根本唔會搵得到咁天馬行空咁突破嘅故事,加埋連茄哩啡做戲都好正(黑仔搞笑好掂絕非而家王祖藍 帶起所謂「喜劇演技」之流,要睇《警界線》,佢係咪而家唯一一個同時簽兩間電視台嘅演員?),而作為特技片頭兩集ETV level CG加假到笑反應彈而家睇返其實相當富娛樂性,第三集CG拍得住甚至超越而家無線製作,又可見製作有幾前衛、當時嘅亞視肯為一套劇投資幾多心機,就連向來唔睇本地劇嘅老豆都話要追埋一份。所以追晒之後,只會對亞視同而家嘅香港電視工業徹底失望,好在時間編得差所以冇得追埋另一亞視神劇《千王之王重出江湖》,如果歲月留聲台係將呢套連住《我和殭屍有個約會》播,今年年底我應該會直頭將屋企部電視無線同亞視兩個中文台delete埋。

不過講到成功一大因素,始終係音樂。亞視劇集組一向強在音響,音效幾乎電影級級數(你唔嫌有時太誇的話),仲好鬼鍾意用日本動畫歌做配樂,《包青天》明 明係查案片經一經亞視手都可以變到成套武俠片咁熱血,之後有線都向亞視取經甚至更上一層樓播Nirvana播Therion(這是新聞台之外另一我超鍾意有線嘅原因)。當然令第二集大受歡迎同好多人追好多人識,就梗係首主題曲《假如真的有個約會》,呢首應該係輝黃時代之後香港電視主題曲史上最接近完美嘅顛峰。劇紅歌更紅,自然立即食住條水出碟,隻EP叫《約會》,《假如真的有個約會》之外仲有《單獨約會》同《約會之後》兩首,噉都可以用「約會」砌到張concept album出嚟,比當年陳啟泰主持《百萬富翁》之後出隻碟叫《最後答案》更cliche。

唔知係咪買唔到原版版權,首主題曲由power ballad變成chamber pop編曲版「歐陸Remix」,唱法都唔同放輕把聲,不過都好聽。另外兩首係陳慧嫻式典型pop歌一快一慢,見到陳慧嫻個名都知出事啦,老實當時香港流行曲其實仲係相當老土,K歌為患搞到發展慢咗最少五年,抒情《約會之後》冇乜特別,不過輕快的《單獨約會》有點驚喜,中間仲有先木結他solo八個bar再木結他鬥keyboard solo多八個bar,可以一首歌入面有長過八個bar solo仲要係兩種樂器鬥彈(雖然都係慢solo唔點高技術),在K歌橫行之香港流行曲嚟講非常難得。不過最kvlt始終都係入面仲有一舊水年費嘅蔣嘉瑩國際歌迷會申請表格,同埋大聯盟卡拉OK優惠券加修身堂$500豐胸coupon,oh thegood old times,想當年中學時代卡拉OK仲係百花齊放,樂壇廢柴張德豪老豆搞嗰間創藝臨執笠賤價到$15唱lunch K,新歌多舊歌齊仲要勁多rock/metal歌,而且飯餐款多大份又好食,大佬嗰陣麥記出名平過茶記,都平唔到十五蚊食到一餐飽仲可以唱埋K啦,當時係考試之後只返半日,日日放學成班人何文田出去尖沙咀金馬倫間創藝食飯唱K十分歡喜,住得遠的話分分鐘車費仲貴過$15呀。只可惜俱往矣,跟住加州紅一招獨家試唱打殘大聯盟,不過風水輪流轉最後反而俾大聯盟死剩種Neway食咗。未經歷過當年大聯盟大戰加州紅時代,唔會領略到嗰陣唱K選擇多又競爭大而間間都肯俾著數你係幾咁開心,邊似而家又少(舊)歌又收得貴仲要冇嘢食加唱一陣就俾人趕咁受氣?

