熱門文章

2014年4月30日 星期三

《我和殭屍有個約會2》,你叫十幾年後億元打造的《西遊記》情何以堪呢

我老母部iPad壞得真係唔合時。自從佢學識咗上網煲劇,屋企部電視立即靜咗好多,我有我睇《我和殭屍有個約會》,佢有佢煲《兩個爸爸》,已經第四次翻睇喇黐撚線架,雖然我都認同呢套其中一套最好睇嘅台劇,俾我都會翻睇,入面啲囡真係好正而且唔太婆媽加幾好笑,連帶而家J2七點半嗰套老母開電視都會望望,因為有周曉涵。今日因為部iPad壞咗,搞到做完愛回家仲唔肯熄電視,就大鑊了,睇咗半集《西遊記》,嘩屌你老母呢個年代居然仲可以有劇集拍到出嚟冇任何一方面唔係垃圾,啲代妝啲CG仲衰過無記十幾年前拍嗰套,劇本同演更唔掂,老實我寧願無記買套《抗日奇俠》返嚟播好過,《西遊記》無論點都只係戇鳩,《抗日奇俠》起碼戇鳩到cult so bad it's good會有興趣睇先。

《西遊記》做完拿拿臨轉過歲月留聲台,今集《我和殭屍有個約會2》剛好做到況國華俾卡士蘭咬變咗殭屍嗰集,十四年前睇已經覺得好撚灰,今時今日仲可以令人心酸,而且十幾年前拍CG都唔差得過所謂「億元打造」嘅《西遊記》幾多,你叫無線八點半劇情何以堪呢。

2014年4月28日 星期一

從《屍2》睇返《屍1》的大結局多麼on9,同劉錫賢多麼pk

《我和殭屍有個約會2》玩平行時空,同一個班底但角色同性格全部唔同晒,其中一絕係上集嘅大日如來劉錫賢因為逆天而行要衰足九十九世,今個時空變咗衰運鬼。梗係啦,睇返第一集,無論正派贏定邪派贏,根本人人都冇得贏:

A. 尹天佑打山本一夫>如來齋食花生唔幫拖>山本一夫贏咗世界末日>地球冚家剷

B. 山本一夫贏>如來出大日如來淨世咒阻止世界末日>點知原來淨完世會令個世界乾淨到乜Q都冇晒>即係如來自己整一個世界末日去制止山本一夫嘅世界末日>地球冚家剷

C. 況天佑靠自己打贏山本一夫>之前唔幫拖嘅如來立即蒲頭執返個尾彩>「見你係況天佑咋,俾一個願望你啦,其他人我俾兩個願望架」>「我想六十年前冇俾將臣咬」>如來改變歷史令況天佑唔使做殭屍做返個人>但係改變完歷史就會將本身條timeline cancel咗>換言之係另一種型式嘅世界末日>地球冚家剷

即係按照如來嘅邏輯,第一集入面嘅地球無論點都係收皮,所以今集搞到咁霉,除左講恭喜之外都唔知應該講乜野好。

(between,成日覺得第一集劉錫賢演如來真係舒服到喊,集集都係坐喺度講幾句搞掂,仲要得最後一集先要郁幾郁對手之前集集都係擺同一個pose就得,下面班凡人走嚟走去打生打死,佢就坐定定郁都廢事等世界末日睇你班人類點樣收皮,仆街到呢)

2014年4月24日 星期四

Blackgaze無Black,一切俱往矣:Alcest - Shelter Tour - Live in Hong Kong




雖然班底一樣,但今次Alcest再臨香港,音樂已經變了樣。我認我膚淺鍾意Alcest就係因為black metal + shoegaze獨一無二,兩年半前全盛期時嚟香港實在好睇到癲,係當年甚至近年最佳metal gig之一 — between,每次講起2011嗰場Alcest,就一定要提返呢個都市傳說:咦,當晚你冇搵Opeth歌佬影相咩?

