熱門文章

2014年10月24日 星期五

三年前觀塘行人隧道的艾未未塗鴉,和今天獅子山上那不朽名句

禮拜四朝早一班登山狂熱份子,為我哋大家在獅子山上留下那不朽香江名句,跟住警察加消防迅速聯手,派出部隊封鎖山頭再勞師動眾直昇機都出動埋,唔夠廿四小時美景不再,堪稱香港九七之後其中一次組織最快、規模最大、效率最高之政府跨部門行動。見到,令我諗起三年前嘅觀塘行人隧道。

鄰近band房同藝術工作坊集中地,街頭常見塗鴉是平常事,三年前之特別,是因艾未未被捕,令街頭出現大量「誰害怕艾未未?」塗鴉,觀塘行人隧道就見到幾個。朝早見到仲諗會留到幾耐,夜晚經過已經全部唔見。不過好有趣,獲此厚待之塗鴉只有此項,其他佈滿大半條街同隧道嘅大小塗鴉,你今日見到同當年所見冇乜分別,唯獨有幾個位係與別不同地份外清潔。

上面講咗乜嘢,自己參透吓啦。

2014年10月6日 星期一

每週一相片大行動:2014 Week 41:Dead Trigger 2世界都同步發生雨傘革命(好似係)




我真係覺得Madfinger好多時擺明玩野。之前中國其中一個任務係佔領兵工廠,因為大陸政府知道終有一日國內會有大暴動,就起間兵工廠專門生產對人彈藥作為鎮壓準備。而當今個星期香港發生雨傘革命,Dead Trigger都打到去香港了,個任務介紹,仲好鬼死應景添。

(between,中國任務地圖好多素材根本取鏡香港,之前打極都冇,今次終於有香港了。但係trailer入面香港地下水道打喪屍跟住隻巨人喪屍一拳打爆天花板,然後走上地面同隻巨人大戰呢一幕呢?)

2014年10月5日 星期日

憑Wintersun對《Time II》的堅持,Jari Mäenpää行動解釋俾香港人點解唔可以袋住先


Wintersun’s Jari Mäenpää and Nuclear Blast Have Kissed and Made Nice with Each Other


http://www.metalsucks.net/2014/10/03/wintersuns-jari-maenpaa-nuclear-blast-kissed-made-nice/


好耐未寫過有關metal文章,今日特意寫寫,因為對現今香港時局,呢單新聞有一個啟示。

Wintersun最出名係可以用差唔多十年出一隻碟,原因係唱片公司只俾好少錢佢去做隻碟,視野廣成本卻有限,《Time I》就係半妥協之下完成,好多部份只有用家中器材完成,可以聽得出製作方面有相當多瑕疵。所以《Time II》Jari Mäenpää決不讓步,一定要入專業錄音室錄音,只係單憑唱片公司微薄資助冇可能達到目標,亦因合約所限唔可以經群眾集資,結果一拖再拖。

當中可以帶出好多議題,例如可以話佢太理想化唔現實,幾多樂隊錄音連搵似樣少少嘅器材錄音都做唔到?既然唱片公司俾得你係得咁多,「袋住先啦!」其實Jari可以同《Time I》時一樣,有幾多錢就使幾多出咗隻碟至算,「話唔埋之後唱片公司肯投資remix remaster呢!」不過佢選擇全力堅守立場,長時間爭取之後,終於輪到唱片公司讓步,批准佢用自己要求嘅方法 - 群眾集資 - 去達成目標。雖然過程辛酸亦用咗好多年時間,但最後爭取到嘅,係真正想要嘅成果,而唔係一個過後連自己都面對唔到嘅不淪不類結果。

凡事總要貫徹。今天你是金鐘派還是旺角派,請自行選擇。

2014年10月4日 星期六

每週一相片大行動 2014 Week 40:2014.10.3 守旺角街頭記




我會將我由2014年10月3日6:45到場至凌晨兩點過後離開,於旺角街頭一切所見所聞,亦即黎棟國所講之「好戲在後頭」寫低。

3/10星期五返工之後出旺角,其實我只抱「贏就一齊贏、輸就一齊輸」心態,就算俾人掃晒場都要睇吓輸成點。點知原來件事未完,六點九去到時未算好多人,主要集中亞皆老街彌敦道交界十字路口,我可以企到亞皆老街近女人街條班馬線,全部人由四面馬路圍堵中間,仲有幾乎全世界記者在場。匯豐銀行對出安全島側邊放音響個鐵架上面有個madam嗌咪叫大家離開,大家當然睬佢都傻,因為而家全部人唔走圍住困喺中間嗰班,就係晏晝打學生班黑社會,佢哋逃走唔到,差佬又唔拉人,而出現呢個圍堵對峙局面。

