我沒了智慧

剝智慧齒間診所喺正屋企樓下行一分鐘就到，咁近搞到冇乜危機意識，約咗十一點，十點半先起身，搭十一個半字至施施然躝落樓，醫生見面第一句就係

「唔係啩？早餐都冇食？知唔知點解我俾三日假紙你？因為陣間剝完牙痛到仆街痛足三日，到時屎到冇得你食呀！」

真大鑊。初頭以為要開刀剝牙好大工程，點知打完三枝麻醉針之後整咗一陣，唔夠四個字已經做完，見到醫生中間破開隻牙一左一右兩塊拎出嚟，真係好鬼br00tal。搞完之後醫生先話

「頭先撚化你咋！又唔使食屎咁慘，不過陣間你都唔使旨意食到乜嘢架喇，剝完牙要止血同吞口水，你今日食雪糕當飯啦！」

剝完落樓冇乜嘢，不過唔知麻醉針一過會發生咩事，醫生仲開咗隻話超級勁一食廿四個鐘有效嘅特強止痛藥俾我講到好大單，好鬼淆底，我怕呢兩日真係會痛到仆街。份新工返咗個半月未夠已經每個禮拜請一兩日假，唔係太好喎。