熱門文章

2014年6月29日 星期日

[怒人屌出生天牙插騷暨劉Sir破處show倒數] 倒數第一回:百年一遇地道香港搖滾「鳩core」係亂屌定屌亂,由你自己判斷


怒人五部曲.第一章:
百年一遇地道香港搖滾「鳩core」係亂屌定屌亂,
由你自己判斷


http://lausirisual.blogspot.hk/2012/10/kowloon-metal-city-track-21core.html


下星期六13/7就係怒人新碟promo屌出生天牙插騷喇,當晚仲有第一次出show嘅劉Sir上台同怒人一齊戇鳩鳩,就今日開始重溫劉Sir為怒人寫嘅五篇論文熱定身啦。點解咁早開始睇?叫得論文自然篇篇都幾千字,今日開始每日睇一兩千粒字,睇晒就差唔多開show架喇。


怒人屌出生天牙插騷


http://www.facebook.com/events/1506533086242403


日期:2014年7月13日
時間:20:00(19:30開始入場)
地點:Zuksession
地址:灣仔盧押道18號海德中心5樓(灣仔地鐵站C出口)
票價:$100 預售 / $150 即場(包一杯飲品)

怒人Facebook: http://www.facebook.com/NoYanDiu9Nei
怒人係火陷, 係暴燥, 係不滿, 係青春, 係衝動, 係幼稚, 係發癲, 係戇鳩, 係痴線, 係笑聲, 係屌聲...屌!
怒人N年前係一人樂隊, 依家係一隊N人樂隊
On Drums: Tim
On Bass: Jacky
On Guitar: Jason, 怒人
On Vocal: 怒人
On鳩: 香港資深五金業工作者劉Sïr


七月十三日,金屬狂人 vs. 金屬傻人

2014年6月26日 星期四

每週一相片大行動 2014 Week 26:在第四集開畫這夜,回想五年前凌晨3:40去Megabox睇《變形金剛2》IMAX版子夜場的on9事




今晚2014年6月25日星期四,《變形金剛4》正式開畫(between,其實我真係好想去上星期四睇完戲仲有得睇Imagine Dragon場首映呀),我相信第一個星期唔去豪華都唔會睇得到架喇寶石都未必有位,呢段等入飛的時間,不如先講返四年前單on9事先啦,就係凌晨三點八走去Megabox睇IMAX版《變形金剛2》。

會咁無聊因為睇完普通版報紙至話普通版cut左唔少野IMAX先係足本,搞到想睇多次,但係唔知點解跟住會走左去睇朝早三點八場,可能因為子夜場半價二人同行一人價錢啦。另一非常記得係本來睇17/7,點知雄心壯志出發時居然打風,仲要係十年都唔知撞唔撞到一次的九號風球,再次證明劉Sir = 地獄黑仔王。一個星期之後仍然好想睇,心諗夜晚三點八仲要出到Megabox咁僻,點會有人爭呀?

就係有,仲要好多添,黐Q線。香港發生左咩事?點解會有咁多人無聊到夜晚三點幾走到觀塘咁偏僻位置睇戲?當晚仲要冇風打但係又熱又大雨,初頭諗住可以包場,點知去到見到大把人仲有一家大細黎睇,我地兩個人已經要坐到K28同K29,好似日頭正場都冇咁爆,或者IMAX可以靠子夜場食糊。好在套戲夠長兩個半鐘,睇完都六點幾有車返屋企,唔係要訓Megabox訓到有巴士先走得就慘喇,你知啦,我睇完之後已經好灰架喇,因為辛辛苦苦咁夜捱眼訓黎睇,睇左先發現原來個所謂足本IMAX版呢,香港個IMAX係冇份架囉。

2014年6月25日 星期三

七月十三日.我的破處show:怒人屌出生天牙插騷





怒人屌出生天牙插騷



http://www.facebook.com/events/1506533086242403



「唔使叫我去睇Vader喇,嗰晚我出(處男)show。」




怒人屌出生天牙插騷



日期:2014年7月13日



時間:20:00(19:30開始入場)



地點:Zuksession



地址:灣仔盧押道18號海德中心5樓(灣仔地鐵站C出口)



票價:$100 預售 / $150 即場(包一杯飲品)




怒人Facebook: http://www.facebook.com/NoYanDiu9Nei



怒人係火陷, 係暴燥, 係不滿, 係青春, 係衝動, 係幼稚, 係發癲, 係戇鳩, 係痴線, 係笑聲, 係屌聲...屌!