只可惜有首超強登場作唱歌又好都冇用,傳聞當年佢見自己咁紅想入英皇,但同亞視傾唔掂數得罪人,結果出完隻EP之後,就同隨碟附送coupon上面嘅Big Echo一樣消聲匿跡,直到今年套劇重播多人知返,亞視台慶搵佢登台,先第一次睇到佢真人聽到佢唱live。不過相信係絕唱了。所以呢隻EP我會好好珍惜。又要多謝多Stan哥柒十柒次至得。

(between,《我和殭屍有個約會II》係我回憶一大部份,除咗神劇地位同首無敵主題曲,仲有入面個差佬小炳係我中學師兄成元鈞。佢本身係超級李小龍迷,校慶 請佢上台表演耍雙節棍同飛腳扮踢「東亞病夫」好鬼high,表演慾爆棚做埋港男真開心,當年想媾Crystal Leung但媾唔到更成一時佳話。亦可能因為噉,入亞視做唔夠幾套戲之後就唔見咗人了)

2014年9月20日 星期六

每週一相片大行動 2014 Week 38:iPod Classic & Apple, R.I.P.




其實我有特異功能,仲要係兩種添。首先,我有特別嘅飛歌技巧。我份人比較有組織,用咁多年mp3機都會自己整playlist,每隊band每隻碟一個playlist出街聽,再砌一個跟時序由頭排到尾嘅全集,等搭長途車搭飛機同返工時可以煲全線。唔知幾時開始發現我可以隨心所欲飛去想聽首歌,例如想第一隻碟第四首飛去第三隻碟第一首,正常梗係要拎部機出嚟望住慢慢篤啦,但我就會自然知道「click十四次就飛到去想聽首歌啦」唔望齋篤就飛到,就算係唔多熟嘅band都可以無意識地想飛去邊首就邊首,準確度有90%以上。呢招奇技都令我幾自豪,雖然純粹自娛完全冇實際用處。

第二樣特異功能就係,唔使點講大家都估到啦,咪就係地獄黑仔王托世去到邊衰到邊囉。我之前做過咁多間公司,全部執晒;出街食飯,好多食肆都俾我食死,好似旺角有幾間放題都打邊爐都係我食完之後就執笠;同怒人出一場show,一個月之後隊band就出事;電話用Motorola,跟住Motorola撤出香港;然後轉用Nexus,部N5立即變成末代版成條line話收皮(好在跟住Android Silver冇人理,Nexus有得復活,死唔晒);咁多年嚟耳筒用開一隻Sony同埋Denon隻360,兩個model同樣我用過之後就停產;今次估唔到蘋果冇咗教主頂住立即出事,當全世界顧住搶iPhone 6時,蘋果唔聲唔聲唔再出iPod Classic。雖然我唔係蘋果fans甚至有點唔太鍾意蘋果嘢,聽到呢個消息都有點唔開心,因為iPod Classic實在係最接近完美嘅mp3機,而且以二千蚊價位嚟講,世界上再搵唔到一部更好嘅mp3機架喇。

冇經歷過連寬頻都未普及個年代的話,唔會感受得到當年科技突破有幾震撼,而家一年一代新iPhone點點點進步之流完全及唔上。正如唔會想像得到當年開個Gmail都係超級威水一回事,Hotmail仲係俾得10MB你用幾個attachment已經爆時,Google一嘢俾夠一激你,最初想開仲要人邀請你至開得,嗰陣問人拎邀請開Gmail account個盛況幾咁墟陷。而iPod革命在一玩就玩到盡,我第一部mp3機係JVC,得128MB賣成三千五百蚊,間間廠出都係幾十MB幾百MB時,蘋果一開始已經係用5GB 10GB噉計,當年連256MB USB手指都已經叫先進(嘩我仲記得當年買flash drive差唔多$2先得1MB),噉樣一舊嘢有成幾激大,真係嚇死全世界,而且整到咁大仲因為可以睇片,我第一部iPod係U2代言部5G,係第一部可以彩色螢幕睇片嘅mp3機(好似係),我就從來未用過iPod睇MV睇戲,不過單為有30GB已經夠爽,嗰時屋企部電腦兩隻harddisc夾埋先得40GB仲要全家分,我仲係聽緊128K mp3一隻碟先三四十MB,30GB已經幾乎等同於無限架喇,大佬佢一部iPod已經大過我部電腦一隻harddisc呀。

而且真係靚。iPod之前冇幾多電子產品敢用全白,雖然我就好怕成日驚整污糟,但個設計實在冇得頂,亦邊會諗過一個圈就可以做到晒全部功能,中間仲一定要隻手掂住先轉到,出嗰時屬於超級高科技超級型。聲又係勁靚,之前用過兩部聲都夠厚夠實,但有點太多低音,其實聽歌我好怕太重bass包括聽metal時,但十間廠九間出mp3機賣點都係(超)重低音甚至谷到拆,iPod就好在賣音質聲好清層次感亦夠,聽pop一流夾對Shure聽The Gathering更是最高享受,而好在我聽metal從來關注中高音多過低音,所以iPod隻聲薄咗少少,但完全符合我所要求面面俱圓,雖然對耳筒就真係食晒屎。