今年再嚟內心著實掙扎咗好耐,見到hi-hat上面個鈴鼓已經知道今晚唔會點樣metal,結果一如所料地舊歌唔算多主要玩新歌,雖然睇佢哋幾隻碟發展都知道最終一定係棄black保gaze,但Alcest引人入勝之處正是二者合一之獨特氣質,或者歌佬實際上最想玩都係純shoegaze,但老實新碟音樂性真係唔夠強寫歌未算好好,而當變返純shoegaze/new wave要睇要聽實在有太多其他更好選擇,七月已經有Slowdive,正式轉型又未算成熟,所以今場未能盡興,佢哋新歌曲編技術都太保守喇。應該唔係得我一個噉諗,睇全場反應好都係集中玩舊歌時,就知大家期待嘅Alcest應該係點,只係結尾由上次激爆blastbeat變成玩住feedback一個個走,音樂同表演都抱娛己多於娛人心態,相信幾難再睇得到舊日的Alcest。如果器材好一點應該能夠救返,不得不說舊場更適合Alcest,特別燈光,高梁個藍光同Alcest完全是絕配。

上一次香港站其實好想寫,而家第二次嚟都未寫冇計啦太懶喇,咁想寫主因係好鍾意個鼓佬,打法好特別唔係跟足CD版有自己玩法,上一場部份位打法完全唔同帶得出一份Type O Negative嘅感覺,效果非常神奇因為唔會預料得到聽CD亦一定唔會聽得到,同時氣氛唔同得嚟又配合樂隊本身主題,令Alcest現場比CD更精彩更感人。樂隊似乎低估咗post類gaze類音樂對鼓之要求,當結他同編曲都追求簡約時,要帶動起伏同情緒變化好多時要依賴鼓手,今場佢打得仍然好勁,但唔見晒上場嗰份巧妙無助提昇歌曲本身多少,音樂簡約技術亦簡單,從頭到尾都係同一格局同一氣氛,自然唔夠力帶動全場。所以今次Alcest再到香港表演,對唔住,我係帶住失望嘅心情返屋企。

「劉Sir,我發覺你成日寫gig,出埋啲相都唔知做乜鳩。」

「是咁的,睇完搭巴士返歸時,收到老細message話九龍城碼頭部提款機死咗機,叫我去收收風。點解要收風呢?老細話見而家Microsoft唔再支援XP近排又heartbleed乜乜乜,諗住研究第時接櫃員機XP support嚟做,就開始做資料搜集去投標,噉我屋企喺九龍城碼頭嗰邊嘛我又喺街嘛落車個站行去都唔係好遠嘛,結果睇完show十一點幾都有工開囉。」

每週一相片大行動 2014 Week 17:黑椒漢堡的遠去,迎來了更久違的粟米批




今年嘅黑椒漢堡食得我好鬼開心,而呢兩個月尖沙咀中港城嗰頭返工次次食飯都要行兩三個字又貴到死,唔想行餐死仲要四五十蚊餐晏,最就腳加最經濟就只得樓下中港碼頭麥記。入到去立即屌晒鬼,因為我同同事都係超級黑椒漢堡fans,本來諗住挑戰連食兩個珍寶黑椒漢堡,點知嚟到至發現唔見咗變成唔知咩韓式飯,好在有個意外驚喜,就係失蹤多時嘅粟米批重現江湖。其實非常好食,最鍾意用嚟點薯條,隊條薯條入去撩幾撩再拎返出嚟食真係人間極品,就係唔知點仲難遇過二百年一遇大雨,今年居然有得食肯定仲癲過黑椒漢堡嗰陣,lunch食完買定個返上公司做下午茶,夜晚放工買返個返屋企做飯後甜品,九點半之前落多次樓買多幾個,食住睇「期待再期待」嘅《我和殭屍有個約會2》,睇完未夠咩唔緊要我屋企樓下間麥記開通宵,落樓整多個做宵夜囉。梗要食到咁癲啦,好似話做兩個星期咋,過咗五月頭又唔知要等多幾多年至有得再食架喇。