怒人N年前係一人樂隊, 依家係一隊N人樂隊



On Drums: Tim



On Bass: Jacky



On Guitar: Jason, 怒人



On Vocal: 怒人



On鳩: 香港資深五金業工作者劉Sïr




七月十三日,金屬狂人 vs. 金屬傻人

2014年6月22日 星期日

我呢個唔睇波嘅《Sherlock》fans今次真係要多謝世界盃

由細到大都唔睇波唔睇體育比賽,所以每到世界盃呀奧運呀都會好唔開心,因為好容易撞時間搞到冇得睇卡通片或者劇集要改期播,不過今次世界盃反而著數咗。本來上星期日係《Sherlock》第二季大結局,因為開波所以遲一個星期至播,立即爽爆,今晚播第二季大結局,睇完聽晚立即到第三季開始。好在有世界盃。

不過同上星期一《我和殭屍有個約會II》集大結局一樣,《Sherlock》又係夜晚十二點半先至做,又係一做就兩個鐘睇完都兩點半。我發覺世界盃開始之後,睇波嘅同事作息正常冇乜改變,反而唯一唔睇波嗰個冇邊日十點之前返得到公司。

2014年6月21日 星期六

一換季屋企就成日出現曱甴,搞到好掛住我隻狗

今日去幫個客個新場趕裝修OT O足十一個鐘,九點幾終於有得返屋企,買咗碗麵諗住有得開開心心慢慢嘆,點知買完唔敢返屋企,因為收到細妹send個message嚟,

「嘩嘩嘩屋企有好撚大隻曱甴呀呀呀!!!!!」
(我認我誇張咗,我細妹好乖唔講粗口嘅,不過想表達嘅意思同語氣差唔多啦)

立即灰晒,搞到我都唔知係咪拎返碗麵入間舖坐低食埋先走,不過始終都要面對,就屌那星頂硬上返屋企先。一開門立即一個側手翻碌入廚房反手開廚櫃拋枝殺蟲水出嚟凌空接住,好似拍《異形》拎住枝嘢一步一驚心慢慢行逐間房搜,無時無刻都覺得下一個彎位就會撞到隻嘢跳出嚟或者天花板跌落嚟,但行晒成間屋都搵唔到,頂唔順唔食飯咩唔通頂硬上囉又,擺住枝殺蟲水喺碗麵隔籬噉樣食法。果然跟住隻嘢就出現了。我永遠唔會明點解啲曱甴咁犀利無論隔幾遠都會知道你有嘢食,食咗半碗麵立即見到佢走出嚟,仲要係向住我個方向直衝當堂屌你老母啦,立即拎枝殺蟲水勁噴,唔搞掂佢邊度有安樂茶飯食呀。雖然噴咗又四份一枝殺蟲水之後,我都唔知未食嗰半碗麵食唔食埋佢好&仲食唔食得。

呢兩星期天氣一熱返立即撞到幾隻,唔知關唔關隔籬屋搬走咗幾個月事,定係因為而家冇養狗?好耐以前屋企都係好多曱甴,但養狗之後就再未有過曱甴入我屋企,一直到隻狗走咗啲曱甴先再出沒。搞到怕曱甴的我好鬼掛住隻狗添。

2014年6月18日 星期三

今期張電話單好鬼貴




新世界send message過嚟提我交$1電話費個成本,應該我交完電話費都唔夠填。

其實我想試吓等到6月30日,睇會唔會因為我冇交一蚊電話費搞到俾人cut台。

2014年6月16日 星期一

每週一相片大行動 2014 Week 25:新文華中心:尖沙咀最後一片屬於真正香港人的樂土




問其實我呢個IT人係做乜,我都答唔到你,因為實際上做得比雜務更雜。好似剛剛個禮拜六有個客尖東間寫字樓要禮拜一開張,要人幫手趕埋啲上網頭電話頭,老細就屈咗我晨早起身過去幫裝修師傅手拉線打頭,裝修佬嗰瓣都撈埋。點解會識呢啲嘢?梗係唔識啦,咪落場問人即學即做囉。