同埋煩在一定要用蘋果自己插頭條線同iTunes過歌,雖然之前已經慣咗全人手upload歌整playlist,所以問題唔大甚至用iTunes處理更方便,而且蘋果自己條線upload file速度超高比人快十倍都有,但用咁多年憎足咁多年,人人都話蘋果嘢易用,唔好意思我可能係全世界唯一一個意見相反嘅人,iTunes個介面根本唔好用仲要越出越複雜完全唔user friendly,而且過親歌一定要靠佢條線佢個程式,即係去到其他機有歌想入落部iPod都可能要手指抄返屋企先過得到,Windows版iTunes又出名食ram仲勁過Chrome,次次開親部機都一定出問題。我只得iPod一樣蘋果產品,已經夠令我對呢個系統非常反感,立誓一日蘋果要我用iTunes,我一日都唔會用iPod以外任何蘋果貨。

只不過又要小又要用的情況下,唔覺唔覺就用咗iPod差唔多十年。第一部5G係親戚抽獎抽到但唔聽歌就送俾我,作為一個U2 fans冇蘋果同U2合作出嗰部紅黑色有埋簽名特別版有點可惜,不過唔使錢有蘋果機你用仲想點吖。點知用咗半年唔夠就瓜咗,原來係成水貨出事大鑊到上埋報紙,上去維修中心入面全部人同我一樣嚟整iPod,counter條友都冇咁好氣解釋收完俾部新機就算(雖然都要象徵式地等一個星期至有得拎)。其實當時有點失望,所有人講到蘋果點堅點好用,但連功能最基本件產品iPod都可以大問題到上報,不禁問句「唔係啩又話蘋果嘢好堅好好用?」好在蘋果有樣好就係出事時直接換部新機俾你廢事浪費大家時間我有新機用又開心,同第一年衰一鑊之後跟住都冇乜事發生,我超級粗用部機差唔多每日跌起碼一鑊,但跌足咁多年都冇事只芒右下角黑咗撻同間唔中插電腦load唔到,同舊電由本來頂到八到十個鐘變到得返四個鐘有點頂唔順囉。如果唔係部機唔知點解放屋企當眼地方又冇人經過會叉叉吓電突然間消失咗,我相信呢部用咗七年嘅5G拎去換換電的話仲可以用多好多年。

只係可以屋企唔見機咁神奇,相信係個天都叫我出返部Classic啦。有一段時間試過用電話代替,有好有唔好。iPod我從來唔較EQ,其實因為預設EQ唔太掂,好似低音一係正常一係超重冇中間位,所以咁多年都係用正常平衡mode聽歌算。電話聽歌用Poweramp可以任set EQ高中低音想點都得,但唔知點解電話會咁白痴音量只得1-15你揀,好多時聽歌最大問題就同iPod EQ一樣冇中間位,覺得細聲但推大一度就變到太大聲,對Denon耳筒隔音又唔算強,出街用電話聽歌好多時聽到好冇癮甚至辛苦。iPod就係高科技在音量拆到好細用個圈慢慢轉逐少逐少較,音量控制咁細緻呢點好多電話同mp3機做唔到。所以跟住都要豪一豪$1888出返部iPod Classic,係咪命數呢同部5G一樣一年未夠就壞又要拎上去換新,只希望拎咗部翻新機之後可以長命百歲,因為當我轉用Classic之後,iPod就只餘touchscreen系列了。