至於六點前情況,資料來自不同目擊者,當中一個健談阿叔,我相信佢就係英國衛報專題文章《Hong Kong protesters beaten and bloodied as thugs attack sit-in》受訪者Andy Chan,佢駐守朗豪坊外地鐵站C出口位置時以風趣幽默全晚幫大家維持士氣,而且係黑社會清場目擊者。佢當時喺地鐵站上緊地面,途中撞到黑社會追打學生打到落地鐵站,有個男俾人打到流晒血,另一個女過去勸交都俾人打埋一份,所以佢驚都立即加入旺角圍堵黑社會行列。

事件過程,聽到係四五點開始大打出手,當時已經接近散場,留守學生得幾十人,突然出現大班人衝入去見係學生就打,仲要見血都唔停手嗰隻。好耐之後差佬終於出現,點知得十零廿個,更加見唔到任何防暴裝備、胡椒噴霧、催淚彈或者雙面旗。成條街都叫佢哋做嘢,點知班差佬係企喺側邊唔理,仲要留守班學生想還手時制止佢哋唔准對班黑社會郁手。然後差人終於做嘢喇,點做呢,當有人打你你想舉手擋時,差佬捉實你隻手「我救你走!」跟住拉你走,佢一面拖,幾個黑社會就襯你冇手擋時追打,仲要一面打你一面嗌「嘩!你做乜打我呀!」而拉你走個差佬完全無動於衷。好喇班差佬終於將你由彌敦道路拉到去朗豪坊嗰邊,你以為冇事時,側邊馬路又衝另一班黑社會出嚟繼續打,原來班差人係「救」你去人打,打到你落地鐵站都唔停手,差人都只係同你講你一還手就係傷人,同記者訪問你對鏡頭講黑社會打人差佬唔做嘢時喝你唔准講嘢。

所以七八點已經好多人,學生再建物資站,當中好多人相信係第一次上街。有對老夫婦住示威區樓上,條街出事時屋企老人家報警,佢哋亦睇住現場情況,有個黑社會自己扮跌低,有醫生定醫護員過去話幫佢睇睇咩事,佢彈起咬人隻手再繼續瞓低,然後無線報「有人俾示威人士推跌暈低」,佢哋睇完電視報導立即出嚟。而在場男女比例係五十五十,就係一句「示威就預咗俾人非禮」,好多女性出嚟旺角聲援(有關非禮女示威者,請同時參閱《喜記老闆踩場,涉嫌非禮被警帶走》),如果今日班人可以打完人非禮完女學生之後大模斯樣離開,就代表即日起你身處香港已同大陸一樣失去任何人身安全保障,因為香港法律禁止行私刑,人身安全要靠紀律部份/警方保護,所以唔好成日話「一面鬧警察,又一面要警方照」,呢樣係法律規定,如果可以自己帶防護器具出街,我相信好多人唔介意好似去到咩國家都鍾意食生果個阿返噉,任何時候都有把刀傍身。但而家差人擺明唔會保護你,你亦冇權自行保護自己,相反黑社會打人唔會俾差佬拉,你還手反而會被拘捕,即係話從今以後香港地只要係黑社會就可以見人就打、見女就強姦非禮,而完全唔需要負法律責任,甚至有警察做佢哋私人保鑣。所以今晚旺角街頭特別多人。

