熱門文章

2014年11月28日 星期五

有去過現場甚至有常識都知,想喺大遊行集會搶差佬槍都是on9的,因為差佬根本冇槍

去過大機會出事嘅集會都知,企前排嗰班軍裝一定唔會有槍跟身,就係因為驚混亂時俾人搶,真係要帶槍嘅都唔會推佢上最前。而且而家情況係,就算曾偉雄都唔夠薑俾企前線班差佬帶槍啦,得警棍已經咁癲,俾埋槍佢哋你估佢哋唔敢開?噴水出棍已令大家出旺角鳩嗚得咁開心,只要開第一槍,到時全港十八區一區一個佔領區都唔奇。

利申:十月三日旺角企最前,同差佬只一條膠帶之隔,見唔到任何一個最前線同第二線差人有帶槍通通吉槍袋

2014年11月24日 星期一

Clockenflap 2014個時間表,真係好難睇&好難睇




果然出事。今年Clockenflap未開始賣飛個lineup已經係非睇不可,跟住越嚟越勁每次公佈新band都係十隊有九隊冇得唔睇,已經感到有暗湧,到見到正式時間表,見咁大鑊,其實唔意外。

我承認係多勁band係好事,但大band就一定要出夜架啦唔同叫Mogwai玩晏晝兩三點咩,結果成班一線band爭崩頭,蝕底反而係觀眾,好似第一日禮拜五,由七點開始一直踩到尾嗰五隊就係我今次嚟Clockenflap好好好想睇嘅五隊,你排晒全部一齊出,唔通叫我每隊睇半個鐘就走去另一個台咩。

亦因為第一晚已經出晒全個fest最頂級嗰班,老實禮拜六暫時冇乜特別想睇,而星期日要睇Flaming Lips就即係冇得睇張懸。可能樂隊檔期真係好難就,被迫禮拜五返工日子反而係全個fest最精彩一日,但始終覺得搞手有太貪心,今屆個班底唔好話搞三日,係搞三個fest都得呀,而家夾硬質晒落一個週末只是浪費,反而令入場嘅人覺得唔係抵睇,而係蝕底。

另外我想話作為香港全年最大型音樂活動,點解個網可以咁難睇?點解唔可以好似其他fest噉用圖畫每個台幾點至幾點邊個表演,而要全部名質晒落一行字就算,仲要時間亂到嘔都唔知應該點計畫好?可能因為呢種華而不實的設計,個節目的最大老細各位文青們鍾意啩。






百屌成材,今朝先鬧完Clockenflap個網個時間表食晒屎,晏晝已經立即執到似返樣。雖然依然好樣衰,不論是個時間表還是成個網。

2014年11月23日 星期日

每週一相片大行動 2014 Week 48:Rest in pieces,我這十幾年的回憶




天下間有咩慘得過死harddisc,仲要係一隻放咗十幾年資料嘅harddisc?隻HDD用得四年唔舊,之前已經有點慢開機都可以開成個字,不過見仲用得就由佢,主要原因係我老母都用我部電腦,但佢係完全冇防毒意識總之逢link就click逢email attachment就開逢software就download,部機一早毒過我,我相信整完好快又會俾佢玩死就懶搞。唔知係咪真係我老母呢,前個禮拜有晚沖完涼出嚟部機就自己瓜咗冇反應,成個星期猛咁試都load唔到,拎返公司俾專門醫奇難雜症個同事睇,佢都話冇得救。當堂灰晒。

其實呢隻本身已經係backup harddisc嚟,只不過被backup嗰幾隻年代久遠已經唔知飛咗去邊,好在之前成個lau-sir.com搬咗去Dropbox,但其他file同相一直見未有大harddisc冇特別去backup,點知拖吓拖吓隻harddisc都死鬼埋,噉就慘我大學四年啲功課呀!想當年year 1通識教香港文化研究,臨present之前個禮拜六日至完全冇reference憑空作咗成份機舖研究論文,然後乜書都冇睇單靠白撞去訪問兩個老師傅又整咗篇紙紮專題出嚟,呢啲史料好寶貴架,仲有幾個而家仲有人問我借嚟當教具嘅PowerPoint呢。更慘係咁多年嚟去旅行同睇show影落啲相冇晒,有好多相之前影落都未睇,而家乜叉都唔使睇了,口烏口烏。

想救又唔係真係冇計,俾錢囉,早排個客先至死server,拎咗佢隻HDD去深水土步做recovery,用咗半個禮拜加四千蚊救返晒全隻harddisc嘅資料。錢唔緊要,問題係我一直信唔過呢啲整hardware公司,成隻harddisc俾咗佢咪咩閃卡都揚晒?