你問iPod Touch即係打唔到電話嘅iPhone嗟,有乜唔好?唔好就係同蘋果無緣就係無緣,唔知點解人人都話易用的蘋果嘢我到而家都仲未曉用,出Classic一個原因就係借咗部Touch返嚟用過一排之後發現我真係頂唔順蘋果touchscreen類產品,再加提高去買Classic嘅動機。同雖然Classic個系統都有美中不足之處,好似連直接喺機入面改playlist內容同查一個playlist全長幾耐之類咁基本功能都冇只可以聽歌,只係當要用touchscreen就代表想轉歌甚至較音量都要拎部電話出嚟(Touch機身個音量掣同電話一樣,做唔到轉圈種細緻調整),噉我仲點可以用到而家招唔望齋摸就可以想聽邊首立即飛去邊首招特異功能?冇咗個圈同實體鍵的話,我仲點可以好似而家噉部機擺褲袋,想較大細聲伸手入袋轉圈,想飛歌喺袋外面篤左右制就得,連機都唔使拎出嚟就能夠控制一切?鍾意獨立用mp3機聽歌除咗聲普遍比電話靚又唔怕搶晒電話啲電,仲為出街時可以唔使事無大小都要拎部電話出嚟睇睇,唔望只用手摸就可以轉歌較音量,假如到頭來又係要全部經touchscreen做,就俾唔到我追求之效果同效率。

只可惜iPod出Touch版之後,Classic就變到同Google Reader一樣,超好用、超方便、超強大,只不過唔會離開到小眾玩意同死忠派領域,當無利可圖時就一定會cut。有幾多人明白iPod聽歌點都好聲過iPhone呢?加埋可以一舊嘢包晒全部功能時,又有幾多人仲會old school地另外買多一部機專為聽歌呢?既然最正確商業決定係谷人買iPhone或者幫手清iPod Touch貨計劃下一個停產時間表,非touchscreen的Classic就只好訣別了。都幾諷刺,上一次U2同蘋果合作時,係出其中一代最重要嘅iPod;今次U2又幫蘋果手,不過佢哋有份幫手推動之實體鍵版iPod反而被消滅了。而家對住部機都幾唏噓,呢個iPod Classic + Denon 360組合係最完美聽歌組合,但係兩樣都停咗產,是但一件壞咗的話都唔知點算,我再搵唔到另一部mp3機同另一對耳筒更加適合我。360香港已經冇晒貨,嚟緊去東京可能會掃返對,雖然日本買打埋稅個價錢等於香港兩對;認真考慮緊嘅反而係,係咪應該襯而家街舖仲有Classic尾水貨時,執定多一部做後備?好命的話,可能兩部Classic陪到我過世架喇。


每週一相片大行動 2014 Week 37:R.I.P., Apple & iPod Classic


http://lausirisual.blogspot.hk/2014/09/2014-week-37rip-apple-ipod-classic.html



每週一相片大行動 2014 Week 38:iPod Classic & Apple, R.I.P.


http://lausirisual.blogspot.hk/2014/09/2014-week-38ipod-classic-apple-rip.html

2014年9月18日 星期四

《一切從音樂開始》:可惜,總是擺脫不到音樂人電影的cliche和殘酷現實

《一切從音樂開始》真係好睇到黐線。(between,個中文名真係好Q長。)不過有點可惜,故事又有意無意間用到十套音樂人電影九套會出現嘅cliche。好似《起勢搖滾》,Mr.點解會紅?唔係因為音樂好,只係唱片公司見到嚟緊潮流係樂隊,經理人見咁啱身邊有個做細嘅夾緊band,就近水樓台捧咗佢哋出嚟先。(利申:雖然而家不值一提,Mr.頭兩隻碟真係冇得頂)《一切從音樂開始》更加一開波已經講明,無論你音樂有幾好,首先要令人注意你,當人注意到你對你有興趣,先至會(認真)聽你音樂,縱使你音樂本身如何驚天動地。

《一切從音樂開始》女主角最後成功,音樂是好的,但更大原因係搵到個大明星同佢宣傳,人哋一句說話勝過你千萬廣告費,只要搵到有份量嘅人幫你講嘢,點平庸都可以紅e.g.《Gangnam Style》。而每當出現呢個cliche,故事點精彩導演拍得點樣好睇都好(呢套真係超級好睇),始終都會覺得主角最後成功到,實際上並唔係因為實力名副其實。

2014年9月10日 星期三

每週一相片大行動 2014 Week 37:R.I.P., Apple & iPod Classic





【無聲告別!iPod classic悄然下架】@蘋果日報,10/9/2014


http://www.facebook.com/hk.nextmedia/photos/a.170516952447.149676.105259197447/10152782586977448


