終極版新瓶舊酒（不過還是好酒）：《戰狼300：帝國崛起》

其實對《戰狼300：帝國崛起》冇咩期望，第一集係好睇嘅，不過純粹因為我睇戲最唔鍾意用腦一味打打殺殺就得，而且Zack Snyder太神全藍幕CG油畫式鏡頭加繼《Matrix》之後最造作慢動作打鬥通通破天荒，拍出嚟我覺得精彩過都幾平舖直敘嘅漫畫原版，當年我仲襯Megabox上IMAX巨幕版特登去睇多次添。但始終故事冇乜只叫足夠，打完殺完噴完血，覺得應該圓滿結束，估佢唔到隔咗七年可以拍一套續集出嚟，仲要唔差＆同第一集一樣有興趣入戲院捧多次場添。

其實冇伏因為《帝國崛起》唔係續集而係外傳，兩個故事同步進行，加大量／太多畫外音畫出腸，就算冇睇過第一集都唔會唔知做乜。如果睇過第一集，仲會覺得「唔錯」一大原因係，頂，隔咗七年，拍法導法都係一樣，兩套都係大半套用CG整，都係畫面推爆黃色同藍色加超漫畫化構圖，都係好多假血（今集仲要更假，相信因為要整3D，所以99%血key得好明顯完全唔夾），都係以一敵百死守最後一關，都係由最後一戰演講做旁白帶到尾講晒成個故仔，都要搵首metal做非正式主題曲（上集Nine Inch Nails，今集Black Sabbath），同埋都要講返句"This is Sparta"。

但"This is Sparta"好大分別，上集講呢句最後係感嘆號，今集係感慨的句號，因為主角唔係斯巴達而係雅典，進而格局相同但又似乎好特登去將第一集橋段變成相反另一面拍出嚟，所以睇落有點平行宇宙feel：戰場由斯巴達變雅典，戰地由北變南，戰法由陸戰變海戰，男性主義變女性抬頭。講到好似終極版新瓶舊酒，事實的確明眼人都睇得出相當保守，完全係想複製一套《300》出嚟就算，可能因為今集Zack Snyder唔做導演退居監製，佢先《300》再《Watchmen》已經成為最有個人風格同最擅長將漫畫改編成電影導演（雖然都係翻拍同改編先掂，自己創作套《Sucker Punch》．．．），今集交俾人導，個新導演擺到明要學到足同一套，但又驚拍得唔夠Zack Snyder好就將所有嘢拍到更浮誇，慢動作更慢、變速變得更誇張、造作鏡頭更多更造作，不過過咗火仲影響埋故事速度，好似講神王、妖女同雅典王背景，有好多部份可以精簡唔使拖到而家咁長都算，直頭旁白講故事講足三個字會唔會過份得滯呀？講主角出身，直接剪到佢百步穿楊已經夠交代身份同神勇，唔使學上集見係主角就俾佢一個打十個，搞一大輪大龍鳳仲要啲慢鏡慢過doom metal，頭半個鐘其實好失敗，我都冇諗過一心入場為睇打戲睇斬到成街血，睇主角出場嗰幕可以睇到「屌，打夠未呀？」

好在之後越後越精彩控制得好，一來海戰上集未試過而且拍得出大場面，二來船戰點樣拍咁多慢動作呀咪踏實返唔浮誇順眼得多囉，但想搵返上集種霸氣可能會失望，今集主角外型完全及唔上Gerard Butler，而且雅典軍唔係斯巴達人欠缺戰士氣質，仲要海上打喎，換來係一份鬥謀略嘅比試步步為營，而唔係一味衝一味殺咁爽。打鬥風格都唔同咗，當主角冇一身肌肉，咪唔玩力量玩招式囉，明顯放咗好多心機去設計花巧招式，最後主角上船打成班Immortal再打妖女打成段拍得好型，只係妖女雙劍發揮太少喇，但應該冇乜人會投訴，始終重點唔係最後互斬，而係開戰之前兩個人互扑嘛，知唔知點解波斯同雅典到頭來都係要打仗？原來因為條友中出即飛。

或者本身冇乜期望同打戲好睇就夠，而家成套戲除咗個頭開得衰同導演造場面功力唔夠Zack Snyder之外，比我預期要好好多，個妖女演得實在太強，同埋口桀口桀口桀～反而有樣嘢想講。睇完好難明，咁激都只係2B級？其實要拍呢種史詩戰爭電影香港人唔係拍唔到，《赤壁》已經相當接近仲要全實景拍唔靠CG，不過如果《赤壁》用同一個拍法，即係一刀斬落去真係會斷頭斷手斷腳有血標出嚟，全套戲有幾幕女人除衫同一句半句粗口，仲要扑嘢扑到打功夫噉款，唔使我講你都知，呢套港產片一定唔會2B只可以三級上畫。就算你同老細講「拍到咁盛大場面咁激烈，外國會鍾意，一定賣到埠！」老細只會屌你「三級喎！香港大陸點賣呀？」然後再剪過，跟住一部戰場史詩變成純粹賣動作場面完全唔暴力唔寫實，就好似一句粗口都聽唔到嘅黑幫片一樣咁戇居。所以點解香港電影而家同以後都唔會出得到頭呢。

講深度就一定冇架喇，你要史詩得嚟點樣有意思睇返《賓墟》算啦，明珠台今晚就重播喇，而我呢挺膚淺市井之徒，就打算睇多一次仲要豪IMAX 3D版，為咗個妖女已經值得再睇啦！（呀．．．你知道唔係嗰種意思．．．）（between，嚟緊另一套Frank Miller漫畫改編電影《Sin City 2》都有佢份，即係又冇得唔入場啦）