返工避年，都避唔開蝗災

轉咗新工，今年冇得再去歐洲嘆返兩個禮拜順便避年喇。理論上都有得避嘅，就係新年前一後一加兩日假，去台北匿返半個禮拜，仲有BabyMetal X 閃靈同我過年初二，點知夜晚臨瞓訂晒機票酒店，朝早搭緊車老細就打嚟話個客可能要遲開張撞正我上機嗰日開檔，台北BabyMetal避年團當堂收皮啦，仲新年三日都可以開足工落場睇實個客檔嘢，變成開住工避年。不過有工開好過冇工開啦，取消機票酒店條數啱啱好一千，逗多三日人工再逗埋利是正好填返，順便儲埋銀根過完年去揾牙醫睇睇年三十佢哋收晒爐先嚟痛隻大牙．．．即係賺埋賺埋都係財散人安樂冇得落袋。

初時老細話新舖開張冇得走要留喺香港睇到實，我反應係「嘩！使唔使呀？」新年流流邊有咁多大陸團嚟香港呀，佢哋同我一樣咁不孝最鍾意避年咩？點知反而真係新年先多大陸人落嚟，一日可以有幾十個團，而趕頭趕命開檔仲要服侍咁多旅行團，第一個禮拜分分鐘大把事出。到而家都唔明，點解可以有咁多大陸人嚟香港呢，真係好好玩咩？問問先知原來而家上面好旬，聽講有上海團嚟香港，五日四夜$700全包，我當一半時間係迫你買嘢啦，你企硬唔買嘢吹咩另外一半仲係抵到仆街，大佬我哋自己香港人喺香港照樣玩五日四夜，七舊水都唔知得唔得啦。所以香港邊有可能唔淪陷呀。

（而最灰係，而家我都算靠自由行大陸團搵食，唉）