2014年4月22日 星期二

終於可以電視上面再聽到《假如真的再有約會》,十分感動,但滾動完又覺得《我和殭屍有個約會》個大結局其實好on9

而家睇返先知,原來《我和殭屍有個約會2》頭兩集係一集個半鐘咁勁,雖然好落本飛到歐洲勁過第一輯日本,韓君婷扮殭屍真係好鬼似,特技終於由八十年代教育電視level升到九十年代教育電視(雖然套劇係2000年播),打戲有進步只係依舊亂咁cut jump扮到好勁實質得個亂字,但抄足日劇套路拍到好浮誇,仲搞到尹天照成個華英雄噉款,我明呢個係上集結局一切重來之平行宇宙,但會唔會為顯區別份cult味營造得刻意得滯呢?不過是但啦劇本仍然好勁,當年第一次睇見到尹天照第二集就死一幕真係嘩出聲,加上再次聽到《假如真的再有約會》實在好感動,同頭兩集惡魔城種氣氛襯到絕,史上冇幾多首港劇主題曲可以咁配主題咁煽情咁完美。唔知而家仲搵唔搵得到首歌高質版MP3?Youtube仲見到有個歐陸版又係好好聽。

頭兩集個頭已經開始得好勁,不過見到當中份日劇cult feel,睇返轉頭又覺得第一集個結局其實都幾戇鳩:因為成功制止世界末日,觀音如來就按況天佑所願改變歷史,等佢唔使俾將臣咬做殭屍。諗深一層,其實劉錫賢同陳煒都好仆街喎,入面都講到改變歷史的話就會令現有個世界消失,而家好喇如你所願打死陳啟泰世界冇事喇,你就改變歷史放棄而家個時空創造新一個代替佢,咪又即係全世界死晒?噉尹天照砌低陳啟泰有咩意思?(意思咪就係,大條道理可以原班底用同一條橋開拍新一輯囉,吹咩)

2014年4月21日 星期一

告別David Letterman,我的英文+音樂恩師


David Letterman Announces Retirement
From Late Show@Ultimate Guitar


http://www.ultimate-guitar.com/news/entertainment/david_letterman_announces_retirement_from_late_show.html


估唔到嘅,唔係月頭新聞到而家月底先寫,而係David Letterman退休咁大件事,我最先居然係睇Ultimate Guitar知道。David Letterman係我兩大恩師,會有今時今日音樂界/metal界嘅劉Sir,同有而家呢一手一口呃得吓無知婦孺嘅英文,都拜當年David Letterman所賜。

當年係講緊十幾年前亞視仲叫做同無記有得鬥時,國際台仲會落本買好多劇同綜藝節目,星期一至五晚十一點三就係The Late Show with David Letterman,深夜再重播之前一晚嗰集。會追全因一次機緣巧合撞到Moby上David Letterman表演《Porcelain》,我就由呢一晚起正式開始認真聽音樂,同埋決定開始追呢個清談節目。起初只為聽歌,後來發現呢個節目真係幾好睇幾好笑。屋企有裝有線,CNN ABC BBC乜外國台都睇晒(又係話當年時間:自有線開台我老豆已經開始睇,嗰陣月費先幾十蚊仲要完全冇廣告睇戲冇廁所位嗰隻,佢勁睇波同新聞,我勁睇戲同MTV台,陷家快樂),其他talk show唔係冇睇,但Jay Leno好Q悶,Conan O'Brien唔識欣賞,Craig Kilborn個Late Late Show接住David Letterman Late Show播但悶得多,唯獨David Letterman班底度啲笑料唔會太美式地道睇得明笑得出,做出嚟個喜劇效果又勁過其他talk show,同咁多個主持人的確佢最有舞台魅力,聲線、語調同措辭都最吸引。當年癲到日日都堅持睇晒首播同重播,就連考緊A-Level都睇埋深夜集重播三四點至瞓,第二朝七點幾起身去考試,長年累月之後就練成識聽識講鬼式英文,所以David Letterman就係我最重要嘅英文師傅。