唔知係咪細個睇得《海虎》多大個咗無師自通磁場轉動,我發覺電子嘢一近我永遠多問題。由小學部486開始,屋企部部電腦都係毫無先兆地無端端打柴,上網用i-cable同新世界兩間都係成日斷線,我間睡房又特別邪門Wifi訊號成日入唔到去,係邪到加咗隻話係穿牆王的router擺正門口外面,入到房都可以得一兩格Wifi。就連公司我用緊部機,12GB ram行Win7 64-bit,都可以俾我用到成日窒,最勁試過開機去到桌面乜都未做已經沒有回應。真係逢電腦嘢埋得我身都唔老黎。

然後,走咗去做IT。

2014年11月19日 星期三

每週一相片大行動 2014 Week 47:成日都話,得文青者得天下




今朝要八點鐘上到APM個客度幫佢哋裝系統(講到好勁,其實係我同事裝嗟,我只負責過嚟坐扮到好多人嚟幫佢哋做嘢),早咗到揾嘢食,唔想又KFC,見電梯大堂隔籬就係Super Sandwiches就試試啦。就中伏了。

成世人第一次食SS,亦應該係最後一次食,餐牌影到份早餐好鬼歐陸好鬼靚,點知實物上檯嘩屌賣相茶記出品噉款完全唔對路,真係KFC份早餐睇落都仲高檔過佢。唔好睇都算問題係食亦唔特別好食,炒蛋是OK的但成份夾埋仍然好茶記,結果成個早餐最歐陸係隻碟,而如果唔係用呢隻碟而用返茶記KFC啲膠碟膠盒膠杯紙杯上,我唔講你都唔會食得出係「高檔」貨嚟。「高檔」我係指份量少過人但又賣貴人十幾蚊。

冇錯,Super Sandwiches可以賣得貴過茶記/雞記十幾蚊嘅原因,就係貴在隻碟。難怪文青生意做之不盡,只要稍為包裝一下,茶記都可以話自己係份子料理,仲要有人信有人肯俾錢至抵死。

2014年11月18日 星期二

Android 5.0 a.k.a. Android L(ollipop) 感想 Part I & II:大伏,唔急的話等5.1先好上

Part I


奉勸各位Android朋友千祈唔好升上第一水Android 5.0 a.k.a. Android L(ollipop),超級大伏,超級失望。理論上集各家custom rom受歡迎功能於大成之5.0係史上最強大一代,睇官方用部Nexus 6示範睇到流晒口水,今朝我仲因為要七點出門口去個客度冇得第一時間升級覺得好失望,點知返到公司立即連Wifi download個500MB image裝完至真正失望。


裝完第一次開機,部機超lag超慢,相信同夾硬將行DAVLIK轉做行ART有關。跟住行順咗叫好啲,但新UI本身反應已經慢咗,仲要每次篤一樣嘢都要出晒動畫先正式run,即係做乜都要等四份一秒。Android本身已經出名在做乜都有延遲,而家更大鑊。


第一日開始已經唔鍾意Material Design,個新UI超級樣衰,最仆街係4.X最多人讚嘅最頂最底兩條bar透明色,而家唔知點解轉返灰色,立即灰晒,之前砌到靚一靚個desktop又要重新執過。更大鑊notification由黑底白字變成白底黑字,大半第三方app啲通知全部睇唔到字收晒皮。


重點嘅Ambient Display比Moto X個Active Display更強,點知原來得N6個rom至有,仲要諷刺地其中一個最大賣點篤篤開芒N6居然用唔到。而N5直頭冇得用Ambient Display添,說好的收到通知自動著芒提你、一拎起電話會自動開芒呢?都有留返lockscreen show通知一樣俾你,不過冇得揀只show你想睇到嘅app,私隱mode又會得個標題睇唔到你本身想睇嘅通知內容,噉有Q用?同就算你唔用開芒show通知,系統都一定要你先過咗通知提醒一版至可以解鎖,即係而家每次開芒點都要你最少掃兩次先可以開始用部機。非常非常之麻煩。