成日都覺得Tim Cook好慘。毫無疑問Steve Jobs係最接近神的男人,不過佢marketing方法亦係做神,將蘋果全部捧上天高再踩到其他人低過地底。佢有人冇嗰啲,「就係劃時代就係最前衛!」(呢一點唔係蘋果迷的我都認同)人有佢冇嗰啲,「垃圾嚟,蘋果唔會有亦都唔需要!」到後期蘋果新software/hardware開始出現「垃圾」,畫都廢事同你解,一句收你皮:「This changes everything. Again.」不過冇人會質疑,因為Steve Jobs就係神不要問只要信,而且你點鬧都好一樣大把人/港女俾,正如我公司班programmer手提電腦一定係用Mac,雖然買返嚟都係裝Windows用office,仲要一部唔夠買多部擺屋企,有個型到部Air買完返嚟開得幾次,跟住同啲書一齊打棟擺上書架做擺設多過用嚟做電腦,「生活態度嘅嘢你識條春咩!」

所以佢在生時威到盡,但死咗之後Tim Cook接手就灰爆了。佢冇錯,錯係Steve Jobs每次出新嘢例必先數爆其他人踩住人上,當年出iPad時就好口響「戇鳩先會出細tablet」,瓜咗之後Tim叔唯有樣衰認戇鳩同大家介紹iPad Mini。iPhone又係另一口響代表作,未死之前iPhone代代個芒都係咁高咁大(or咁矮咁細),只不過用神級marketing包裝到點樣完美尺寸、點樣(好似其他牌子電話噉)大部少少已經唔可以單手控制、點樣最符合人體工學,大家又覺得係喎細得有道理喎,跟住佢一死部5已經搞到Tim叔又樣衰多鑊,而家第六代仲要bigger than bigger添都唔知可以點樣兜喇。

其實好多年前已經覺得蘋果只要一出大芒版立即可以稱霸天下,好似Galaxy Note初出個個見咁大部根本冇人睇好,點知爆冷成為其中一個最賣得電話系列,就係一班用完iPhone覺得太細嘅港女見大iPhone差唔多成倍就仆去買Note,所以只要有日蘋果出大芒,成班人/港女肯定立即仆返去用iPhone,要立即搶多幾十%市佔其實唔難。問題係Steve Jobs時代連唔用蘋果嘅人都覺得蘋果型,就係可以硬件規格唔係勁甚至弱、芒咁多代都係咁細,偏偏用設計同UI+UX打贏幾十個Android電話牌子,當時你只會覺得Android電話係抄iPhone特別三星出品。但iPhone 6...唔好意思5代手感同設計我都覺得好完美(雖然個人口味仍然嫌太輕太細),但今代第一眼真係以為HTC出新機,特別個背脊點解可以仲樣衰過大陸Android山寨機?就連marketing都弱晒,Steve Jobs死之前有幾可試過發佈會之前已經乜都俾人爆晒出嚟俾晒相你睇?今次除咗隻錶仲係神神秘秘,兩三個月之前你已經知道晒最新一代iPhone咩樣咩料,噉個發佈會仲有咩值得期待嘅意義?(有,咪見證一下部iPhone 6係咪真係傳說中咁樣衰囉,結果求仁得仁啦大家)

雖然從來唔係蘋果友,今次發佈會都有兩樣嘢關我事,第一就梗係睇定iPhone 6咩價位同幾時有得買,大佬唔執返幾部賺返少少水腳,下個月邊夠錢去睇Loud Park呀?第二就係,唔係蘋果(今次係蘋果日報)講都唔知,原來出新iPhone、出Apple Watch,代價就係唔出再iPod Classic。真係好心灰,雖然我成世只用過iPod一樣蘋果產品,而且單iPod一樣已經令我非常非常之厭惡iTunes繼而唔再對其他任何蘋果出品有興趣,但iPod本身的確係史上最完美mp3機之一,上星期先剛剛拎去整,整完就見到話原來剛剛收返嚟部機已經係末代,總會有點唔開心。而iPod,將會係我同大家講嘅另一個故事。


每週一相片大行動 2014 Week 37:R.I.P., Apple & iPod Classic

http://lausirisual.blogspot.hk/2014/09/2014-week-37rip-apple-ipod-classic.html


每週一相片大行動 2014 Week 38:iPod Classic & Apple, R.I.P.