而且仲係音樂啟蒙。唔係上佢度聽到Moby首《Porcelain》,我而家可能仲係聽緊Village People,而唔會開始個個禮拜六日走去CD舖買碟,由電子聽到rock聽到metal聽到變成劉Sir。會咁迷David Letterman另一個原因就係佢本身係個超級音樂迷,連帶個清談show比其他人更重音樂成份,隊band CBS Orchestra就係咁多talk show之中最勁嗰隊,每集一定睇埋字幕先熄機因為首主題曲作得好熱鬧好精彩,個bass佬超型而且唱歌同手bass都勁,仲有份玩Victor Wooten隻《Bass Extremes》。後來迷到自己開咗間label,會請主流節目冇乜可能見到嘅樂隊好似Red Fang上去表演,我相信冇其他talk show敢做(利申:去法蘭克福睇過一次Red Fang,歌同演都覺得好悶,尤其佢哋係幫玩同一樣嘢但明顯勁十倍以上嘅Mastodon做opening)(順便提埋,Mastodon都上過David Letterman唱歌架),跟住索性舉辦「Live on Letterman」,有大band登台的話,完咗正場之後會俾佢哋留低開一場正式演唱會繼續唱落去,而且條友出晒名係鼓手fans,鍾意到搞咗個Drum Solo Week每晚請一個名鼓手上去打一段solo,連Rush鼓佬Neil Peart都賞面。呢一切一切都係其他清談節目入面唔會發生,所以點解David Letterman退休,唔少音樂網好似睇落完全唔關事嘅Ultimate Guitar會第一時間報導?正因佢同音樂界關係比好多人想像中密切。亦正因如果此,通俗talk show之中,The Late Show with David Letterman最受我呢挺樂迷歡迎,佢個show俾到一份其他talk show絕對俾唔到你嘅感覺,就好似細個聽收音機時噉,每晚都有好歌聽,間唔中會發掘到唔出名嘅新樂隊新歌手,晚晚有驚喜。

後來亞視窮到連買劇都唔夠錢,要縮皮第一件事當然係斬本身已經唔多人睇嘅非黃金時段節目,就要同David Letterman講再見了。嗰陣仲話有生之年有機會去紐約的話,一定要去Ed Sullivan Theater睇一次David Letterman。而家,只餘回憶矣。

2014年4月19日 星期六

《我和殭屍有個約會》第一輯大結局好笑但又好感動

唔覺唔覺就完咗第一輯《我和殭屍有個約會》。當年見個名已經覺得好大陣亞視味似未睇已經收得皮,仲要當時邊度有殭屍係著時裝架咪玩啦,點知而家睇返仍然係神劇級,可以由武打片開始,跟住變鬼片驚慄片然後愛情片,跟住世界危機大陰謀,最後幾集直頭變埋龍珠 X 五星戰隊(真係有五粒星架頂你),難得劇本度得好好,拉埋幾套舊劇做序,頭幾集留低伏線最後幾集有呼應,人物故事全部完整,一個好容易走火入魔嘅劇本最終好頭好尾結局都有心思過人,而家無記根本搵唔到人有呢份功力。

係雖然啲CG仲衰過教育電視,最後出真身變怪獸樣衰到爆仲要變卡通聲真係仲戇鳩過Mortal Kombat,打鬥場面一味蒙太奇jump cut仲要替身個樣都廢事遮,對招永遠係兩個人論住轉圈我掃堂腿時你跳起避開再飛腳,你落地又掃堂到我跳返起飛腳,換言之兩個人一直轉圈轉到世界末日都掂唔到對方,再加所謂真正特技只係無限反應彈,班人擺晒戰隊pose再運氣出元氣彈就成個地球係噉爆炸拍得住Michael Bay啲戲咁爆,雖然劉錫賢條如來就正一仆街,明明自己好撚勁又唔係唔出得手就係點都唔肯幫你拖你吹呀,見你打唔贏「唉人間都係冇得救架喇」就想整世界末日一鑊熟,好喇你唔使靠佢都贏到喇拿拿臨下凡執返個尾彩抽抽你水,做神做到咁仆街難怪人間咁多苦難。但撇除技術層面,你會搵得返一份而家無記俾唔到你嘅「我睇緊電視我煲緊劇好開心」嘅感覺,已夠彌補一切缺憾。所以要期待下星期一,輪到電影級水準嘅第二輯播喇。

2014年4月16日 星期三

[Kowloon Metal City: Just Listen] 交響死金教父Septicflesh回歸




http://youtu.be/iX5Y5vWMQ-o


若「Fleshgod Apocalypse太流行了!」就聽聽來自希臘的交響死金教父Septicflesh最新單曲《Order of Dracul》。新專輯似乎會很不錯。

If "Fleshgod Apocalypse is too POP!" sounds true to you, try out this new track "Order of Dracul" by the symphonic death metal godfathers Septicflesh. Promising, it sounds.

