有三種戲，係要去豪華呢種古老戲院睇至夠feel：舊舊哋嘅，鳩鳩哋嘅，同cult cult哋嘅。就即係《衝鋒車》啦。
老實個頭開得幾差，頭三份一交代前事同點樣整警車扮差佬，有點好似為做cult片而cult地視覺剪接乜都夾硬整色整水落去，結果構圖同畫面全部亂到爆，係正式出發開始先收歛返叫睇得舒服。後面唔同線環環相扣劇本寫得幾好，玩漣漪效應前因帶到後果雖然硬係熟口熟面，但導演一開頭已經同戲中角色自嘲明係撞橋啦，而且處理得真係唔錯，班佬又的確是正的，吳鎮宇都係咁喪喪哋、任達華都係咁《紅van》、譚耀文都係咁《縱橫四海》、鄭浩南都係咁《我和殭屍有個約會》、姜浩文都係咁亞視、古巨基都係咁唔識做戲，睇演技都夠滿足。
笑料度得唔太夾硬對白又寫得正，唔覺唔覺爆一兩句講緊戲入面但又好應而家香港景嘅金句出嚟，最重要粗口少得嚟用得自然同精警得多，同好多地方都隱喻緊而家社會問題，好似一開場話曱甴成災令三十萬人上街遊行，大陸人睇只覺得係一個（戇鳩）笑點，但香港人大家都心知肚明代表乜嘢。大家都想做同一樣嘢，《衝鋒車》明顯比上年嘅《紅van》更紅van，只係依然只得無記劇ETV級數嘅CG就拍得住《紅van》咁令人苦笑。不過整體我收貨的，夠過癮，夠完整，夠簡單直接，膚淺睇又得深入思考又得，係一套我會推介嘅港產片。
只可惜，係咪而家英皇有份嘅戲，就一定唔使旨意可以完全本土、可以唔政治正確？好似雪糕妹同賊妹點解要搵大陸人做，同任達華個女一樣搵個陀地MK妹做唔得咩？同最後主角班人明明贏咗，又要講到良心發現去自首投案，立即搞到套戲柒晒，點睇都係佢哋幫差人破完案之後做咗英雄又有大舊錢揸手消遙快活，呢種咁八九十年代《富貴迫人》式嘅完場先至係最似樣嘅結局啦吓嘩？然後字幕睇到最尾仲有一段講有下集的話，會係龍舟打釣魚台，已經唔知係真心定膠。今年一樣令人興奮係多返好多本土題材本土製作嘅港產片，而且都叫好叫座，但睇完《衝鋒車》反而會擔心，就算唔靠合拍片，以後嘅「港產片」只要有親大陸老細或者大陸資金，都可以陰啲陰啲加啲慢慢滲入大陸元素或者手法入去，第時地道港產片可能都會變得唔多地道了。
（本來睇完《衝鋒車》諗住直落豪華睇埋《Fast & Furious 7》，其實我覺得呢個系列幾好睇，算係雲迪素有份而冇咁爛嘅爛片，但放假都有超多嘢要搞，都係等第時明珠台一連七個禮拜六日嘅明珠930連播七集時先追啦）
沒有留言:
張貼留言