其實本身諗住部N5升上5.0再拎去換電,應該夠我用多好長時間,但5.0俾我嘅第一個印象實在太差,差到好想打去聯想問香港幾時有Nexus 6行貨。真係千祈千祈唔好升5.0。




Part II


部Nexus 5升咗上Android L用咗一日,感想比初升級時好少少。I will now recap in Cantonese。


初升完級部機窒到PK,boot多次順咗,但係仍然成日篤完個芒部機delay起碼半秒至做嘢,確係幾惡頂。


Material Design種後現代風格,即係用一大劈單一顏色去代表一樣嘢加平面過iOS,但用耐咗開始鍾意,乜都圓碌碌一撻色種公仔未完全接受到,但L啲動畫效果係設計得幾好,夾埋個UX幾靚幾順,同通知欄轉白色底色係好睇好多。我相信用多一段日子會完全擁抱Android UI 5.0。


傳說中的Ambient Display Nexus 5冇份,而lockscreen冇得好似Kitkat時加Widget連Dashclock都唔見埋,又硬性規定一定要先經過一頁通知頁先可以解鎖,即使你set咗完全唔顯示任何notification,都要先掃走嗰頁至有得解鎖入桌面。呢樣暫時我幾like,不過要繼續用Dynamicnotifications扮有新通知時自動開芒提你的Ambient Display先,但我相信我永遠都唔會習慣一定要掃最少兩次芒先正式unlock到部機。


基本功能改變都幾大,如果你好似我玩Tasker玩自動化,都幾大鑊,雖然大部份舊設定都用到,但有幾個重要plug in已經失靈,要等開發組快手升級。


繼GPS同飛機mode唔俾第三方開關後,而家連上網data都只可以經stock rom開關,你會話冇乜所謂,但我一向set咗部電話熄芒時熄埋data慳電架。


起初奇怪點解冇咗靜音mode,原來而家變咗個名好古怪的「干擾mode」,可以獨立set鈴聲通知聲邊種會靜晒邊種會咩mode都出聲「干擾」你,換言之Android L真正升級反而係呢個功能,不過我冇乜用處,因為冇人會打電話俾毒撚,公司的事有公司電話搞掂。


外國評測話5.0好多bug,其實中一個係連Wifi用勁多電,感覺上公司連Wifi時真係食電過以前,但出街3G又唔覺分別好大,亦即係,屌,一樣係開芒的話一分鐘冇1%咁滯。L有個新慳電mode,會整暗芒熄動畫行少啲app之類令部機可以捱耐啲,未試到,不過相信好快有機會。話會慳電過以前(邊一代唔係噉講)但結果依然食電過舊時,可能因為而家一刀切全個environment轉行ART,但市面90% app都係寫俾DAVLIK,搞到撞rom做唔到效能最佳化。而最灰係,老實,我真係唔覺得轉行ART之後,點樣「比DAVLIK慳電同時快400%」囉。


5.0版我真係唔建議大家立即升,等多一排Google出5.1再睇包膠至決定啦。

2014年11月16日 星期日

的確好多唔明,唔係 sci 嗰邊,係 fi 嗰邊:《Interstellar 星際啟示錄》

作為一個細個勁刨衛斯理大個狂煲美漫嘅sci-fi迷,睇完《Interstellar》對入面所講嘅冇乜邊樣唔明,都幾自豪。噉唔明嗰幾樣係咩呢?

(拿,有劇透架!)


首先梗係唔明點解一套噉嘅戲都要塞個奸角入去啦,個角色有點為出而出相當無謂,搵到神秘嘉賓做唔代表大晒。

點解最後半個鐘戲路可以同前面差咁遠?其實原因幾明顯,因為劇本擺明收唔到科唯有夾硬嚟,想做《2001太空漫遊》又做唔到,立即搞到套戲格調cliche晒。正因咁cliche,相信我唔係唯一一個人睇咗半套唔夠,已經估到晒最後會點發展。

又當中最唔明梗係個老豆點樣將人類歷史上最重要嘅資料傳俾個女?個女唔係由一開始就睇老豆講乜,咁Q大抽data冇可能一陣記晒可能要望住幾日,而且眨個眼已經記少個字啦,邊可能做得到?

