熱門文章

2015年2月18日 星期三

既然想玩deconstruction,點解唔玩得更盡?:Kingsman: The Secret Service




本來冇諗住今晚會返返EMAX睇戲,因為會滯留APM一段長時間,下星期要趕上機之前清晒成個project,琴晚先朝九晚九諗住今晚會仲夜,點知個客話佢臨近歲晚加聽日放假,所以準時六點走要鎖門迫我一齊早收工,但當乜都只可以喺個客個場做而得返一個星期時間唔夠就要交貨,其實我當時係想跪地哭求佢唔好走俾我繼續做,成世人從未試過咁恨返工,這是另話。因為一早叫咗老母唔使煮飯,辛苦咗咁多日又想抖抖,結果由九展出去觀塘開工,放工之後再由觀塘走返去九展睇戲。

其中一個走返去九展嘅理由,係而家都好難買到飛,係星影匯先幾乎乜戲都可以walk-in仲一定大把靚位你揀,冇計單睇trailer《Kingsman》已經冇得輸,雖然或者期望太高搞到有少少失望。原著其實幾好睇,Mark Millar都算當今漫畫界high-concept之王,佢同Warren Ellis兩個係好多年前令我再次對美漫提起興趣嘅大師,而家兩大美漫label由九幾年都幾emo變到而家寫實硬朗十分metal,佢哋兩位居功不少。跟住自己出嚟開條indie line,賣點係專搵超勁畫師合作色畫超靚(《The Secret Service》就係《Watchmen》畫家Dave Gibbons出手),同專出幾期短篇講簡單得嚟另類嘅故事,可以話完全為搏電影公司睇中買版權拍戲而寫,好鬼聰明,你同我講佢出過咁多短篇全部都會出電影版我都唔會覺得出奇,《Kick-Ass》都拍咗兩集啦(雖然第二集食晒屎),而第一集個導遊Matthew Vaughn今次又拍佢另一本,唔知佢會唔會成為Mark Millar御用導演呢。

Mark Millar啲短篇鍾意玩另類故事同deconstruction,《Kick-Ass》第一集完全拍得出原著種氣氛同神經質,Matthew Vaughn玩鏡頭玩配樂有一手,嚟到《Kingsman》繼續發揮,雖然又係trailer已經睇晒幾乎全部打戲,不過拍得真係好型,教堂場戲如果可以出一1 take long shot版就正,最後同個腳刀女打得好鬼爽,當然唔少得好鬼玩嘢嘅soundtrack,一開波已經影住錄音帶播Dire Straits《Money for Nothing》,真係夠晒英國。個故事其實除咗老鬼帶個街頭古惑仔後生入行做特務呢條線,同控制人類自相殘殺陰謀之外,其他幾乎完全同漫畫唔同,但我冇投訴而且改得幾好更配合電影種長度同格式,只係同《Kick-Ass》一樣,贏在技術上視覺上,編同導始終差啲,好似話係特務片,完全拍唔出嗰種氣氛,講到鬼咁多花臣道具但玩唔到咩花樣,就算話係deconstruction都de得有點過頭;故事重點係講主角點樣用街頭智慧小聰明玩轉死板守舊學院派,戲入面完全感受同表達唔到呢樣,偏偏漫畫最好睇一部份就係特務訓練過程;打戲鏡頭同設計都一流,但最後打大佬基地,可以十幾個人大直路開槍都射唔中、連企正前面半步距離唔夠鏡頭影住已經係對正嚟射都可以話射失,就未免流過頭,仲搞到主角好似完全唔勁(實際上佢做主啲打戲的確差好多皮)。同點解明明有超必一出就搞掂可以輕鬆爆機,又係都要留到最後一刻先用呢?