2014年4月15日 星期二

祝願我對絕版Denon C360長命百歲

對耳筒無端端右邊冇聲,知唔知我幾驚,呢對Denon C360已經變成絕版架喇大佬,可能大家都收到風停咗產所以街貨已經俾人掃晒,壞咗拎去整亦只會直接換對上一級賣接近五舊水嘅C452俾你,搞到我有啲後悔上次上雅蘭Denon寫字樓知道斷貨之後冇立即過對面馬路星際城市有幾多掃幾多,除咗$280買返嚟有得自動升級變相每對平二百蚊,仲有C360隻聲真係唔知邊度搵得返。

C452大隻好多,output勁聲底厚低音出,問題係我聽metal鍾意高音推盡,中音普通水平低音推高少少就可以,一來突出旋律、二來音牆平均、三來太偏中低音好易朦同拆,而300-400價位耳筒嚟講,C360樂器定位同音色就最接近我要求。好可惜唔知點解耳筒廠硬係鍾意鬥低音,試咗兩個月仍然未聽得慣C452全部樂器拆到好散再將鼓聲推到好出種音響效果,更大問題係而家十對耳筒九對都鍾意呢種重低音嘅排位方式。

好在最後試到原來對耳筒冇事,只係條延長線壞咗,即係用咗十幾年耳筒,壞延長線我都係第一次遇到。噉就好喇,之前買落好多對次次都只係用耳筒,後備延長線我應該成櫃桶都係,不過呢對最後的C360壞埋就真係冇架喇,希望佢長命百歲啦,呢對都冇埋就唔知仲邊度搵得到合晒我合尺嘅metal耳筒。

(不過可能C360搞到停產正因用料太劣,以前一對起碼用一年/一過保養先壞醒到爆,近兩年都係用一對三四個月就打柴,我呢對新年開始用,應該都差唔多時候,似乎可以摷返八月就過期張保養單擺落袋跟身,隨時準備過雅蘭換多對C452架喇...)

2014年4月12日 星期六

每週一相片大行動 2014 Week 15:當我樓下一罐Pokka咖啡賣$5間士多執笠時


向來唔識飲咖啡,唯一會飲係Pokka罐裝,因為奶味重過咖啡味完全唔係咖啡,由細到大都好鍾意飲,Pokka就係咖啡界的汽水。大個咗更加珍惜,因為四洲開始沒落,細個時都仲話電視睇到Pokka咖啡廣告,大個想飲罐裝好多地方只搵得到雀巢之類大牌子,但當OK一罐雀巢250ml可以賣到九個半,另一個選擇係俾多一兩蚊買日本同台灣牌子枝裝,就體會到便利店霸權壓迫有幾深。有一段時間七仔枝裝奶茶咖啡大劈價$7.5一枝,點知減得一個星期就完,好在俾我搵到屋企附近有間士多,買嘢食價錢普通但嘢飲非常平,Pokka咖啡350ml只賣$5罐,行過幾間舖七仔已經係雙倍價錢,老闆娘話所以附近做七仔做OK班人都私底下過嚟入貨,梗係啦佢哋自己問公司拎貨個價可能已經七八蚊。


可惜我知道呢間士多時已經係最後N天,之後會搬過紅磡,立即最後幾日落去掃兩箱返屋企慢慢飲 - 其實都唔慢,買到返屋企老豆老母立即醒水,我唔飲佢哋都每人每日最少飲一罐,四十八罐其實捱唔到幾耐。所以好快又要補貨,但係當連土瓜灣都係執一間士多就多一間金舖找換店時,唔好叫我走到出紅磡抬幾十罐咖啡返屋企呀。想平平哋飲罐咖啡嗟,點解都咁難?