另一邊葵涌貨櫃碼頭個倉,掛住「IT部」個名入場但做親都係擺明唔關IT事的純粹粗重工夫,今日終於由幕前做到幕後,派咗去尖東間office做系統檢查,聽落好pro其實只係俾一大份checklist你,跟住逐行逐個指令打入去睇結果正唔正常就得,食完早餐食完lunch同臨放工各一次,做晒一輪之後抖一抖就可以開始準備下一round,真正由朝check到晚。好鬼忙,不過令我第一次有機會行呢頭,發現尖東真是一個好地方。

可能因為之前坐Sony位置係尖西,餐餐lunch天天新款又好鬼豐富食得刁咗,呢兩日覺得尖東冇乜好食,本身食肆已經唔多,又要多數得個貴字唔太好食,結果每次搵食都係去新文華,先發現正喎尖沙咀原來仲有俾我哋香港平民百姓行嘅商場。係咪襯返隔籬好鬼死舊的華懋呢,新文華真係點睇都似旺角之類地區開咗好多年都唔肯裝修啲商場,望落去好殘完全唔尖咀,好在入面舖頭一樣咁old-school,有收返算正常價位嘅茶記,仲有好多你同我行過唔會「挑呢啲嘢邊度會有香港人買架」而睇見會心郁郁想幫襯種「正常」舖頭,充滿親切感。

禮拜六做裝修喺海傍另一邊開工,雖然趕頭趕命因為棟大廈禮拜六晏晝唔開冷氣星期日直頭全日唔開(好多老細好多地方都唔當裝修師傅係人,以前做fair砌場同今次落手落腳做感同身受好多次,佢哋賺嘅係真正血汗錢,所以我一向好尊重裝修師傅),趕時趕一點鐘lunch同三點三tea time都特登行過嚟呢頭,冇計唔食麥記的話得新文華有平飯食,同埋有咩想買要補給都係呢邊。坐低吹開水班師傅怒屌自由行,雖然尖沙咀叫做商業區高檔地段,以前佢哋開工時有咩特別嘢要搵就近都唔係搵唔到,但而家唔係藥房就珠寶五金舖變晒金舖,尖東唯一仲搵到電工五金買得返最角落頭的新文華。

星期一唔使身水身汗坐返office,好在上華懋坐即係新文華隔籬,梗係開心啦大把好嘢食喎,做完晏晝輪system check中間有一個鐘空檔鼠咗落樓下掃掃街,酒吧街下面麵包西餅煎釀三寶蒸籠包點連pizza都有得食,食完仲有間細細間涼茶舖俾你清熱添,充滿行舊區嘅感覺,亦係自由行出現開始只顧住做大陸人生意香港人你死你事嘅尖沙咀俾唔到你嘅感覺,同埋唔貴呀十蚊六件煎釀三寶,我屋企樓下都兩蚊一件啦!以前我唔太鍾意出嚟尖沙咀,叫我過呢邊返工更加可免則免因為消費太高,但呢兩日之後我會同老細講聲,「如果係返尖東的話,都唔錯喎。」

唔知當初係咪龔如心刻意經營維持古典,華懋同新文華呢個尖沙咀角落,係而家尖沙咀難得仲有濃厚八九十年代香港色彩地帶,附近幾個商場大半舖頭變晒做金舖錶舖藥材舖時,新文華仲可以俾到你二三十蚊個下午茶十蚊六粒炸魚蛋八九蚊碗清保涼,再食住花生醬多睇隔籬幾個商場點樣無時無刻都俾十幾間旅遊巴百幾個大陸人包圍。只係唔知維持到幾耐,新文華入面地下已經變咗間outlet(雖然未見過有人行),街舖都每隔幾個舖位就一間係藥房,換言之街坊式細舖執一間就少一間,相信過多一兩年再路過呢度,新文華應該都會淪陷變成「另一間尖沙咀商場」,就好似今日嚟華懋廣場返工,諗住收工可以落華懋戲院睇返場戲,先發現原來間戲院執咗好耐已經變埋做金舖outlet一樣,真正的香港特色已經慢慢消失。

願甜甜神在天之靈眷顧我哋土生土長香港人,庇佑華懋同新文華呢個尖沙咀最角落位置唔會俾自由行入侵、唔會變成為做大陸人生意而開嘅商場,保存呢處尖東甚至尖沙咀最後一片屬於真正香港人的樂土。