當街頭開始多人包圍黑社會,立即有大量差佬出現,比學生俾人打時多幾倍,而呢好大班警察嚟到立即圍起防線,去保護班黑社會。冇錯你冇睇錯,黑社會打完人之後,居然得到警方保護,而唔係被警方拘捕,班差人仲要拎警棍出嚟威脅市民唔好行前,成個計劃根本就係黑社會打走示威者,然後差佬趕走到場聲援市民徹底清場,真真正正警氓合作。有人話搞事呢班唔係旺角陀地而係西北落嚟做嘢,因為旺角古惑仔師承牛佬講義氣,而鄉紳派係牛屎佬當正自己土皇帝乜都唔怕乜都敢做,所以打完人之後仲可以留喺條街度對住市民同記者叫囂成個鐘都唔走,因為佢哋知道差佬一定會保佢哋走。只不過因為人實在太多,而差佬擺明唔會做嘢,結果條街只有越來越多人,「拉人」之聲此起彼落。

聽到在場人士講,被圍困黑社會主要有兩群,一群喺匯豐銀行下面近轉角位,另一班喺彌敦道至朗豪坊中間路段,過程中差佬已經幫手放走咗幾個 - 冇錯你又冇睇錯,差佬到場居然唔係拉人,而係將黑社會同市民隔開,然後襯市民唔留意或阻止唔到時放佢哋走,而且為保班黑社會安全仲要不惜千方百計,好似匯豐銀行外彌敦道路段約八點人群突然起哄,因為班差佬居然圍起一個圈護送幾個黑社會離開,不過去到近安全島時俾市民迫返去匯豐下面,班黑社會走唔甩,但班差人繼續保住佢哋,等市民唔可以對佢哋郁手。我寫完都覺得好超現實。

八點之後匯豐銀行下面有人搞事,民眾嗌「警察拉人」甚至開埋條路俾佢哋入嚟,完全冇差佬理,結果要市民自己行使公民拘補令制服搞事份子,之後再擾攘多成個字終於有警察現身,不過差人似想只帶走佢就算,全部人梗係唔收貨大叫「落孖葉」,大佬打人係刑事喎,手扣都唔使用,唔係啩?又擾攘多好耐,可能差人見呢舖冇其他選擇,至戴手扣押走個犯,當然大家都知只係做場戲,全日好多人都目擊到差人帶犯出去之後轉個彎已經放人,只差在送上的士之後未幫個犯俾埋的士錢。大家唔妥係一來冇可能唔拉人,二來對學生你都用手扣時,拘捕犯毆打刑事罪嘅黑社會邊有可能唔使落孖葉?而家差人係直頭想連戲都唔做俾你班市民睇呀。

結果終於正式拉咗第一個人,而全晚我見到落孖葉拉嘅只有兩個。如果你問點解黑社會公然打人仲要打完唔走兇返市民記者咁大件事,居然可以差唔多冇拉過人?差佬甚至會幫手放犯走?說話頭先單嘢過程中,有個洋警官現身(請注意,當晚旺角洋警官有兩個,光頭個有幫市民擋黑社會係好人嚟,講緊係肥肥哋成日講笑撩女仔嗰個),經過我面前時聽到佢同隔籬個華人白衫講 - 好似係咋,唔係肯定呀 - "Don't arrest anybody, just remove them to safety." 雖然我對自己英文水平有一定信心,都唔敢講我冇聽錯,亦唔知佢句中arrest對象係示威者定打人嗰班。你可以按幾日間發生之事,自行思考。

然後現場話地鐵站C出口即朗豪坊H&M對出位置唔夠人,就過去支援,亞皆老街彌敦道路口至朗豪坊路口一早俾警方前後用封條分做禁區,我企封條前,隔籬個社工個仔晏晝留守彌敦道時俾人打到入醫院,好多人講返晏晝清場同差人護送打人黑社會離開時都眼濕濕。個禁區本身只係俾差人同記者駐守用,後來班黑社會實在無路可走,差人就將佢哋全部護送入禁區內保護,市民就前後路口加兩邊行人路包圍,不停問候各位警察同黑社會的親人。MK朋友向來充滿通俗智慧,呼籲既然藍絲帶係支持警方執法,警察就應該對打人者如曾偉雄所講「嚴正執法、無畏無懼」。此情此景,就同今時今日中國國歌實際上好比中國禁歌一樣咁諷刺。

因為已經無路可退,如是者僵持咗幾個鐘,不過期間警方並未有放棄放走班黑社會,扮普通市民光明正大放走試過,警師護送出去試過,就連交更差人列隊出去時,隊伍中間夾住幾個黑社會偷運出去都試過。有架警車自禁區離開,我相信入面已經運走一大班出去散水,而喺警方全力保護同突圍之下,有幾個黑社會成功被差佬護送落地鐵站,仲趕到切追尾班車返屋企,唔知差佬有冇幫佢哋買埋車飛呢。我諗全香港除咗班官之外,呢班黑社會就係得到最嚴密保護一班,同埋點解警察可以咁抵死居然唔係困住班犯之後拉人,而係無論如何都要放佢哋走?