2014年4月11日 星期五

未睇原著入場,你會失望;睇過原著入場,只會極度失望:《那夜凌晨,我坐上了旺角開往大埔的紅van》

雖然本身都唔係點樣期待,《紅van》電影版仍然幾失望吓。林雪李燦森真係無敵絕配,Janice Man完全唔識做戲但好鬼正(一齊出道但紅嗰個反而係Angelababy唔係佢就灰咗啲,跟黎明吖嗱抵死啦),有啲笑位度得好(寓意是好但講政治啲位實際上加得好夾硬),結局雨中小巴一段十分蒼涼,但就係咁多。

片頭拍得幾正但一入主題曲入得完全唔夾仲要剪到好鬼差首歌又唔掂已經出事,導得好差乜都狂飛步伐亂晒,trailer份氣氛同緊張完全搵唔到,《Space Oddity》由一絕變成一柒,特技可能而家啲ETV做得仲真仲好睇,茶餐廳公審更加係戇鳩地浪費時間。開頭好睇、林雪好笑、臨尾紅雨紅van嗰段感情好正,可惜中間強差人意,後段仲要編同演都越變越cult片格唔知做乜鳩,同埋,係,查實套戲係完全冇結尾,同《寒戰》一樣擺明得個局謎呢下集肯俾錢睇咪知囉,而如果你係睇過原著至入場會仲大鑊,成套故事同人物都改到仆街,唯一100%忠於原著只得小巴司機,林雪甚至做得更正,李燦森白粉佬都好笑不過仲差少少至夠原著個鬥。唔好再聽我鳩up,聽聽坐我後面兩個鬼佬點評:我同佢哋一齊坐到最尾,字幕出時兩個鬼佬勁屌,屌套戲一時想做呢樣,一時又想做嗰樣,亂晒大龍,高不成低不就。如果唔拍到咁cult而肯正經拍,唔使由頭到尾都係結局咁滄桑,拍得出trailer隻feel已經夠晒。

其實我從未完整睇過陳果任何一套戲,不過睇完《紅van》,反而興幸自己以前冇睇過。《紅van 2》應該會係我最後一套會睇嘅陳果戲。不過有一樣嘢又一定要抱不平嘅。唔明套戲點解三級?你話姦屍的話,唔公平上次嚟九展睇戲係《300: Rise of the Empire》,頭兩個字已經激過晒《紅van》全套兩個鐘啦,點解又唔使三級呢?

2014年4月9日 星期三

後來受盡負評的《紅Van》,我覺得好神喎

唔係落地鐵站見到燈箱話《紅Van》星期四上畫,可能本書會繼續擺到暑假至開嚟睇。前晚臨瞓開始,比想像中易睇同短,第一晚兩個半鐘睇咗三份二,第二晚再個半鐘完上集,癮起立即電話上網追埋下集,睇到Episode 37四點幾先瞓,今朝起身繼續追晒最後四章,返工一面做嘢一面睇(真仆街),前後七個鐘左右啦,終於俾我睇晒呢部新一代港產科幻神作。

未必好多人認同,但我本身係港產科幻迷睇衛斯理原振俠畢華流大,所以對有香港特色嘅科幻小說特別有情意結,而《紅Van》單個名已經知道地道得冇得更地道,睇咗頭五章我已經知道呢本一定係我最鍾意嘅小說之一,文筆舖排同氣氛神得嚟好有親切感。去到後半係有啲失控,不過未至於好似好多人所講咁爛,或者同《Gantz》一樣,你連載時逐回追會覺得作者諗唔到點寫而死拖爛拖,但等出晒之後一氣呵成睇都係好緊張,白粉友呢個角色真係正到仆街,拍埋小巴司機唱雙簧簡直一撚流,感覺係香港版《Lost》:前設吸引、演譯精警、劇情緊湊、驚喜不斷、氣氛一流,不過掟咗萬幾個彎掟到作者自己都lost晒開始唔知應該點繼續落去,個頭開得真係太大而且跟住一直加新伏線越玩越癲,好在最後都叫兜到同我都接受到,但差在手法,要特登寫成章畫外音直接開估仲要臨尾煞有介事加一句「以上就是謎底」,格調立即由JJ Abrams level急跌到王晶級數,要一次過解晒幾個謎,都可以有更好嘅方法,唔一定要一篇文踢爆就算咁求祈啩。同最後係咪代表主角終於脫離紅Van殺局,但做咁多嘢香港都係復活唔到、主角一班都係輸咗、日本仔仍然係贏家呢?

