好耐未試過開電視會咁有盛事氣氛：Marvel《Agents of S.H.I.E.L.D.》 vs. DC《Arrow》同日首播之戰

當無記越嚟越垃圾嘅時候，今年明珠台反而帶得返起以前每逢暑假就一次過推晒全年最勁最想睇啲劇集出嚟好大陣仗種氣氛，世界盃完咗個禮拜幾套勁劇一齊開始播，雖然應該禮拜三《Under the Dome》先係重頭戲，但講最過癮肯定係星期一，因為呢晚係Marvel同DC電影市場正式開戰之後，兩大美漫廠牌第一套為進軍電視界而設嘅劇集同時香港首播。噉樣先似盛事、噉樣先似暑假嘛。

兩間label就算拍劇依然跟足拍戲種拍法。《Agents of S.H.I.E.L.D.》好多人鬧，其實我都冇乜大期望，因為睇預告都預咗係好典型Marvel戲路，即係賣大製作大排場，製作級數媲美電影非常落本，加一貫美式幽默笑位度得幾正，只係格局正路過正路可以話有點太保守，娛樂性夠只係開開心心一個鐘之後冇乜特別深印象留低。都有嘅，就係成套劇超多女仲要好正，一開波出嚟串吓場條女正到呢，出得兩個鏡但係睇到你口桀口桀口桀～同埋另一樣嘢，當年睇《新世紀福音戰士》都有諗過：

「又話全世界最神秘組織、又話唔俾得普通人知？噉點解上至飛機大炮下至一枝原子筆乜嘢都要加自己組織個嘜頭上去，次次出動全架車全隊人全身都係S.H.I.E.L.D.個logo，慌死人唔知佢哋係邊個？」

跟住到《Arrow》，反而冇諗過無線會揀星期一至四晚十二點播，會排呢個時段有一定代表性，因為通常題材比較嚴肅沉重或者畫面一定要剪過至出得，就會排到呢個時間播，例如《The Walking Dead》如果首播就直接排十二點播的話，應該可以完全唔剪足本出街。

同走開超級型路線嘅Marvel相對，DC劇同戲一樣走真實型，雖然故事的確幾灰拍得亦唔差，動作冇想像中咁激仍算精彩，Green Arrow唔係英雄而係反英雄會殺人更是好事，但你成層樓殺晒一滴血都見唔到就無奈咗啲喎。故事唔算突出冇乜新意，我好簡單劇本唔會悶過《Agents of S.H.I.E.L.D.》就得，不過可能幾難，因為DC成功在搵到Christopher Nolan reboot蝙蝠俠，但亦失敗在《Dark Knight》三部曲太成功限制咗自己戲路，蝙蝠俠之後幾乎逢係DC就要好灰好沉重好強悲劇人物色彩，想超級型少少都好難，睇《Green Lantern》就知出事。希望發展落去唔會覺得只係睇緊一個曉射箭嘅蝙蝠俠啦。

相信嚟緊兩間label仲有大把劇拍，但最希望反而係《Guardians of the Galaxy》有機會拍劇。套戲未上畫單幾條trailer，已經令佢由Marvel最冇人睇好嗰套變成全部人都超級有興趣睇到底係咩一回事嘅年度焦點電影，如果真係拍得出漫畫入面份荒謬感出嚟（trailer已經拍得好足喇），然後拍埋電視版變成Marvel嘅《星空奇遇記》，肯定爽到震。