每週一相片大行動 2014 Week 6：唔該唔該唔該唔該唔該唔該唔該咖哩豬扒飯唔該

跟緊個客新年喺大角咀開咗新場，我就梗係開心啦，呢頭多嘢食又好食又唔算貴嘛，而家去咗其他區返工，嘢食少咗好多選擇之餘話咁易四十蚊先食到一餐，所以呢幾個星期可以重臨舊地，每日放lunch寧舍愉快。

雖然舊區舊樓都慢慢變成一幢幢豪宅，暫時都仲有唔少平靚正嘢食，好似發現到有間日式咖哩飯，賣晒廣告話「講一句唔該平五蚊」，立即入去坐低「唔該唔該唔該唔該唔該唔該唔該咖哩豬扒飯唔該」，食到飽仲有得加多杯凍華田，食完唔使俾錢仲找咗幾蚊俾我當利是傍身添。