只有話唔係好似好多人所講咁差咁爛尾,雖然就真係仲有啲bug同劇情冇交代清楚,好似小學同學呢個角色實在加得好夾硬,阿信死而復生仲走返出去取代埋主角身份然後電話入面講到點樣勁仲話「有啲唔對路」,跟住冇咗件事好似完全冇發生過完全唔重要。臨尾全部敵人突然死晒,邊個人邊度開槍唔知,到頭來個系統有幾重要幾強勁表達唔到。不過我已經好滿足架喇,小說出到下集會買埋同刨多次,而套戲希望上畫正日就可以入場睇啦。(應該好難,嗰晚係今個星期最後一日坐Sony,照計好夜先放到工)

若要數最大最大嗰個bug,唔係日本仔居然可以當中國冇到直入香港搞三搞四,而係當大陸/港共政府要喺香港整一個監控系統,點會俾你用外國名,而唔迫你改個娘到爆嘅大陸名/搵唔知邊個中國神話人物命名咁柒?

2014年4月8日 星期二

偷得浮生半日閑




返九龍灣office時,就好似菜街寬頻仔加黃金砌機仔合體,專做擔擔抬抬粗重跑腿立雜嘢;過尖沙咀坐Sony時,就似返個專業(好似係)IT人,負責測試系統寫報告做文件。不過坐呢一邊一坐就真係由朝坐到尾,反而係附近啲場出事令我做返老本行走嚟走去送貨執漏時,先至叫有得出去走走抖一抖。

2014年4月7日 星期一

2014年4月6日 星期日

美漫迷,都是等本年度重頭戲《Days of Future Pass》吧:美國隊長2 Captain America: The Winter Soldier



本來打算下星期二先睇《美國隊長2》,點知晨早要落土瓜灣個場開工,就順便行埋出紅磡寶石睇十二點場。或者因為第一集唔多掂所以冇期望,同埋old-school派的寶石戲院3D版都只收$50仲借埋眼鏡間院又大(只係同一樣係old-school的豪華相同音響唔多掂),睇完雖然覺得只叫好過第一集少少,夾埋叫收貨啦,同應該叫Avengers + Iron Man 1&3之外Marvel自家電影入面最好一套架喇。

或者Marvel擺到明只谷Iron Man同Black Widow兩個,明明美國隊長先至係主角,電影入面搞到茄喱啡都不如,自己套戲拍到成套特攝片劇場版噉,Avengers入面少咗佢你都唔會點樣覺,冇睇漫畫更唔會知原來佢至係Avengers大佬,鬼叫又唔係女又冇超能力咩。第一集冇入戲院睇亦好彩冇,如果第二集trailer唔係咁勁應該都係等電視播or搭飛機時睇算,今集似乎終於捉到美國隊長應該走咩路線,唔係特攝動作片,而講返一個聽命於政府嘅非超能人點樣面對政治現實。本來二戰時代人物穿越六十年點樣融入現代個主題拍拍吓冇咗回事都算,今集想拍正傳Earth 616式正氣英雄嚟到Ultimate一切式務實為先嘅時代,其實撞正斯諾登事件拍特務組織監控世界故事襯到絕,好可惜拍唔出應有之警世,到頭來變返典型大場面動作片,劇本依然薄弱、橋依然係為扭而扭、Helicarrier同Avengers入面一樣只負責俾人炸、S.H.I.E.L.D.明明有最高科技最多人才點知仲廢過新版占士邦入面個MI6、搞到S.H.I.E.L.D.咁廢你叫fans們情何以堪呢。

另一個大問題係副題叫The Winter Soldier,但其實成套戲都唔多關Winter Soldier事,絕對唔係稱得上能擔當副題之重點。而且原著Winter Solder出場舖排係一絕,即係未睇過第一集同漫畫都未必估唔到佢真正身份,只係漫畫入面係除咗隊長自己人人都知但冇人敢講,到揭曉真正身份一刻先帶得出嗰份震撼,不過電影版邊得閒同你搞咁多嘢呀,結果公開身份一段變返cliche到爆完全冇劇力。套戲索性叫做Captain America: Fall of S.H.I.E.L.D.或者Captain America & Black Widow仲好啦。

