呢兩個禮拜，今晚係第一晚可以早少少返到屋企，之餘返到唔係爬住飯開工，而可以抖一抖食返餐安樂茶飯先，雖然食完抖陣陣間都要做嘢，叫冇咁忙囉。今日至認真睇新聞，已經錯過咗David Letterman大結局，曾幾何時佢個Late Show係我每晚都追晒十一點幾首播加凌晨兩三點重播至瞓，連會考時都風雨不改堅持睇埋深夜重播至瞓，係我星期一至五晚睇國際台嘅理由。只可惜帶佢到香港嘅亞視收皮時David Letterman都退休，以前成日話呢世人一定要飛一次去紐約睇佢live，而家人生又多一個遺憾了。
意料之內，最後一晚都係Foo Fighters，冇諗過會好似Craig Ferguson退休個星期晚晚都係Metallica。太耐冇追加實在太忙，所以唔再多講，等最後一集出網上版好過，而且以前都講過好多David Letterman了，想講，重溫舊文已夠乜晒啦。再見了，我的英文加音樂阿sir。