套戲幾好睇嘅,教堂大屠殺同最後同條女打兩場真係搞到你想入戲院睇多次,只係步《Kick-Ass》後塵論整體就差,想玩另類解構但唔夠特務又唔夠精警,頭半勁可惜後勁不繼,但係睇個勢要拍續集唔難,電影公司好無謂地加個Kingman個字落個名呢招原來幾聰明,一收得就可以變成系列名,只要唔好好似《Kick-Ass》噉第二集撻Q撻到仆晒街就得。同打戲可以拍得再喪啲,坐我後面係個老豆帶兩個細路入場,唔知點解戲院會俾佢哋入場,更加唔明個老豆點解會帶細路睇套咁暴力嘅戲,但兩條細路睇晒成場都冇出過聲,應該係佢哋都覺得打到再黐線啲至係嘛!

2015年2月1日 星期日

要睇土匪亡靈,因為你知道香港唔會出到一隊土匪亡靈:土匪亡靈無品大匯演

2014最灰係乜?唔係睇唔到Origin,唔係仲未媾到女,而係買晒飛訂晒機票酒店生日個禮拜飛去台中睇山海屯,先知怒人撞正我生日正日搞巨碟發佈演屌週,然後山海屯話會 搞香港站。係灰到貼晒地,因為睇陣容睇班底睇埋隻碟都知,就算為怒人成個演屌週(其實只得兩晚...)放棄全個台港山海屯都絕對值得,只有同自己講:

「去山海屯睇到土匪亡靈場處男show,衰唔晒吖。仲有台妹真係好撚正呢。」

點知半年之後,土匪亡靈嚟香港,同場仲有怒人。我已經屌到冇氣了。





其實我好佩服主辦單位,雖然土匪亡靈話題性十足,兩地文化語言到底不同,正如怒人我哋覺得好正,台灣人聽可能完全唔知做乜春覺得聽條鐵,加上喺香港名聲未算好響, 會為佢哋開蒲吧仲要開全場而唔只做半場,實在好勇。

另一勇係搵Mechanix做第一隊,因為音樂上內容上同全場gig主題完全唔夾有點鳩唔搭柒,不過我都明白想喺香港搵到啱呢場show出嘅(奇)band其實好難,世界上有幾多個怒 人呢,神奇膠之類身價又可能太高。好處係可以見識新band,但第一個印象係嫩,編曲同表演都有點亂,雙歌佬但唔係玩拆聲雙聲部、唔會清聲唱和音,只係輪流嗌,兩把聲區別 又唔夠,只好似一人嗌一句等對方唔使咁辛苦,到最後一首歌(似乎係佢哋嘅「single」)先至有清聲後面加把拆聲,但整體根本唔需要刻意分開兩個人唱。當本身一個人都做到 而拆開兩個人做,就只好似歌佬未得所以要搵人分擔。

老實歌同演我都覺得唔太理想,但solo非常非常非常之好,技術夠仲有melody有sense,在這個01001就係咁簡單的breakdown時代,我好耐未試過睇一隊香港band彈solo會睇到

「嘩!!!」

雖然音樂屬我唔太鍾意類新派,為手solo,我好有興趣睇下一次Mechanix演出。





好耐未睇過怒人,半年人事幾番新,今次又新一個班底了,但之前都係一隻新碟一隊band唔算出奇,《屌時代》而家都去到第三個版本啦(雖然我仍死忠地覺得bass跟住 progressive keyboard拍線拍到飛天個第一版係最正)。歌同演方面大家都好熟悉,所以想講係隊band。

姑且叫「雙重鳩鼓宇宙巨樂隊」做MK1、《屌出生天》班底做MK2、而家個怒人大惡隊做MK3,如果話MK2係怒人咁多年嚟實力最強表演最可觀時期,相信冇幾多人會反對,因為 MK2樂隊勁在唔止全情投入首歌帶動到台下都興奮,玩舊歌時亦會加自己風格入去為佢哋注入新生命,而MK3我覺得即使有人有技術,暫時未搵到當時份火花。但第一次齊人出剛剛 開始嗟,bass佬台上面癲癲哋同樂隊表演風格好鬼夾,結他佬《仆街人生》用自己方法將段solo彈到Buckethead噉款,睇得到別於以前嘅可能性,俾時間磨合一下,或者會是另一 種精彩。

