3/1/2015 SAT．韓留記Day 25

http://youtu.be/4PACFmxlHm8

聽日正式開場，今日雖然已經叫冇太多體力勞動嘢做，但要做好最後準備要執手尾一定唔會咁早閃得，見一朝早返到公司已經有姐姐問定你「公司請食飯，今日晏晝同夜晚想食乜？」已經知道大鑊，結果十一點至走得，其實預咗架喇，可以俾我準時少少食到飯就算，同都叫俾我玩過套音響。裝修哥哥裝完套喇叭想試咪，就叫我「Play some music！」其實我係超想播Pantera，但怕嚇親在場各位，結果都係播Supper Moment娛娛賓算。

住南大門返公司行三個字路就到，只夠聽幾首歌，基本上每日返工放工都係聽無盡的《無盡》，其實我唔算好鍾意Supper Moment同Sunny唱歌，但呢首一定係繼Kolor《了不起》＆《天地會》之後香港indie界最強single，歌詞帶點美中不足的沙石，反而更能突顯其獨立韻味，而且即使意指不同，在現今香港聽，體會反而更深。