宣傳重點之一是準確科學,入面堆星球卻相當古怪。雖然我理科肥晒佬咁滯,對黑洞都有點概念,以我皮毛知識,一個星球冇乜可能咁穩定地停留喺個黑洞側邊,而且戲入面自己都講到黑洞係乜都吸晒入去光都走唔甩啦,個星球仲要得自己一個冇太陽,點解降落到去成個星球咁光?另一個啲雲結咗冰,但點解成個北極咁大嘅雲會浮喺天空,而唔係俾地心吸力扯落地?我明白型是很緊要,但重力呢回事,唔係一直都係套戲嘅科學重心咩?

當然臨尾解謎部份又係唔明白。睇到最後你會發現原來人類無論進化到咩地步,內裡都永遠係條仆街,未來明明先進到接近神,隨便出手已經可以救返全個地球亦即自己老豆老母阿爺阿婆,點解硬係要陰啲陰啲噉救,好似放個蟲洞出嚟要地球人自己用幾十年時間整架太空船出嚟再用幾年時間飛過去,如果整唔到咪仆街?同點解唔可以放近啲要放到土星咁遠?過到去另一邊最後搵唔到個星球住人類咪冚家剷?話因為唔可以改變過去,而只能夠創造未來喎,但佢哋整一個悖論出嚟令重要資料傳返去之前,咪係改變緊歷史囉?同冇改變到過去,又點會有未來的佢哋,咪即係自相矛盾?而且話晒主角都係地球救世主吖,你班未來撚用完即棄你搞掂啦嘛就掟佢返出太空自生自滅,咁仆街都有嘅,唔係主角打救世人,邊度會有你班未來撚?

話時話,除咗音樂電影,我好少會關心套戲配樂同音響製作,但《Interstellar》一定要講講,啲mixing超唔掂,90%時間啲配樂大聲到遮晒對白,好鬼煩,都唔知整音響班人做乜春。

當然仲有其他Christopher Nolan電影典型通病,例如對白好平庸,同角色發展好弱(演得最有戲味反而係隻機械人,你話係咪唔吹脹),但《Interstellar》仍是一套好戲,入場前諗住有機會瞓著,點知會係連身邊班港女都睇到好肉緊,同菲林拍感覺果然與別不同別有味道。《Gravity》早一年上,真符碌。

而睇完《Interstellar》,又要重溫一吓我最愛美漫作家Warren Ellis名作《Planetary》,一部必入我最愛漫畫頭三名之經典。個故事其實有點似《Interstellar》,都係由篡改阿波羅登月歷史開始,不過《Planetary》係登月太空船穿過蟲洞去到另一個時空,同平行宇宙星球合作成為邪惡版Fantastic Four返到地球密謀統治世界,似《X-Files》,更似《Fringe》,似乜都冇所謂,總之超好睇。

2014年11月14日 星期五

會是可一不可再的香港站吧:Gacharic Spin 5th Anniversary Gachallenge 「Winner向前走」中國巡演香港站




(TL;DR的話,直接飛到尾啦,有正嘢睇架,口桀口桀)

命呢家嘢冇計,雖然九展隔籬返工聽落好爽,但每逢撞正九展或者Hidden Agenda或者樂人地帶有show嘅返工日子,十次有八次唔係晏晝先有客急call出去另一個場做嘢就係要OT。早排幻日 X Evocation撞著個客死server,場show完咗我都未收得工;大前晚就係見魏如萱又去九展開演唱會,諗住放工過去walk-in,點知頭先講兩樣嘢打孖上,返到屋企仲要開電話會議開完又差唔多十工點,只有話好在之前冇買定飛。錯過咗好睇的兩場,就只好講返好耐之前呢場,其實想寫好耐,不過太忙加太懶。(between,見字呢晚本身係花倫演唱會,點知就係今晚有得九龍灣早收工,HA先話花倫嚟唔到香港開唔到show,真係R.I.P.,我話我)

