問其實我呢個IT人係做乜，我都答唔到你，因為實際上做得比雜務更雜。好似剛剛個禮拜六有個客尖東間寫字樓要禮拜一開張，要人幫手趕埋啲上網頭電話頭，老細就屈咗我晨早起身過去幫裝修師傅手拉線打頭，裝修佬嗰瓣都撈埋。點解會識呢啲嘢？梗係唔識啦，咪落場問人即學即做囉。
另一邊葵涌貨櫃碼頭個倉，掛住「IT部」個名入場但做親都係擺明唔關IT事的純粹粗重工夫，今日終於由幕前做到幕後，派咗去尖東間office做系統檢查，聽落好pro其實只係俾一大份checklist你，跟住逐行逐個指令打入去睇結果正唔正常就得，食完早餐食完lunch同臨放工各一次，做晒一輪之後抖一抖就可以開始準備下一round，真正由朝check到晚。好鬼忙，不過令我第一次有機會行呢頭，發現尖東真是一個好地方。
可能因為之前坐Sony位置係尖西，餐餐lunch天天新款又好鬼豐富食得刁咗，呢兩日覺得尖東冇乜好食，本身食肆已經唔多，又要多數得個貴字唔太好食，結果每次搵食都係去新文華，先發現正喎尖沙咀原來仲有俾我哋香港平民百姓行嘅商場。係咪襯返隔籬好鬼死舊的華懋呢，新文華真係點睇都似旺角之類地區開咗好多年都唔肯裝修啲商場，望落去好殘完全唔尖咀，好在入面舖頭一樣咁old-school，有收返算正常價位嘅茶記，仲有好多你同我行過唔會「挑呢啲嘢邊度會有香港人買架」而睇見會心郁郁想幫襯種「正常」舖頭，充滿親切感。
禮拜六做裝修喺海傍另一邊開工，雖然趕頭趕命因為棟大廈禮拜六晏晝唔開冷氣星期日直頭全日唔開（好多老細好多地方都唔當裝修師傅係人，以前做fair砌場同今次落手落腳做感同身受好多次，佢哋賺嘅係真正血汗錢，所以我一向好尊重裝修師傅），趕時趕一點鐘lunch同三點三tea time都特登行過嚟呢頭，冇計唔食麥記的話得新文華有平飯食，同埋有咩想買要補給都係呢邊。坐低吹開水班師傅怒屌自由行，雖然尖沙咀叫做商業區高檔地段，以前佢哋開工時有咩特別嘢要搵就近都唔係搵唔到，但而家唔係藥房就珠寶五金舖變晒金舖，尖東唯一仲搵到電工五金買得返最角落頭的新文華。
星期一唔使身水身汗坐返office，好在上華懋坐即係新文華隔籬，梗係開心啦大把好嘢食喎，做完晏晝輪system check中間有一個鐘空檔鼠咗落樓下掃掃街，酒吧街下面麵包西餅煎釀三寶蒸籠包點連pizza都有得食，食完仲有間細細間涼茶舖俾你清熱添，充滿行舊區嘅感覺，亦係自由行出現開始只顧住做大陸人生意香港人你死你事嘅尖沙咀俾唔到你嘅感覺，同埋唔貴呀十蚊六件煎釀三寶，我屋企樓下都兩蚊一件啦！以前我唔太鍾意出嚟尖沙咀，叫我過呢邊返工更加可免則免因為消費太高，但呢兩日之後我會同老細講聲，「如果係返尖東的話，都唔錯喎。」
唔知當初係咪龔如心刻意經營維持古典，華懋同新文華呢個尖沙咀角落，係而家尖沙咀難得仲有濃厚八九十年代香港色彩地帶，附近幾個商場大半舖頭變晒做金舖錶舖藥材舖時，新文華仲可以俾到你二三十蚊個下午茶十蚊六粒炸魚蛋八九蚊碗清保涼，再食住花生醬多睇隔籬幾個商場點樣無時無刻都俾十幾間旅遊巴百幾個大陸人包圍。只係唔知維持到幾耐，新文華入面地下已經變咗間outlet（雖然未見過有人行），街舖都每隔幾個舖位就一間係藥房，換言之街坊式細舖執一間就少一間，相信過多一兩年再路過呢度，新文華應該都會淪陷變成「另一間尖沙咀商場」，就好似今日嚟華懋廣場返工，諗住收工可以落華懋戲院睇返場戲，先發現原來間戲院執咗好耐已經變埋做金舖outlet一樣，真正的香港特色已經慢慢消失。
願甜甜神在天之靈眷顧我哋土生土長香港人，庇佑華懋同新文華呢個尖沙咀最角落位置唔會俾自由行入侵、唔會變成為做大陸人生意而開嘅商場，保存呢處尖東甚至尖沙咀最後一片屬於真正香港人的樂土。
沒有留言:
張貼留言