2014年6月12日 星期四

《我和殭屍有個約會II》早就看透了14年後甚至47年後的香港

《我和殭屍有個約會II》實在非常前衛,講仲有幾個月就殞石撞地球,不過香港人生活冇咩唔同,因為「末日?冇馬跑就世界末日!!俾份號外我做乜?我要馬經呀!」 而講殞石就嚟撞到落地球份號外,背面係樓盤廣告。聽落係咪好熟?冇錯,就係14年之後嘅《香港將於33年後毀滅》。

(between,求叔招都冇得出嗌幾嗌就死咗實在冇癮,第二集嘅求叔比第一集更有霸氣入型入格得多,反而冇得好似第一集噉光榮戰死,太浪費喇)

2014年6月10日 星期二

《我和殭屍有個約會II》外傳之卡士蘭的煩惱

卡士蘭作為彊屍之皇同全世界最好打嗰個,原來都有煩惱,就係成日都顧住做其他嘢搞到睇唔切睇電視,好似今晚顧住同人打交,搞到趕唔切睇《風起雲湧》大結局(套劇夜晚播但唔知點解打嗰陣係日頭,通天塔喺另一個時空但時間都係一樣喎),作為一個電視迷,生於一個未有Youtube亞視又未一日重播六次嘅年代真係幾灰。(咦,咪住先,上幾集唔係話夜晚一點半有重播咩?)但係其實佢都幾蠢,就算亞視未會無限重播,身邊咪有隻可以穿越時空嘅白狐囉,錯過咗邊集,叫白狐送佢返去嗰晚開始做嗰一分鐘咪得囉,仲方便過錄影機。 

(between,女媧初出場好有霸氣,但學埋晒卡士蘭啲衰嘢晚晚煲劇,嚟到呢幾集變到冇晒女神氣質變到成個港女噉,相信佢哋追嗰套係無記劇嚟,仲要係俾白狐玩穿越時空睇錯咗N年之後今時今日啲膠劇) 

(再between,而家都唔明點解女媧要配音,睇返片尾片花現場把聲講嘢冇問題又冇口音,點解出街要重新配過?)

2014年6月9日 星期一

終於等到謝安琪新廣東歌《勢不兩立》,但...




http://youtu.be/urb8Wr6GVyQ


終於等到謝安琪新廣東歌《勢不兩立》,老實,曲編演都差噉啲。以前聽謝安琪,平淡都好有feel,因為歌同唱點都有自己一份型格。但近三四隻碟,謝安琪感覺越嚟越少,「謝安琪搞到好似邊個邊個」感覺就越來越強。

2014年6月6日 星期五

又一間平價邊爐俾我食死咗,德星我會永遠懷念你的無限任食阿波羅雪糕




灰喎,屋企樓下間德星,之前話打邊爐金融海嘯價$90全包做到六月二號,其實真係好正架有阿波羅雪糕任食,點知六月三再行過,已經拉晒閘貼左張「內部裝修」。而眾所鳩知酒樓界行內術語,「裝修」90% =「執笠/走佬/換老闆」,而再開返一定唔會仲可以打邊壚一舊水有找到時連雪糕都可能冇,灰啦冇得再一打打噉狂食阿波羅喇。

2014年6月3日 星期二

每週一相片大行動 2014 Week 23:蘋果日報,甚撚麼是「小三」?


蘋果今舖威到盡啦,噉嘅料都刮得到出嚟,今次事態發展真係彭順孖埋彭發再搵晒成條無記編劇組一齊度寫足十年都拍唔出,難怪今朝九點九先出門口返工,屋企樓下七仔窿崎報紙檔已經冇晒蘋果,爆同一單料嘅東方就仲有貨。不過想講係,廣東話入面有「第三者」、有「二奶」、有「外遇」,點解咁多選擇都唔用,係要用睇見都覺得柒到喊嘅咩「小三」?


其實好多時想撐蘋果,但見到作為一份香港地道潮流先鋒報紙,又要用埋晒呢啲娘爆大陸/台灣國語字整cheap自己,就真係想話你俾人抽你廣告就唔係有骨氣而係抵撚死嘅,自己都唔堅持本土到底。