應該係成世人第一次一年內睇一隊外國band睇足三次,五月連睇大阪同名古屋兩場(雖然兩晚都唔係為睇佢哋),十月居然會嚟香港,半年內就睇咗三次Gacharic Spin。為佢哋仲破埋戒,作為一個九龍城人真係唔太鍾意過西灣河蒲吧,雖然屋企樓下就有巴士直到,但一程要搭成個鐘,而呢晚係史上第一次會平日日子仲要星期三收工過蒲吧睇show,大佬睇完返到屋企都差唔多十二點,第二朝又要早走身返工,好支力架。不過是值的,雖然今次Gacharic Spin香港站,冇想像中咁精彩。

又要講返五月頭。過日本其實係想睇WW Face呢個女band metal fest,主要為我覺得好Q正的Light Bringer(年中睇完,年尾隊band就話出多隻碟就收皮了,近得劉Sir果然好易R.I.P.),同場仲有Gacharic Spin,同埋GS隊band搵埋LB個超勁歌妹搞的side project DOLL$BOXX,因為呢個line up可一不可再而會兩日內去晒大阪同名古屋。一直冇寫返兩場show又因為懶,簡評的話,Light Bringer最正經同一早預期係點,隊band好叉勁音樂十分Angra,滿足,但冇驚喜;不論製作本錢只論表演同音樂,DOLL$BOXX絕對勝過Babymetal同我見過之任何日本女子metal band,強在自己玩樂器而全隊技術高超,全隊演得落力又有舞台表演,同時自己寫歌而風格完全冇人似佢哋,可惜只當side project,所以好難出live同出新碟(而家LB散咗會機會大啲啩);最後一隊Gacharic Spin,三隊當中佢哋最紅好多碟更超多表演,不過啲歌我真係聽極都唔鍾意,似輕量版DOLL$BOXX而且輕得都幾多輕到有點平淡,不過表演好睇因為有兩個囡囡專責跳舞,而且兩晚表演可以有一半歌唔同,真係抵落本加咁辛苦走嚟走去睇晒兩場。

佢哋唔係第一次中國tour,不過係第一次tour中國而會出香港,如果唔係之前睇過知道佢哋live係點我未必會睇,因為音樂始終唔太受但表演真不錯,另一個原因係WW Face時其中一個dancer腳傷得返一個跳,今次捧場想見識兩條女一齊跳係點。其實今場幾似名古屋,當晚個場都同今晚蒲吧半場差唔多size,不過用更大面積做舞台同有百幾枝燈好鬼pro,同當然台下人數完全冇得比啦,你諗吓蒲吧開半場而個台霸咗一半位然後再企滿人會係點?setlist都差唔多,但會話齊兩個dancer反而冇想像中咁精彩,可能WW Face另外兩隊都係恆band自然玩多嘈歌,自己solo就轉返「大路」,所以多咗pop rock歌同慢歌,抱住睇metal gig心態感受始終差啲。同埋好過癮,中國tour依然係用新碟《Winner》做主題,點知居然冇玩到首主題曲。

睇就依然好好睇嘅,大部份道具gimmick嘢都有出,係估唔到之前腳傷個dancer,即係左手邊個樣十足純情學生妹應該入偶像組合唱吓歌仔就算完全唔夾隊band嗰個,原來跳舞仲勁過另外一個,有首歌揹座keyboard俾琴妹同結他妹鬥solo,名古屋嗰場係座keyboard冇聲跟住琴晚爆肚9up solo。雖然台下就真係幾淒涼,我諗都有六十人嘅,不過有幾個日本佬fans(真係佬)帶齊道具又熟晒邊啲位做乜動作,Gachiac Spin音樂唔算頂級,但現場好睇就係呢種娛樂性,同台下少人都好,隊band都唔會hea過日本主場表演時,不過論表演、論音樂、論台上台下整體,其實更想睇根本係同一隊band嘅DOLL$BOXX。Gacharic Spin音樂大路嚟講係得、樂隊技術係夠、表演亦絕對勁,但某程度上得到更大成功,在於囡的身份,我用例子答你:

如果係劉Sir彈一段Joe Satriani你聽,你會話「屌!彈呢啲。」但如果係個糖妹噉嘅靚妹彈段Joe Satriani你聽,你就會話「屌!!!彈呢啲!?!?!?!?」佢哋技術唔係其他(全女)band做唔到,King Records同Bright Star Records近幾年已經帶出大量技術派全女metal band,但係睇住bass妹狂slap、結他妹狂tap、鼓妹狂double bass,加十分melodic的metal底,即使聽碟麻麻live見到總有點震撼,尤其現場送多兩條女跳舞你睇呢。而DOLL$BOXX就係Gacharic Spin原班人馬唔要兩條dancer唔要全部pop rock歌慢歌,然後將佢哋隻J-dance-pop metal玩到thrash咁滯,再搵埋Light Bringer個超長氣超高音歌妹唱爆咪,然後加返少少動作舞步,雖然只出得一隻碟,但一隻碟加睇一次已經足夠成為我最愛嘅日本女子band。只不過metal的代價就係forever underground,所以DOLL$BOXX明明音樂最好,偏偏只出得一隻碟,而GS越嚟越pop,因為要搵食;要metal就Light Bringer,但玩埋今年都摺了。近幾年好似佢哋正正經經玩metal仲要玩得好嗰班女聲metal band其實唔少,只可惜Babymetal贏的是資本,有點似四大天王時代的反唱作歌手反實力派的香港樂壇,你寫歌好、技術勁,又點?我有大公司包裝同宣傳,吹咩?雖然我都係Babymetal fans,不過,老實,有得揀,我寧願睇DOLL$BOXX都唔睇Babymetal囉。唯有希望WW Face反應咁好(如果唔係去山海屯,我八月頭會飛咗去睇東京場加場),Light Bringer又唔玩,兩邊會有心夾埋出多隻碟啦再tour啦。

最後一樣想講,係就算今場show到頭來唔好睇(好在唔係),你都冇乜好怨,因為一隊咁勁嘅日本band嚟香港表演個半鐘,仲要開蒲吧有勁燈光大舞台,仲要到場至知原來有Ever做opening,先至收$120 - 冇錯係百二蚊你冇睇錯,一個睇本地band都可能唔得嘅價錢,我都唔知係咪收錯我錢。唔知係搞手經驗唔夠定點,唔係第一次tour中國不過係第一次搞香港站,或者以為香港物價指數加觀眾人數都會及得上大陸,結果就用大陸飛價錢喺香港開,但在香港知名度唔夠,加上差唔多開show一個禮拜之前至公佈仲完全冇宣傳,其實今晚有五六十人,已經比我想像中多,論演出性質同規模HA會更夾,但蒲吧個台先配合佢哋活動大嘅舞台表演。或者搞手唔知中國同香港之分別,或者對呢個「國際都會」太有信心了,所以Gacharic Spin嚟香港相信可一不可再,聽過好多搞手講,好多band搞中國tour都唔會有香港站,因為就算大陸非常叫好叫座,好多時大陸賺埋條數都唔夠香港開一場蝕埋條數,大佬一隊出show觀眾以百計嘅band嚟到至得十份一人捧場,計晒飛錢商品錢都未夠填場租啦,仲未計食宿交通機票呢?而且之前一晚可以對住幾百人表演,點知今晚得幾十,搞手同樂隊見到都未必有癮啦。

好好彩抽到167號飛,而呢張167會成為我永久珍藏,因為我擔心佢哋唔會再嚟香港,可能真係等DOLL$BOXX有新碟出時,再飛過日本睇WW Face Round 2啦。

(between.1.0:想知DOLL$BOXX有幾正,睇睇呢個《Take My Chance》MV就明,最過癮係日本睇佢哋出live,台下真係同個MV一樣成班毒佬架,冇錯係佬勁多阿叔仲多過後生毒撚)



http://youtu.be/mu2z4Uf9Tgc


(between.2.0:又驚你錯過,其實個bass妹係水著女嚟架,口桀口桀)



http://youtu.be/6LXM-xxyLf8

2014年11月8日 星期六

每週一相片大行動 2014 Week 45:強烈支持愛字頭加藍絲帶罷買阿信屋


自從阿信屋開始辦埋雜貨,我冚家都去少咗超級市場,大佬三十幾蚊買到五斤米,平超市成半喎,你仲幫李日日賺?不過最正都係阿信屋成日入新貨,單想試晒佢賣啲麵其實已經好難。繼之前三個幾一包好好食仲煮到大大煲夠食幾餐嘅意粉,今期流行係呢隻韓國芝士味辣麵,$16一袋有四包,唔算貴不過亦唔算抵因為一包得百幾g(我一餐食兩包200g辛辣麵架),唯有噉諗:我出大角咀食芝士辛辣麵,雖然話俾成塊芝士你,但整完碗麵掟塊芝士上去噉就收我$2X,而家三份一價錢食到辣芝士公仔麵,OK啦。


