的確好多唔明，唔係 sci 嗰邊，係 fi 嗰邊：《Interstellar 星際啟示錄》

作為一個細個勁刨衛斯理大個狂煲美漫嘅sci-fi迷，睇完《Interstellar》對入面所講嘅冇乜邊樣唔明，都幾自豪。噉唔明嗰幾樣係咩呢？

（拿，有劇透架！）


首先梗係唔明點解一套噉嘅戲都要塞個奸角入去啦，個角色有點為出而出相當無謂，搵到神秘嘉賓做唔代表大晒。

點解最後半個鐘戲路可以同前面差咁遠？其實原因幾明顯，因為劇本擺明收唔到科唯有夾硬嚟，想做《2001太空漫遊》又做唔到，立即搞到套戲格調cliche晒。正因咁cliche，相信我唔係唯一一個人睇咗半套唔夠，已經估到晒最後會點發展。

又當中最唔明梗係個老豆點樣將人類歷史上最重要嘅資料傳俾個女？個女唔係由一開始就睇老豆講乜，咁Ｑ大抽data冇可能一陣記晒可能要望住幾日，而且眨個眼已經記少個字啦，邊可能做得到？

宣傳重點之一是準確科學，入面堆星球卻相當古怪。雖然我理科肥晒佬咁滯，對黑洞都有點概念，以我皮毛知識，一個星球冇乜可能咁穩定地停留喺個黑洞側邊，而且戲入面自己都講到黑洞係乜都吸晒入去光都走唔甩啦，個星球仲要得自己一個冇太陽，點解降落到去成個星球咁光？另一個啲雲結咗冰，但點解成個北極咁大嘅雲會浮喺天空，而唔係俾地心吸力扯落地？我明白型是很緊要，但重力呢回事，唔係一直都係套戲嘅科學重心咩？

當然臨尾解謎部份又係唔明白。睇到最後你會發現原來人類無論進化到咩地步，內裡都永遠係條仆街，未來明明先進到接近神，隨便出手已經可以救返全個地球亦即自己老豆老母阿爺阿婆，點解硬係要陰啲陰啲噉救，好似放個蟲洞出嚟要地球人自己用幾十年時間整架太空船出嚟再用幾年時間飛過去，如果整唔到咪仆街？同點解唔可以放近啲要放到土星咁遠？過到去另一邊最後搵唔到個星球住人類咪冚家剷？話因為唔可以改變過去，而只能夠創造未來喎，但佢哋整一個悖論出嚟令重要資料傳返去之前，咪係改變緊歷史囉？同冇改變到過去，又點會有未來的佢哋，咪即係自相矛盾？而且話晒主角都係地球救世主吖，你班未來撚用完即棄你搞掂啦嘛就掟佢返出太空自生自滅，咁仆街都有嘅，唔係主角打救世人，邊度會有你班未來撚？

話時話，除咗音樂電影，我好少會關心套戲配樂同音響製作，但《Interstellar》一定要講講，啲mixing超唔掂，90%時間啲配樂大聲到遮晒對白，好鬼煩，都唔知整音響班人做乜春。

當然仲有其他Christopher Nolan電影典型通病，例如對白好平庸，同角色發展好弱（演得最有戲味反而係隻機械人，你話係咪唔吹脹），但《Interstellar》仍是一套好戲，入場前諗住有機會瞓著，點知會係連身邊班港女都睇到好肉緊，同菲林拍感覺果然與別不同別有味道。《Gravity》早一年上，真符碌。

而睇完《Interstellar》，又要重溫一吓我最愛美漫作家Warren Ellis名作《Planetary》，一部必入我最愛漫畫頭三名之經典。個故事其實有點似《Interstellar》，都係由篡改阿波羅登月歷史開始，不過《Planetary》係登月太空船穿過蟲洞去到另一個時空，同平行宇宙星球合作成為邪惡版Fantastic Four返到地球密謀統治世界，似《X-Files》，更似《Fringe》，似乜都冇所謂，總之超好睇。