http://lausirisual.blogspot.hk/2014/09/2014-week-38ipod-classic-apple-rip.html

2014年9月6日 星期六

《轟天猛將3》:預咗會屌架喇,又點吖,咪又係邊屌邊睇,不過又唔算差嘅




雖然今集依然好睇,不過嚟到第三集,《Expendables》呢個系列已經相當大危機。第一集概念同場面都好,衰在史泰龍自己做導演,搞到套戲好亂;第二集知驚搵真係識做導演嘅人去導,故事場面都冇唔妥,差在一切顯得太簡單冇乜挑戰性(有Chuck Norris世上仲有乜嘢難事呢);今集似返第一集,缺點係想講好多想做好多,結果好多方面都高不成低不就。

似乎史泰龍已經唔記得《轟天猛將》要搵咁多猛人演嘅原意。頭兩集論戲幾差都好仍然會覺得精彩,因為人人都有自已solo時間拍得出個個隊員各自特點似場盛事,而家雖然玩返第一集種硬橋硬馬真功夫,但又明顯打得冇第一集咁激,為咗過電檢等細路都入得場啩,Jason Statham玩刀片到周圍血或者龍格爾霰彈槍分屍全部冇晒。班新仔仲灰,有個話枝XM25高科技爆破彈狙擊槍點先進點勁,點知出都冇出過,不過點灰都唔夠李連杰,居然只出嚟開槍,唔使打功夫你搵佢嚟做乜鳩?結果成隊十幾個人,除咗個搞笑西班牙佬同真係打得勁條女之外,其他全部都係拎住相同嘅槍做埋同一樣嘢完全冇分別,講到係史上最危險人物嘅Mei Gibson更加講都廢事講。如果可以加段李連杰同條女中國功夫+MMA一個打十個,會更有睇頭。(between電單車一嘢飛上八樓嗰場真係精彩嘅,坐我後面班女睇到尖叫)

劇情搵得返上集唔夠嘅危機感,只係隊名叫Expendables,三集以嚟幾乎冇死過人仲要死都係路人級角色,十個人打人數多十倍仲出埋飛機大炮嘅軍隊,依然可以成隊人全身而退槍都冇中過冇穿冇爛,仲係咁無敵會唔會冇癮得滯呢,要一開波中槍個黑鬼死好難咩,而且如果佢個角色死的話,跟住劇情發展都會合理好多。

有樣好過上兩集,就係玩演員出身同經典對白,史泰龍加Wesley Snipes根本就係《Demolition Man》,跟住現實真係坐過監嘅Wesley Snipes戲入面用佢現實入獄個原因嚟講笑真係笑死,阿諾舒華辛力加玩佢舊戲啲金句更加出神入化,最後史泰龍tribute埋《Judge Dredd》,笑位設計得比上兩集精警同時自然唔夾硬,只係精得滯,我哋睇《轟天猛將》除咗為成班麻甩佬以一敵百見人就殺,仲有殺完人之後成班佬圍埋一齊互寸互窒㗎。笑位好咗特別好過上集唔少,只係希望可以有更多囉。

不過同睇無記班人一樣,都係又要鬧又要睇㗎喇,睇個尾都知長拍長有,佢肯拍開到456柒集一樣會俾錢入場。套戲又未至於話好睇到想入多次戲院睇多次嘅,不過勾起咗舖old school打星癮,等我聽日狂loop Austrian Death Machine全線至得。GET TO THE CHOPPER!!!!!!

2014年9月5日 星期五

每週一相片大行動 2014 Week 36:多謝阿信屋,令我可以用$5食到餐又飽又好味的意粉


阿信屋實在是我們窮撚的偉大救世主,唔係有佢,呢個時勢仲邊有可能$3X買到一包5kg越南米?去百佳惠康買五斤泰國米澳洲米的話價錢起碼兩三倍啦,隻越南米又唔係唔好食分別只係濕身少少,所以屋企附近開分店之後,我老母入糧貨寧願行多幾步路都唔幫襯百佳惠康。不過低處未算低,今期流行螺絲粉長通粉蜆殼粉400g通通$4.1一包,400g概念係夠煮四大碗,而且有會員卡七折三蚊一包,就算冇得平到盡街坊價都有八折先三個半(其實到而家我都未知幾時當我會員幾時當我街坊,是但啦八折都好平啦已經),然後落街市買$20免治牛肉,撈埋可以整到四兜免牛意,隻粉又要好食&食得飽喎,自此老母成日叫我經過阿信屋就買幾包,我亦成世人第一次開始帶飯,因為當而家出街食飯四十蚊已經係基本消費時,廿幾蚊夠一家人食一餐、$5食得飽你,真係慳到好多。同埋真係好食嘛。