好係作為動作片打得好咗好多。第一集美國隊長俾人打多過打人動作又唔靚,飛盾絕招差唔多唔用仲要飛出去唔識彈嚟彈去,點睇都似條雜卒多過超級士兵,加埋CG好鬼流搞到勁重特攝feel唔夠荷里活大片格調,今集睇完起碼會諗「導演終於記得俾錢請武指喇喎。」Nick Fury飛車中伏、美國隊長電梯入面一個打十個同公路打戰機好精彩(雖然我唔明公路上面架戰機一直向後飛,佢個盾飛得咁慢點樣可以快到追得上架機...),不過美國隊長依然係最雞嗰個仍然係任何一個大角色都好打過佢,Winter Soldier同Black Widow打得好勁連Falcon得飛嚟飛去都拍得好睇,隊長呢你記得最多都係佢點樣俾人打,成日都中伏都俾人打到,超級士兵喎...

我只有話,純粹想簡簡單單睇一套大製作動作片,《美國隊長2》睇得過,大場面真係拍得好,底線係好過第一集,只係有要求又怕中伏的話,或者學我去睇兩次都仲平過去其他地方睇一次嘅寶石睇算啦。入場前後睇咗幾次《X-Men: Days of Future Pass》trailer,更深刻感受到,呢一套先係真正美漫迷今年最想睇嘅重頭戲。而《Days of Future Pass》之後一定會到更灰更激嘅《Age of Apocalypse》。開始為Marvel嚟緊MCU Phase 3擔心,或者要開始考慮拍Black Widow solo了,哈

(between,講起X-Men,一定要睇片尾第一條「隱藏」片。Marvel Studios版Quicksilver同Scarlet Witch真係名乎其實地樣衰到冇朋友...)

2014年4月4日 星期五

每週一相片大行動 2014 Week 14 Entertainment Expo Expecial:識睇戲一定係睇九折豪華歡樂早場




去阿信屋買薯片食,送咗張電影節coupon,四月中之前去睇戲有九折。今晚用嚟睇《美國隊長2》3D版...就笨柒啦。識睇一定係星期日朝早去豪華睇$15歡樂早場時用。

2014年4月2日 星期三

《我和殭屍有個約會》和歲月留聲台的意義,就是令你更深切明白無線有多垃圾、王維基立即開台有多重要

唔知編劇同導演係咪睇美漫睇上腦,呢兩集《我和殭屍有個約會》玩時光倒流六十年,講六十年前後兩個時空點樣互相影響、今日牽一髮點樣動昨日全身,拍到出嚟真係好美漫feel,不過劇力非常之強緊張刺激有自己一套,打戲好Matrix但係套劇要早Matrix一年出街,仲肯落本買首張學友做插曲,呢幾年睇港產劇《天與地》大結局之外,就只得今晚《我和殭屍有個約會》第23集會覺得好震撼睇電視好似睇緊戲,真係值得十二點半重播睇多一次。播到三分二已經咁有迫力,更加期待嚟緊兩個禮拜結局篇可以有幾精彩。

如果而家無線都肯咁認真去寫劇本去製作去投資,我都肯轉返去翡翠台捧場,可惜頭先放工買飯食時坐低睇咗而家無記八點半嗰套,兩個字入面就係睇一條仔同一條女點樣互send Whatsapp,柒到連食緊飯班師奶都屌佢哋老母做乜鳩,就知道一日王維基開唔到台,想開電視睇港劇又唔使半個字就熄得機,只得返歲月留聲台一個選擇。

2014年4月1日 星期二

每週一相片大行動 2014 Week 14:這架「花貨車」,才是今個愚人節的重點嗎




是日重點唔係我點樣接到call六點鐘起身同大班學生哥加成班帶住大袋細袋去旺角搭火車上羅湖嘅阿婆搶頭班巴士出去美孚個客個倉趕正式開倉之前去到做system check跟住俾人祝我愚人節快樂。而係前幾日報紙講有條友將自己架貨車改成結婚花車,估唔到今日會喺個倉見到,而且佢結完婚之後仲繼續開住架花車開工畫都唔鬼拆。老實,真係(柒到)唔識欣賞。

如果係垃圾佬將架垃圾車變做花車再開住架紅噹蕩垃圾車四圍收垃圾,先至係霸氣。