熱門文章

2014年1月6日 星期一

連個天都唔抵得我唔去台北睇BabyMetal




真係天意,無端端執嘢,跌返呢張嘢出嚟。上次去台中睇Soilwork撞正拜山節,飛機唔夠位到俾人安置咗去貴賓室等上機再送咗張券換禮物,點知走時唔記得換帶咗返香港。而家摷返出嚟,就代表連個天都同我講,

「喂,你唔記得咗月底BabyMetal去台北同閃靈一齊出show咩?」

呢排真係忙到連搵老細請假都唔記得,今日一返到公司唔夠三個字就俾客急call出去連走三頭,聽日朝早晏晝都要見客開會傾system development,連寫封email俾老細話新年請假都冇時間。襯今晚有機會上網篤篤,三十飛初五返,時間唔係靚嘅機票加地點唔算靚嘅酒店已經要四千幾,睇埋場show我諗今次2014避年之旅埋單應該要六千幾。應該叫平架喇,如果同成班同事同老細爭假成功爭取到放足一月頭成個禮拜的話,分分鐘又會鼠去歐洲又萬幾二萬。

沒有留言:

張貼留言