當然大家更關心係幾時有新歌?唔係新咗N年嗰啲呀屌。





「全盛時期嘅怒人,一晚可以撕爛幾多本撕政報告同露幾多次J?」






播咗N個版本嘅《東京熱》(利申:Tokyo Hot是甚鳩麼?),主角終於上台。我好榮幸睇到上年山海屯土匪亡靈第一場show(代價是放棄怒人用MK2絕響「巨碟發佈演屌週」 同我慶祝生日,我仍然覺得是一個太大的代價),雖然當時只出擺最外面街角位唔買飛經過都有得睇個細台,得三首歌加一首《You Suffer》(好似係),好夾硬先玩到半個鐘, 但全場反應超好個個笠晒絲襪玩到癲,計入座率更加係全場音樂節頭幾名,我呢個普通話半桶水台語更加識條春嘅香港人都覺得場show好撚好睇。而今次中國tour香港站加第一次 香港開show...我已經唔知應該俾咩反應。





土匪亡靈音樂就似Ephel Duath隻黑碟,擺明亂咁嚟、有啲位擺明唔夾,但技術練到好勁第一首歌已經俾個gravity blast你歎,全隊表演好紮實,加撈埋好聽好玩喎你吹咩。 唔係彈幾首歌唱完就算,而舖排足全場成一場完整表演,冇錯佢哋依然超少歌唔夠歌又玩又吹水都只得四十分鐘,冇錯你班港燦都係聽唔明到底班友唱乜同想唱乜,但冇人會話佢 哋玩得唔好或者今晚唔好睇,加埋唔知點解特別多事幹彈彈吓斷結他帶播歌又hang機又乜乜乜,如果係其他show遇到你會「屌唔撚係啩咁撚雞」,但今晚出呢啲意外反而令氣氛更 開心更好玩,稱得上現場演出,就係要有呢啲控制唔到嘅突發事先好玩嘛。





而且又唔係鳩玩亂嚟,好似由香蕉a.k.a.太陽花到黃傘帶出一首歌唱晒兩岸兩場革命,玩味之間又可見認真同心思,點解成日覺得外國樂隊(包括大陸同台灣),表演硬係做 得比本地樂隊好、開show比香港band好睇?就係佢哋明白點樣去計劃一場有娛樂有內容有思考空間嘅表演,好似土匪亡靈自稱「綜藝團體」,你會覺得好笑,但正是此綜藝之心, 由佢哋第一場演唱會開始,每一場演出都唔只得音樂咁簡單。

好多人成日話劉Sir只識踩香港band彈佢哋呢方面唔掂嗰方面唔得,但想講一隊樂隊練嘅唔應該只得技術,企得上台要兼顧嘅仲有表演,而睇得外國band多都會體會到,香港 band一個大問題係往往只顧修練前者,而長期忽視後者,需知技術高唔代表就等於識得表演,就如上次 韓國post-thrash metal band Diablo香港當晚,一隊indie band點樣將全晚串連成一場一氣呵成嘅演唱會,佢哋點樣台下只得廿個人(唔夠)都可以好似對住二百幾人表演 咁落力,好老實,我真係唔覺得有幾多香港(metal) band做得到。之但係Diablo玩完第二晚係本地extreme metal大團圓之Metalvolent Returns,呢場爆到癲,而之前一晚Diablo觀眾人數夾埋都唔夠當晚台上全部樂隊加埋咁多,有見及此,我相信有啲嘢其實香港band自己都唔多 會執著或覺得需要學習。





「簽名會用螢光筆簽是那招???」


(同埋,蒲吧唔係一向話無煙無酒無粗口咩?但怒人已經出咗N次蒲吧都未俾人blacklist,今場show張poster可以貼到落大門口大人細路都見到,跟住又露撚又撕爛施政報告 ,我已經唔知道癲嘅係土匪亡靈、係怒人定係蒲吧)





後來先睇到,真係多謝QWERTY的朋友如此抬舉,其實劉Sir一向只出名在用一百個字去寫十個字講得晒嘅嘢,用字數扮到好似好專業噉去呃啲無知婦孺以為佢好Q勁噉嗟。

同通常稱得上/被稱為「經典」,好多時都代表而家已經過晒氣或者收咗皮,哈