祝願我對絕版Denon C360長命百歲

對耳筒無端端右邊冇聲，知唔知我幾驚，呢對Denon C360已經變成絕版架喇大佬，可能大家都收到風停咗產所以街貨已經俾人掃晒，壞咗拎去整亦只會直接換對上一級賣接近五舊水嘅C452俾你，搞到我有啲後悔上次上雅蘭Denon寫字樓知道斷貨之後冇立即過對面馬路星際城市有幾多掃幾多，除咗$280買返嚟有得自動升級變相每對平二百蚊，仲有C360隻聲真係唔知邊度搵得返。

C452大隻好多，output勁聲底厚低音出，問題係我聽metal鍾意高音推盡，中音普通水平低音推高少少就可以，一來突出旋律、二來音牆平均、三來太偏中低音好易朦同拆，而300-400價位耳筒嚟講，C360樂器定位同音色就最接近我要求。好可惜唔知點解耳筒廠硬係鍾意鬥低音，試咗兩個月仍然未聽得慣C452全部樂器拆到好散再將鼓聲推到好出種音響效果，更大問題係而家十對耳筒九對都鍾意呢種重低音嘅排位方式。

好在最後試到原來對耳筒冇事，只係條延長線壞咗，即係用咗十幾年耳筒，壞延長線我都係第一次遇到。噉就好喇，之前買落好多對次次都只係用耳筒，後備延長線我應該成櫃桶都係，不過呢對最後的C360壞埋就真係冇架喇，希望佢長命百歲啦，呢對都冇埋就唔知仲邊度搵得到合晒我合尺嘅metal耳筒。

（不過可能C360搞到停產正因用料太劣，以前一對起碼用一年／一過保養先壞醒到爆，近兩年都係用一對三四個月就打柴，我呢對新年開始用，應該都差唔多時候，似乎可以摷返八月就過期張保養單擺落袋跟身，隨時準備過雅蘭換多對C452架喇．．．）