同埋好食嘛。第一次買返屋企,老母話「整兩包今晚食啦!另外兩包聽日你拎返公司帶飯食。」跟住一人一包,食完之後向來唔多鍾意食麵特別即食麵的老母話「不如而家整埋另外兩包食埋佢囉!」結果嗰晚晚餐非常豐富,同俾我老母搞到第二日冇得帶飯返公司。自此每次經過阿信屋見到有貨都會掃返一兩袋返屋企,雖然賣呢隻麵最平其實係全家,即係之前搵到$4一罐Pokka咖啡間散貨場,正價已經$15仲平過759會員價半蚊,但係全家可能上位上得唔夠快俾阿信屋搶咗頭啖湯,而家除咗一早喺商場落腳啲主力舖,已經好難搵到了,屋企附近兩間都執咗好耐。係好灰架,而家唔搭車出去買,都唔知仲有邊度搵得到四蚊罐Pokka咖啡。(雖然最近去睇,好似已經加到五蚊罐了)


所以當早排各位愛字頭藍絲帶話罷買阿信屋,我不知幾開心,因為阿信屋真係唔愁唔夠客,就連完全唔睇好間九展分店,去過幾次lunch時間可以長期有近百人排隊條龍長到由舖頭排到舖尾,所以你班愛乜鳩咪Q去阿信屋搶埋一份搞到我食唔到芝士麵呀。

2014年11月5日 星期三

根本好多所謂儲蓄保退休保都係搵你笨柒


25年前100元買養老險 如今每月只領1.8元


http://www.hkcd.com/content/2014-10/30/content_883264.html


其實我老母都有差唔多遭遇。話說廿年前都有可能更耐,銀行sell份儲蓄保險,供滿之後大約退休開始每個月會派返$500。當年兩三蚊搭程車、十幾蚊有個碟頭飯,慳住使五舊水真係夠你用半個月,覺得好抵,所以買,點知事隔十幾廿年後的今日睇返,大佬而家茶記食個碟頭飯都要四條喇,五舊水一個月養老?結果份退休保單變到有點得啖笑。

從中亦可以睇到,而家香港生活壓力幾大,同以前相比差幾遠。等班老嘢仲成日鬧後生捱唔到苦,當年阿叔點樣捱法乜乜乜。

2014年11月4日 星期二

這就是班官口中「正常」嘅香港

今日Megabox真係黐撚線。行到街口已經有條女逗我,以為去錯咗砵蘭,原來係問「睇唔睇示範單位?」行近棟嘢已經成街經紀,一入正門直頭幾十個agent企滿晒個大堂仲多過嚟行商場嘅人,上面每個電梯同扶手電梯口都企咗最少一個agent,一見人出電梯就問睇唔睇樓,跟住每層都有好多人行嚟行去,以為係遊客,點知一行近又俾人撩睇樓,結果由樓下街口開始每一層最少俾經紀逗過一次,上到戲院嗰層,撞返樓下街口個師奶又俾佢撩多次。而最抵死係,俾班agent煩到我過咗售票處閂門時間,先醒起其實我今次嚟Megabox唔係想買樓,而係想買盧巧音演唱會飛。

這就是班官口中「正常」嘅香港。令我好懷念十月頭所謂「受佔中影響令人流同生意大跌」而全棟樓仲少人過《生化壽屍》間商場嘅Megabox。

2014年11月1日 星期六

每週一相片大行動 2014 Week 44:你討厭政治、反對佔領、譴責擾民、打壓抗爭,離地冷感又問在現在的香港可以做甚麼?


你討厭政治、反對佔領、譴責擾民、打壓抗爭,
離地冷感又問在現在的香港可以做甚麼?




就在制度中戰鬥,自己香港自己救。


今日唔爭取,第日唔好怨點解成班掌心雷阿婆選咗個民建聯出嚟。