去到兩點幾,相信差人都知長此落去唔係辦法,最後直頭光明正大帶最後幾個行出去,立即大班人包圍追住以防差佬又放人,但係就算捉到入差館,坐一陣轉個頭都係放佢哋走架啦,又唔係未試過。我真係未見過有警察可以有證據都唔拉人,仲要幫手窩藏罪犯八九個鐘加猛咁偷運出去放走都唔拉,仲要黑社會打學生市民想郁佢哋時幫班黑社會擋,相反現場市民同差佬有少少衝撞,即搭。同我到而家都唔明點解唔拉得人,喂黃之鋒冇做任何動作冇任何犯罪證據,都可以無端端俾差人拉去差館拘留四十八小時,仲冇搜查令都可以「因為相信將會犯罪」而爆入屋抬嘢走,反而而家班黑社會已經俾人拍晒片影晒相俾市民包圍埋走唔甩,有犯,真係唔拉?既然每次示威差人落場時,在場無論係咩人就算只係剛剛路過,都通通拉晒返差館先有殺錯冇放過,點解今次又唔可以拉住先?而且仲會調返轉警察保護黑社會再落力放人,除咗警氓合作,我真係諗唔到咩原因可以要警方勞師動眾,出動比市民被打時更多警力、更多裝備,再用咁多個鐘頭去保護同送走打市民班人。

黑社會走晒,跟住點收科呢?風聲傳來金雞嚟咗班防暴隊,晏晝學生俾黑社會打時都唔嚟,而家黑社會俾差佬放走晒只餘市民在場時,防暴隊就出動了。企我隔籬個哥仔立即開背囊派裝備俾各位,我收到一個口罩同一條毛巾,而家香港人已經進步到視胡椒噴霧同催淚彈只是一般威脅,出門口已經帶齊裝備應對,我唔知係可喜定可悲。好在可能見在場仲有大量記者,最後差人剪封條收隊,彌敦道就由俾黑社會同差佬合作拆到得返路中心個帳幕,回到眾人同心重新霸佔全個十字路口,並已經立即有人建立四方路障,差佬亦由中旅社走到朗豪坊上車,相信正式收隊返警署。

我親身經歷呢八個鐘之後,你唔好再同我講香港警察係伸張正義、除暴安良、儆惡懲奸,更加唔好同我講而家嘅差佬執法係不偏不倚、公正嚴平、絕無選擇性。我唔直接答你,我用例子答你:首先香港係行法治唔係人治,即無論被傷害對象係咩人有冇犯罪,只要你有傷害佢,你就犯咗罪可以被檢控。假如我前面有個差佬,我喺佢面前一拳打落企我隔籬條友度,或者去非禮一個女仔,你估幾多秒鐘之內,我會俾個差佬推落地落孖葉?跟住又需要幾多時間先至會俾人拉上警車押去差館落charge錄口供?全個過程應該唔使半個鐘。但係我唔相信我打完人或者非禮完一個人之後,可以草都唔使著留喺現場耀武揚威,跟住警方會派成隊差人同我講「放心我哋唔會俾你有事」保護我幾個鐘,仲要用盡任何方法都要唔拉我而放我走囉。

今場,果然是一場好戲呀。雖然班差佬演技就好屎。應該話,佢哋而家已經連戲都唔做喇。

2014年10月2日 星期四

路障必不可失,嚴防左膠引警入陣




請謹記,路障係最重要,只要冇路障,警車就可以直接衝入陣地趕人拉人。琴日一葉雙輝陳淑莊突然出現四處叫人拆路障,跟住今日周融同愛字頭話晏晝會開始有行動,香港島亦特別多咗好多警察旁邊駐守,跟住會發生咩事,可想而知。所以路障點都唔可以拆、點都要撐住。最好各地點有人自發去路障處睇住,以防俾人e.g. 不明來歷糾察隊襯人唔覺拆走引兵入關。